Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

FEBRUARY 17, 2014
PHILIPPINES

Tsebišo e Mpsha: Ka Morago ga Ledimo le Matla la Haiyan, Dihlatse tša Jehofa di Thoma Modiro wa Tlhakodišo

Tsebišo e Mpsha: Ka Morago ga Ledimo le Matla la Haiyan, Dihlatse tša Jehofa di Thoma Modiro wa Tlhakodišo

MANILA, Philippines—Ka morago ga go hlaselwa ke Ledimo le matla la Haiyan Dihlatse tša Jehofa di ile tša rulaganya modiro wa tlhakodišo woo o tšwelago pele wa lefase ka bophara go thuša Philippines.

Ofisi ya lekala ya Dihlatse tša Jehofa kua Manila e ile ya hloma dikomiti tše hlano tša go akgofiša thušo go bao ba kgomilwego ke kotsi ye ya tlhago. Ditone tše fetago tše 190 tša dilo tša tlhakodišo di ile tša romelwa bogareng bja Philippines. Dihlatse go tšwa dinageng tše lesome di ile tša thuša ka tlhakodišo. Baithaopi ba thuša ka go lokiša le go aga lefsa magae a ka godimo ga a 2 000 goba go thuša ka dilo tše dingwe tša kalafo.

Batho ba bantši ba ka bago ba 225 ba sa dula ditenteng tšeo di hlomilwego ke Dihlatse lefelong leo batho bao ba kgomilwego ke kotsi ba hudušeditšwego go lona kgauswi le Motse wa Calbayog kua Samar. Go akanyetšwa gore diperesente tše 15 go ya go tše 20 tša batho bao ba nyakago tlhakodišo lefelong le ga se Dihlatse.

Ledimo le e bile le matla go feta madimo a mangwe ao a ilego a hlasela naga, palo ya batho bao ba bolailwego ke lona e bile 6 201 gomme ba 1 785 ba sa timeletše. Batho ba ka bago ba 28 000 ba ile ba gobala gomme magae a fetago a milione a ile a senyega. Ofisi ya lekala ya Dihlatse tša Jehofa ya Manila kua Philippines e bolela gore go hwile Dihlatse tše 33 mola tše 10 di sa timeletše e bile go naganwa gore mohlomongwe di hwile.

Mark Sanderson, e lego setho sa Sehlopha se Bušago sa Dihlatse tša Jehofa, o etela bao ba kgomilwego ke kotsi.

Go thoma ka December 7, 2013, Mark Sanderson, e lego setho sa Sehlopha se Bušago sa Dihlatse tša Jehofa, o ile a etela diprofense tše hlano mafelong ao a kgomilwego ke kotsi lebaka la matšatši a šupago. O re: “Maemo a sa kgahlišego ao a bakilwego ke Ledimo le la Haiyan a sa dutše a kgoma o šoro batho ba bantši kua Philippines; lega go le bjalo re ikemišeditše go tšwela pele re thuša ka go nea dilo tšeo ba di hlokago, go romela batho bao ba ka thušago le go homotša bao ba kgomilwego ke kotsi.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba mogala +1 718 560 5000

Philippines: Dean Jacek, mogala. +63 2 411 6090