Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

MARCH 3, 2014
RUSSIA

Kgoro ya Tsheko ya Boipiletšo ya Russia e Thekga Ditshwanelo tša Batho ka go Gana go Thibela JW.ORG

Kgoro ya Tsheko ya Boipiletšo ya Russia e Thekga Ditshwanelo tša Batho ka go Gana go Thibela JW.ORG

Ka January 22, 2014, baahlodi ba bararo ba Kgoro ya Tsheko ya Selete ya Tver ba ile ba fetoša phetho ya kgoro ya tsheko e nyenyane ya go thibela jw.org, e lego Wepesaete ya semmušo ya Dihlatse tša Jehofa. * Ka go fapana le diphetho tše dingwe tšeo di dirilwego ke dikgoro tša tsheko tša Russia mengwageng e sego kae e fetilego, Kgoro ya Tsheko ya Selete e ile ya diriša molao wa go fišegela bodumedi ka mo go fošagetšego gomme ya gana maiteko a matla a motšhotšhisi a go thibela Wepesaete ye.

Go tshwenywa le go tlaišwa ga Dihlatse tša Jehofa kua Russia moo go bego go thekgwa ke Mmušo go ile gwa mpefala ge ka August 7, 2013 kgoro ya tsheko e nyenyane ya Tver (yeo e lego mo e ka bago dikhilomithara tše [160]) ka leboabodikela bja Moscow e dira phetho ya go thibela jw.org molatong woo o tšerego metsotso e 25 feela. Baemedi ba Dihlatse tša Jehofa ga se ba tsebišwa ka molato wo e bile ga se ba ka ba newa sebaka sa go ikemela ditatofatšong tšeo di dirilwego ke motšhotšhisi wa lefelong leo, ka gona ba ile ba tliša taba ya bona kgorong ya tsheko. Dihlatse tša Jehofa di tsebile ka molato wo wa go thibela Wepesaete ye methopong e mengwe ya ditaba diiri tše sego kae feela pele ga nako yeo e beilwego ya gore di ipiletše e fela ka September 12, 2013. Gateetee di ile tša tsenya boipiletšo bja tšona Kgorong ya Tsheko ya Selete ya Tver.

Boipiletšong bjoo bo dirilwego ka January 22, 2014, Kgoro ya Tsheko ya Selete e ile ya lemoga gore ditokelo tša beng ba Wepesaete ye, e lego Watchtower Bible and Tract Society of New York, Inc., di ile tša gatakelwa gomme ya laela gore molato wo o ahlaahlwe lefsa gore go kwewe mahlakore ka moka. A thekgwa ke baemedi ba Kgoro ya Toka le Kgoro ya Ditaba tša Selegae, motšhotšhisi o ile a kgopela kgoro ya tsheko gore e bolele gore Wepesaete ye e bontšha go fišegela bodumedi ka mo go fošagetšego le gore e swanetše go thibelwa nageng ka moka ya Russia. Se se kgahlišago ke gore Kgoro ya Tsheko ya Selete e ile ya se dumelelane le pono ya motšhotšhisi yoo.

Lesolo la naga ka bophara la go tlaiša le a thoma—molao wa go fišegela bodumedi ka mo go fošagetšego o dirišwa gampe go thibela modiro wa Dihlatse tša Jehofa. Go thoma ka 2009, balaodi ba mmušo ba Russia ba ile ba diriša mantšu a sa kwagalego a Molao wa Naga wa go Fediša Mediro ya Bao ba Fišegelago Bodumedi ka mo go Fošagetšego go oketša go tlaišwa ga Dihlatse tša Jehofa e sego mafelong a itšego feela eupša e be lesolo la naga ka bophara. Balaodi bao ba ile ba diriša gampe molao wa go fišegela bodumedi ka mo go fošagetšego go lokafatša dilo tše di latelago:

  • go bewa ka nakwana ga Dihlatse tša Jehofa tše di fetago tše 1 600 ka diseleng;

  • go thibelwa ga dipuku le dipukwana tše 70 tša bodumedi bja Dihlatse;

  • go phuruphutšwa ga mafelo a 171 ao a akaretšago magae le mafelo a borapedi; le

  • go šitišwa ga ditirelo tše 69 tša bodumedi bja Dihlatse go ba go fihla ga bjale.

Molatong wa Tver, motšhotšhisi o ile a thibela Wepesaete ya jw.org ka gobane e na le dipuku le dipukwana tše tshela tšeo go thwego di bontšha go fišegela bodumedi ka mo go fošagetšego. Kgoro ya Tsheko ya Selete ya Tsentralniy motseng wa Tver, e ile ya diriša molao wa go fišegela bodumedi ka mo go fošagetšego e le motheo wa phetho ya August 7, 2013, e lego phetho yeo e thibelago Wepesaete ya jw.org le go e akaretša Lelokelelong la Dilo ka Moka tša Mekgatlo ya go Fišegela Bodumedi ka mo go Fošagetšego.

Ruri phetho ye e be e sa kwagale ka ge e ile ya palelwa ke go bontšha seo se ka dirwago—ka mohlala, go tlošwa ga dipuku le dipukwana tšeo go thwego di bontšha go fišegela bodumedi ka mo go fošagetšego Wepesaeteng ye. Ge Kgoro ya Tsheko ya Selete e lemoga gore beng ba Wepesaete ye ba šetše ba tlošitše dipuku le dipukwana ka moka tšeo go thwego di bontšha go fišegela bodumedi ka mo go fošagetšego go badudi ba Russia, ga se ya palelwa ke go phetha ka gore ga go na motheo wa molao wa go thibela Wepesaete ye. Ga bjale phetho e fihlile seremong, motšhotšhisi o na le dikgwedi tše tshela tša go dira kgopelo ya go ipelaetša kgorong e kgolo (court of cassation).Lega go le bjalo, kgoro e ka kgetha go theetša goba go se theetše boipiletšo bjo ka ge e sa gapeletšege.

Na phetho ya Kgoro ya Tsheko ya Selete ya Tver e bontšha gore dilo di tla kaonefala?

Go sa na le mo gontši moo go tlago go direga pele ga kimollo. Morero wa Kgoro ya Tsheko ya Selete ya Tver wa go hlahloba lefsa kahlolo ya yona o fapane kudu le megato e feteletšego yeo e tšerwego ke dikgoro tše dingwe tša tsheko tša Russia kgahlanong le Dihlatse tša Jehofa. Ka makga a mmalwa Kgoro ya Yuropa ya Ditshwanelo tša Batho (European Court of Human Rights [ECHR]), e ile ya sola Russia ka go gatakela ditokelo tša Dihlatse go di thibela tokologo ya bodumedi. Go e na le go diriša dikahlolo tša ECHR, Russia e ile ya tšwela pele go gatakela ditokelo tša batho. Dihlatse tša Jehofa ga bjale di na le dikgopelo tše 23 kgahlanong le Russia tšeo di sego tša dirwa ke ECHR e le ge di emela tokologo ya tšona ya borapedi.

Na phetho ya Kgoro ya Tsheko ya Selete ya Tver e bontšha gore dilo di tla kaonefala? Dihlatse tša Jehofa di tla letela go kwa gore Russia e arabela bjang kahlolong ye le dikahlolong tše dingwe tšeo di tlago go dirwa ke ECHR.

^ ser. 2 Go iletšwa ga Wepesaete ye ke kgoro ya tsheko go be go ka se thibele motho go tsena go yona. Go e na le moo, go be go tla dira gore balaodi ba mmušo ba latofatše motho le ge e le ofe yoo a tsenago go yona ka molato wa bosenyi.