Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

OCTOBER 7, 2015
AUSTRIA

Go Bulwa ga Sengwalwa Seo se Hlomphago Hlatse ya Austria Yeo e Bolailwego ke Manazi

Go Bulwa ga Sengwalwa Seo se Hlomphago Hlatse ya Austria Yeo e Bolailwego ke Manazi

Gabriele Votava, e lego meyara wa Selete sa Meidling, o nea polelo ya go bulwa ga sengwalwa.

VIENNA—Ka di 13 tša May 2015, batho ba ka bago 400 ba ile ba tla moletlong wa go bulwa ga sengwalwa sa Gerhard Steinacher, e lego Hlatse ya Jehofa yeo e ilego ya bolawa ke Manazi ka baka la go gana go tsenela bošole kua Jeremane mengwaga e 75 e fetilego. Meyara wa Selete sa Meidling, e lego Gabriele Votava, e be e le seboledi sa letšatši moletlong wa go bulwa ga sengwalwa seo se kgomareditšwego ka ntle ga legae la ga Steinacher moo ba bego ba dula gona peleng kua Meidling, Vienna seterateng sa Längenfeldgasse 68.

Sehlogo sa moletlo wo se be se re “Nka se kgone go thuntšha” e lego mantšu ao a boletšwego ke Mna. Steinacher ge a be a phophotha gore a gaugelwe. Mantšu ao a bolela mo gontši mabapi le tsela ya Bokriste yeo Mna. Steinacher a bego a phela ka yona, go swana le mantšu a Jesu ao a lego go Mateo 19:19 a rego: “O rate moagišani wa gago ka mokgwa wo o ithatago ka wona.”

Gerhard o ile a ithuta Beibele ge e be e sa le mofsa. Ge a na le mengwaga e 17, o ile a ba Hlatse ya Jehofa. Ka di 15 tša September 1939, Mna. Steinacher o ile a swarwa ka ge a ganne go tsenela bošole ka baka la letswalo le go gana go bolela mantšu a go hlompha Hitler. Ka morago ga gore a swarwe dibeke tše tshela kua Vienna, Mna. Steinacher o ile a romelwa kgolegong ya go leta tsheko yeo e bitšwago Moabit kua Berlin, Jeremane.

Ka November 11, 1939, e lego letšatši la pele leo Mna. Steinacher a ilego a sekišwa ka lona, o ile a bonwa molato wa gore o nyatša thulaganyo ya bošole ke moka a ahlolelwa lehu. O ile a phophotha gore a gaugelwe ka baka la ditumelo tša gagwe tša bodumedi. Lega go le bjalo, ka di 2 tša March, 1940, Reichskriegsgericht e lego (Kgoro ya Tsheko ya Mašole ya Reich) e ile ya thekga kahlolo ye. Ka morago ga dibeke tše nne ka di 30 tša March, Mna. Steinacher o ile a bolawa ka go ripša hlogo kgolegong yeo e tumilego gampe ya Plötzensee toropong ya Berlin. O be a na le mengwaga e 19.

Ka morago ga moletlo wa go bulwa ga sengwalwa se, moletlo wo o ile wa tšwela pele Volkshochschule Theater. Gare ga dilo tšeo di bego di rulagantšwe moletlong wo, e be e le pontšho ya go hlaloswa ga histori ya lapa la ga Steinacher. E nngwe ya dilo tšeo di bontšhitšwego e be e le lepokisi le lenyenyane leo le hweditšwego ka 1976 le na le mangwalo a 28 ao Ignatz le Luise Steinacher ba a ngwaletšego morwa wa bona Gerhard ge a be a le kgolegong, gape go na le dikarata tše 25 le mangwalo ao a ngwadilwego ke Gerhard a homotša batswadi ba gagwe le go bolela ka tumelo ya bona.

Ge Luise, e lego mmago Gerhard a be a hlokofala ka 1976, go ile gwa hwetšwa lepokisi le leo le nago le mangwalo le dikarata ntlong ya ga Steinacher.

Ge sehlogo sa kuranta ya Wiener Bezirkszeitung se bolela ka moletlo wo, se o hlalositše e le “segopotšo se bohlokwa” seo se ilego sa utolla ditiro “tšeo di bego di sa tsebje” tša Mna. Steinacher tšeo di bontšhago sebete. Sehlogo se se tšwela pele go reta Mna. Steinacher ka gore: “O be a ikemišeditše go hwela ditumelo tša gagwe, e lego ditumelo tšeo a bego a phela ka tšona.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Austria: Johann Zimmermann, mogala +43 1 804 53 45

Jeremane: Wolfram Slupina, mogala +49 6483 41 3110