Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

OCTOBER 14, 2015
RUSSIA

Ditsebi ga di Dumelelane le Phetho ya Russia ya go Thibela Wepesaete ya JW.ORG

Ditsebi ga di Dumelelane le Phetho ya Russia ya go Thibela Wepesaete ya JW.ORG

ST. PETERSBURG, Russia—Ka July 21, 2015, Mmušo wa Russia o ile wa thibela Wepesaete ya semmušo ya Dihlatse tša Jehofa ya jw.org, o bolela gore ke molato go kgothaletša batho gore ba e diriše nageng. Russia ke naga e nnoši lefaseng yeo e thibetšego Wepesaete ya jw.org.

Yekaterina Elbakyan e lego setsebi sa dithuto tša bodumedi e bile e le Moprofesara wa Academy of Labor and Social Relations kua Moscow, o boletše ka Wepesaete ya jw.org gore: “Ke nagana gore Wepesaete ye e bohlokwa ka gore e na le tsebišo e bohlokwa yeo e tšwago go Dihlatse tša Jehofa yeo e bolelago ka mokgatlo wa tšona go e na le go bolela ka ditaba tšeo di tšwago methopong e mengwe. . . .Ga se ditho tša tšona feela tšeo di thabelago Wepesaete ye, eupša le batho ba bangwe bao ba thabelago madumedi a fapafapanego le bona ba a e rata. Le gona ga ke bolele feela ka ditsebi tša bodumedi tša go swana le nna eupša ke bolela le ka babegi le baphatlalatši ba ditaba bao ba ngwalago ka bodumedi.”

“Ke nagana gore Wepesaete ye e bohlokwa ka gore e na le tsebišo e bohlokwa yeo e tšwago go Dihlatse tša Jehofa”—Yekaterina Elbakyan, yo e lego Moprofesara wa Academy of Labor and Social Relations, Moscow

Setsebi sa molao sa Mokgatlo wa Ditokelo tša Batho kua Moscow, e lego Lev Levinson, o bolela tiro ye ya mmušo ka tsela ya histori gore: “Le mehleng ye Russia e na le molaotheo wo o kgonthišetšago tokologo ya bodumedi le go lekalekana ga mekgatlo ya bodumedi. Lega go le bjalo, go etša mengwageng ya bo-1800, Russia e sa dutše e thibela batho tokologo ya go bolela ka bodumedi bja bona ka go ba tšeela dipuku le go thibela Wepesaete ya bona. Le gona se se dirwa ke baahlodi le ditsebi tša molao tšeo di dirišago gampe molao wa go lwantšha go fišegela bodumedi ka tsela e feteletšego.”

Go thibelwa mo ga Wepesaete ya Dihlatse tša Jehofa ke selo se se sa tšwago go tšwelela leemaemeng la kgoro ya tsheko yeo e sa lego e thoma morago kua ka 2013. Ka August 7 ngwageng wona woo, kgoro ya tsheko ya selete ya Russia e boletše gore Wepesaete ya Dihlatse tša Jehofa “e bontšha go fišegela bodumedi ka mo go feteletšego” nakong ya tsheko ya ka sephiring, eupša phetho yeo e ile ya bušetšwa morago ke kgoro ya tsheko ya tikologo ka January 22, 2014. Lega go le bjalo, Motšhotšhisi yo Mogolo wa Mmušo wa Russia o ile a dira boipiletšo Kgorongkgolo ya Tsheko ya Russia gore e bušetše phetho e dirilwego ke kgoro ya tikologo morago. Ka December 2, 2014, Kgorokgolo ya Tsheko e ile ya theetša boipiletšo bja motšhotšhisi Dihlatse tša Jehofa di se gona go ka ikarabela ka ge di be di se tša tsebišwa ka tsheko. Kgorokgolo ya Tsheko e ile ya bušetša phetho yeo e dirilwego ke kgoro ya tsheko ya tikologo morago, ya bolela gore Wepesaete ya Dihlatse tša Jehofa “e bontšha go fišegela bodumedi ka mo go feteletšego” gaešita le ge kgoro ya tsheko e be e dumetše gore Wepesaete yeo ga e sa na dipuku tša bodumedi tšeo di thibetšwego ke balaodi ba mmušo wa Russia. Dihlatse tša Jehofa di ile tša se dumelelane le phetho yeo gomme tša dira boipiletšo go moahlodi wa Kgorokgolo ya Tsheko, eupša tša se atlege. Phetho yeo e ile ya dira gore ka July 21, 2015 Kgoro ya Toka ya Russia e tsenye Wepesaete ya Dihlatse tša Jehofa Lelokelelong la Dilo ka Moka tša Mekgatlo ya go Fišegela Bodumedi ka mo go Feteletšego, ka go rialo ya thibela Wepesaete yeo nageng ka moka ya Russia.

Yaroslav Sivulskiy, yo e lego seboleledi sa Dihlatse tša Jehofa kua Russia, o bolela ka moo thibelo ye e ba kgomilego ka gona ka gore: “Re nyamišitšwe kudu ke gore balaodi ba mmušo wa Russia ba tšere kgato ye ya go hloka toka. Go thibelwa ga Wepesaete go šitiša borapedi bja Dihlatse tša Jehofa tša ka godimo ga tše 170 000 tšeo di lego nageng ye. Eupša ge o nagana gore batho ba ka bago 285 000 mo Russia ba tsena Wepesaeteng ya Dihlatse tša Jehofa letšatši le lengwe le le lengwe, go bontšha gabotse gore gaešita le batho bao e sego ditho tša bodumedi bja rena ba tingwa mokgwa o mo kaonekaone wa go ithuta Beibele.”

J. R. Brown, yo e lego mmoleledi wa ditšhabatšhaba wa Dihlatse tša Jehofa ge a bolela go tšwa Ntlongkgolo ya Dihlatse tša Jehofa kua Brooklyn, New York, o re: “Wepesaete ya rena ya semmušo ya jw.org, e na le dibidio tša maemo a godimo, dipuku tša go ithuta Beibele ka maleme a mantši le dimakasine tše pedi tšeo di fiwago batho lefaseng ka moka tša Morokami le Phafoga! Wepesaete ye ile ya bontšhwa pontšhong ya dipuku ya ditšhabatšhaba e bile e ile ya dirišwa kudu dikolong. E thušitše batho ba bantši lefaseng ka bophara le gona e be e dirišwa kudu nageng ka moka ya Russia. Ruri ye ke Wepesaete yeo e swanetšego go thekgwa.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Russia: Yaroslav Sivulskiy, mogala +7 812 702 2691