Eya go dikagare

Eya go menyu wa bobedi

Dihlatse tša Jehofa

Sepedi

MARCH 8, 2017
RUSSIA

Na Modiro wa Dihlatse tša Jehofa o Kgauswi le go Thibelwa Kua Russia?

Na Modiro wa Dihlatse tša Jehofa o Kgauswi le go Thibelwa Kua Russia?

Ka di-21 tša February 2017, Lefapha la Toka la Russia le ile la nea Ofisi e Kgolo ya Dihlatse tša Jehofa kua Russia taelo e mpsha. Ga bjale lefapha leo le nyaka gore Ofisi e Kgolo e le tlišetše ditaba ka botlalo mabapi le diphuthego tše 2 277 tša Dihlatse tša Jehofa tšeo di lego Russia.

Lefapha la Toka le ile la ntšha taelo yeo ge Ramolao yo Mogolo a sa ntšhitše taelo ya gore Ofisi e Kgolo ya Dihlatse tša Jehofa e hlahlobje. Ge batho bao ba rometšwego ke Lefapha la Toka ba dutše ba dira dinyakišišo tša bona, ba ile ba hlahloba feela mekgatlo ya semmušo yeo e dirišwago ke Dihlatse tša Jehofa. Mekgatlo ye e akaretša Ofisi e Kgolo ya Dihlatse tša Jehofa gotee le Mekgatlo ya tšona ya Bodumedi yeo diphuthego di e dirišetšago go ngwadiša meago ya tšona. Ka morago ga gore Lefapha la Toka le phethe modiro wa lona wa go hlahloba Ofisi e Kgolo ka di-27 tša February 2017, le ile la bolela gore dilo tšeo di dirwago lefelong leo ga di molaong e bile go dirwa mediro e kotsi kudu moo.

Dihlatse tša Jehofa lefaseng ka moka di tshwenyegile kudu ka badumedigotee le tšona ba Russia. Taelong ya bobedi yeo e ilego ya ntšhwa, Lefapha la Toka le hlasela diphuthego tša Dihlatse tša Jehofa. Ka baka la dilo tšeo di dirwago ke mmušo, Dihlatse tša Jehofa di lemogile gore Ramolao yo Mogolo ga a nyake feela go fediša mekgatlo ya tšona ka moka ya semmušo eupša o nyaka go thibela mediro ka moka ya Dihlatse tša Jehofa kua Russia.