Eya go dikagare

Eya go menyu wa bobedi

Dihlatse tša Jehofa

Sepedi

APRIL 19, 2017
RUSSIA

Letšatši la Bohlano la Tsheko Kgorongkgolo ya Russia: Go Hlahlobja Molato wa Dihlatse wa Mengwaga e Lesome

Letšatši la Bohlano la Tsheko Kgorongkgolo ya Russia: Go Hlahlobja Molato wa Dihlatse wa Mengwaga e Lesome

NEW YORK—Ka Laboraro la di-19 tša April 2017, batho ba e ka bago ba 300 ba be ba tsogile ka masa (ba bangwe ba tlile ka bo-2 ya masa) go tlo theetša molato Kgorongkgolo ya Tsheko ya Russia. Ke letšatši la bohlano go sekwa molato wa gore Lefapha la Toka le nyaka go tswalela Ofisi e Kgolo ya Dihlatse tša Jehofa. Ka ge mmušo wa Russia o tšere mengwaga e lesome o lwantšha Dihlatse ga sehlogo, go ile ga kgoboketšwa difaele tše 43 tša go hlatsela seo gomme tša išwa Kgorong ya Tsheko.

Kgoro e ile ya hlahloba difaele tše 43 tša bohlatse.

Ge molato o sekwa, boramolao ba Lefapha la Toka ba ile ba palelwa ke go fa lebaka la semolao leo le bontšhago gore ba ka tswalela Ofisi e Kgolo ya Dihlatse. Le gona, ba ile ba se ntšhe bohlatse bja gore Ofisi e Kgolo goba Mekgatlo ya Bodumedi ya Dihlatse tša Jehofa e dira mediro e kotsi kudu. Yury Toporov e lego yo mongwe wa boramolao ba Ofisi e Kgolo ya Dihlatse tša Jehofa, o boletše tshekong gore tše dingwe tša difaele tšeo di na le disetefikeiti le mangwalo a go leboga Ofisi e Kgolo go tšwa go mmušo. Disetefikeiti tšeo le mangwalo ao di bontšha gore mmušo o be o leboga gore Ofisi e Kgolo e na le mengwaga e mentši e thuša setšhaba. Le gona mmušo o lemogile gore mekgatlo ya bodumedi le yona e thuša setšhaba sa moo e lego gona. Go oketša moo, difaele tše dintši di bontšha gore ba Lefapha la Toka ba be dutše ba hlahlobišiša mekgatlo ya bodumedi ya Dihlatse tša Jehofa nageng ye ya Russia ga e sa le go tloga ka 2008, eupša ga se ba hwetša selo sa go bontšha gore mediro ya mekgatlo yeo e kotsi kudu. Boramolao ba Lefapha la Toka le bona ba e bone taba yeo.

Bao ba dutšego ka pele go tloga ka letsogong le letshadi go ya go le letona: Anton Omelchenko, Maksim Novakov, Victor Zhenkov le Yury Toporov, e lego boramolao ba Ofisi e Kgolo ya Dihlatse tša Jehofa ya Russia. Ka morago ga bona go tloga ka letsogong le letshadi go ya go le letona ke Vasiliy Kalin le Sergey Cherepanov, e lego ditho tša komiti ya Ofisi e Kgolo ya Dihlatse tša Jehofa ya kua Russia.

Kgoro ya Tsheko e tlo tšwela pele ka di-20 tša April 2017, ka iri ya bobedi thapama.

Ba Ditaba:

Bakeng sa Dinaga tše Dingwe: David A. Semonian, Ofisi ya Ditaba tša Setšhaba, +1-845-524-3000

Russia: Yaroslav Sivulskiy, +7-911-087-8009