Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

MAY 15, 2015
CHILE

Dihlatse tša Jehofa di Thuša Bahlaselwa ba Mafula Nageng ya Chile

Dihlatse tša Jehofa di Thuša Bahlaselwa ba Mafula Nageng ya Chile

Holo ya Mmušo e lego lefelo la borapedi toropong ya Copiapó e be e tletše ka meetse le leraga.

SANTIAGO, Chile—Dipula tša matlorotloro di sentše selete sa Atacama seo se lego ka leboa la Chile ka March 25, 2015, dipula tše di bakile go elela ga leraga le mafula a matla—go feta ao a ilego a ba gona mengwaga e 80 e fetilego. Batho ba fetago 30 000 ba kgomilwe ke mafula a, mola ba 3 000 ba tlošitšwe magaeng a bona ba išwa mafelong a nakwana a go dula gomme mafula a a bolaile ba 25.

Ofisi ya lekala ya Dihlatse tša Jehofa nageng ye e begile gore ga go Hlatse ya Jehofa yeo e hlokofetšego goba go gobala kudu. Lega go le bjalo, magae a šupa a Dihlatse a sentšwe o šoro mola a mmalwa a senyegile ganyenyane. Holo ya Mmušo e lego lefelo la borapedi la Dihlatse tša Jehofa, e senyegile kudu gomme tše dingwe tše pedi di senyegile ganyenyane.

Moago wo o senyegilego toropong ya Diego de Almagro, e lego toropo yeo e sentšwego ke mafula.

Toropo ya Copiapó, e bile e nngwe ya ditoropo tšeo di sentšwego kudu ke mafula a, gomme Dihlatse tša Jehofa di ile tša rulaganya komiti ya tlhakodišo gore e nyake boitsebišo bja batho goba mafelo a borapedi ao a sentšwego ke mafula le go rulaganya go thuša ka go hlwekiša. Go ile gwa romelwa moemedi go tšwa ofising ya lekala bakeng sa go thekga le go nea bao ba wetšwego ke kotsi kgothatšo ya mangwalo. Dihlatse tše tšwago toropong ya Antofagasta, Arica, Calama, Caldera, Iquique le La Serena gateetee di ile tša romela bana babo bona dilo tšeo ba di hlokago.

Dihlatse di kgoboketša dilo tša tlhakodišo Holong ya Mmušo toropong ya Alto Hospicio bakeng sa go di iša mafelong ao a kgomilwego ke kotsi.

Jason Reed, e lego mmoleledi wa Dihlatse tša Jehofa nageng ya Chile, o boletše gore: “Re kwela batho bao ba wetšwego ke kotsi ye bohloko e bile komiti ya tlhakodišo e ikemišeditše go thuša ka go dula e hlwekiša le go tsošološa dintlo tšeo di senyegilego. Maiteko a rena a magolo ke go homotša le go kgothatša bohle bao ba kgomilwego ke mafula.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Chile: Jason Reed, mogala +56 2 2428 2600