Eya go dikagare

Eya go menyu wa bobedi

Dihlatse tša Jehofa

Sepedi

FEBRUARY 5, 2015
ARMENIA

Armenia e Hloma Lenaneo la go Dira Mediro Yeo e Sego ya Bošole

Armenia e Hloma Lenaneo la go Dira Mediro Yeo e Sego ya Bošole

Lenaneo la go dira mediro e mengwe yeo e sego ya bošole le ile la atlega ka morago ga ngwaga le hlomilwe Armenia. Batho ba pele ba go ba karolo ya lenaneo le e bile masogana a Dihlatse tša Jehofa ao a ilego a šoma go aga setšhaba go e na le go golegwa ka ge a gana go tsenela mediro ya bošole ka baka la letswalo.

Go tloga ka 1985 Armenia e be e dutše e golega masogana a Dihlatse ao a bego a gana go tsenela mediro ya bošole ka baka la letswalo. Ka ge go be go se na molao woo o bego o dumelela badudi ba naga ye go dira mediro e mengwe yeo e sego ya bošole, Dihlatse tša Jehofa tše fetago 450 di ile tša golegwa mengwaga e fetago 20, gantši ka tlase ga maemo a sa kgahlišego. Se se ile sa fetoga ka June 2013 ge Armenia e be thoma go diriša molao wo naga ye e ilego ya dumelelana le wona e lego Molao wa go Dira Mediro e Mengwe Yeo e Sego ya Bošole.

Ka October 23, 2013, mokgatlo wa Armenian Republican Committee o ile wa dumela dikgopelo tša go dira mediro e mengwe yeo e sego ya bošole go batho ba 57 bao ba bego ba gana go tsenela bošole, batho ba ka moka e be e le Dihlatse tša Jehofa *. Ka morago mokgatlo wo wa Republican Committee o ile wa romela Dihlatse tše dingwe lenaneong le. Masogana a Dihlatse a 71 a ile a thoma ka mediro ya wona bekeng ya January 13, 2014. Mafelelong a ngwaga wa 2014, Dihlatse tše fetago 126 di be di šetše di thomile go dira mediro e mengwe yeo e sego ya bošole.

Go Atlega ga Lenaneo

Go atlega ga lenaneo le go bonagala ka seo se boletšwego ke balaodi, bahlokomedi le bašomi gotee, bao ba ilego ba lemoga mekgwa e mebotse ya go šoma, go ikemišetša go thuša le boitshwaro bjo botse bja masogana a a Dihlatse. Ditho tše mmalwa tša mokgatlo wa Republican Committee di ile tša dumela gore Dihlatse di dira modiro o mobotse mmušong wa Armenia le gore di šoma ka thata go dira mediro yeo di e neilwego.

  • Mohlokomedi wa Ditirelo tša Setšhaba wa Yerevan/Shengavit o boletše gore: “Lena masogana le direla naga ye modiro o mobotse go sa šetšwe mogolo o monyenyane wo le o hwetšago. Le tloga le le bašomi ba kgonthe.”

  • Mooki yo mongwe legaeng la ditšhiwana mo Dihlatse di abetšwego go šoma gona o itše: “Ruri go a kgahliša! Le leka ka thata go phela ka melao ya Beibele mola le leka go hola setšhaba.”

  • Molaodi wa Ditirelo tša Setšhaba wa Yerevan/Arabkir o boletše gore: “Ge e ba go sa na le batho ba go swana le lena, okare ba ka tla ba ntšhomela!”

Dihlatse tšeo di dirago mediro yeo e sego ya bošole di hlwekiša le go lokiša serapa toropong ya Yerevan, ka ntle ga Republic Square.

Dihlatse tšeo di bego di šoma medirong ye le tšona di ile tša reta lenaneo le kudu.

  • Gevorg Taziyan, yo a bego a šoma e le Mothuši wa Mootledi Lefapheng la Tlhakodišo o boletše gore: “Ke kgahlwa kudu ke lerato le hlompho ya bašomi gotee le nna. Nakong e nngwe ke ile ka se ye mošomong ka ge ke be ke babja, gomme bašomi gotee le nna ba ile ba nteletša mogala go mpotšiša matsogo. Lenaneo le e tloga e le tšhegofatšo go nna, ka ge se se dira gore ke hlankele Modimo ntle le mathata.”

  • Samvel Abrahamyan, yo a abetšwego go šoma go hlokomela serapa Sepetleleng sa Malwetši a Monagano o itše: “Mošomong, re šomišana gabotse le balaodi le bašomi ba mo. Ka ge ba tshwenyega ka rena, le rena re tshwenyega ka bona. Go na le dinako tšeo re bego re fiwa mešomo yeo e sego ya rena, eupša re be re dira mešomo ye ntle le bothata.”

  • Artsrun Khachatryan, yo a abetšwego go šoma Lefapheng la Tlhakodišo go hlokomela serapa o boletše gore: “Re thomile go šoma Lefapheng la Tlhakodišo ka January 14, 2014 re le ba 13. Go tloga mathomong go fihla lehono, re thabela go šoma gabotse le batho ka moka. Ga go na go se kwane magareng ga rena le balaodi ba lefapha. Ba tloga ba kgahlwa ke tsela yeo re šomišanago ka yona.”

Seo se ilego sa dira gore lenaneo le atlege di sa tloga fase ke tirišano e botse yeo balaodi le bahlokomedi ba bilego le yona gaešita le boitshwaro bjo bobotse bja Dihlatse. Dihlatse tša Jehofa tša Armenia di leboga sebaka sa go hlankela naga ya tšona ntle le go dira selo seo se lego kgahlanong le ditumelo tša tšona tša bodumedi goba go golegwa ka ge di gana go tsenela bošole ka baka la letswalo.