Karabo ya Beibele

Ke mang a swanetšego go ruta bana ka thobalano? Beibele e nea batswadi boikarabelo bjo, le gona batswadi ba bantši ba ile ba holwa ke ditšhišinyo tše di latelago:

  • O se ke wa lewa ke dihlong. Beibele e bolela ka bolokologi ka thobalano le ditho tša pelego, le gona Modimo o boditše setšhaba sa Isiraele gore “bana” ba swanetše go rutwa ka ditaba tše bjalo. (Doiteronomio 31:12; Lefitiko 15:2, 16-19) O ka diriša mantšu a hlomphago ao a sa dirego gore thobalano goba ditho tša pelego e be dilo tšeo di lešago dihlong.

  • Ba rute ganyenyane-ganyenyane. Go e na le gore o botše ngwana wa gago dilo tše dintši ka nako e tee mabapi le thobalano ge a tsena mahlalagading, mmotše dilo ganyenyane-ganyenyane ka mokgwa woo a tlago go di kwešiša.—1 Bakorinthe 13:11.

  • Ba rute boitshwaro. Dikolo di ka ruta bana dilo tše itšego ka thobalano. Lega go le bjalo, Beibele e kgothaletša batswadi gore ba se ke ba fo ruta bana ba bona ka ditho tša pelego eupša ba ba rute le ka pono le boitshwaro bjo bo nepagetšego ka thobalano.—Diema 5:1-23.

  •  O se ke wa arabela ka go tšeega maikwelong goba go kitimela go ahlola ge e ba ngwana wa gago a go botšiša dipotšišo ka thobalano. Go e na le moo, ‘akgofela go kwa gomme o diege go bolela.’—Jakobo 1:19.

Kamoo o ka šireletšago ngwana wa gago go batho bao ba gobošago ba bangwe ka thobalano

Ruta ngwana wa gago go itwela ge e ba a ka gahlana le motho yo a tlaišago ba bangwe ka thobalano

  • Ithute. Ithute kamoo motho yo a tlwaetšego go goboša ba bangwe a šomago ka gona.—Diema 18:15; bona kgaolo 32 ya puku ya Dipotšišo tša Bafsa le Dikarabo tše Šomago, Bolumo 1.

  • Tseba seo se diregago bophelong bja ngwana wa gago. O se ke wa fo mo tlogela le motho yo a itšego o sa tsebe ge e ba motho yoo o a botega, le gona o se ke wa dumelela ngwana wa gago a ‘ipuša.’—Diema 29:15.

  • Ruta bana ba gago gore ba se ke ba fo kwa motho yo mongwe le yo mongwe. Bana ba swanetše go ithuta go kwa batswadi ba bona. (Bakolose 3:20) Lega go le bjalo, ge e ba o ruta ngwana wa gago gore ka mehla o swanetše go kwa motho yo mongwe le yo mongwe yo mogolo, o dira gore a gobošwe gabonolo. Batswadi ba Bakriste ba ka botša bana ba bona gore: “Ge e ba motho yo mongwe a go botša gore o dire selo seo Modimo a rego se fošagetše, o se ke wa se dira.”—Ditiro 5:29.

  • Itlwaetšeng megato e bonolo ya go itšhireletša. Ruta ngwana wa gago seo a swanetšego go se dira ge e ba motho yo mongwe a nyaka go mo tlaiša ge wena o se gona. Go ekiša ka boripana seo ngwana wa lena a ka se dirago ge a hlaselwa go ka mo nea sebete sa go kgona gore: “Ntlogele! Ke ilo go tlaleya!” ke moka a tšhabe kapejana. O swanetše go “dula” o gopotša bana ba gago ka taba ye, ka ge ba ka lebala gabonolo.—Doiteronomio 6:7, Contemporary English Version.