Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

MARCH 20, 2014
DITABA TŠA LEFASE KA BOPHARA

Guy H. Pierce, Setho sa Sehlopha se Bušago sa Dihlatse tša Jehofa, o Hlokofetše

Guy H. Pierce, Setho sa Sehlopha se Bušago sa Dihlatse tša Jehofa, o Hlokofetše

NEW YORK—Guy H. Pierce, e lego setho sa Sehlopha se Bušago sa Dihlatse tša Jehofa ntlongkgolo ya lefase ka bophara Brooklyn, kua New York, o hlokofetše ka Labobedi, March 18. O be a na le mengwaga e 79.

Mna. Pierce o ile a šoma dikomiting tše fapafapanego tšeo di hlokomelago mediro ya Dihlatse le modirong wa tšona wa lefase ka bophara wa go ruta Beibele. Boikarabelo bja gagwe bo be bo nyaka gore a sepele maeto a matelele, le gona o ile a diriša dibaka tše gore a kgothatše Dihlatse tša Jehofa lefaseng ka bophara. Go sa šetšwe boikarabelo bja gagwe bjo boima, o be a tsebja e le motho yo a iphago nako ya go theetša bao ba bego ba nyaka thušo goba keletšo, e bile o be a dira gore batho ba ikwe ba phuthologile ka go myemyela ga gagwe le ka go dira metlae. Bao ba mo tsebago gabotse ba lemogile gore batho ba ditšo goba ditlogo tše di fapafapanego ba be ba gogelega go yena. Polelong ya gagwe yeo a e filego lenaneong la go aloga la badiredi ba nako e tletšego, Mna. Pierce o boletše mantšu ao le yena a bego a a diriša bophelong bja gagwe, ge a re: “O eme ka go tia bakeng sa melao ya motheo e lokilego, eupša o be yo a fetofetogago le maemo. O se ke wa tšeela fase bao ba lego kabelong ya gago ka gobane setšo sa bona e le seo se fapanego.”

Guy Hollis Pierce o belegwe Auburn, kua California, ka November 6, 1934. O ile a kolobetšwa go ba Hlatse ya Jehofa ka August 14, 1955, ge a be a na le mengwaga e 20. O ile a nyala Hlatsegotee le yena, e lego Penelope (Penny) Wong, ka May 30, 1977, gomme ba godišitše lapa ba le gotee. Mna. le Moh. Pierce e be e le barutiši ba ka mehla ba Beibele (bao Dihlatse di ba bitšago babulamadibogo ba ka mehla). Ka morago ga moo, o ile a ba molebeledi yo a etelago diphuthego tša Dihlatse tša Jehofa nageng ka moka ya United States gore a kgothatše badiredi ba bangwe ba ka mehla bao ba rutago Beibele gotee le go etela ditho tša diphuthego tša tikologong ya moo. Ka 1997, Mna. le Moh. Pierce ba ile ba laletšwa go šoma ofising ya lekala ya Dihlatse tša Jehofa kua United States ka nako e tletšego. Ka October 2, 1999, Mna. Pierce o ile a kgethwa go ba setho sa Sehlopha se Bušago.

Mafelobekeng a October 5 le 6, 2013, Mna. Pierce e be e le modulasetulo sebokeng sa ngwaga le ngwaga sa bo-129 sa Watch Tower Bible and Tract Society of Pennsylvania. Batho ka moka ba 1 413 676 dinageng tše 31 ba ile ba ba gona sebokeng seo ka go lebanya goba go se bogela ka Inthanete. Go ya ka Wepesaete ya semmušo ya Dihlatse, seboka se e be e le se segologolo sa Dihlatse tša Jehofa go ba go fihla ga bjale.

Mna. Pierce o tlogela mosadi wa gagwe e lego Penny, bana ba gagwe ba tshela, ditlogolo le ditlogotlogolwana. Le gona o gopolwa gabotse lefaseng ka bophara ke Dihlatse tša Jehofa tšeo a bego a di lebelela e le lapa.

Dithogotee le yena tša Sehlopa se Bušago di boletše ka “tumelo ya gagwe e tiilego le go emela melao le melao ya motheo ya Jehofa” di okeditše ka gore: “Go gopola go ba ga gagwe le sebete le tsela yeo a bego a phela ka yona go tla tšwela pele go re matlafatša mengwageng e tlago yeo e letšego ka pele.”

Ba Ditaba:

Bakeng sa Ditšhabatšhaba: J. R. Brown, Ofisi ya Ditaba tša Ditšhabatšhaba, mogala +1 718 560 5000