Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

AUGUST 27, 2014
TURKMENISTAN

Mmago Ngwana wa Mengwaga e Mene o Swerwe ka go Hloka Toka Kua Turkmenistan

Mmago Ngwana wa Mengwaga e Mene o Swerwe ka go Hloka Toka Kua Turkmenistan

Kgorong ya Tsheko yeo e bego e swerwe phapošing ya motšwa-o-swere kua Dashoguz, Turkmenistan, Moahlodi Gagysyz Orazmuradov ka go hloka toka o ile a ahlolela Bibi Rahmanova wa mengwaga e 33 kgolegong ka tlase ga ditatofatšo tša maaka. Ka August 18, Bibi e lego mmago ngwana wa mengwaga e mene, o ile a bonwa molato wo go thwego o hlasetše lephodisa le go hlola mpherefere. * Moahlodi o ile a mo nea kotlo e matla ya go golegwa mengwaga e mene.

Ba Swerwe Seteišeneng sa Terene

Taba ye ya Bibi e thomile mantšiboeng a July 5, 2014, ge yena le monna wa gagwe e lego Vepa Tuvakov le morwa wa bona ba fihla seteišeneng sa terene sa Dashoguz go yo tšea dipuku le dipukwana tša bona tša bodumedi le dilo tše dingwe tša bona tšeo di bego di etšwa go mogwera wa bona wa kua Ashgabad. Nakwana ka morago ga ge lapa la ga Tuvakov le se na go tšea merwalo ya lona, banna ba tshela ba maphodisa bao ba bego ba sa apara diaparo tša mošomo ba ile ba ba tšea ba nyaka go bona seo se bego se le ka mekotleng ya bona. Maphodisa a a ile a hwetša laptop le dipuku le dipukwana tša bodumedi tša Dihlatse tša Jehofa ka mekotleng yeo, ke moka a ile a roga banyalani ba a ba tšhošetša ka gore morwa wa bona e tla ba tšhiwana.

Bibi o ile a thoma go gatiša tiragalo ye founong ya gagwe ke moka a e fihla diaparong tša gagwe tšeo a bego a di apere ge maphodisa a be a leka go mo tšeela yona. Maphodisa a a ile a mo goga ka meriri, a mo raga le go mmetha a ba a mo goga ka matsogo. Ge ba sa dutše ba le moo, lephodisa le lengwe le ile la emiša diaparo tša gagwe la swara Bibi ka tsela yeo e sego ya maleba le nyaka go mo tšeela founo. Bibi o ile a leka go itšhireletša ge a hlaselwa eupša ga se a ka a gana go swarwa goba go hlasela maphodisa a.

Bibi le Vepa ba na le morwa wa bona

Maphodisa a ile a iša ba ga Tuvakov seteišeneng sa maphodisa. Maphodisa a ile a nyaka gore Vepa a saene setatamente seo se bego se šetše se ngwadilwe. O ile a gana. Maphodisa a ile a mmetha ka makga a mmalwa ge Bibi le morwa wa bona ba le ka phapošing e nngwe. Vepa o be a dutše a gana go saena. Bibi le yena o ile a gana go saena setatamente seo se bego se šetše se ngwadilwe gomme le yena o ile a bethwa. Maphodisa a ile a golega Bibi le morwa wa gagwe bošego ka moka a ba lokolla letšatšing le le latelago. * Ka morago ga gore Bibi a bule molato wa go ipelaetša go maphodisa a Turkmenistan, Vepa o ile a lokollwa matšatšing a sego kae ka July 11. A sa tšhošwe ke selo, maphodisa a Dashoguz City a ile a thoma ka go dira dinyakišišo tša bosenyi kgahlanong le Bibi le monna wa gagwe.

Go Lahlelwa Kgolegong, go Golegwa ka Nakwana le Tsheko

Ka August 6, Bibi o ile a bonwa molato, a golegwa ka nakwana ka August 8 gomme ka August 18 tsheko ya molato wa gagwe e ile ya thoma. Nakong ya tsheko, Moahlodi Orazmuradov o ile a bontšha go tšea lehlakore. Moahlodi yo o be a tsena ramolao wa Bibi ganong ge a be a leka go bolelela Bibi. Ge maphodisa a be a nea bohlatse bja go se swane, moahlodi o ile a thibela ramolao wa Bibi go a hlaba ka dipotšišo. Moahlodi o ile a ba a thibela Vepa ge a be a nea bohlatse bja kamoo maphodisa a swerego Bibi gampe ka gona le go gana go diriša bohlatse bjo bo gatišitšwego tiragalong yeo. Moahlodi o ile a bona Bibi molato a ba a mo nea kotlo ya mengwaga e mene kgolegong.

Bibi o tla swanelwa ke go dira boipiletšo pele ga August 28, ka gona go ba go fihla ka nako yeo o tla golegwa kgolegong ya DZD-7. Ge e ba boipiletšo bja gagwe bo ka ganwa, o tla išwa kgolegong yeo e lego leganateng la Seydi. A ka se amogwe tokologo ya gagwe feela eupša o tla amogwa le sebaka sa go godiša ngwana wa gagwe.

Le ge Vepa a se a tšwa a bonwa molato, go na le kgonagalo e kgolo ya gore a bonwe molato, a sekišetšwe ditatofatšo tša maaka le go lahlelwa kgolegong mo go se nago toka. Ge e ba se se ka direga morwa wa bona a ka se amogwe feela mmagwe eupša o tla amogwa le tatagwe. Ga go na mabaka a kwagalago a ditiro tše tša go hloka toka.

Di Llela Toka

Turkmenistan ke kgale e swara Dihlatse tša Jehofa gampe le go di gana ka ditokelo tša motheo tša batho. Lefaseng ka bophara Dihlatse tša Jehofa gotee le batho ba bangwe ba bantši bao ba hlomphago sereti sa motho le tokelo ya bolokologi bja borapedi ba lebeletše gore mmušo wa Turkmenistan o lokiše diphošo tša wona.

^ ser. 2 Kotlo ya molato wa go hlola mpherefere le go se theetše ba molao ke mengwaga e mehlano kgolegong.

^ ser. 6 Morwa wa bona o ile a newa yo mongwe wa leloko mesong ya July 6; gomme Bibi yena o ile a lokollwa ka moragonyana lona letšatšing leo.