Eya go dikagare

Eya go menyu wa bobedi

Dihlatse tša Jehofa

Sepedi

APRIL 7, 2014
UZBEKISTAN

Na Boemo bja DihIatse tša Jehofa bo a Kaonefala Kua Uzbekistan?

Na Boemo bja DihIatse tša Jehofa bo a Kaonefala Kua Uzbekistan?

Dihlatse tša Jehofa kua Uzbekistan di holofela gore balaodi ba mmušo wa Uzbekistan ba tla di dumelela go dira mediro ya bodumedi bja tšona ntle le go thibelwa. Igor Yurchenko, e lego moemedi wa Dihlatse tša Jehofa tša lefelong leo e bile e le setho seo se dulago se le gona dikopanong tša 2013 tšeo di bego di swarwa le bahlankedi ba mmušo ba Uzbekistan o re: “Re lemogile gore maemo a a kaonefala dipoledišanong tša rena le bahlankedi ba mmušo e bile go bonagala ba ikemišeditše go dira diphetogo tše di kgahlišago. Re holofela gore kgauswinyane dikopano tše di tla tšweletša dipoelo tše dibotse.”

Abdubannob Akhmedov

E le go bontšha gore ba ikemišeditše go tliša diphetogo, balaodi ba mmušo wa Uzbekistan ba lokolotše Abdubannob Akhmedov kgolegong ka March 2, 2013 ka morago ga gore a fetše mengwaga e fetago e mene le seripa ya mengwaga e tshelelago yeo a bego a e ahloletšwe kgolegong. E be e le yo mongwe wa Dihlatse tše tharo tšeo di golegilwego ka baka la mediro ya tšona ya bodumedi. Dihlatse tše dingwe di lokolotšwe pejana ka 2012. Ga bjale ga go na Dihlatse tšeo di golegilwego kua Uzbekistan.

Dikgwedi ka morago ga gore Mna. Akhmedov a lokollwe, balaodi ba ba be ba ikemišeditše go dira diphetogo tše dikgolo tša go hlompha ditokelo tša batho. Ka July 5, 2013, mmušo wa Uzbekistan o tsebišitše UN Human Rights Council Working Group on the Universal Periodic Review ka maikemišetšo a wona a go diriša ditšhišinyo tšeo di dirilwego tša go lemoga tokelo ya motho ya go ba le tokologo ya bodumedi le ya batho ba dihlopha ka moka ntle le go kgethollwa.

Maiteko a go Ngwadiša Diphuthego tše Difsa

Ga bjale go na le phuthego e tee yeo e ngwadišitšwego ka molao ya Dihlatse tša Jehofa kua Uzbekistan, gomme e toropong ya Chirchik, seleteng sa Tashkent. Lega go le bjalo, bontši bja Dihlatse tša Jehofa di dula dikarolong tše dingwe tša naga. Ka ge Dihlatse di be di sa kgone go ngwadiša diphuthego tše difsa ga e sa le go tloga ka 1996, di kopanela borapeding ntle le go šireletšwa ke molao gomme se se dira gore di be kotsing ya go hwetša kotlo. Mna. Yurchenko o okeditše ka gore: “Re holofela gore poledišano yeo ga bjale e tšwelago pele gabotse le balaodi ba mmušo e tla dira gore go be le diphetogo tše di ka feleletšago ka go ngwadišwa ga diphuthego tša Dihlatse tša Jehofa ka molao nageng ka moka ya Uzbekistan.”

Dihlatse tša Jehofa di lebeletše pele gore di dire mediro ya tšona ya bodumedi ka khutšo kua Uzbekistan e bile di holofela gore kgauswinyane di tla ngwadiša diphuthego tše difsa.