Eya go dikagare

Eya go menyu wa bobedi

Dihlatse tša Jehofa

Sepedi

OCTOBER 21, 2016
JEREMANE

Moletlong wa go Gopola Bao ba Ilego ba Lokollwa Kgolegong ya Brandenburg go be go Bolelwa Kudu ka Dihlatse tša Jehofa

Moletlong wa go Gopola Bao ba Ilego ba Lokollwa Kgolegong ya Brandenburg go be go Bolelwa Kudu ka Dihlatse tša Jehofa

SELTERS, Jeremane—Moletlong wa bo-71 wa go gopola bao ba ilego ba lokollwa Kgolegong ya Brandenburg-Görden wo o bego o swerwe ka di-24 tša April 2016 go be go bolelwa kudu ka Dihlatse tša Jehofa.

Mongwaledi wa Lefapha la Ditšhelete tša Mmušo kua Brandenburg, e lego Daniela Trochowski, o nea polelo moletlong.

Moletlo wo o be o rulagantšwe ke mokgatlo wa Brandenburg Memorials Foundation (Stiftung Brandenburgische Gedenkstätten). O be o swaretšwe kgolegong ya Brandenburg an der Havel (seswantšho sa ka godimo), yeo e lego dikhilomithara tše e ka bago tše 90 ka bodikela bja Berlin. Baeng ba ka godimo ga ba 200 ba be ba le gona moletlong woo. Daniela Trochowski, e lego Mongwaledi wa Lefapha la Ditšhelete tša Mmušo kua Brandenburg, o ile a nea polelo ya letšatši. O itše: “Kgolegong ye, Dihlatse tša Jehofa di ile tša ahlolelwa lehu . . . ka baka la gore di be di gana go bolela gore, ‘Heil Hitler’ ka baka la tumelo ya tšona, di sa tšee karolo meletlong ya Mmušo le go gana go tsenela bošole.”

Sigurd Speidel e be e le yo mongwe wa Dihlatse tšeo di ilego tša bolawa ke Manazi kgolegong ya Brandenburg-Görden.

Nakong ya pušo ya Nazi, mopresitente wa Jeremane e lego Adolf Hitler, o ile a bolela ka Dihlatse tša Jehofa gore ke ‘sehlopha sa batho bao ba swanetšego go bolawa.’ Magareng ga ngwaga wa 1940 le 1945 batho ba e ka bago ba 2 000 ba ile ba bolawa Kgolegong ya Brandenburg-Görden (yeo e bego e bitšwa bjalo nakong ya pušo ya Nazi). Ba 127 ba bona e be e le Dihlatse, e lego palo e kgolo kudu ya sehlopha se nnoši sa batho seo se kilego sa bolaelwa moo.

Moletlong woo wa di-24 tša April, Jochen Feßenbecker e lego moemedi wa Dihlatse tša Jehofa yo a tšwago ofising ya lekala ya Jeremane o ile a boledišana le Werner Speidel. Morena Speidel o ile a hlalosa kamoo mogolwa’gwe e lego Sigurd yo e bego e le Hlatse a ilego a bolawa ka gona Kgolegong yeo ya Brandenburg-Görden. Ka di-27 tša January 1943, Sigurd wa mengwaga e 19 o ile a bolawa ka go kgaolwa molala a na le dikgwedi tša ka tlase ga tše tharo kgoro ya tsheko e mo ahlotše. Nakong ya poledišano, Morena Feßenbecker o ile a bala lengwalo leo Sigurd a le ngwadilego diiri tše sego kae pele a bolawa. Morena Speidel o boletše kamoo ba lapa la gabo ba ilego ba ikwa ka gona ka mantšu a Sigurd a mafelelo. O itše: “Go bala lengwalo le ga se gwa dira gore re tšhoge kudu. Go e na le moo, re ile ra ikgantšha ka Sigurd ka gobane o ile a dula a e na le tumelo go fihlela a ehwa.”

Lengwalo la Sigurd Speidel la go laela ba lapa la gabo. Karolwana yeo e tsentšwego mmala lengwalong le, e re: “Ke kgotleletše dilo ka moka le go ema ke tiile ka ditsela tšohle go swana le leboto.”

Ba Ditaba:

Bakeng sa Dinaga tše Dingwe: David A. Semonian, Ofisi ya Ditaba tša Setšhaba, 1-718-560-5000

Jeremane: Wolfram Slupina, 49-6483-41-3110