Eya go dikagare

Eya go menyu wa bobedi

Dihlatse tša Jehofa

Sepedi

JANUARY 14, 2013
PHILIPPINES

Philippines e Sentšwe ke Ledimo le Matla la Bopha

Philippines e Sentšwe ke Ledimo le Matla la Bopha

KUA Manila, Philippines, batho bao ba fetago 1 000 ba ile ba hwa gomme ba fetago 970 000 ba lahlegelwa ke magae ka morago ga gore ledimo le matla le senye metse ya Philippines ka Labobedi la December 4, 2012. Kgwedi ka morago, Dihlatse tša Jehofa di tšwela pele di hlakodiša bao ba hlasetšwego ke Ledimo le matla la Bopha (leo tikologong yeo le tsebjago e le Pablo).

Ga e sa le go tloga ka January 7, ofisi ya lekala ya Dihlatse tša Jehofa kua Manila e kgonthišeditše gore ka manyami go hlokofetše Dihlatse tše hlano ka baka la ledimo le. Yo mongwe o ile a išwa sepetlele ka morago ga gore a gobale kudu mokokotlong. Go oketša moo, malapa a ka bago a 520 a Dihlatse a ile a šala a se na madulo ka morago ga gore magae a 140 a šwalalane gomme a mangwe a 400 a senyege.

Baemedi ba lekala ba ile ba etela bao ba kgomilwego ke ledimo le go bona kamoo le ba senyeditšego ka gona, go rulaganya tlhakodišo le go nea bao ba phologilego kgothatšo le thekgo ya moya. Dihlatse di hlamile komiti ya tlhakodišo go rulaganya dihlopha tše šupago tša tlhakodišo le go thuša baithaopi ba tikologong yeo go aba dilo tša tlhakodišo.

Dikarolong tše dingwe tša naga, ledimo le gogotše dijo tše dintši le dilo tšeo batho ba iphedišago ka tšona, go akaretša reise, mehlare ya dipanana le ya di-coconut. E le go thuša tiragalong ye, komiti ya tlhakodišo ya Dihlatse e ile ya romela dijo tša boima bja ka godimo ga ditone tše 12 ka dilori. Lega go le bjalo, go ile gwa tloga go sa kgonege gore go išwe dijo tšeo lefelong le lengwe leo le kgomilwego ke kotsi ka gore leporogo la go ya moo le be le senyegile.

Ledimo le matla la Bopha gape le sentše mafelo a borapedi, ao a bitšwago Diholo tša Mmušo, a 15 le go šwalalanya letee. Lega go le bjalo, ba bangwe ba batho bao ba lahlegetšwego ke magae ka baka la ledimo ba ile ba bewa Diholong tša Mmušo tšeo di bego di se tša senyega. Komiti ya tlhakodišo e katanela go hudušetša batho ba bao ba kgomilwego ke kotsi magaeng a makaone.

Mediro ka moka ya go hlakodiša e thekgwa ke meneelo ya Dihlatse tša Jehofa tša tikologong yeo le tše dingwe tša lefaseng ka bophara. Sehlopha se Bušago sa Dihlatse tša Jehofa se thuša go hlokomela ditshenyagalelo tše bjalo ka go diriša ditšhelete tšeo di neetšwego bakeng sa modiro wa lefase ka bophara wa Dihlatse.

Dean Jacek, e lego mmoleledi wa Dihlatse tša Jehofa kua Philippines, o re: “Ka moka ga rena re llišwa ke go lahlegelwa ke baratiwa ba rena le badumedigotee le rena le go kwešwa bohloko ke tshenyo yeo e bakilwego ke ledimo le. Eupša re tla tšwela pele re dira seo re ka se kgonago go hlakodiša ba bangwe, go akaretša go nea thušo ya moya le go homotša baagišani ba rena.”

Ba Ditaba:

Bakeng sa Ditšhabatšhaba: J. R. Brown, Ofisi ya Ditaba tša Boditšhaba, mogala +1 718 560 5000

Philippines: Dean Jacek, mogala +63 2 411 6090