Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

MARCH 11 2013
TURKEY

UN e re Mmušo wa Turkey o Swanetše go Hlompha Matswalo a Badudi ba Wona

UN e re Mmušo wa Turkey o Swanetše go Hlompha Matswalo a Badudi ba Wona

Bakriste ba dimilione ba gana go tsenela tša bohlabani ka baka la letswalo—gomme dinaga tše dintši di hlompha phetho yeo. Komiti ya Ditokelo tša Batho ya UN e dirile phetho ya gore badudi ba Turkey ba swanetše go ba le tokologo yeo.

Phethong yeo UN e e dirilego ka March 29, 2012, Komiti e ile ya dira kahlolo yeo e emago le badudi ba babedi ba kua Turkey e lego Cenk Atasoy le Arda Sarkut. Banna bao ba babedi ke Dihlatse tša Jehofa tšeo di gannego go tsenela tirelo ya tša bohlabani ka lebaka la bodumedi bja tšona.

Ka makga a mantši, Mna. Atasoy le Mna. Sarkut ba be ba dutše ba romela mangwalo diofising tša mmušo ba kgopela go hlalosa phetho ya bona yeo e theilwego letswalong, gomme ba ile ba kgopela go dira ditirelo tše dingwe tša setšhaba tšeo di sa tswalanego le tša bohlabani. Lega go le bjalo, banna bao ba ile ba gapeletšwa ka go se kgaotše go tsenela tša bohlabani. Ka morago ga gore kgoro ya tša bohlabani e tšhošetše yunibesithi yeo e bego e thwetše Mna. Sarkut yoo e bego e le mothuši wa mofahloši ka gore e tla bula molato wa bosenyi kgahlanong le yona, o ile a lahlegelwa ke mošomo wa gagwe.

Komiti ye ge e dira phetho e ile ya bolela gore ditokelo tša go gana go tsenela tirelo ya bohlabani ka baka la letswalo “ke karolo ya tokelo ya go bolela seo motho a se naganago, tokelo ya go dira dilo go ya ka letswalo le ya bodumedi,” yeo e hlaloswago go Article 18 ya Kgwerano ya Ditšhabatšhaba ya Ditokelo tša Selegae le tša Bopolitiki. Go oketša moo, Komiti e phethile ka gore tokelo ye e “dumelela motho yo mongwe le yo mongwe gore a se tsenele tirelo ya tša bohlabani ge e ba seo se sa dumelelwe ke kereke goba ditumelo tša gagwe.

Phetho ye e tla gateetee ka morago ga diphetho tše pedi tšeo di swanago tšeo di dirilwego ke Kgoro ya Yuropa ya Ditokelo tša Batho. Go e nngwe ya diphetho tšeo, Kgoro e phethile ka gore “go gana ga mmušo wa Turkey go dumelela motho go dira mediro e mengwe ge e ba a sa nyake go tsenela tša bohlabani go thulana la tokelo ya go gana ka baka la letswalo” yeo e tšwelelago ka go Tumelelano ya Yuropa ya Ditokelo tša Batho.

Go gana go tsenela tša bohlabani ka baka letswalo ke selo sa kgale go swana le Bokriste. E. W. Barnes, ka pukung ya gagwe ya The Rise of Christianity, o ngwadile gore: “Go hlahloba lefsa boitsebišo ka botlalo bjo bo lego gona go [bontšha] gore go ba go fihla nakong ya Marcus Aurelius [mmušiši wa Moroma go tloga ka 161 go fihla ka 180 C.E.], go be go se Mokriste yo e bego e le lešole; e bile go be go se motho yo a bago lešole ka morago ga go ba Mokriste.