Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

NOVEMBER 13, 2014
TURKMENISTAN

Turkmenistan e Lokolla Dihlatse tša Jehofa Tšeo di Bego di Golegilwe ka Baka la Tumelo ya Tšona

Turkmenistan e Lokolla Dihlatse tša Jehofa Tšeo di Bego di Golegilwe ka Baka la Tumelo ya Tšona

Ka tsela yeo e bego e sa letelwa, Mopresidente Gurbanguly Berdimuhamedov o ile a lokolla Dihlatse tša Jehofa tše seswai tšeo di bego di golegilwe kua Turkmenistan ka baka la tumelo ya tšona. Di be di le gare ga bagolegwa ba bangwe bao ba lokolotšwego ka October 22, 2014. Dihlatse tše tshelelago tšeo di bego di golegilwe ka ge di ganne go tsenela mediro ya bošole ka baka la letswalo gomme tše pedi di be di golegilwe ka baka la ditatofatšo tša maaka tša mediro ya bodumedi.

Merdan Amanov le Pavel Paymov

Senepeng sa ka godimo (Go tloga ka go le letshadi go ya ka go le letona): Aibek Salayev, Matkarim Aminov le Bahram Shamuradov

Masogana a magareng ga mengwaga e 18 le 23 ao a bego a gana go tsenela mediro ya bošole ka baka ka letswalo a be a golegilwe kua Seydi Labor Colony, yeo e lego leganateng la Turkmen. Merdan Amanov, Pavel Paymov, Suhrab Rahmanberdyyev le Amirlan Tolkachev ba be ba le kampeng yeo go golegilwego batho bao ba ahloletšwego mengwaga ya ka tlase ga e meraro (general regime camp). Matkarim Aminov le Dovran Matyakubov (yo a sego gona mo senepeng) ba be ba le kampeng yeo go bego go golegilwe batho bao ba dirilego melato e megolo le e kotsi ka ge ba bonwe molato gape e le bao go thwego ke disenyi tšeo di sa itsholego. Ge ba le kgolegong, masogana a a ile a kgotlelela go tlaišwa le go phela ka tlase ga maemo ao a sa kgahlišego.

Dihlatse tše pedi tšeo di bego di golegilwe ka baka la ditatofatšo tša maaka e lego Aibek Salayev wa mengwaga e 35 le Bahram Shamuradov wa mengwaga e 42, le bona ba be ba golegilwe kampeng kua Seydi. Bobedi bja bona bo be bo ahloletšwe mengwaga e mene kgolegong ka baka la ditumelo le mediro ya bona ya bodumedi. Godimo ga go hloka toka ka ge ba ile ba golegwa ka baka la bohlatse bja maaka ba ile ba tlaišwa le go swarwa gampe ge ba be ba sa letetše go sekišwa.

Amirlan Tolkachev le Suhrab Rahmanberdyyev

Ke Hlatse e tee feela, Ruslan Narkuliev, ye e sa lego kgolegong kua Turkmenistan. O ile a golegwa ka baka la go gana go tsenela mediro ya bošole dibeke tše mmalwa pele ba bangwe ba lokollwa kgolegong, gomme leina la gagwe le ka ba le be le sa tsenywa lenaneong la bao ba lokolotšwego leo le bitšwago Presidential Administration ge go tsebišwa go lokollwa ga ba bangwe. Baemedi ba gagwe ba molao ba šoma mmogo le balaodi ba mmušo wa Turkmen go kgonthišetša gore o a lokollwa.

Mopresidente Berdimuhamedov o ile a tšea kgato e botse ge a be a phetha ka go lokolla banna ba seswai ba tumelo. Bao ba hlomphago tokologo ya bodumedi ba holofela gore se se tla tliša phetogo kua Turkmenistan, phetogo yeo e tla dumelelago Dihlatse tša Jehofa go dula ka khutšo le ka matswalo ao a lokologilego di sa boife go tlaišwa le go golegwa.