Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

OCTOBER 9, 2013
JEREMANE

Go Bulwa ga Segopotšo sa Mophologi wa Dipolao tše Sehlogo Kua Jeremane

Go Bulwa ga Segopotšo sa Mophologi wa Dipolao tše Sehlogo Kua Jeremane

SELTERS, Jeremane—Ka June 21, 2013 go ile gwa bulwa semmušo segopotšo sa go hlompha mohu Max Liebster kua Lautertal-Reichenbach, yo e lego yo mongwe wa Dihlatse tša Jehofa yoo a kgotleletšego ka mengwaga e mehlano a golegilwe dikampeng tša tlaišo tša Manazi. Ramotse le balaodi ba bangwe ba toropo ba ile ba dira moletlo wa go bula segopotšo seo gomme go be go tlile badudi ba toropo le mosadi wa mohu e lego Simone Liebster yoo le yena e lego Hlatse ya Jehofa.

Ka ge e be e le Mojuda yo a bego a phela Jeremane nakong ya pušo ya Manazi ya Hitler, Mna. Liebster o ile a golegwa ke Magestapo ka 1939 gomme ka morago o ile a tlaišwa dikampeng tše hlano tša: Sachsenhausen, Neuengamme, Auschwitz, Buna le Buchenwald. Ditho tše seswai tša lapa labo di ile tša hwela dikampeng tšeo. Gare ga tšona go be go na le tatagwe, yoo Mna. Liebster a ilego a rwala setopo sa gagwe go se iša lefelong leo go fišetšwago ditopo Sachsenhausen.

Mna. Liebster o ile a tlwaelana le bagolegwa ba bangwe ba Dihlatse tša Jehofa dikampeng tšeo. O ile a kolobetšwa a ba yo mongwe wa Dihlatse tša Jehofa ka morago ga go lokollwa ka 1945. Pego e nngwe yeo e ngwadilwego segopotšong sa gagwe e re: “Tumelo ya Mna. Liebster ke yona yeo e mo neilego matla le maikemišetšo a go phologa.” O phetše mengwaga e 93 pele a hlokofala ka 2008.

Taletšo ya moletlo wa go bula segopotšo seo e be e ngwadile gore: “Mna. Liebster o be a kgodišegile gore tsela ya Bokriste e ka dira gore batho e be ba bakaone.” Wolfram Slupina, e lego mmoleledi wa Dihlatse tša Jehofa kua Jeremane o itše: “Re thabišwa ke gore go ile gwa gopolwa sebete seo se bontšhitšwego ke yo mongwe wa badumedigotee le rena ba bantši yoo a ilego a ema a tiile ge bodumedi bo be bo ganetšwa. Segopotšo se e tloga e le bohlatse bja matla a molaetša wa Beibele wa khutšo le botee, dika tšeo Dihlatse tša Jehofa di katanelago go di bontšha.”

Ba Ditaba:

Bakeng sa ditšhabatšhaba: J. R. Brown, Ofisi ya Ditaba tša Boditšhaba, mogala +1 718 560 5000

Jeremane: Wolfram Slupina, mogala +49 6483 1 3110