Eya go dikagare

Eya go menyu wa bobedi

Dihlatse tša Jehofa

Sepedi

Boporofeta ke Eng?

Boporofeta ke Eng?

Karabo ya Beibele

Boporofeta ke molaetša wo o buduletšwego ke Modimo, ke taba yeo e utolotšwego ke yena. Beibele e re baporofeta “ba boletše se se tšwago go Modimo ge ba be ba šušumetšwa ke moya o mokgethwa.” (2 Petro 1:20, 21) Ka gona moporofeta ke motho yo a amogelago molaetša go Modimo ke moka a o botša ba bangwe.Ditiro 3:18.

Ke bjang baporofeta ba bego ba hwetša melaetša e tšwago go Modimo?

Modimo o ile a diriša mekgwa e latelago e mmalwa go fetišetša dikgopolo tša gagwe go baporofeta ba gagwe:

  • Ka go ngwala. Modimo o ile a diriša mokgwa wo gatee ka go nea Moshe ka go lebanya Melao e Lesome yeo e bego e šetše e ngwadilwe.Ekisodo 31:18.

  • O ile a boledišana le bangwadi ba Beibele a diriša barongwa. Ka mohlala, Modimo o ile a diriša morongwa go nea Moshe molaetša wo a bego a swanetše go o botša Farao wa Egipita. (Ekisodo 3:2-4, 10) Ge go be go le bohlokwa gore ba ngwale mantšu a itšego ka go lebanya, Modimo o ile a laela barongwa gore ba bolele molaetša wa gagwe, go etša nakong ya ge a be a botša Moshe gore: “Ingwalele mantšu a gobane ke dira kgwerano le wena gotee le Isiraele ka go dumelelana le ona.”Ekisodo 34:27. *

  • Dipono. Ka dinako tše dingwe baporofeta ba be ba bona dipono ge ba phafogile gomme ba kgona go kwa selo se sengwe le se sengwe. (Jesaya 1:1; Habakuku 1:1) Tše dingwe e be e le tša kgonthe kudu moo motho yo a bego a bona pono le yena a bego a kgona go tšea karolo ponong yeo. (Luka 9:28-36; Kutollo 1:10-17) Ka dinako tše dingwe, ba bangwe ba be ba bona dipono ge go be go bonagala okare ba idibetše. (Ditiro 10:10, 11; 22:17-21) Le gona ka dinako tše dingwe Modimo o be a nea baporofeta ba gagwe melaetša ka ditoro ge ba be ba robetše.Daniele 7:1; Ditiro 16:9, 10.

  • O ile a ba hlahla gore ba kgone go bolela dikgopolo tša gagwe. Modimo o ile a hlahla dikgopolo tša baporofeta ba gagwe gore ba kgone go fetiša molaetša wa gagwe. Se se a kwagala ka gobane Beibele e re: “Lengwalo ka moka le buduletšwe ke Modimo.” Polelwana e rego “buduletšwe ke Modimo” e ka fetolelwa gape ka gore “hueditšwe ke Modimo.” (2 Timotheo 3:16; Beibele ya Taba ye Botse) Modimo o dirišitše moya wa gagwe o mokgethwa, goba matla a gagwe, go “budulela” dikgopolo tša gagwe menaganong ya bahlanka ba gagwe. Molaetša e be e le wa Modimo, eupša baporofeta ba ile ba ikgethela mantšu a go o fetiša.2 Samuele 23:1, 2.

Na ka mehla boporofeta bo akaretša go bolela e sa le pele ka dilo tšeo di tlago go direga nakong e tlago?

Aowa, boporofeta bja Beibele ga bo bolele feela ka dilo tšeo di tlago go direga nakong e tlago. Lega go le bjalo, melaetša e mentši ya Modimo e bolela ka dilo tšeo di tlago go direga nakong e tlago, le ge e sa di bolele ka go lebanya. Ka mohlala, baporofeta ba Modimo ba ile ba lemoša gantši Baisiraele ba bogologolo ka ditsela tša bona tše mpe. Ditemošo tšeo di be di hlalosa ditšhegofatšo tšeo ba bego ba tlo di hwetša ge ba be ba ka kwa, le masetlapelo ao a bego a tlo ba wela ge ba be ba ka se kwe. (Jeremia 25:4-6) Ditlamorago di be di ithekgile ka seo Baisiraele ba bego ba tla kgetha go se dira.Doiteronomio 30:19, 20.

Mehlala ya diporofeto tša ka Beibeleng tšeo di sa bolelego selo ka dilo tša nakong e tlago

  • Lebakeng le lengwe ge Baisiraele ba be ba kgopela Modimo gore a ba thuše, o ile a romela moporofeta go yo ba botša gore Modimo ga se a ba thuša ka ge ba ganne go kwa ditaelo tša gagwe.Baahlodi 6:6-10.

  • Ge Jesu a be a bolela le mosadi wa Mosamaria, o ile a utollela mosadi yoo dilo tšeo a bego a ka di tseba ge feela Modimo a mo utolletše tšona. Mosadi yoo o ile a kgona go tseba gore Jesu ke moporofeta le ge a be a se a bolela selo ka dilo tšeo di tlago go direga nakong e tlago.Johane 4:17-19.

  • Ge Jesu a be a sekišwa, manaba a gagwe a ile a mo khupetša sefahlego, a mo otla ke moka a re: “Porofeta! Ke mang yo a go otlilego?” Batho bao ba be ba sa nyake gore Jesu a bolele seo se tlago go direga nakong e tlago, eupša ba be ba nyaka gore a diriše matla a Modimo go bolela gore o otlilwe ke mang.Luka 22:63, 64.

^ par. 7 Gaešita le ge mathomong mohlaleng wo go ka bonagala eka Modimo o boletše le Moshe ka go lebanya, Beibele e bontšha gore Modimo o ile a diriša barongwa go fetiša kgwerano ya Molao wa Moshe.Ditiro 7:53; Bagalatia 3:19.

Ithute ka mo go Oketšegilego

BEIBELE—E NA LE MOLAETŠA OFE?

Modimo o Diriša Baporofeta ba Gagwe go Bolela

Baporofeta ba Modimo ba ile ba bolela melaetša efe? Ela hloko ditaba tše nne tšeo ba ilego ba bolela ka tšona.