Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

July 6, 2015
UKRAINE

Dihlatse tša Jehofa di Swara Seboka se se Kgethegilego Nageng ya Ukraine Moo go Tsogilego Ntwa

Dihlatse tša Jehofa di Swara Seboka se se Kgethegilego Nageng ya Ukraine Moo go Tsogilego Ntwa

LVIV, Ukraine—Ka February 14, 2015, Dihlatse tša Jehofa nageng ya Ukraine di ile tša swara seboka se se kgethegilego seo se bego se hlametšwe go kgothatša Dihlatse tše fetago 17 000 tšeo di dulago seleteng seo go tsogilego ntwa ka bohlabela bja Ukraine. Lenaneo le leo le tšerego diiri tše pedi le be le kgokagantšwe ka bidio go tloga ofising ya lekala ya Dihlatse tša Jehofa ya Lviv go ya ka bohlabela bja Ukraine gotee le dikarolong tše dingwe nageng ye. Seboka se se fihlile ka nako ka ge go ile gwa thunywa motse wo o lego ka lebopong la Mariupol ka rocket ka January 24, 2015, moo e ilego ya senya magae a mararo a Dihlatse le difolete tša tšona tše 58. Hlatse e nngwe e ile ya gobala o šoro mola e nngwe ya mengwaga e 16 e ile ya hlokofala tiragalong yeo.

Dihlatse di bokane Holong ya Mmušo ya Makiyivka bakeng sa go tlo theetša lenaneo leo le kgokagantšwego ka bidio go tšwa lekaleng la Ukraine karolong yeo go tsogilego ntwa.

Ofisi ya lekala ya Ukraine e dirišana le ofisi ya lekala ya Russia, e ile ya gatiša lenaneo la seboka se gomme la bontšhwa Dihlatse tša Belarus le tša Russia ka go kgokaganywa ka bidio. Ka baka leo, Dihlatse tše dingwe tša Belarus le Russia tše 186 258 di ile tša bogela lenaneo le go tlaleletša go tše 150 841 tša Ukraine, ke moka se sa dira gore palomoka ya bao ba bogetšego lenaneo le e fihle go 337 099.

Gustav Berki, e lego mmoleledi wa Dihlatse tša Jehofa nageng ya Ukraine, o hlalosa gore: “Go kwa kamoo go ilego gwa dirwa maiteko a tlhakodišo nageng ya Ukraine, go ile gwa kgothatša bao ba kgomilwego ke ntwa. E bile mo go kgothatšago kudu go kwa kamoo komiti ya tlhakodišo ya Rostov-on-Don, Russia, e ilego ya hlokomela bana babo rena bao ba tšhabetšego nageng yeo.”

Mmoleledi wa Dihlatse tša Jehofa nageng ya Russia, e lego Yaroslav Sivulskiy, o boletše gore: “Dihlatse tša Jehofa lefaseng ka bophara di tsebja kudu ka go ba le khutšo le go se tšee lehlakore dipolotiking. Seboka se se ile sa ba le polelo yeo e bego e bontšha seo Beibele e se bolelago ka go se tšee lehlakore dipolotiking. Polelo ye e ile ya hlalosa lebaka leo ka lona go sa šetšwe gore re Marussia, Maukraine goba badudi ba naga le ge e le efe, re sa tšeego karolo dintweng.”

Dihlatse tša Jehofa tše pedi toropong ya Horlivka, Donetsk di phologile ka morago ga gore legae la tšona le thuntšhwe ka rocket di le ka gare.

Go ba go fihla ga bjale, ofisi ya lekala ya Ukraine e ile ya hloma Dikomiti tša Tlhakodišo tše 14 bakeng sa go hlokomela bao ba kgomilwego ke ntwa. Dikomiti tše di ile tša nea Dihlatsegotee le bao e sego Dihlatse ditone tše fetago tše 149 tša dijo le tše 21 tša diaparo. Dikomiti tše di ile tša rulaganya mafelo a bodulo a bahlaselwa ba fetago 7 600 le go lokiša goba go aga magae a mantši ao a bego a senyegile gotee le Diholo tša Mmušo (mafelo a borapedi a Dihlatse). Ka mohlala matšatši a mabedi ka morago ga tlhaselo, Komiti ya Tlhakodišo e ile ya kgona go rulaganya baithaopi ba 160, gore ba thome go lokiša difolete tše 34 tše di senyegilego toropong ya Mariupol.

Lefelo la go phaka dikoloi toropong ya Mariupol leo le sentšwego ke di-rocket kgauswi le Holo ya Mmušo (yeo e sa tšwelelego mo seswantšhong).

Mna. Berki o ile a bolela gape gore ofisi ya lekala ya Ukraine e dira mo gontši modirong wo wa tlhakodišo go feta go fo nea thušo ya dilo tšeo di hlokegago. O boletše gore: “Go tlaleletša sebokeng se se kgethegilego, bahlankedi bao ba etelago diphuthego tša Dihlatse tša Jehofa ba tšwela pele go etela Dihlatse tšeo di lego mafelong a 136 ao a kgomilwego ke ntwa. Ka ge se se dirwa diphuthegong ka moka tša Dihlatse tša Jehofa lefaseng ka bophara, bagolo ba lefelong leo ba dira maiteko a magolo a go homotša le go kgothatša ka Beibele bohle bao ba ba hlokometšego.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Belarus: Pavel Yadlouski, mogala +375 17 292 93 78

Russia: Yaroslav Sivulskiy, mogala +7 812 702 2691

Ukraine: Gustav Berki, mogala +38 032 240 9323