Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ekiša Tumelo ya Bona

 KGAOLO YA MASOMEPEDI

“Ke Dumetše”

“Ke Dumetše”

1. Hlalosa kamoo Mareta a bego a ikwa ka gona le lebaka leo le dirilego gore a ikwe ka tsela yeo.

MARETA o be a sa kgone go lebala lebitla la kgaetšedi’agwe, e be e le lewa leo molomo wa lona o tswaletšwego ka leswika. Manyami a gagwe a be a mo imela go fo swana le leswika leo. O be a sa kgolwe gabotse gore kgaetšedi ya gagwe yo a rategago e lego Latsaro o hwile. Matšatši a mane ga e sa le Latsaro a hwile a be a le thata, a tletše manyami, baeng le dikhomotšo.

2, 3. (a) Mareta a ka ba a ile a ikwa bjang ge a bona Jesu? (b) Mantšu a bohlokwa ao Mareta a a boletšego a ile a utolla’ng ka yena?

2 Ga bjale, Mareta o be a eme pele ga monna yoo Latsaro a bego a mo rata kudu. Mohlomongwe ge Mareta a bona Jesu o ile a nyama le go feta, ka gobane Jesu e be e le motho a nnoši lefaseng yoo a bego a ka phološa kgaetšedi’agwe. Lega go le bjalo, Mareta o ile a homotšwa ke go ba le Jesu moo, ka ntle ga motsana wo o lego mmotong wa Bethania. Nakwana yeo a e feditšego a na le yena, o ile a homotšwa le go kgothatšwa ke botho bja Jesu, e lego kwelobohloko e lerato yeo e bego e kgothatša. Jesu o ile a mmotšiša dipotšišo tšeo di ilego tša mo thuša gore a tshwenyege kudu ka tumelo ya gagwe gotee le go dumeleng ga gagwe tsogong. Poledišano ye e dirile gore Mareta a bolele mantšu a bohlokwa kudu ao a kilego a a bolela, a rego: “Ke dumetše gore o Kriste Morwa wa Modimo, Yena yo a bego a tlo tla lefaseng.”Joh. 11:27.

3 Go etša ge mantšu a lego ka mo godimo a bontšha, Mareta e be e le mosadi yo a nago le tumelo e kgolo. Bonyenyane bjoo Beibele e re botšago ka yena bo re ruta dithuto tše bohlokwa kudu tšeo di ka re thušago go tiiša tumelo ya rena. Go bona gore seo se kgonega bjang, a re eleng hloko pego ya pele ya Beibele yeo e bolelago ka Mareta.

Go “Belaela le go Tshwenyega”

4. Ke ka tsela efe lapa la gabo Mareta e bego e le le sa tlwaelegago, gomme lapa leo le be le tlwaelane bjang le Jesu?

4 E be e le dikgwedi pele ga moo. Latsaro o be a sa phela e bile a phetše gabotse. Legae la gabo kua Bethania le be le le kgauswi le go  etelwa ke moeng yo bohlokwa ka go fetišiša, e lego Jesu Kriste. Latsaro, Mareta le Maria e be e le lapa le le sa tlwaelegago—le be le bopša ke bana ba motho ba bararo bao ba godilego bao go bonagalago ba be ba dula ka lapeng letee. Banyakišiši ba bangwe ba šišinya gore Mareta e swanetše go ba e be e le yena yo mogolo go bona ka moka, ka ge go bonagala e ile ya ba yena moamogedi wa baeng gomme ka dinako tše dingwe go bolelwa ka yena pele. (Joh. 11:5) Ga re tsebe ge e ba le ge e le ofe wa bona a be a nyetše goba a nyetšwe. Go sa šetšwe seo, ba ile ba ba bagwera ba paale ba Jesu. Nakong ya bodiredi bja gagwe kua Judea, moo a ilego a ganetšwa kudu le go swarwa gampe, Jesu o be a dula legaeng la bona. Ka ntle le pelaelo, o ile a rata legae leo la khutšo le thekgo yeo a bego a e hwetša.

5, 6. (a) Ke ka baka la’ng Mareta a be a tloga a swaregile nakong ya ge Jesu a ba etetše? (b) Maria o ile a diriša bjang nako ya ge Jesu a le legaeng la gabo?

5 Mareta o be a tshwenyegile kudu ka gore dilo di sepele gabotse ka lapeng. Ka ge e be e le motho yo a dulago a swaregile le yo a šomago ka thata, o be a dula a swaregile. O ile a dira bjalo le nakong ya ge Jesu a ba etetše. Go se go ye kae, o ile a rulaganya go apea dijo tše di rothišago mare bakeng sa moeng wa gagwe yo bohlokwa mohlomongwe le bao a bego a sepela le bona. Mehleng yeo, go amogela baeng go be go le bohlokwa kudu. Ge moeng a fihla, o be a amogelwa ka go atlwa, a rolwa diramphašane, a hlapišwa dinao gomme a tlotšwa hlogo ka makhura a lapološago a monko o bose. (Bala Luka 7:44-47.) O be a swanetše go newa marobalo le dijo.

6 Mareta le Maria ba be ba na le mošomo o mogolo woo ba bego ba swanetše go o dira. Le ge ba bantši ba nagana gore Maria o be a rata go ithuta, le yena o ile a thuša mogolwagwe. Eupša ka morago ga ge Jesu a fihlile, dilo di ile tša fetoga. Jesu o ile a lebelela sebaka seo e le nako ya go ruta—gomme o ile a ba ruta! Go fapana le baetapele ba bodumedi ba mehleng yeo, Jesu o be a hlompha basadi e bile a ikemišeditše go ba ruta ka Mmušo wa Modimo, e lego sehlogo sa bodiredi bja gagwe. Ka ge Maria a thabetše sebaka se, o ile a dula dinaong tša Jesu gomme a theetša sohle seo Jesu a bego a se bolela.

7, 8. Ke ka baka la’ng Mareta a ile a tlalelwa gomme o ile a utolla bjang tlalelo ya gagwe?

7 Akanya feela kamoo Mareta a bego a tlaletšwe ka gona. O be a tshwenyegile le go šitišega kudu ka dijo le mešomo ka moka yeo a bego a swanetše go e direla baeng ba gagwe. Ge a be a dutše a eya kua le kua a swaregile gomme a bona ngwanabo a dutše a sa mo thuše ka selo, na o ile a thoma go bontšha gore o tshwenyegile? Go be go ka se makatše ge a be a ka dira bjalo. O be a ka se phethe mešomo ye ka moka a nnoši!

8 Mareta o be a se sa kgotlelela. O ile a tsena Jesu ganong gomme a re: “Morena, na ga o na taba ge ngwanešo a ntlogetše ke dira dilo  ke nnoši? Ka gona, mmotše gore a nthuše.” (Luka 10:40) Mantšu a a be a le matla. Diphetolelo tše dintši di fetolela potšišo ye ka gore: “Morena, na ga o re selo ge . . . ?” Ke moka o ile a kgopela Jesu gore a kgale Maria, a mo laele gore a boele mošomong.

9, 10. (a) Jesu o ile a araba Mareta bjang? (b) Re tseba bjang gore Jesu o be a sa nyatše Mareta ka baka la go šoma ka thata?

9 Karabo ya Jesu e ka ba e ile ya makatša Mareta, bjalo ka ge e ile ya makatša babadi ba bantši ba Beibele ga e sa le go tloga ka nako yeo. O ile a bolela ka boleta a re: “Mareta, Mareta, o belaela le go tshwenyega ka dilo tše dintši. Lega go le bjalo, go nyakega dilo tše sego kae goba selo setee feela. Maria yena o kgethile kabelo e botse gomme a ka se ke a e amogwa.” (Luka 10:41, 42) Jesu o be a e ra go re’ng? Na o be a e ra gore Mareta o be a rata dilo tše di bonagalago? Na o be a tšeela fase go šoma ga gagwe ka thata go ba apeela dijo tše dibose?

Gaešita le ge a be a “belaela le go tshwenyega,” Mareta o ile a amogela phošollo ka boikokobetšo

10 Ga go bjalo. Ka ntle le pelaelo Jesu o be a bona gore Mareta o na le lerato le maikemišetšo a mabotse. Go feta moo, o be a sa nagane gore go fošagetše go apeela baeng dijo tše dintši. O be a kile a ya “[monyanyeng] o mogolo wa kamogelo” woo Mateo a bego a mo diretše wona pejana. (Luka 5:29) Tabakgolo mo e be e se dijo tša Mareta; go e na le moo, e be e le dilo tšeo a bego a di etiša pele. O be a tshwenyegile kudu ka dijo tše dintši moo e lego gore o ile a se lemoge seo se bego se le bohlokwa kudu. E be e le eng sona seo?

Jesu o ile a tšeela godimo moya wa Mareta wa go amogela baeng gomme o be a tseba gore o na le lerato le maikemišetšo a mabotse

11, 12. Jesu o ile a phošolla Mareta bjang ka botho?

11 Jesu, Morwa yo a tswetšwego a nnoši wa Jehofa Modimo, o be a le ka legaeng la gabo Mareta go tlo ruta therešo. Ga go selo seo se bego se le bohlokwa go feta seo, go akaretša le dijo tša Mareta tše di rothišago mare. Ka ntle le pelaelo Jesu o ile a nyamišwa ke go bona Mareta a fetwa ke sebaka sa moswananoši sa go matlafatša tumelo ya gagwe, eupša o ile a mo dumelela gore a itirele phetho. * Go sa šetšwe phetho yeo a bego a tla e dira, o be a sa swanela go direla Maria phetho ya gore a fetwe ke sebaka sa go rutwa ke Jesu.

12 Ka baka leo, o ile a phošolla Mareta ka botho, a bitša leina la gagwe gabedi ka boleta e le gore a theoše maswafo a gagwe, gomme a mo kgonthišetša ka gore go be go sa nyakege gore a “[belaele] le go tshwenyega ka dilo tše dintši.” Dijo tše sego kae di be di lekane, kudukudu ka ge go be go na le dijo tše dintši tša moya. Ka gona, o be  a ka se dire selo go amoga Maria “kabelo e botse” yeo a bego a e kgethile ya go ithuta go Jesu!

13. Re ka ithuta’ng tseleng yeo Jesu a ilego a phošolla Mareta?

13 Re ka ithuta mo gontši pegong ye. Ga se ra swanela go dumelela selo le ge e le sefe se šitišana le go kgotsofatša ‘senyakwa sa rena sa moya.’ (Mat. 5:3) Gaešita le ge re nyaka go ekiša mohlala wa Mareta wa go ba le seatla se se bulegilego le wa go šoma ka thata, le ka mohla ga re nyake go “belaela le go tshwenyega” kudu ka dilo tšeo di sego bohlokwa tša go sepedišana le go amogela baeng moo re feleletšago re fetwa ke dilo tše bohlokwahlokwa. Re gwerana le badumedigotee, e sego feela go ba fa goba go hwetša dijo tša matsaka, eupša gape le go kgothatšana le go fana dimpho tša moya. (Bala Baroma 1:11, 12.) Re ka ipshina ka go ba gotee gaešita le ge go ka jewa dijo tše dinyenyane.

 Kgaetšedi yo a Rategago o a Hwa—e Bile o a Tsošwa

14. Ke ka baka la’ng re ka re Mareta o re beetše mohlala o mobotse wa go amogela phošollo?

14 Na Mareta o ile a amogela kgalemelo ya Jesu e botho le go ithuta go yona? Re a tseba gore o ile a dira bjalo. Ge moapostola Johane a rola pego e kgahlišago ya mabapi le kgaetšedi ya Mareta, o re gopotša ka gore: “Bjale Jesu o be a rata Mareta le ngwanabo le Latsaro.” (Joh. 11:5) Go be go fetile dikgwedi ga e sa le Jesu a etela Bethania bjalo ka ge go hlalositšwe ka mo godimo. Go molaleng gore Mareta ga se a ka a ngala; ga se a ka a bolokela Jesu sekgopi ka baka la keletšo ya gagwe e lerato. O ile a e amogela ka pelo ka moka. Le mo tabeng ye, o re beetše mohlala o mobotse kudu wa tumelo, ka gobane ka moka ga rena re fela re tsoma go phošollwa go se nene.

15, 16. (a) Go bonagala Mareta a ile a dira’ng ge kgaetšedi ya gagwe e babja? (b) Ke ka baka la’ng seo Mareta le Maria ba bego ba se holofetše se ile sa se phethagale?

15 Ge kgaetšedi’agwe e babja, Mareta o ile a swarega kudu ka go mo hlokomela. O dirile sohle seo a ka se kgonago go mo thuša go se kwe bohloko kudu le go mo thuša gore a be kaone. Lega go le bjalo, Latsaro o ile a babja le go feta. Dikgaetšedi tša gagwe di ile tša tšwela pele di mo hlokomela iri e nngwe le e nngwe le letšatši le lengwe le le lengwe. Mareta o swanetše go ba a ile a dulela go lebelela kgaetšedi’agwe yo a lapilego, a gopola nywaga yeo ba e feditšego ba le gotee le dilo tšeo ba di thabetšego ba le gotee go akaretša le manyami a bona!

16 Ge go be go bonagala eka Latsaro o be a babja moo ba ka se sa kgonago go mo thuša, Mareta le Maria ba ile ba romela molaetša go Jesu. O be a dira boboledi lefelong leo go bego go tšea matšatši a mabedi go ya go lona go tloga Bethania. Molaetša wa bona e be e le o mokopana, o re: “Morena, tseba gore motho yo o mo ratago o a babja.” (Joh. 11:1, 3) Ba be ba tseba gore Jesu o be a rata kgaetšedi ya bona e bile ba be ba na le tumelo ya gore o be a ka dira sohle seo a ka se kgonago go thuša mogwera wa gagwe. Na ba be ba holofetše gore Jesu o be a ka fihla pele maloba e eba maabane? Ge e ba ba be ba naganne bjalo, dikholofelo tša bona ga se tša ka tša phethagala. Latsaro o ile a hwa.

17. Mareta o ile a makatšwa ke’ng, gona o ile a arabela bjang ge a be a ekwa gore Jesu o batametše motseng?

17 Mareta le Maria ba ile ba llela kgaetšedi ya bona, ba dira ditokišetšo tša gore a bolokwe gotee le go amogela baeng ba bantši bao ba tšwago Bethania le metseng ya kgauswi. Lega go le bjalo, ga ba kwe selo ka Jesu. Ka ntle le pelaelo Mareta o ile a makala le go feta ge nako e dutše e eya. Mafelelong, matšatši a mane ka morago ga lehu la Latsaro, Mareta o ile a kwa gore Jesu o be a batametše motseng. Ka ge e le mosadi yo mafolofolo, le lebakeng le la manyami, Mareta o ile a  emelela gomme ntle le go botša Maria, a tšwa ka lebelo go yo gahlanetša Jesu.Bala Johane 11:18-20.

18, 19. Mareta o ile a bontšha gore o na le tumelo go eng, gona ke ka baka la’ng yeo e be e le tumelo e kgolo?

18 Eitše ge Mareta a bona Mong wa gagwe, a bolela seo se bego se tshwentše yena le Maria matšatšing ao a fetilego, a re: “Morena, ge nkabe o be o le mo, kgaetšedi ya ka nkabe a se a hwa.” Lega go le bjalo, Mareta o be a se a lahlegelwa ke kholofelo le tumelo. O okeditše ka gore: “Le ga bjale ke a tseba gore dilo tše dintši tše o di kgopelago go Modimo, Modimo o tla go nea tšona.” Gateetee Jesu o ile a bolela selo se itšego go matlafatša kholofelo ya gagwe, a re: “Kgaetšedi ya gago o tla tsoga.”Joh. 11:21-23.

19 Mareta o be a nagana gore Jesu o be a bolela ka tsogo ya nakong e tlago, ka baka leo o ile a araba ka gore: “Ke tseba gore o tla tsoga tsogong letšatšing la mafelelo.” (Joh. 11:24) Tumelo ya gagwe thutong yeo e be e le e kgolo kudu. Baetapele ba bangwe ba bodumedi bja Sejuda, bao ba bitšwago Basadutsei, ba be ba gana gore go tlo  ba le tsogo ya bahu, gaešita le ge e be e le thuto e kwagalago ka Mangwalong a buduletšwego. (Dan. 12:13; Mar. 12:18) Lega go le bjalo, Mareta o be a tseba gore Jesu o rutile ka kholofelo ya tsogo e bile o be a kile a tsoša bahu—gaešita le ge go be go se le o tee wa bona yoo a bego a hwile nako e telele go swana le Latsaro. O be a sa tsebe seo se bego se tlo direga.

20. Hlalosa seo se bolelwago ke mantšu a sa lebalegego a Jesu le karabo ya Mareta yeo e lego go Johane 11:25-27.

20 Ke moka Jesu o ile a bolela mantšu ao a sa lebalegego a re: “Ke nna tsogo le bophelo.” Ee, Jehofa Modimo o file Morwa wa gagwe matla a go tsoša bahu lefaseng ka bophara nakong e tlago. Jesu o ile a botšiša Mareta a re: “Na o dumela se?” Ke moka o ile a nea karabo yeo e lego sehlogo sa kgaolo ye. O be a na le tumelo ya gore Jesu e be e le Kriste, goba Mesia, gore e be e le Morwa wa Jehofa Modimo le gore baporofeta ba be ba boletše e sa le pele gore o be a tlo tla lefaseng.Joh. 5:28, 29; bala Johane 11:25-27.

21, 22. (a) Jesu o ile a dira’ng go bontšha gore o kwela bao ba hwetšwego bohloko? (b) Hlalosa seo se diragetšego ge Latsaro a tsoga.

21 Na Jehofa Modimo le Morwa wa gagwe, Jesu Kriste, ba tšeela godimo tumelo e swanago le ya Mareta? Ditiragalo tšeo Mareta a tlago go di bona di nea karabo e kwagalago gabotse. O ile a kitimela go yo bitša ngwanabo. Ka morago ga moo, o ile a bona gore Jesu o be a nyamile kudu ge a be a bolela le Maria le batho ba bantši bao ba bego ba lla bao ba bego ba na le yena. Mareta o ile a bona mahlo a Jesu a tlala megokgo ge ka bolokologi a bontšha gore o nyamile ka baka la bohloko bjo bo bakwago ke lehu. O ile a kwa ge Jesu a laela gore leswika le tlošwe molomong wa lebitla la kgaetšedi’agwe.Joh. 11:28-39.

22 Ka ge a be a lebelela dilo ka tsela ya kgonthe, Mareta o ile a bolela gore setopo ga bjale se swanetše go ba se be se nkga, ka ge a na le matšatši a mane a hwile. Jesu o ile a mo gopotša ka gore: “Na ga se ka go botša gore ge e ba o ka dumela o tla bona letago la Modimo?” O be a dumela seo gomme o ile a bona letago la Jehofa Modimo. Ka yona nako yeo, Jehofa o ile a nea Morwa wa gagwe matla a go tsoša Latsaro bahung! Akanya ka tiragalo ye yeo Mareta a bego a tla dula a e gopola bophelong bja ga gagwe ka moka: Ge a ekwa Jesu a goeletša a laela a re: “Latsaro, tšwaa!”; ge a ekwa lešatana le le tšwago ka leweng leo Latsaro a boloketšwego ka go lona ge monna yo a tsoga a sa tatedišwe ka mašela a lebile molomong wa lewa; ge a ekwa taelo ya Jesu ya gore “mo tatolleng, le mo lese a sepele”; gotee le ge yena le Maria ba kitimela ka matsogong a kgaetšedi ya bona gomme ba mo gokarela ka borutho. (Bala Johane 11:40-44.) Bohloko bjoo bo bego bo tletše pelong ya Mareta bo ile bja tloga!

Tumelo ya Mareta go Jesu e ile ya putswa ge a be a bona kgaetšedi’agwe e tsošwa

23. Jehofa le Jesu ba nyaka go go direla’ng, gona wena o swanetše go dira’ng?

23 Pego ye e bontšha gore tsogo ya bahu ga se toro feela; ke thuto  ya Beibele yeo e kgothatšago le selo sa kgonthe seo se hlatselwago ke histori. (Jobo 14:14, 15) Jehofa le Morwa wa gagwe ba rata go putsa bao ba nago le tumelo, bjalo ka ge ba putsitše Mareta, Maria le Latsaro. Le wena ba tla go putsa ka tsela yeo ge e ba o ka ba le tumelo e matla.

“Mareta a ba Direla”

24. Ke selo sefe sa mafelelo seo pego ya Beibele e se bolelago ka Mareta?

24 Pego ya Beibele e bolela ka Mareta lebakeng le lengwe gape. E be e le mathomong a beke ya mafelelo ya bophelo bja Jesu a le lefaseng. Ka ge a be a tseba gabotse ka mathata ao a bego a letše ka pele, Jesu gape o ile a kgetha lefelo le la Bethania gore a dule go lona. Go tloga moo o be a tla sepela dikhilomithara tše tharo go ya Jerusalema. Jesu le Latsaro ba be ba eja legaeng la Simone wa molephera, gomme moo re kwa go bolelwa ka Mareta la mafelelo ge go thwe: “Mareta a ba direla.”Joh. 12:2.

25. Ke ka baka la’ng re re diphuthego lehono di šegofaditšwe ka go ba le basadi bao ba swanago le Mareta?

25 Se ruri ke seo mosadi yoo yo mafolofolo a bego a tlwaetše go se dira! Ge Beibele e bolela ka yena ka lekga la mathomo, e bolela ka yena a šoma; ge e bolela ka yena la mafelelo, e bolela ka yena a sa šoma, a dira sohle seo a ka se kgonago go hlokomela dinyakwa tša bao a nago le bona. Diphuthego tša balatedi ba Jesu lehono di šegofaditšwe ka basadi ba swanago le Mareta—bao ba nago le sebete le seatla se se bulegilego, bao ba dulago ba bonagatša tumelo ya bona ka go ikgafa. Na Mareta o ile a tšwela pele a dira sona seo? Go bonagala a ile a dira bjalo. Ge e ba go le bjalo, o dirile ka bohlale, ka gobane o be a sa tlo kopana le mathata a itšego.

26. Tumelo ya Mareta e ile ya mo thuša go dira’ng?

26 Matšatši a sego kae ka morago, Mareta o ile a swanelwa ke go kgotlelela lehu le bohloko la Mong wa gagwe yo a rategago, Jesu. Go feta moo, baikaketši bao ba nyoretšego polao bao ba mmolailego ba be ba ikemišeditše le go bolaya Latsaro, ka ge tsogo ya gagwe e be e matlafatša tumelo ya ba bantši. (Bala Johane 12:9-11.) Le gona ke therešo gore lehu mafelelong le ile la aroganya Mareta le bana ba gabo bao a ba ratago. Ga re tsebe gore seo se diregile bjang goba neng, eupša seo re ka kgonthišegago ka sona ke se: Tumelo e kgolo ya Mareta e mo thušitše go kgotlelela go fihla bofelong. Ke ka baka leo Bakriste lehono ba swanetšego go ekiša tumelo ya Mareta.

^ par. 11 Go Bajuda ba lekgolong la pele la nywaga, basadi ba be ba sa tšee karolo medirong ya thuto. Sa bona e be e le go rutwa mediro ya ka gae. Ka gona Mareta o be a makatšwa ke go bona mosadi a dutše fase a theeditše ge motho yo mongwe a ruta.