Eya go dikagare

Eya go menyu wa bobedi

Dihlatse tša Jehofa

Sepedi

SEPTEMBER 22, 2014
TURKMENISTAN

Mma wa Kua Turkmenistan o Lokolotšwe Kgolegong

Mma wa Kua Turkmenistan o Lokolotšwe Kgolegong

Bibi Rahmanova le lapa la gagwe

Bibi Rahmanova o tšwile kgolegong bošegong bja September 2, 2014 ka 8:00. Le ge a lokolotšwe, molato wa gagwe ga se wa phumolwa. Pejana lona letšatšing leo, baahlodi ba Kgorotsheko ya Selete ya Dashoguz ba ile ba amogela boipiletšo bja gagwe. Le ge ba se ba phumola ditatofatšo tša maaka kgahlanong le Bibi, ba ile ba fetoša kotlo ya gagwe ya mengwaga e mene kgolegong gomme ba e dira kotlo yeo e laolwago ke maemo a itšego * ke moka ba laela gore a lokollwe kgolegong. Phetho ye e bontšhitše gore baahlodi ba etše hloko maemo a itšego a bjalo ka gore Bibi ke mosadi le mmago ngwana wa mengwaga e mene le gore ga se a ka a dira bosenyi nakong e fetilego.

Bibi o ile a dira boipiletšo bja cassation Kgorongkgolo ya Tsheko ka morago ga ditatofatšo tša maaka tša August 18 tšeo go thwego o tlaišitše lephodisa le go hlola mpherefere. Maphodisa a ile a emiša Bibi le monna wa gagwe Vepa ka July 5 seteišeneng sa diterene sa Dashoguz, ge ba se na go tšea merwalo ya bona yeo e bego e ena le dipuku le dipukwana tša bodumedi. Ditatofatšo kgahlanong le Vepa ka morago di ile tša phumolwa. Lega go le bjalo, Bibi o ile a swarwa ka August 8. Ge a be a le kgolegong, Bibi o ile a tlaišwa o šoro.

Turkmenistan e Ntšheditšwe Mahlo ka Baka la go Hloka Toka

Ramolao wa Bibi yoo a dulago nageng e nngwe o bolela gore go lokollwa ga Bibi ka pejana go thušitšwe ke go lla ga lefase mabapi le go golegwa ga gagwe ka go hloka toka.

Taba ya gagwe ga se selo se sefsa go Dihlatse tša Jehofa kua Turkmenistan. Gantši Dihlatse di lebeletšana le go gatakelwa o šoro ga ditokelo tša tšona tša motheo. Dihlatse tša Jehofa tše seswai di golegilwe ka ge di kgomarela tumelo ya tšona, tše tshela tša tšona di golegilwe ka ge di gana go dira mediro ya bošole ka baka letswalo mola tše pedi di golegilwe ka baka la ditatofatšo tša maaka. Di phela ka tlase ga maemo a go se kgahliše le go swarwa gampe.

Go a kgahliša gore baahlodi ba Kgorokgolo ya Tsheko ya Dashoguz ba ile ba kaonefatša boemo bja Bibi, le ge ba paletšwe ke go lokiša go hloka toka. Batho bao ba hlomphago sereti sa batho ba holofela gore balaodi ba mmušo wa Turkmenistan ba tla bona dilo ka leihlo le lengwe le go diriša melao ya lefase ka bophara ya ditokelo tša batho ya go dumelela tokologo ya bodumedi nageng ya bona.

^ ser. 2 Kgorotsheko ya selete e ile ya fega kotlo ya gagwe ya mengwaga e mene gomme ya mo nea kotlo ya mengwaga e mene yeo e laolwago ke maemo a itšego yeo e akaretšago gore a se ke a dira molato le ge ele ofe mengwageng e meraro e latelago le go fela a ipega maphodiseng. Nakong ye ka moka, Bibi o swanetše go itshwara gabotse, a se ke a huduga motseng wo a dulago go wona goba nageng ya gabo ntle le go hwetša tumelelo ya ba mmušo.