Eya go dikagare

Eya go menyu wa bobedi

Dihlatse tša Jehofa

Sepedi

May 6, 2015
GAUTEMALA

Dikolo tša Guatemala di Leka go Rarolla Bosenyi ka go Kgopela Dipuku tša Dihlatse tša Jehofa

Dikolo tša Guatemala di Leka go Rarolla Bosenyi ka go Kgopela Dipuku tša Dihlatse tša Jehofa

MEXICO CITY—Dikolo tše tharo tša Guatemala di ile tša kgopela dipuku le dipukwana tša Dihlatse tša Jehofa bakeng sa go di šomiša lenaneong la thuto. Dihlatse di ile tša romela dipuku le dipukwana tše 3 500 ka Sepanishi le se-Quiché dikolong tšeo. Se-Quiché ke mmolelo wa Seindia sa Amerika wo o bolelwago ke Bamaya bao ba dulago ka bodikela bja dithaba tša Guatemala.

Sekolong sa Official Rural Coeducational Elementary School motseng wa Paraje Xepec: Morutiši o ruta klase a diriša Puku ya ka ya Ditaba tša Beibele le ya Seo ke Ithutago Sona ka Beibeleng, yeo a e hweditšego go Dihlatse tša Jehofa.

Dikolo tše di ikopantše le Dihlatse tša Jehofa ka ge e le mokgatlo wo o tšweletšago dipuku le dipukwana ka se-Quiché gomme tše dingwe tša dipuku le dipukwana tša Dihlatse di ahlaahla mathata ao bafsa ba Guatemala ba lebeletšanego le ona. Moporofesara Maria Cortez wa sekolo sa Official Rural Coeducational Elementary School motseng wa Paraje Xepec o boletše gore dipuku le dipukwana tšeo di kgopetšwe ka maikemišetšo a gore di “kgone go nweletša boitshwaro le mekgwa e mebotse e lego dilo tšeo di hlokegago kudu setšhabeng.”

Sekolong sa Elisa Molina de Sthall Official Rural Coeducational School: Barutwana ba bala Puku ya ka ya Ditaba tša Beibele ka se-Quiché.

Dinyakišišo tša morago bjale di bontšhitše gore bosenyi le bošoro gare ga bafsa ke selo seo se tlwaelegilego go dikologa Guatemala. Ka lona lebaka le, mekgatlo ya Guatemala go swana le wa Violence Prevention Program (VPP) e lego mokgatlo wo o thibelago bosenyi, e hlomilwe bakeng sa gore “barutwana, batswadi, barutiši, bahlankedi ba setšhaba gaešita le setšhaba ba tšee karolo ka go dira gore go be le polokego dikolong le go nea bana le bafsa lenaneo la go ithuta mešomo e itšego.” Go sepedišana le mananeo a, sekolo sa National Institute of Basic Education with Agricultural Orientation (INEBOA), Elisa Molina de Sthall Official Rural Coeducational School (EORM) le sa Official Rural Coeducational Elementary School tša motseng wa Paraje Xepec, di kgopetše dikopi tša Puku ya ka ya Ditaba tša Beibele ka se-Quiché. Sekolo sa INEBOA se kgopetše gape le dipuku tša Dihlatse tšeo di thušago ka mathata ao bafsa ba lebeletšanego le wona e lego Bolumo 1 le Bolumo 2 ya Dipotšišo tša Bafsa le Dikarabo tše Šomago ka Sepanishi. Sekolo se ile sa nea batswadi dikopi tša dipuku tšeo e le gore di ka kgona go thuša bana ba bona go lokišetša mešomo ya gae. Go oketša go seo, sekolo se ile sa tsenya bidio yeo e tšweleditšwego ke Dihlatse tša Jehofa ya Morwa wa Lehlaswa o Boa Gae lenaneong la thuto.

Erick De Paz, e lego mmoleledi wa Dihlatse tša Jehofa tša Guatemala, o boletše gore: “Ge re dutše re swaregile ka modiro wa rena wa go botša batho molaetša wa Beibele magaeng a bona, re thabela gore dipuku le dipukwana tša rena di tšwetše barutiši le batswadi mohola gore ba kgone go thuša bafsa.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Guatemala: Juan Carlos Rodas+502 5967 6015

Mexico: Gamaliel Camarillo, mogala +52 555 133 3048