Eya go dikagare

Eya go menyu wa bobedi

Dihlatse tša Jehofa

Sepedi

NOVEMBER 18, 2013
LEFASE KA BOPHARA

Le se Lebale Bao ba Lego Kgolegong

Le se Lebale Bao ba Lego Kgolegong

“Tokelo ya go ba le tokologo ya go nagana seo o se ratago, ya go gana go dira dilo ge di sa dumelelane le letswalo la gago le tokologo ya bodumedi” ke ditokelo tše dikgolo tša batho, se ke seo se bolelwago ke Article 18 ya Kgwerano ya Ditšhabatšhaba ya Ditokelo tša Selegae le tša Bopolitiki. * Dinageng tše dingwe ge Dihlatse tša Jehofa di re di diriša ditokelo tše di feleletša di le kgolegong le go swarwa gampe. Bontši bja ba bao ba lego kgolegong ke masogana ao a ilego a gana go tsenela bošole ka baka la letswalo. A mangwe a golegilwe feela ka baka la tumelo ya ona.

Go swarwa mo gampe ga go fokodiše potego ya Dihlatse tša Jehofa ge di dutše di dira dilo go ya ka ditumelo tša tšona. Go e na le moo, go swarwa gampe go goboša leina la mebušo yeo e palelwago ke go hlompha ditokelo tša batho. Lelokelelong leo le lego ka mo tlase go na le mebušo yeo e ilego ya golega Dihlatse tša Jehofa le gore ke batho ba bakae bao ba lego kgolegong nageng yeo.

NAGA

BAO BA GOLEGILWEGO

 Eritrea

52

 Korea, Borwa

599

 Nagorno-Karabakh

1

 Singapore

18

 Turkmenistan

9

Palomoka

679

Lelokelelo la bao ba golegilwego go tloga ka November 12, 2013

 ERITREA

Pego ya mafelelo e bontšhitše gore banna le basadi ba Dihlatse tša Jehofa ba 52, ba golegilwe ka tlase ga maemo a sa kgahlišego. Gaešita le ge go se na bao ba ilego ba bonwa molato, ba ile ba golegwa ka ge ba gana go tsenela bošole ka baka la letswalo, go dira mediro ya bodumedi goba ka mabaka a mangwe a sa tsebjego. Banna ba bararo e lego Paulos Eyassu, Isaac Mogos le Negede Teklemariam, ba ile ba golegwa mengwaga e ka bago e 20 ka ge ba gana go tsenela bošole ka baka la letswalo—ga e sa le go tloga ka September 24, 1994. Misghina Gebretinsae le Yohannes Haile, e lego Dihlatse tša Jehofa tše pedi tše di nago le mengwaga e fetago e 60, di ile tša hwela kgolegong. Ga e sa le Eritrea e eba naga yeo e ipušago ka 1993, e ile ya dula e golega, e tlaiša le go swara Dihlatse tša Jehofa gampe.

 KOREA BORWA

Ga bjale, masogana a 599 a ahloletšwego go fetša dikgwedi tše 18 kgolegong ka ge a gana go tsenela bošole ka baka la letswalo. Go tloga nakong ya Ntwa ya Korea go ba go fihla gona bjale, Korea Borwa e ile ya tšwela pele e golega masogana a Dihlatse ao a ganago go tsenela bošole ka baka la letswalo gomme ga se ya ka ya a dumelela go dira mediro e mengwe yeo e sego ya bošole gore e rarolle bothata bjo. Nakong ye ka moka, Korea Borwa e golegile Dihlatse tše 17 549, tšeo di yago go fetša palomoka ya mengwaga e 34 100 di le kgolegong ka ge di gana go tsenela mediro ya bošole. Korea Borwa e ile ya palelwa ke go latela melao ya ditšhabatšhaba gomme e ile ya gana go lemoga ditokelo tša motheo tša go gana go tsenela bošole. Bakeng sa tsebišo e oketšegilego, bona sehlogo se rego: Go Hloka Toka Kua Korea Borwa go Emišitše Lefase ka Maoto.

 NAGORNO-KARABAKH

Lesogana le lengwe la mengwaga e 20 le ile la golegwa ka baka la go gana go tsenela bošole ka ge mmušo wa Nagorno-Karabakh o se na lenaneo la go dira mediro e mengwe yeo e sego ya bošole ge e ba o sa nyake go dira ya bošole. Ka December 30, 2011, le ile la ahlolelwa dikgwedi tše 30 kgolegong gomme ka January 29, 2013, kgopelo ya lona ya gore le newe parola e ile ya ganwa. Ka ge le na le bothata bja tša maphelo, le ile la kgopela go lokollwa gomme balaodi ba kgolego ba ile ba gana.

 SINGAPORE

Mmušo wa Singapore o gapeletša batho go tsenela bošole gomme o gatakela ditokelo tša bao ba ganago go tsenela bošole ka baka la letswalo. Ka ge masogana a Dihlatse tša Jehofa a 18 a sa nyake go dira selo seo se sa dumelelanego le matswalo a ona ao a tlwaeditšwego ka Beibele, yo mongwe le yo mongwe o ahloletšwe dikgwedi tše 39 Dikampeng tša Kgolego tša Mašole. Hlatse e nngwe e ile ya lokollwa ka August 2013 ka morago ga go fetša ngwaga e le kgolegong ka ge e gana go tsenela bošole.

 TURKMENISTAN

Ga bjale go na le masogana a senyane a Dihlatse ao a lego kgolegong kua Turkmenistan—a seswai a golegilwe ka ge a gana go tsenela bošole ka baka la letswalo gomme le lengwe le golegilwe ka ditatofatšo tša maaka. Masogana a a ahloletšwe dikgwedi tše di tlogago go tše 12 go ya go tše 24 kgolegong gomme gantši di bethwa o šoro ke bahlapetši ba kgolego le mašole. Ka morago ga gore a lokollwe, ona masogana ao a ile a golegwa go thwe a bušeleditše melato yeo peleng a e dirilego gomme a beilwe leihlo ke balaodi ba kgolego.

^ ser. 2 Bona gape Boipolelo bja Ditšhabatšhaba bja Ditokelo tša Batho bja Ditšhaba tše di Kopanego, Article 18, le Tumelelano ya Yuropa ya Ditokelo tša Batho, Article 9.