Mesong ya di-30 tša October 2016, kua bogareng bja Italy go ile gwa ba le tšhišinyego e kgolo kudu ya lefase yeo e ilego ya lekanywa gomme gwa hwetšwa e le ya bogolo bja 6,6, e lego tšhišinyego e kgolo kudu yeo e kilego ya wela Italy ga e sa le go tloga ka 1980. Le ge bonyenyane go gobetše batho ba 20, dipego tša ka morago ga tšhišinyego yeo di boletše gore ga go na batho bao ba hlokofetšego.

Tšhišinyego ye ya lefase yeo e sentšego kudu kgauswi le toropo ya Norcia, e diragetše ka morago ga ge tikologong yeo go bile le ditšhišinyego tše pedi tša lefase matšatši a sego kae pejana ga moo. Bošegong bja di-26 tša October 2016, go ile gwa ba le tšhišinyego ya bogolo bja 5,5 gomme ka morago ga diiri tše pedi gwa latela ya bogolo bja 6,1.

Ditšhišinyego tše tša lefase di diragetše kgauswi le moo go bilego le tšhišinyego ka di-24 tša August, e lego tšhišinyego yeo e bolailego batho ba e ka bago ba 300.

Ofisi ya lekala ya Dihlatse tša Jehofa kua Italy e begile gore ga go na Dihlatse tšeo di hlokofetšego goba tšeo di gobetšego kudu, eupša malapa a mabedi a ile a loba dintlo ditšhišinyegong tša ka di-26 tša October, gomme dintlo tša Dihlatse tše dintši tša senyega. Bagolo ba tikologong yeo ba ikgokagantše le Dihlatse tša moo go kwa gore di hloka eng le go kwa ditaba tšeo di sa tšwago go direga, kudukudu ka ge batho ba bantši ba sa leka go kopantšha bophelo ka morago ga tšhišinyego yeo e diragetšego ka August. Go no swana le batho ba bangwe bao ba wetšwego ke kotsi ye, Dihlatse tše dintši ga di kgodišege gore dintlo tša tšona di šireletšegile, ka baka leo di robala ka dikoloing, mafelong a go hloma ditente goba Diholong tša Mmušo, e lego mafelo ao Dihlatse di a dirišetšago mediro ya borapedi.

Sehlopha se Bušago sa Dihlatse tša Jehofa se etelela pele modiro wa tlhakodišo se le ntlongkgolo ya rena, se diriša meneelo yeo e ntšhitšwego go thekga modiro wa Dihlatse wo o dirwago lefaseng ka moka. Go na le Dihlatse tša ka godimo ga tše 251 000 kua Italy.

Ba Ditaba:

Bakeng sa Dinaga tše Dingwe: David A. Semonian, Ofisi ya Ditaba tša Setšhaba, 1-718-560-5000

Italy: Christian Di Blasio, 39-06-872941