Eya go dikagare

Eya go menyu wa bobedi

Dihlatse tša Jehofa

Sepedi

OCTOBER 9, 2014
DITABA TŠA LEFASE KA BOPHARA

Dihlatse tša Jehofa di Tšea Kgato go Thibela Bolwetši bja Ebola

Dihlatse tša Jehofa di Tšea Kgato go Thibela Bolwetši bja Ebola

NEW YORK—Ge bolwetši bja Ebola bo dutše bo hlasela Bodikela bja Afrika, Dihlatse tša Jehofa di tšwela pele go ruta ditho tša tšona ka bolwetši bjo.

Ka morago ga go lemoga gore twatši ya Ebola e hweditšwe kua Guinea le go aparela ka lebelo go fihla Liberia le Sierra Leone, diofisi tša makala tša seleteng seo tša Dihlatse tša Jehofa di ile tša romela ka go akgofa mangwalo ao a bego a nea temošo ka bolwetši bjo diphuthegong tšeo di bego di le dinageng tše tše tharo. Ka go diriša ditlhahlo le ditšhišinyo go tšwa mekgatlong ya mmušo ya tikologong yeo, mangwalo ao a be a hlalosa dikotsi tša twatši ye, kamoo e fetelago ka gona le gore ke dikgato dife tša maleba tšeo di ka tšewago go thibela go phatlalala ga bolwetši bjo. Collin Attick e lego mmoleledi wa Dihlatse tša Jehofa kua Sierra Leone o boletše gore: “Go ba lefelong leo malwetši a šoro a sa kwešišwego gabotse le mabarebare a mantši a moo Ebola e tšwago gona, batho ba bantši ba be ba gakanegile mathomong ba sa tsebe seo ba swanetšego go se dira. Eupša ge ditho tša phuthego ya rena di ekwa ka ditaelo tšeo di neilwego Holong ya Mmušo, di ile tša tšea kgato ka go se dika dike.”

Ka July, baemedi ba basepedi ba Dihlatse tša Jehofa ba ile ba thoma go dira diketelo tše kgethegilego tša matšatši a mabedi diphuthegong ka moka tša Sierra Leone le Guinea. Diketelo tše di be di akaretša polelo yeo e bego e re: “Go Kwa go Phološa Maphelo,” ka morero wa go lemoša batho ka mekgwa yeo e šomago ya go thibela bolwetši bjo le go ba kgothaletša go dula ba latela ditlhahlo tšeo di newago. Diketelo tše di tla tšwela pele go fihla ka November 2014. Go oketša moo, Dihlatse di ile tša dira mafelo a go hlapa diatla ka meetse ao a tswakilwego le bleach mejakong ya mafelo a tšona a borapedi (ao a tsebjago e le Diholo tša Mmušo) kua Guinea, Liberia le Sierra Leone. Dihlatse tše dintši dinageng tšeo di latela mohlala wo, ka go dira mafelo a go hlapa diatla magaeng a tšona.

E le temošo, lapa la Dihlatse le latela lenaneo la thibelo ya go ba kgaufsi le bao ba babjago kua Toropong ya Dolo, motsaneng wo o lego ka bohlabela bja Monrovia kua Liberia. Lenaneo le le ile la tlošwa ka September 8, 2014.

Go ya ka pego yeo e dirilwego ka October 1, 2014 ke mokgatlo wa tša maphelo (World Health Organization), batho ba 7 178 ba šetše ba fetetše ke bolwetši bjo gomme ba fetago 3 300 ba šetše ba bolailwe ke bolwetši bja Ebola kua Bodikela bja Afrika, gomme go sa letetšwe gore dipalopalo tše di hlatloge. Go fihla ka October 2, gare ga Dihlatse tše 2 800 tša kua Guinea le Sierra Leone, mosadi o tee wa Hlatse yo e bego e le mooki o ile a fetelwa ke twatši ya Ebola gomme a hlokofala ka September 25, 2014. Gare ga Dihlatse tše 6 365 kua Liberia, tše 10 di bolailwe ke bolwetši bjo; tše tshelela tša tšona e be e le bašomedi ba tša maphelo. Gaešita le ge bjale twatši ye e phatlaletše go fihla Nigeria, ga go le o tee wa Dihlatse tša Jehofa yo a fetetšwego ke bolwetši bjo. Go oketša moo, ga go baromiwa ba Dihlatse ba dinageng tšeo bao ba fetetšwego ke twatši ye; ka ge nakong yeo baromiwa ba bantši ba be ba le maikhutšong goba dikopanong tša ditšhabatšhaba kua Yuropa le United States. Ba bangwe ba sa tšwa go boela medirong ya bona ya boromiwa gomme ba latela ditaelo mabapi le go thibela bolwetši bjo go tšwa ofising ya lekala ya lefelong leo. Baromiwa ba bangwe ba sa palelwa ke go boa ka baka la go thibelwa ga difofane le maemo a mangwe.

Lefelo la go hlapa diatla Holong ya Mmušo kua Sierra Leone.

Dikomiti tša Tlhakodišo tša baithaopi ba Dihlatse di thuša Dihlatse tša lefelong leo ka go hlokomela dinyakwa tša malapa a tšona le barapedigotee le tšona kua dinageng tšeo di hlasetšwego kudu ke Ebola tša Bodikela bja Afrika. Thomas Nyain, Sr., mmoleledi wa Dihlatse tša Jehofa kua Liberia o boletše gore: “Go latela melao ya motheo ya Beibele mabapi le bohlweki le go dula o nnoši ge o babja go re thušitše go lebeletšana le boemo bjo. Ka ge re le Dihlatse tša Jehofa, re phema gape le mekgwa yeo e sego ya mangwalo ya go boloka. Se e bile tšhireletšo go rena ka moka, kudukudu nakong ye ya mathata.”

Kua Sierra Leone, go ile gwa gašwa seteišeneng sa radio sa tikologong yeo kamoo Dihlatse tša Jehofa di thušitšego ditho tša tšona le bao e sego Dihlatse go thibela twatši ye ya Ebola. Bahlankedi ba mmušo ba ile ba kgopela gore komiti ya tlhakodišo ya Dihlatse e thuše mekgatlo ya mmušo ya seleteng seo.

J. R. Brown, mmoleledi wa ditšhabatšhaba ntlongkgolo ya lefase ka bophara ya Dihlatse kua New York o boletše gore: “Re kgothatšwa ke go bona barapedigotee le rena kua Bodikela bja Afrika ba le šedi ge ba dutše ba tšwela pele ka mediro ya bona ya moya le go ruta batho ka Beibele go fihla bokgoleng bjoo ba ka bo kgonago. Bana babo rena le dikgaetšedi le ba bangwe bao ba lebeletšanego le ditlamorago tša twatši ya Ebola ba menaganong le dithapelong tša rena.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Guinea: Thierry Pourthié, mogala +224 631 40 96 50

Liberia: Thomas Nyain, Sr., mogala +231 886 513 414

Nigeria: Paul Andrew, mogala +234 7080 662 020

Sierra Leone: Collin Attick, mogala +232 77 850 790