Eya go dikagare

Eya go menyu wa bobedi

Dihlatse tša Jehofa

Sepedi

JULY 18, 2017
RUSSIA

Kgoro ya Tsheko e Phagamego ya Russia e Kgonthišetša Kahlolo e Dirilwego ya go Thibela Mediro ya Dihlatse tša Jehofa

Kgoro ya Tsheko e Phagamego ya Russia e Kgonthišetša Kahlolo e Dirilwego ya go Thibela Mediro ya Dihlatse tša Jehofa

Ka di-17 tša July, Kgoro ya Tsheko e Phagamego ya Russia e kgonthišeditše kahlolo yeo e bego e e dirile pejana ya gore mediro ya Dihlatse tša Jehofa e se be molaong nageng ya Russia. E dirile se le ge naga ye e itlamile gore e dumelelana le molao wo o dirišwago dinageng tše dingwe wa go šireletša tokologo ya bodumedi. Phetho ye e ra gore go tloga gona bjale mediro ya bodumedi ya Dihlatse tša Jehofa e thibetšwe nageng ka moka.

Kgoro ya Tsheko e Phagamego ya Boipiletšo ya baahlodi ba bararo e ganne boipiletšo bja Dihlatse tša Jehofa gomme ya se fetoše phetho ya Kgoro ye yeo e dirilwego ke Moahlodi Yuriy Ivanenko ka di-20 tša April. O be a ahlotše ka go dumelelana le phetho ya ba Lefapha la Toka “ya gore Ofisi e Kgolo ya Dihlatse tša Jehofa ya Russia gotee le mekgatlo ya moo ya bodumedi yeo e lego karolo ya mokgatlo wa Dihlatse e tswalelwe le gore meago ka moka ya Dihlatse tša Jehofa e newe Mmušo wa Russia.”

Ditho tša sehlopha sa molao sa Ofising e Kgolo

Phetho ye e bea maphelo a Dihlatse tša Jehofa tša kua Russia tša ka godimo ga tše 175 000 kotsing e kgolo kudu. Philip Brumley, yo e lego Ramolao yo Mogolo wa Dihlatse tša Jehofa o itše: “Dihlatse tša Jehofa lefaseng ka moka di tshwenyegile kudu ka bana babo tšona le dikgaetšedi ba Russia. Phetho ya kgoro ya boipiletšo e dira gore go tlaišwa le go swarwa gampe ga Dihlatse tša Jehofa kua Russia go be molaong e bile go tšwele pele, le gona di ka golegwa ka molato wa gore ke disenyi. Di fetogile batho bašele nageng ya gabo tšona.”

Dihlatse tša Jehofa tša Russia di dirile boipiletšo Kgorong ya Yuropa ya Ditshwanelo tša Batho le Komiting ya Ditšhaba tše Kopanego ya Ditokelo tša Batho. Gona bjale di sa dutše di letile, badumedigotee le tšona lefaseng ka moka ba rapelela gore mmušo wa Russia o nagane lefsa gomme o hlomphe ditokelo tša motheo tša batho, e le gore Dihlatse di “tšwele pele [di] phela bophelo bja khutšo le boiketlo ka boineelo bjo bo feletšego go Modimo,” go etša ge go boletšwe go Timotheo wa Pele 2:2.