Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

MARCH 3, 2014
RUSSIA

Tsebišo e Nngwe ya Moragorago: Maiteko a go Thibela JW.ORG a Foloditše

Tsebišo e Nngwe ya Moragorago: Maiteko a go Thibela JW.ORG a Foloditše

ST. PETERSBURG, Russia—Ka January 22, 2014, Dihlatse tša Jehofa di ile tša fenya molato kgorong ya tsheko, ge kgoro ya tsheko ya boipiletšo e be e hlahloba lefsa phetho ya kgoro e nyenyane ya tsheko ya go thibela Wepesaete ya jw.org, e lego Wepesaete ya semmušo ya Dihlatse tša Jehofa kua Russia.

Kgoro ya Tsheko ya Selete ya Tver e ile ya phaela ka thoko phetho yeo e dirilwego ke Kgoro ya Tsheko ya Selete ya Tsentralniy ka August 7, 2013. Kgoro ya tsheko ya selete ya Tver e bontšhitše gore kgoro ya tsheko ya Tsentralniy e paletšwe ke go lokafatša molato wa yona wa go thibela Wepesaete yeo ka gobane Dihlatse tša Jehofa, beng ba Wepesaete yeo, ga se ba ka ba newa sebaka sa gore ba be gona tshekong yeo. Motšhotšhisi wa kgoro ya tsheko ya Tver o ile a tliša molato woo kgorong ya tsheko a nea lebaka la gore dikgoro tša tsheko tša Russia di lebelela dipuku le dipukwana tšeo di lego Wepesaeteng ya jw.org di bontšha go fišegela bodumedi ka mo go fošagetše. Gateetee ka morago ga gore Dihlatse tša Jehofa di tsebe ka phetho yeo e dirilwego ke kgoro ya tsheko ya selete, di ile tša tloša dipuku le dipukwana tšeo Wepesaeteng ya jw.org ka Serussia. Kgoro ya Tsheko ya Selete ya Tver e ile ya dumela gore Dihlatse di ile tša latela melao ya Russia gomme ya fediša go thibelwa ga jw.org.

Dihlatse tša Jehofa di ile tša lwantšhana le dikahlolo tša dikgoro tša tsheko tša Russia, tšeo di boletšego gore dipuku le dipukwana tša Dihlatse di bontšha go fišegela bodumedi ka mo go fošagetšego gomme Dihlatse di ile tša dira dikgopelo tše mmalwa Kgorong ya Yuropa ya Ditokelo tša Batho gore e hlahlobe lefsa diphetho tšeo.

Grigory Martynov, e lego mmoleledi wa Dihlatse tša Jehofa kua Russia, o re: “Re thabišwa ke gore baahlodi ba ile ba bona mehola ya Wepesaete ya rena le maiteko a rena a go latela diphetho tšeo di dirilwego ke kgoro ya tsheko ya Russia. Re tla tšwela pele re emela dipuku le dipukwana tša rena ka potego le go lwela ditokelo tša badudi ba Russia bao ba holwago kudu ke modiro wa rena wa go ruta ka Beibele.”

J. R. Brown, e lego mmoleledi wa Dihlatse tša Jehofa kua ntlongkgolo ya lefase ka bophara ge a bolela ka phenyo ye, o re: “Lefaseng ka bophara Dihlatse di thabišwa ke phenyo ye. Re leboga gore re fentše molato wo e bile badudi ka moka ba Russia ba tla tšwela pele ba kgona go tsena Wepesaeteng ye e rutago ka Beibele.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Russia: Grigory Martynov, mogala +7 812 702 2691