Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

FEBRUARY 13, 2015
UKRAINE

Go Tswalelwa ga Meago ya Bodumedi Ukraine

Go Tswalelwa ga Meago ya Bodumedi Ukraine

Ka January 2015, dihlopha tša banna bao ba itlhamilego ka dithunya di ile tša tswalela Diholo tša Mmušo (mafelo a borapedi) tša Dihlatse tša Jehofa tše 14 tša Ukraine. Diholo tšeo di tswaletšwego di seleteng sa Donetsk le sa Luhansk e lego dikarolo tša ka bohlabela bja naga mo ntwa e šoro e bilego gona ka dikgwedi tše dintši. Banna ba bao ba bego ba itlhamile ka dithunya ba hlasetše Dihlatse tša Jehofa ka ge ba kgetholla le go se hlomphe tokelo ya tokologo ya bodumedi ya tšona.

Ka mengwaga e fetago e 20, Dihlatse tša Jehofa Ukraine di be di thabela tokologo ya bodumedi. Vasyl Kobel, Hlatse ya Jehofa yeo e lego ofising ya lekala la Lviv o boletše gore: “Re be re bokana ka mehla mafelong a rena a borapedi re ithuta Beibele le go rapela e bile re leka ka thata go thuša batho ba seleteng seo re dulago go sona. Dikgweding tše fetilego, maphelo a badudi ba Ukraine a kgomilwe o šoro ke tlhakahlakano yeo e lego ka bohlabela bja naga ye. Dihlatse tša Jehofa le tšona di kgomilwe ke tlhakahlakano ye.” Mna. Kobel o boletše se legatong la Dihlatse tša Jehofa tše 150 000 tšeo di dulago Ukraine.

Dihlatse tše dintši di tšhabile lefelong leo la ntwa dikgweding tše fetilego. Eupša Dihlatse tše ka bago 17 500 tšeo di šetšego Donetsk le Luhansk di leka ka thata go tšwela pele ka mediro ya tšona ya letšatši le letšatši go sa šetšwe tlhakahlakano yeo e lego gona. Ka ge Diholo tša tšona tša Mmušo di tswaletšwe, Dihlatse tše dikete ga di na mo di bokanago gona bakeng sa borapedi ka gona di gapeletšega go bokana magaeng a tšona ao a pitlaganego. Dihlatse tše dingwe di swanela ke go sepela diiri tše nne go ya le go boa dipokanong tša bodumedi.

Go Tswalelwa ga Diholo tša Mmušo ka Baka la Lehloyo la Bodumedi

Diholo tša Mmušo di ile tša tswalelwa ka ge sehlopha se se be se hloile Dihlatse. Moetapele wa sehlopha se sengwe o ile a bolela gore o ikemišeditše go “fediša Dihlatse tša Jehofa ka moka” ka gobane go ya ka yena, Kereke ya Orthodox ke yona feela e dumeletšwego seleteng seo. Moetapele o mongwe o boletše gore: “Go fedile ka Dihlatse tša Jehofa.” Go sa šetšwe ditšhošetšo tše, Dihlatse tša Jehofa di ikemišeditše go tšwela pele di le mafolofolo dikarolong ka moka Ukraine.

Le ge go se na Hlatse ya Jehofa yeo e gobetšego tlhakahlakanong ye, Dihlatse ga se tša šireletšega e bile ga se tša dumelelwa go bokana le badumedigotee le tšona. Nakong e nngwe ge go be go swerwe seboka sa bodumedi, banna bao ba itlhamilego ka dithunya ba ile ba tšhoša bao ba bego ba le sebokeng seo ge ba be ba šwahlela Holong ya Mmušo toropong ya Horlivka yeo e lego seleteng sa Donetsk. Holong e nngwe ya Mmušo, Dihlatse di ile tša makala ge di hwetša dinotlelo di fetošitšwe gomme lefelo leo le dirišwa e le meago ya mašole.

Seo se Dirwago go Rarolla Bothata

Mna. Kobel o boletše gore: “Ofisi ya lekala ya Lviv e tsebišitše mafapha a fapafapanego a mmušo le bahlankedi ba bangwe ka go tswalelwa mo go sego molaong ga mafelo ao a borapedi. Se se ile sa dira gore Mmušo o tsebe gore seo se diregago meagong ye goba seo dihlopha tše di se dirago go yona se ka godimo ga matla a Dihlatse.” Go oketša moo, ofisi ya lekala e ile ya laela banna bao ba hlokometšego diphuthego tša Dihlatse tša Jehofa tša seleteng sa Donetsk le sa Luhansk go dira sohle seo ba ka se kgonago go šireletša Dihlatse. Banna ba ba ile ba botšwa gore maphelo a batho a bohlokwa go feta meago le gore ga se ba swanela go dira selo le ge e le sefe seo se ka beago maphelo a Dihlatse kotsing.

Ka tlase ga tlhakahlakano ye, ga go seo Dihlatse tša Jehofa di ka se dirago ka molao gore di hwetše Diholo tša tšona tša Mmušo. Lega go le bjalo, go sa šetšwe mathata ao a tlišitšwego ke go tswalelwa ga Diholo tša Mmušo, Dihlatse di ikemišeditše go tšwela pele ka mediro ya tšona ya bodumedi. Di letetše nako yeo di tlago go boela tša bokana mmogo le barapedigotee le tšona Diholong tša tšona tša Mmušo tšeo di šireletšegilego.