Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

JANUARY 21, 2014
RUSSIA

TSEBIŠO E MPSHA: Maiteko a go Thibela JW.ORG a Foloditše

TSEBIŠO E MPSHA: Maiteko a go Thibela JW.ORG a Foloditše

KA August 7, 2013, kua St. Petersburg, Russia— Kgoro ya Tsheko ya Selete ya Tsentralniy motseng wa Tver, woo o lego dikhilomithara tše 160 ka leboa la Moscow, e phethile ka gore Wepesaete ya go ruta Beibele ya jw.org e swanetše go thibelwa Russia.

Le ge jw.org e etelwa ke batho ba makgolo a dikete lefaseng ka bophara le go ratwa ke batho bao ba dirago dinyakišišo, kgoro e ile ya ema le mmušo maitekong a wona a go nyaka go thibela Wepesaete ye ya go tuma. Kgoro ya tsheko e ile ya dira phetho ntle le go tsebiša goba go kwa bohlatse bja beng ba Wepesaete ye, e lego Watchtower Bible and Tract Society of New York. Dihlatse tša Jehofa di ile tša dira boipiletšo ka phetho yeo go Kgoro ya Tsheko ya Selete ya Tver. Ka gona boipiletšo bjo bo tla kwewa ka January 22, 2014.

Ge e ba boipiletšo bjo bo ka ganwa, Dihlatse tša Jehofa tše fetago tše 160 000 kua Russia di ka se sa kgona go ba le Wepesaete ye, Dihlatse tše gantši di e diriša bakeng sa mediro ya borapedi, ge motho a ithuta Beibele le ge lapa le ithuta Beibele. Go diriša Wepesaete ye kua Russia go tšewa e le molato. Go oketša moo, batho ba e ka bago dimilione tše 142 kua Russia ba tla thibelwa go tsena go jw.org gore ba hwetše tsebišo ya mahala ya Beibele. Yekaterina Elbakyan, e lego setsebi sa Filosofi le dithuto tša bodumedi e bile e le moprofesara kua Academy of Labor and Social Relations kua Moscow o re: “ Jw.org ke mpho go batho ka moka bao ba ratago go nyakišiša ka ditaba tša bodumedi. E bolela ka ditaba tše bohlokwa le tšeo di kwešišegago. Ditaba tša bohlokwa tša Beibele le boitshwaro di hlaloswa ka tsela e bonolo. Ge o diriša Wepesaete ye, o ikwa eka o amogetšwe ka borutho legaeng la Dihlatse tša Jehofa.”

Mmoleledi wa Dihlatse tša Jehofa, e lego Grigory Martynov kua St. Petersburg, Russia, o itše: “Wepesaete ya jw.org ke sedirišwa se sebotse bakeng sa bao ba dulago nageng ya gabo rena go dira nyakišišo ka Beibele gomme ga e tswalane le dipolotiki goba tša kgwebo ka tsela le ge e le efe. Re holofela gore Kgoro ya Tsheko ya Selete ya Tver e tla kgonthišetša gore Wepesaete ye e rutago yeo e tumilego e tla dula e hwetšagala go badudi ka moka ba Russia.”

J. R. Brown, e lego mmoleledi wa Dihlatse tša Jehofa ntlongkgolo ya tšona ya lefase ka bophara kua New York, o re: “Wepesaete ya jw.org e ratwa ke batho ba bantši go dira nyakišišo ka taba le ge e le efe e bile ke mothopo wa boitsebišo bjo bo botwago ke malapa lefaseng ka bophara. E ratwa kudu ke batho ba ka bago ba 900 000 ba e etelago letšatši le letšatši gore ba hwetše molaetša o agago ka maleme a ka bago a 600. Go thibela sedirišwa se ruri go tloga go sa kwagale.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Russia: Grigory Martynov, mogala +7 812 702 2691