Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ekiša Tumelo ya Bona

 KGAOLO YA MASOPEDI-TEE

O Ile a Lwantšhana le Poifo le Pelaelo

O Ile a Lwantšhana le Poifo le Pelaelo

1-3. Petro o bone’ng letšatšing leo la ditiragalo gomme go ile gwa direga’ng bošego?

PETRO o be a lapišitšwe ke lehuduo gomme a phafogile bošego ka moka. Na seetšana seo se sa bonagalego gabotse seo a bego a se bona thokong ya bohlabela e be e le pontšho ya gore go kgauswi le go sa? Mešifa ya gagwe ya mokokotlo le ya magetla e be e lapišitšwe ke go hudua sekepe diiri tše dintši. Diphefo tše matla di ile tša dira gore Lewatle la Galilea le galefe. Maphoto a be a betha hlogo ya sekepe sa go rea dihlapi gomme a gaša Petro ka meetse a tonyago. O ile a tšwela pele a hudua sekepe.

2 Kua lebopong, Petro le bagwera ba gagwe ba be ba tlogetše Jesu a nnoši. Letšatšing lona leo, ba be ba bone Jesu a diriša dinkgwa le dihlapi tše sego kae go fepa lešaba la ba dikete leo le bego le swerwe ke tlala. Batho ba ile ba nyaka go dira Jesu kgoši, eupša o be a sa nyake go tšea karolo dipolitiking. Le gona o be a ikemišeditše go kgothaletša balatedi ba gagwe gore ba se ke ba phegelela dipakane tše bjalo. O ile a tšhabela mašaba, a laela barutiwa ba gagwe gore ba namele sekepe gomme ba ye lebopong ka mošola ge yena a be a eya go rapela thabeng a nnoši.Mar. 6:35-45; bala Johane 6:14-17.

3 E be e le gare ga bošego ge barutiwa ba be ba namela sekepe; ga bjale ngwedi o be o sobelela ganyenyane-ganyenyane ka thokong ya bodikela. Ba ile ba kgona go sepela feela dikhilomithara tše mmalwa. Go tšutla ga phefo le modumo wa maphoto, go ile gwa dira gore barutiwa ba palelwe le ke go boledišana. Mohlomongwe Petro o be a ile le monagano.

Petro o be a ithutile go gontši nywageng e mebedi ya ge a be a na le Jesu, eupša go be go sa na le dilo tše dintši tšeo a bego a sa tlo ithuta tšona

4. Ke ka baka la’ng Petro e le mohlala o mobotse woo re swanetšego go o ekiša?

4 Ruri o be a na le dilo tše dintši tšeo a ka naganago ka tšona! Petro  o be a na le nywaga ya ka godimo ga e mebedi a bona ditiragalo tše di kgahlišago tša Jesu wa Natsaretha. O be a ithutile go gontši, eupša go be go sa na le dilo tše dintši tšeo a bego a sa tlo ithuta tšona. Go ikemišetša ga gagwe go ithuta go mo dira mohlala o mobotse woo re swanetšego go o latela, gaešita le ge a ile a lwantšhana le mapheko a bjalo ka dipelaelo le poifo. A re boneng lebaka.

“Re Hweditše Mesia”!

5, 6. Petro o be a phela bophelo bja mohuta mang?

5 Petro o be a ka se tsoge a lebetše letšatši leo a ilego a gahlana le Jesu ka lona. Ngwanabo e lego Andrea, o ile a thoma ka go mo tlišetša ditaba tše di kgahlišago, a re: “Re hweditše Mesia.” Ona mantšu ao, a ile a thoma go fetoša bophelo bja Petro. E be e le ge bo fetogetše sa ruri.Joh. 1:41.

6 Petro o be a dula Kaperenaume, motse wo o lego lebopong la letsha la Lewatle la Galilea leo le nago le meetse a se nago letswai. Yena le Andrea ba be ba šoma le barwa ba Tsebedeo e lego Jakobo le Johane, kgwebong ya go rea dihlapi. Petro o be a sa dule le mosadi wa gagwe feela, eupša o be a dula le mmatswalagwe gotee le ngwanabo e lego Andrea. Ka ntle le pelaelo go be go nyakega gore a šome ka thata, a be le matla gotee le bokgoni bja go rarolla mathata gore a hlokomele lapa leo ka go rea dihlapi. Re ka akanya banna bao ba šoma ka thata bošego ka moka—ba goga malokwa a lego magareng ga dikepe tše pedi gomme ba goga dihlapi tšeo ba di swerego ka letsheng. Re ka akanya le ka matšatši ao ba bego ba a fetša ba šoma ka thata, ba arola dihlapi gomme ba di rekiša, ba lokiša malokwa le go a hlwekiša.

7. Petro o ile a kwa’ng ka Jesu, gona ke ka baka la’ng tšeo e be e le ditaba tše di kgahlišago?

7 Beibele e re botša gore Andrea e be e le morutiwa wa Johane Mokolobetši. Ga go pelaelo gore Petro o be a kgahlišwa ke go kwa ge ngwanabo a mmotša ka molaetša wa Johane. Ka letšatši le lengwe, Andrea o ile a bona Johane a šupa Jesu wa Natsaretha gomme a re: “Bonang, Kwana ya Modimo!” Gateetee Andrea o ile a ba molatedi wa Jesu gomme ka mafolofolo a botša Petro ditaba tše tše di kgahlišago, tša gore: Mesia o fihlile! (Joh. 1:35-40) Ka morago ga borabele bja kua Edene mo e ka bago nywaga e 4 000 pele ga moo, Jehofa Modimo o be a holofeditše gore go be go tla tla motho yo bohlokwa yo a bego a tla nea batho kholofelo ya kgonthe. (Gen. 3:15) Andrea o be a šetše a gahlane le Mophološi yoo, Mesia ka boyena! Petro le yena o ile a kitima go yo gahlanetša Jesu.

8. Leina leo Jesu a le filego Petro le be le bolela’ng gomme ke ka baka la’ng ba bangwe ba sa dutše ba belaela gore Petro o swanelwa ke leina leo?

8 Go fihla letšatšing leo, Petro o be a tsebja e le Simone goba Simeoni. Eupša Jesu o ile a mo lebelela gomme a re: “‘O Simone morwa wa Johane; o tla bitšwa Kefase’ (yeo e fetolelwago ka Segerika e le Petro).” (Joh. 1:42) “Kefase” ke leina le le tlwaelegilego leo le rago gore  “letlapa” goba “leswika.” Go molaleng gore mantšu a Jesu e be e le a boporofeta. O ile a bona e sa le pele gore Petro o be a tla ba bjalo ka leswika—a ba tutuetšo e tiilego, e maatla le e botegago go balatedi ba Kriste. Na Petro o be a itebelela ka tsela yeo? Ga go bonagale bjalo. Gaešita le batho ba bangwe bao ba balago dipego tša Ebangedi lehono ga ba bone eka Petro o be a na le dika tšeo di swanago le leswika. Ba bangwe ba šišinya gore o be a bonagala a se a tsepama e bile e le yo a dikadikago go ya ka tsela yeo pego ya Beibele e bolelago ka yena.

9. Jehofa le Morwa wa gagwe ba lebelela’ng go rena, gona ke ka baka la’ng o nagana gore re swanetše go bota pono ya bona?

9 Ke therešo gore Petro o be a na le mafokodi. Jesu o be a tseba mafokodi a Petro. Eupša Jesu, go swana le Tatagwe e lego Jehofa, ka mehla o be a lebelela dika tše dibotse bathong. Jesu o be a bone gore Petro o be a ka ba le dika tše dibotse, gomme O be a nyaka go mo thuša go bonagatša dika tšeo tše dibotse. Jehofa le Morwa wa gagwe ba lebelela dika tše dibotse le go rena lehono. Go ka ba thata go dumela gore go na le dika tše dintši tše dibotse tšeo ba ka di hwetšago go rena. Lega go le bjalo, re swanetše go bota pono ya bona gomme re bontšhe gore re ikemišeditše go tlwaetšwa le go bopša go etša Petro.Bala 1 Johane 3:19, 20.

“Tlogela go Boifa”

10. Go bonagala Petro a ile a bona’ng, eupša o ile a boela kae?

10 Mohlomongwe Petro o ile a sepela le Jesu leetong la gagwe la boboledi leo a bego a tlo le tšea. Ka go re’alo a ka ba a ile a bona ge Jesu a dira mohlolo wa gagwe wa pele, wa go fetoša meetse go ba beine monyanyeng kua Kana. Se bohlokwa le go feta, o ile a kwa molaetša wa Jesu o kgahlišago le o tletšego kholofelo wa Mmušo wa Modimo. Le ge a bone dilo tše ka moka, o ile a mo tlogela gomme a boela kgwebong ya gagwe ya go rea dihlapi. Lega go le bjalo, dikgwedi tše itšego ka morago, Petro o ile a kopana le Jesu gape—gomme lebakeng le Jesu o ile a kgopela Petro gore a mo latele ka mo go tletšego.

11, 12. (a) Petro o kgotleletše bošego bja mohuta mang? (b) Petro a ka ba a ile a ipotšiša’ng ge a be a theeditše Jesu?

11 Petro o be a sa tšwa go kgotlelela mošomo o sa kgahlišego wa bošego. Nako le nako ge barei ba dihlapi ba be ba ntšha malokwa a bona ka meetseng, ba be ba hwetša a se na selo. Go molaleng gore Petro o dirišitše phihlelo le bokgoni bja gagwe ka moka go hwetša dihlapi, a leka mafelo a fapafapanego a letsha go nyaka moo dihlapi di hwetšagalago gona. Ga go pelaelo gore go be go na le dinako tšeo yena, go swana le barei ba bantši ba dihlapi, a bego a duma ge a ka kgona go lebelela ka meetseng ao a bilogilego gomme a bona dihlapi tše dintši goba go duma gore di ka tsena ka malokweng a gagwe. Ke therešo gore dikgopolo tše bjalo di be di ka dira gore a ferekane le go feta. Petro o be a sa itloše bodutu ka go rea dihlapi; o be a fepa lapa la gagwe ka go rea dihlapi. Mafelelong, o ile a boela lebopong a se a swara  selo. Lega go le bjalo, o be a swanetše go hlwekiša malokwa. Ka gona, o be a swaregile kudu ka go hlwekiša malokwa ge Jesu a be a mmatamela.

Petro ga se a ka a lapišwa ke go kwa ge Jesu a godiša sehlogo se segolo sa boboledi bja gagwe e lego Mmušo wa Modimo

12 Lešaba le be le pitlagantše Jesu, le theeditše ka phišego seo a bego a se bolela. Ka ge a be a dikologilwe ke lešaba, Jesu o ile a namela sekepe sa Petro gomme a mo kgopela gore a šuthiše sekepe go se nene go tloga lešing. Ka ge lentšu la Jesu le be le kwagala gabotse godimo ga meetse, o ile a ruta lešaba. Petro o ile a theetša ka kelohloko go fo swana le bao ba bego ba le lebopong. Ga se a ka a lapišwa ke go kwa ge Jesu a godiša sehlogo se segolo sa boboledi bja gagwe e lego Mmušo wa Modimo. Ruri e be e tla ba tokelo e kgolo kudu go thuša Kriste go phatlalatša molaetša wo wa kholofelo nageng ka moka! Eupša na o be a ka kgona go dira bjalo? O be a tla fepa lapa la gagwe ka’ng? Mohlomongwe Petro o ile a nagana gape ka bošego bjoo a bo feditšego a leka go rea dihlapi.Luka 5:1-3.

13, 14. Jesu o ile a direla Petro mohlolo ofe, gona Petro o ile a arabela bjang?

13 Ge Jesu a fetša go bolela, o ile a botša Petro gore: “Eyang moo go išago tlase le theošeng malokwa a lena gore le sware dihlapi.” Petro o be a belaela. O itše: “Morutiši, re itapišitše bošego ka moka ra se hwetše selo, eupša ke tla theoša malokwa go ya ka taelo ya gago.” Petro o be a sa tšwa go hlatswa malokwa. Go molaleng gore selo sa mafelelo seo Petro a bego a sa nyake go se dira e be e le go theoša malokwa ao gape—kudukudu ka ge dihlapi di be di sa hwetšagale! Lega go le bjalo, o ile a kwa, mohlomongwe a bontšha badirišani ba gagwe ka sekepeng sa bobedi gore le bona ba dire bjalo.Luka 5:4, 5.

14 Petro o ile a makala ge a be a ekwa malokwa a thoma go mo imela. A tlabegile, o ile a goga a tiišitše, gomme go se go ye kae, o be a kgona go bona dihlapi tše dintši tšeo di bego di nyeuma ka malokweng! A tlaletšwe, o ile a bitša banna bao ba bego ba le sekepeng sa bobedi gore ba tle ba mo thuše. Ge ba dutše ba goga, kapejana ba ile ba lemoga gore sekepe setee se be se ka se kgone go rwala dihlapi tšeo ka moka. Di ile tša tlatša dikepe tše pedi, le gona e be e sa dutše e le tše dintši kudu—dikepe di ile tša thoma go nwelela ka baka la go imelwa. Petro o ile a tlabega o šoro. O be a ile a bona Kriste a diriša matla a gagwe pejana, eupša seo se bego se direga lebakeng le se be se tla hola yena le lapa la gagwe. O be a makaditšwe ke gore Jesu o kgona le go dira gore dihlapi di tsene ka gare ga malokwa! Petro o ile a welwa ke poifo. O ile a khunama pele ga Jesu a re: “Tloga go nna Morena, gobane ke motho wa sebe.” O be a ikwa a sa swanelege go gwerana le Yoo a kgonago go diriša matla a Modimo ka mekgwa e bjalo!Bala Luka 5:6-9.

“Morena, ke motho wa sebe”

15. Jesu o rutile bjang Petro gore poifo le dipelaelo tša gagwe di be di se bohlokwa?

 15 Jesu ka botho o itše: “Tlogela go boifa. Go tloga bjale go ya pele o tla be o swara batho ba phela.” (Luka 5:10, 11) Ye e be e se nako ya go belaela goba go boifa. Petro o be a swanetše go tshwenyega ka modiro o bohlokwa wa boboledi go e na le go tshwenyega ka gore o tla fepa bjang lapa la gagwe goba gore ga a swanelege go dira modiro wa boboledi. Jesu o be a na le modiro o mogolo woo a swanetšego go o dira, bodiredi bjoo bo bego bo tla kgoma bokamoso bja batho. O be a hlankela Modimo yo a ‘lebalelago kudu.’ (Jes. 55:7) Jehofa o be a tla hlokomela dinyakwa tša Petro tša nama le tša moya.Mat. 6:33.

16. Petro, Jakobo le Johane ba ile ba arabela bjang taletšong ya Jesu gomme ke ka baka la’ng seo e be e le phetho e botse kudu?

16 Petro o ile a arabela ka go akgofa, go swana le Jakobo le Johane. “Ba bušetša dikepe lešing, ba tlogela tšohle gomme ba mo latela.”  (Luka 5:11) Petro o ile a bontšha tumelo go Jesu gotee le go Yo a mo romilego. O be a dirile phetho e botse kudu. Bakriste bao lehono ba fenyago poifo le dipelaelo tša bona gore ba hlankele Modimo le bona ba bontšha tumelo. Ka mehla Jehofa o hlokomela bao ba mmotago.Ps. 22:4, 5.

“Ke ka Baka La’ng o Fentšwe ke Pelaelo?”

17. Ke dilo dife tšeo Petro a di gopolago ka nywaga e mebedi yeo a e feditšego a tseba Jesu?

17 Nywaga e ka bago e mebedi ka morago ga go gahlana le Jesu, Petro o ile a hudua sekepe bošegong bjo bo tšutlago phefo Lewatleng la Galilea, go etša ge go boletšwe mathomong a kgaolo ye. Ke therešo gore re ka se tsebe seo a bego a se nagana. Go be go na le dilo tše dintši tšeo a bego a ka nagana ka tšona, Jesu o be a fodišitše mmatswalagwe gomme o be a šetše a neetše Thuto ya Thabeng. Nako le nako ge a be a ruta le ge a dira mehlolo, o ile a bontšha gore ke yena Mesia Yo a Kgethilwego ke Jehofa. Ge dikgwedi di feta, diphošo tša Petro tše bjalo ka tshekamelo ya gagwe ya go ineela poifong le pelaelong di be di fokotšegile go fihla bokgoleng bjo itšego. Jesu o be a šetše a kgethile Petro gore e be yo mongwe wa baapostola ba 12! Lega go le bjalo, go se go ye kae Petro o be a sa tlo bona gore o sa na le poifo le pelaelo.

18, 19. (a) Hlalosa seo Petro a se bonego Lewatleng la Galilea. (b) Jesu o ile a arabela bjang kgopelong ya Petro?

18 Lebakeng la tlhapetšo ya bone ya bošego, goba mo e ka bago magareng ga iri ya boraro mesong le go hlaba ga letšatši, gateetee Petro o ile a kgaotša go hudua sekepe a makaditšwe ke selo se sengwe. O itše a sa lebeletše ka kua ga maphoto, a bona selo seo se sepelago! Na e be e le meetse a maphoto a bontšha seetša sa ngwedi? Aowa, selo sa gona se be se sa šišinyege e bile se eme thwii. E be e le motho! Ee, e be e le motho gomme o be a sepela godimo ga meetse a lewatle! Ge motho yo a batamela, go be go bonagala eka o tla feta kgauswi le bona. Ka letšhogo, barutiwa ba be ba nagana gore ke seriti. Motho yoo o ile a re: “Tiang matla! Ke nna; le se boife.” E be e le Jesu!Mat. 14:25-28.

19 Petro o ile a araba ka gore: “Morena, ge e ba e le wena, ntaele gore ke tle go wena ke sepela godimo ga meetse.” Mathomong o ile a bontšha sebete. Ka ge a be a kgahlilwe ke mohlolo wo wa moswananoši, Petro o ile a nyaka go tiiša tumelo ya gagwe le go feta. O be a nyaka go akaretšwa go seo se diregago. Ka botho, Jesu o ile a mmitša. Petro o ile a fologa sekepe gomme a sepela godimo ga meetse ao a nago le maphoto a lewatle. Akanya kamoo Petro a ilego a ikwa ka gona ge a hwetša gore moo a bego a gata gona go be go tiile gomme a kgona go ema godimo ga meetse. O swanetše go ba a ile a makala ge a eya go Jesu. Lega go le bjalo, kapejana dilo di ile tša thoma go fetoga.Bala Mateo 14:29.

“Ge a lebelela ledimo, a tšhoga”

20. (a) Petro o ile a šitišwa ke’ng gomme seo se ile sa feleletša ka’ng? (b) Jesu o ile a ruta Petro thuto efe e bohlokwa?

 20 Petro o be a swanetše go dula a lebišitše tlhokomelo ya gagwe go Jesu. E be e le Jesu yo a bego a dira gore Petro a be ka godimo ga maphoto a diriša matla a Jehofa. Le gona Jesu o be a dira se ka baka la tumelo yeo Petro a bego a na le yona. Eupša Petro o ile a šitišega. Re bala gore: “Ge a lebelela ledimo, a tšhoga.” Petro o ile a bona maphoto ao a betha sekepe, a gašanya meetse le mahulo, gomme a thoma go tšhoga. Mohlomongwe o ile a ipona a nwelela ka letsheng leo gomme a kgangwa ke meetse. Ge poifo e dutše e gola ka pelong ya gagwe, tumelo ya gagwe e ile ya fokotšega. Monna yo yoo a ilego a reelwa leina la Leswika ka baka la ge a be a bonagala a sa šišinyege o ile a thoma go nwelela bjalo ka leswika ka baka la tumelo ya gagwe e fokolago. Petro o be a kgona go rutha, eupša ga bjale ga se a ka a ithekga ka bokgoni bjoo. O ile a goeletša a re: “Morena, mphološe!” Jesu o ile a mo swara ka letsogo gomme a mo ntšha ka moo meetseng. Ke moka, ge a sa dutše a le godimo ga meetse, o ile a gatelela thuto ye e bohlokwa go Petro: “Wena wa tumelo e nyenyane, ke ka baka la’ng o fentšwe ke pelaelo?”Mat. 14:30, 31.

21. Ke ka baka la’ng poifo e le kotsi, gona re ka e lwantšha bjang?

21 ‘Go fenywa ke pelaelo’—a ke mantšu a swanelegago gakaakang! Pelaelo e ka re bakela mathata a magolo. Ge e ba re ineela go yona, e ka senya tumelo ya rena ganyenyane-ganyenyane. Re swanetše go lwantšhana le yona! Bjang? Ka go tshwenyega ka dilo tše di swanetšego. Ge e ba re tshwenyega ka seo se re boifišago, seo se re nyamišago le seo se re aroganyago le Jehofa le Morwa wa gagwe, gona dipelaelo tša rena di tla oketšega. Ge e ba re tshwenyega ka Jehofa le Morwa wa gagwe, ka seo ba re diretšego sona, seo ba re direlago sona gotee le ka seo ba tlago go se direla bao ba ba ratago, re ka se be le dipelaelo tšeo di tla senyago tumelo ya rena.

22. Ke ka baka la’ng re swanetše go ekiša tumelo ya Petro?

22 Ge Petro a be a latela Jesu ba lebile sekepeng, o ile a bona ledimo le okobala. Lewatle la Galilea le ile la homola. Petro o ile a tlatša barutiwa ba bangwe ge ba re: “Ruri o Morwa wa Modimo.” (Mat. 14:33) Ge go esa, Petro o swanetše go ba a be a tletše tebogo. O ile a lahla poifo le dipelaelo. Ke therešo gore o be a swanetše go dira diphetogo tše dintši pele a ka ba Mokriste yo a swanago le leswika yoo Jesu a mmonego. Eupša o be a ikemišeditše go dula a leka go kaonefatša. Na le wena o ikemišeditše go dira bjalo? O tla hwetša gore tumelo ya Petro e swanelwa ke go ekišwa.