Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

OCTOBER 19, 2016
KOREA BORWA

Kgoro ya Boipiletšo ya Korea Borwa e Hweditše Bao ba Ganago go Tsenela Bošole ka Baka la Letswalo ba se na Molato

Kgoro ya Boipiletšo ya Korea Borwa e Hweditše Bao ba Ganago go Tsenela Bošole ka Baka la Letswalo ba se na Molato

Ka di-18 tša October 2016, kgoro yeo e theetšago melato ya boipiletšo e lego Kgoro ya Tikologo ya Gwangju e ile ya ahlola ka gore Hye-min Kim, Lak-hoon Cho le Hyeong-geun Kim ga ba na molato wa go se tsenele bošole. Banna ba ba bararo, bao ka moka e lego Dihlatse tša Jehofa, ke ba mathomo ba go se bonwe molato tabeng ye kgorong ya boipiletšo kua Korea Borwa.

Moahlodi Young-shik Kim o hlalositše gore: “Kgoro e dumela gore banna ba ba gana go dira mediro ya bošole ka baka la ditumelo tša bona tša bodumedi le letswalo. Tokologo ya bodumedi le ya go gana go dira dilo tše itšego ka baka la letswalo ke ditokelo tša molaotheo, e bile motho a ka se otlwe ka baka la tšona.”

Ge e ba ramolao a sa dumelelane le kahlolo ye gomme a dira boipiletšo, molato wo o tla išwa Kgorong e Phagamego ya Korea Borwa gore o ahlaahlwe moo. Kgorong ye e Phagamego go na le melato ya ka godimo ga e 40 yeo e sa fegilwego ya banna bao ba bonwego molato tabeng ye. Philip Brumley, e lego Ramolao wa Dihlatse tša Jehofa, o itše: “Le ge go fihla gona bjale Kgoro e Phagamego ya Korea Borwa le Kgoro ya Molaotheo di gana go amogela tshwanelo ya motho ya go gana go tsenela bošole ka baka la letswalo, kgoro ya boipiletšo yona e dirišitše molao wo o dirišwago dinageng tše dingwe ka go amogela tshwanelo yeo. Se se kgonthišeditšwe diphethong tša ka godimo ga tše 500 tšeo di dirilwego ke Komiti ya Ditshwanelo tša Batho ya Ditšhaba tše Kopanego.”