Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

MARCH 13, 2014
DITABA TŠA LEFASE KA BOPHARA

Dihlatse tša Jehofa di Lokolla Beibele Yeo e Kaonefaditšwego ya Kgatišo ya Mongwalo o Mogolo

Dihlatse tša Jehofa di Lokolla Beibele Yeo e Kaonefaditšwego ya Kgatišo ya Mongwalo o Mogolo

NEW YORK—Dihlatse tša Jehofa di lokolotše Phetolelo ya Lefase le Lefsa ya Mangwalo a Makgethwa e kaonefaditšwego ya mongwalo o mogolo e le maiteko a tšona a tšwelago pele a go dira gore Beibele e hwetšwe ke batho ba bantši ka mo go ka kgonegago, go rulagantšwe gore go tla gatišwa dikopi tša mathomo tše 424 000 tša Beibele ye yeo e gatišwago United States le Japane.

Dihlatse di lokolotše Beibele ya mongwalo o tlwaelegilego ya Phetolelo ya Lefase le Lefsa e kaonefaditšwego sebokeng se se kgethegilego seo se ilego sa gašwa ka October 5-6, 2013, dinageng tše 31. Phetolelo ye ya 2013 ke phetolelo e kaonefaditšwego yeo e ilego ya tšweletšwa ga e sa le Beibele ye ile ya fetolelwa la mafelelo ka 1984. Ka October 7, 2013, Dihlatse di tšweleditše phetolelo ye ya Beibele gore e hwetšagale lenaneong la khomphutha la JW Library, leo le šetšego le taoneloutilwe ka makga a ka bago a dimilione tše 1,4. Le gona Phetolelo ya Lefase le Lefsa yeo e kaonefaditšwego e hwetšagala ka dibopego tše di fapafapanego tša elektroniki tšeo di lego go jw.org.

Dibopego ka moka tša Phetolelo ya Lefase le Lefsa yeo e kaonefaditšwego di akaretša ditšhupetšo tše ka bago tše 60 000, tšeo di thušago babadi gore ba kwešiše gakaone dipego tša Beibele. Le gona e na le diswantšho tša mebalabala, mebapa ya dinageng tša Beibele le ditšhate tšeo di bontšhago ditaba ka botlalo tša kamoo batho ba bego ba phela ka gona mehleng ya ge Beibele e be e ngwalwa. Lemetletšo le hlalosa ditaba tše bjalo ka melao yeo e bego e latelwa ge go be go fetolelwa Beibele le histori ya kamoo Beibele e ilego ya ngwalwa le go bolokwa ka gona.

Kgatišo ya 1984 ya Phetolelo ya Lefase le Lefsa, e dirišitše leina la Modimo leo le tšwelelago ka makga a ka bago a 7 000. Lega go le bjalo, phetolelo ye e kaonefaditšwego ya 2013 e bontšha nyakišišo ya moragorago ya moo leina la Modimo le tšwelelago gona dingwalweng tša kgalekgale tša Beibele. Ge go be go hlahlobja lefsa Mangwalo a go Phuthwa a lego Lewatleng le le Hwilego le dingwalweng tše dingwe tša bogologolo, go ile gwa hwetšagala gore leina la Modimo le tšwelela gape ka makga a mangwe a tshelelago, ka gona Phetolelo ya Lefase le Lefsa e kaonefaditšwego e dirišitše leina la Modimo ka makga a mangwe a tshelelago. Leina le le hwetšagala go Baahlodi 19:18;1 Samuele 2:25; 6:3; 10:26; 23:14, 16. Lemetletšo le hlalosa gape go dirišwa ga leina la Modimo ka Seheberu le Segerika, le kamoo le tšwelelago diphetolelong tša Beibele ka meboto e mmalwa ya mehleng yeno le maleme.

Dihlatse di ile tša kgatha tema e bohlokwa ya go gatiša, go phatlalatša le go fetolela Beibele ya Phetolelo ya Lefase le Lefsa, yeo le diithuti di e hlomphago ka baka la go nepagala ga yona. Ka 1961, phetolelo e feletšego ya Beibele ye e ile ya tšweletšwa la mathomo ka Seisemane. Ka 1963, The New York Times e begile gore Phetolelo ya Lefase le Lefsa, e be e tla hwetšagala ka maleme a mangwe a tshelelago, ka ge tsebišo ye e dirilwe kopanong ya selete yeo e bego e swerwe Yankee Stadium. Ga e sa le go tloga ka nako yeo, Dihlatse di ile tša fetolela Beibele ye ka maleme a fetago a 120. Mengwageng ya morago bjalo, Komiti ya Phetolelo ya Lefase le Lefsa ya Beibele e ile ya dira phetho ya go kaonefatša phetolelo ye ya Beibele ka ge komiti ye e be e lemoga gore go na le diphetogo tseleng yeo batho ba bolelago ka yona mehleng ye le go hlalosa dipolelwana tše itšego tša Beibele, ka go re’alo se sa dira gore e balege le go kwešišwa gakaone. Ge Phetolelo ya Lefase le Lefsa e kaonefaditšwego e be e fetolelwa, go ile gwa dirišwa mekgwa ya moragorago ya go fetolela Beibele.

J. R. Brown, e lego mmoleledi wa Dihlatse tša Jehofa ntlongkgolo ya lefase ka bophara, o itše: “Mengwaga e 50 e fetilego, go ile gwa thabiša go hwetša kgatišo ya pele ya Phetolelo ya Lefase le Lefsa, gomme go thabiša le go feta go hwetša phetolelo ya moragorago yeo e kaonefaditšwego. Re ikemišeditše go dira gore Mangwalo a Makgethwa a kwešišwe ke batho bohle ka go diriša phetolelo ye e nepagetšego, e hlomphegago le ya nakong ye.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000