Eya go dikagare

Eya go menyu wa bobedi

Dihlatse tša Jehofa

Sepedi

AUGUST 5, 2013
UNITED STATES

Dihlatse di Thoma go Aga Ntlokgolo e Mpsha ya Lefase ka Bophara Kua Warwick, New York

Dihlatse di Thoma go Aga Ntlokgolo e Mpsha ya Lefase ka Bophara Kua Warwick, New York

NEW YORK—Dihlatse tša Jehofa di thomile go aga ntlokgolo ya tšona e mpsha ya lefase ka bophara kua Warwick, New York, ka Mošupologo, July 29, 2013, ka morago ga go hwetša tumelelo ya mmušo.

Ka Laboraro la July 17, Town of Warwick Planning Board e ile ya dumelelana le tsela yeo Dihlatse di tlago go diriša setsha sa tšona se sefsa moo go tlogo agwa ntlokgolo ya tšona e mpsha ya lefase ka bophara, bjale go be go šetše tumelelo ya mafelelo ya gore di thome go aga. Tumelelano ye e tlile ka morago ga mengwaga e mene ya gore Dihlatse di hwetše setsha seo sa kua Warwick ka July 17, 2009. Ka morago ga go hwetša tumelelo ya go aga meago ya mathomo ka Labohlano la July 26, Dihlatse di ile tša thoma go šoma le go epa faonteišene ka Mošupologo wa July 29.

Ka ge Dihlatse di nyaka go aga meago yeo e sa senyego tikologo, se ke sona selo sa bohlokwa seo se dirilego gore lekgotla le la tša kago le di nee tumelelo. Ka mohlala, maiteko a tšona a go šireletša tikologo a tla akaretša go ala selo seo se tla thušago gore mmu o se gogolege seo gape se šireletšago tlhago, go swana le dinoga gore di be kgole le lefelo la go aga.

Richard Devine, yo e lego mmoleledi wa Dihlatse o re: “Re thabela go šoma le bahlankedi ba mmušo ba toropong ya Warwick le go tšwela pele le modiro woo. Tumelelo ye e bile karolo e kgolo ya go hudušetšwa ga ntlokgolo ya rena ya lefase ka bophara go tšwa Brooklyn go ya Warwick.” Enrique Ford, yoo yena le Mna. Devine ba lego komiting ya tša kago ya Dihlatse, o oketša ka gore: “Go hwetša ditumelelo ka July e bile selo se bohlokwa seo re se fihleletšego gore re kgone go fetša modiro woo ka mengwaga e mene.”

Lefelo le e be e le la International Nickel Company gomme le be le dirišetšwa dilo tše sa swanego, go akaretša le diofisi tše dikgolo tša khamphani yeo e bile e le lefelo la yona la go dira dinyakišišo, e le dirišitše go tloga ka 1960 go ya go 1987. Ka morago ga gore le dule le sa dirišwe ka mengwaga e mene, le ile la rekwa ke King’s College ka maikemišetšo a go le fetoša lefelo la bodulo bja barutwana. Lefelo leo ga se la ka la phetha morero wa lona, gomme la dula le sa dirišwe ka mengwaga e fetago e 20 go ba go fihlela ge Dihlatse di le reka ka 2009.

Ba Ditaba:

Bakeng sa Ditšhabatšhaba: J. R. Brown, Ofisi ya Ditaba tša Boditšhaba, mogala +1 718 560 5000