Eya go dikagare

Eya go menyu wa bobedi

Dihlatse tša Jehofa

Sepedi

DECEMBER 2, 2016
ITALY

Balaodi ba Italy ba Direla Bagolegwa “Holo ya Mmušo” ka Kgolegong ka ge ba Bona Gore ba a Holega

Balaodi ba Italy ba Direla Bagolegwa “Holo ya Mmušo” ka Kgolegong ka ge ba Bona Gore ba a Holega

ROMA—Balaodi ba kgolego yeo e lego toropong ya Bollate yeo e lego dikhilomithara tše 15 ka leboa la Milan, ba ile ba lemoga gore Dihlatse tša Jehofa di thuša bagolegwa, gomme ba di nea phapoši e kgolo gore e be “Holo ya Mmušo,” goba lefelo la borapedi.

Molaodi wa kgolego yeo, e lego Dr. Massimo Parisi o hlalosa gore morero wa kgolego ya Bollate e be e le gore go thušwe bagolegwa gore ba boele ba dire dilo tše dibotse gape. O itše: “Selo seo re nyakago go se fihlelela ke gore bagolegwa ba be le kholofelo gape, gomme e le gore re se fihlelele, re diriša dilo tša go fapafapana. Re bona gore go ithuta ka Modimo go bohlokwa go no swana le mekgwa e mengwe yeo re e dirišago.” Go šetše go fetile mengwaga e 13 Dihlatse tša Jehofa di dumelelwa go ruta bagolegwa Beibele mahala kgolegong ye. Dr. Parisi o hlalosa mafelelo a seo ka gore: “Dihlatse tša Jehofa di be di dutše di dirišana le rena ka mengwaga e mentši gomme maiteko a tšona a go ruta batho Beibele a dirile gore ba bangwe ba bagolegwa ba fetoge. . . . Ka baka la seo, re ile ra bona e le mo gobotse gore re direle Dihlatse tša Jehofa lefelo leo di ka le dirišago gore di thuše bagolegwa go ithuta ka mo go oketšegilego ka Modimo.” Dikgweding tše sego kae tše di fetilego, ka makga a mabedi go bile le bagolegwa ba fetago ba 100 ditirelong tšeo di bego di swere ke Dihlatse tša Jehofa.

Seswantšho sa ka ntle ga kgolego ya Bollate.

Christian Di Blasio, e lego seboleledi sa Dihlatse tša Jehofa kua Italy, o re: “Re thabela gore balaodi ba kgolego ya Bollate ba ile ba thekga maiteko a rena a go thuša bagolegwa gomme ba re direla lefelo la borapedi ka kgolegong. E bile re holofela gore re tla tšwela pele re dirišana le bona go thuša bagolegwa ka go ba ruta Beibele gore ba tle ba holege.”

Ba Ditaba:

Bakeng sa Dinaga tše Dingwe: David A. Semonian, Ofisi ya Ditaba tša Setšhaba, 1-718-560-5000

Italy: Christian Di Blasio, 39-06-872941