Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

NAGORNO-KARABAKH

Di Golegilwe ka Baka la Tumelo ya Tšona

Di Golegilwe ka Baka la Tumelo ya Tšona

Mmušo wa Nagorno-Karabakh o golegile Dihlatse tša Jehofa tšeo di šetšego di le mengwageng ya go tsenela bošole ka ge di gana go dira mediro ya bošole ka baka la letswalo. Mmušo ga o nyake go hlompha tokelo ye ya tšona gomme ga o di nee kgetho ya go dira mediro e mengwe yeo e sego ya bošole. Ka gona, bafsa ba Dihlatse ba golegwa ka baka la go kgomarela ditumelo tša bona tša go gana go lwa le magagabo bona.

Maiteko a go Dira Mediro Yeo e Sego ya Bošole a a Folotša

Ka January 29, 2014, Askeran City Military Commissariat e lego lefapha la taolo ya mašole le ile la ntšha taelo ya gore Artur Avanesyan, e lego Hlatse ya Jehofa a tle go dira mediro ya bošole. Letšatšing le le latelago, Mna. Avanesyan o ile a tliša kgopelo ya gagwe lefapheng le la taolo ya mašole la Nagorno-Karabakh a kgopela go dira mediro e mengwe yeo e sego ya bošole go e na le go dira ya bošole. Gateetee ramolao wa gagwe o ile a kopana le balaodi ba mmušo wa Nagorno-Karabakh le wa Armenia gomme ba ahlaahla taba ya go dumelela Mna. Avanesyan go dira mediro yeo e sego ya bošole kua Armenia.

Ka ge a be a holofetše gore dilo di tla loka, Mna. Avanesyan o ile a hudugela Armenia gomme ka February 13, 2014 o ile a tsenya kgopelo ya go dira mediro yeo e sego ya bošole kua Republic of Armenia Masis Military Commissariat e lego lefapha la taolo ya mašole. Ge a sa letetše gore o tla tšwelela pele ga lekgotla leo le ikarabelago ka mediro e mengwe yeo e sego ya bošole la Armenia, Mr. Avanesyan o ile a laelwa go iponagatša seteišeneng sa maphodisa sa Yerevan ka July 14, 2014. Ge a fihla seteišeneng seo, maphodisa a go tšwa Nagorno-Karabakh a be a mo letetše. O ile a golegwa gomme a išwa Nagorno-Karabakh. Letšatšing le le latelago, o ile a bewa seleng ka nakwana a sa letetše go sekišwa kgorong ya tsheko ya Nagorno-Karabakh.

Nakong yeo, o ile a lemoga gore dikgweding tše nne tše fetilego, kgoro ya tsheko e ile ya ntšha lengwalo la go laela gore a golegwe le taelo ya gore a se sekišwe. Kgoro ya tsheko e ile ya kgonthišetša phetho ye gomme Mna. Avanesyan o ile a golegwa le semeetseng. Kgoro ya tsheko e ile ya gana dikgopelo tša gagwe ka moka tša go ipiletša kgahlanong le go golegwa ka nakwana pele a sekišwa.

Ka September 30, 2014, kgoro e ile ya bona Mr. Avanesyan molato gomme ya mo ahlolela dikgwedi tše 30 kgolegong. Kgoro ya Boipiletšo e ile ya thekga kahlolo ya Kgoro ya Tsheko. Ke moka Mna. Avanesyan o ile a ipiletša Kgorong Kgolo ya Tsheko ya Nagorno-Karabakh, eupša ka December 25, 2014 Kgoro ye le yona e ile ya thekga kahlolo ya pele.

Nagorno-Karabakh e sa dutše e golega masogana ao a latelago matswalo a ona ao a tlwaeditšwego ke Beibele. Ka go dira se e gana ditekanyetšo tša ditšhabatšhaba tšeo di dumelelago bao ba ganago ka baka la letswalo seriti sa go dira mediro e mengwe yeo e sego ya bošole.

Tatelano ya Ditiragalo

  1. December 25, 2014

    Kgoro Kgolo ya Tsheko ya Nagorno-Karabakh e thekga kahlolo ya pele yeo Kgoro e e neilego Artur Avanesyan.

  2. September 30, 2014

    Kgoro ya tsheko ya Martakert, Nagorno-Karabakh e bona Artur Avanesyan molato gomme o ahlolelwa dikgwedi tše 30 kgolegong.

  3. July 14, 2014

    Artur Avanesyan o golegwa kua Armenia gomme o išwa Nagorno-Karabakh le go swarwa ka nakwana pele a ka sekišwa.

  4. December 30, 2011

    Karen Harutyunyan, e lego Hlatse ya mengwaga e 18, o ahlolelwa dikgwedi tše 30 kgolegong ka baka la go gana go dira mediro ya bošole.

  5. February 16, 2005

    Areg Avanesyan, e lego Hlatse ya Jehofa, o golegwa ka baka la go gana go dira mediro ya bošole gomme o ahlolelwa dikgwedi tše 48 kgolegong.

  6. June 12-13, 2001

    Dihlatse tše tharo tšeo di ganago ka baka la letswalo di golegwa dikgwedi tše tshela go iša go ngwaga ka ge di sa dumele go tsenela ditlwaetšo tša bošole.