Eya go dikagare

Eya go menyu wa bobedi

Dihlatse tša Jehofa

Sepedi

OCTOBER 14, 2016
RUSSIA

Kgoro ya Tsheko ya Kua Russia ga e Amogele Boipiletšo bja Dihlatse tša Jehofa bjo bo Thulanago le Temošo ya Moahlodi

Kgoro ya Tsheko ya Kua Russia ga e Amogele Boipiletšo bja Dihlatse tša Jehofa bjo bo Thulanago le Temošo ya Moahlodi

Ka di-12 tša October 2016, Kgoro ya Tsheko ya Selete ya Tverskoy kua Moscow e ile ya thibela go ipiletša ga Dihlatse mo go bego go thulana le temošo yeo Ramolao yo Mogolo a ilego a e nea Ofisi ya Lekala ya Dihlatse yeo e lego kgauswi le St. Petersburg. Temošo yeo e bego e se na bohlatse, yeo e neilwego ka di-2 tša March 2016, e be e sa bee Ofisi ya Lekala molato ka go lebanya, eupša e be e bea mekgatlo e mengwe ya bodumedi bja Dihlatse tša Jehofa molato wa gore e dira mediro e kotsi. Ka ge Ofisi ya Lekala e le yona e laolago modiro wa Dihlatse tša Jehofa nageng ya Russia, ke yona e swanetšego go ikarabela ka ditiro tšeo ka moka. Taba ye ya gore Dihlatse di dira mediro e kotsi, ge e le gabotse e bile gona ka baka la mabarebare le bohlatse bja maaka bjo bo hlamilwego ke balaodi ba mmušo ba tikologong yeo. Moahlodi o ile a ganetša dihlatse di nea bohlatse kgorong ya tsheko. Le gona o ile a gana di tšweletša dibidio tšeo di bontšhago ka makga a mmalwa batho ba bea dikgatišo tšeo di lebelelwago e le tše kotsi kudu mafelong a borapedi a Dihlatse tša Jehofa.

Dihlatse di tlo dira boipiletšo ka phetho yeo Kgorong ya Tsheko ya Toropong ya Moscow. Ge Dihlatse di ka palelwa ke go fenya molato wo, di tla gapeletšega go latela temošo yeo e neilwego ke Ramolao yo Mogolo gomme seo sa dira gore Dihlatse tša Jehofa tša kua Russia di se sa thabela tokologo ya bodumedi. Ka baka la kahlolo yeo e sego ya toka le bohlatse bjo bo hlamilwego bja maaka bja gore Dihlatse tša Jehofa di dira mediro e kotsi kudu, Ramolao yo Mogolo a ka tšwela pele ka leano la gagwe la go thibela mediro ya Dihlatse ka gore a tswalelele sa ruri Ofisi ya Lekala ya Dihlatse kua Russia.