Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ekiša Tumelo ya Bona

 KGAOLO YA LESOMEŠUPA

“Bona, Nna Lekgoba la Jehofa!”

“Bona, Nna Lekgoba la Jehofa!”

1, 2. (a) Maria o ile a dumedišwa bjang ke motho yo a sa mo tsebego? (b) Maria o ile a swanelwa ke go dira phetho efe gona e ile ya fetoša bjang bophelo bja gagwe?

MARIA o ile a makala ge a bona moeng a tsena ka gabo. Moeng yo o be a sa nyake tatagwe goba mmagwe. O be a tlile go tlo bona Maria! Maria o be a kgodišegile gore moeng yo o be a sa tšwe Natsaretha. Go be go se thata go bona batho bao ba sa dulego moo ka ge motse wa gabo e be e le o monyenyane. Yo yena o be a tloga a fapane le badudi ba moo. O ile a dumediša Maria ka tsela e sa tlwaelegago, a re: “Dumela, wena yo a ratilwego kudu, Jehofa o na le wena.”Bala Luka 1:26-28.

2 Ge Beibele e re botša ka Maria, e re ke morwedi wa Heli, yo a tšwago motseng wa Natsaretha kua Galilea. Beibele e re tsebiša yena ka nako yeo a swanetšego go dira diphetho tša bohlokwa. O be a beeleditšwe go tlo nyalwa ke Josefa wa mmetli, e lego monna yo a sego a huma eupša e le yo a nago le tumelo. Ka gona, go be go bonagala eka o be a tseba seo a tlago go se dira bophelong—e lego bophelo bjo bonolo bja go ba mothekgi wa Josefa, yoo a bego a tla thoma lapa le yena. Lega go le bjalo, gateetee o ile a ikhwetša a na le moeng yo yoo a bego a mo tlišeditše kabelo e tšwago go Modimo wa gagwe, e lego boikarabelo bjo bo bego bo tla fetoša bophelo bja gagwe.

3, 4. E le gore re tsebe Maria, re swanetše go hlokomologa’ng gomme re hlokomele’ng?

3 Batho ba bantši ba makatšwa ke gore Beibele ga e re botše mo gontši ka Maria. E re botša mo gonyenyane ka setlogo sa gagwe le semelo sa gagwe gomme ga e re botše selo ka ponagalo ya gagwe. Lega go le bjalo, seo Lentšu la Modimo le se bolelago ka yena se tloga se utolla mo gontši.

4 E le gore re tsebe Maria, re swanetše go hlokomologa dikgopolo tše dintši ka yena tšeo di rutwago madumeding a fapafapanego. Re hlokomologe le diswantšho tša gagwe tše dintši tšeo di thadilwego, tšeo di dirilwego ka mmabole goba samente. Le gona a re hlokomologeng dithuto tše di raraganego tšeo di rutwago ka mosadi yo yoo a ikokobeditšego tšeo di dirilego gore a newe direto tše di mo godišago tše bjalo ka “Mmago Modimo” le “Kgošigadi ya Legodimo.” Go e na le moo, anke re lebišeng tlhokomelo go seo ge e le gabotse Beibele e se utollago ka  yena. E re nea kwešišo ya bohlokwa kudu mabapi le tumelo ya gagwe le kamoo re ka e ekišago ka gona.

Maria o Etelwa ke Morongwa

5. (a) Re ka ithuta’ng ka Maria tseleng yeo a ilego a arabela ka yona tumedišong ya Gabariele? (b) Ke thuto efe e bohlokwa yeo re ka ithutago yona go Maria?

5 Moeng wa Maria e be e se motho. E be e le morongwa Gabariele. Ge a be a bitša Maria gore ke “yo a ratilwego kudu,” Maria o ile a “tshwenywa kudu” ke mantšu ao gomme a thoma go ipotšiša ka tumedišo ye e sa tlwaelegago. (Luka 1:29) O be a ratilwe kudu ke mang? Maria o be a sa letela gore a ratwe kudu ke batho. Eupša morongwa o be a bolela ka go ratwa ke Jehofa Modimo. Seo e be e le sa bohlokwa go Maria. Lega go le bjalo, ga se a ka a phetha ka boikgantšho gore o be a ratwa ke Modimo. Ge e ba re nyaka go ratwa ke Modimo, re sa phethe ka boikgantšho gore o šetše a re rata, re tla ithuta thuto ya bohlokwa yeo Maria a ilego a e kwešiša ka mo go feletšego. Modimo o ganetša bao ba ikgogomošago, eupša o rata le go thekga bao ba ikokobeditšego.Jak. 4:6.

Maria ga se a ikgantšha ka gore o be a ratwa ke Modimo

6. Morongwa o ile a nea Maria kabelo efe e kgethegilego?

6 Go be go tla nyakega gore Maria a be le boikokobetšo bjo bjalo, ka gobane morongwa o ile a mo nea kabelo e kgethegilego yeo a bego a sa nagane gore a ka e newa. O ile a mo hlalosetša gore o be a tla belega ngwana yo e bego e tla ba yo bohlokwa kudu gare ga batho ka moka. Gabariele o itše: “Jehofa Modimo o tla mo nea sedulo sa bogoši sa Dafida tatagwe, o tla buša e le Kgoši ntlong ya Jakobo ka mo go sa felego gomme Mmušo wa gagwe o ka se fele.” (Luka 1:32, 33) Maria o swanetše go ba a be a tseba seo Modimo a se holofeditšego Dafida nywageng e fetago e sekete pele ga moo—gore yo mongwe wa ditlogolo tša gagwe o tla buša ka mo go sa felego. (2 Sam. 7:12, 13) Ka gona, morwa wa gagwe e be e tla ba Mesia yoo batho ba Modimo ba bego ba dutše ba mo letetše ka nywagakgolo e mentši!

Morongwa Gabariele o ile a botša Maria gore o be a neilwe tokelo e kgolo kudu

7. (a) Potšišo ya Maria e ile ya utolla’ng ka yena? (b) Bafsa ba ka ithuta’ng go Maria?

7 Go oketša moo, morongwa yoo o ile a mmotša gore morwa wa gagwe o be a tla “bitšwa Morwa wa Yo Godimodimo.” Ke bjang mosadi yo e lego motho a ka belegago Morwa wa Modimo? Ge e le gabotse, Maria o be a ka belega morwa bjang? O be a beeleditšwe ke Josefa eupša o be a se a hlwa a mo nyala. Maria o ile a botšiša potšišo ye ka go lebanya: “Se se tla direga bjang, gobane ga se ka ka ka robala le monna?” (Luka 1:34) Ela hloko gore Maria o boletše ka bokgarebe bja gagwe ka ntle le go lewa ke dihlong. Go e na le moo, o be a tšeela godimo bohlweki bja gagwe. Lehono, bafsa ba bantši ba fagahlela go lahla bokgarebe goba bosogana bja bona gomme ba akgofela go kwera bao ba sa dirego bjalo.  Ruri lefase le fetogile. Lega go le bjalo, Jehofa ga se a fetoga. (Mal. 3:6) Go swana le mehleng ya Maria, o tšeela godimo bao ba kgomarelago melao ya gagwe ya boitshwaro.Bala Baheberu 13:4.

8. Le ge Maria a be a sa phethagala, o be a ka belega bjang ngwana yo a phethagetšego?

8 Gaešita le ge e be e le mohlanka yo a botegago wa Modimo, Maria e be e le motho yo a sa phethagalago. Ka gona, o be a ka belega bjang ngwana yo a phethagetšego, e lego Morwa wa Modimo? Gabariele o hlalositše gore: “Moya o mokgethwa o tla theogela go wena gomme matla a Yo Godimodimo a tla go aparetša. Ka baka leo, le yo a tlago go belegwa o tla bitšwa yo mokgethwa, Morwa wa Modimo.” (Luka 1:35) Go ba yo mokgethwa go bolela “go hlweka,” “go seka,” “go kgethega.” Gantši batho ba fetišetša boemo bja bona bja go se hlweke le bja go ba badiradibe baneng ba bona. Lega go le bjalo, tabeng ye Jehofa o be a tla dira mohlolo wa moswananoši. O be a tla fetišetša bophelo bja Morwa wa gagwe ka popelong ya Maria go tšwa legodimong gomme a diriše matla a gagwe a šomago goba moya o mokgethwa go “aparetša” Maria, e le gore a šireletše ngwana sepatsong le ge e le sefe sa sebe. Na Maria o ile a dumela kholofetšo ya morongwa? O ile a arabela bjang?

Karabelo ya Maria go Gabariele

9. (a) Ke ka baka la’ng batho bao ba belaelago pego ya Maria ba fošitše? (b) Gabariele o ile a matlafatša tumelo ya Maria bjang?

9 Batho bao ba belaelago mohlolo wo, go akaretša le borathutatumelo ba bangwe ba Bojakane, ba thatafalelwa ke go dumela gore kgarebe e ka belega ngwana. Go sa šetšwe thuto ka moka yeo ba nago le yona, ba palelwa ke go kwešiša therešo ye e bonolo. Go etša ge Gabariele a boletše, “go Modimo ga go mantšu ao a ka se phethagatšwego.” (Luka 1:37) Maria o ile a amogela mantšu a Gabariele e le therešo, ka gobane e be e le kgarebe yeo e nago le tumelo e matla. Lega go le bjalo, Maria e be e se madumelatšohle. Go etša motho le ge e le ofe yo a kgonago go nagana, Maria o be a nyaka bohlatse bjoo a bego a ka thea tumelo ya gagwe go bjona. Gabariele o ile a mo nea bohlatse bjo bjalo. O ile a mmotša ka motswalo wa gagwe yo a tšofetšego e lego Elisabetha, yo a tsebilwego ka nako e telele e le moopa. Modimo o be a dirile gore a ime ka mohlolo!

10. Ke ka baka la’ng re sa swanela go phetha ka gore kabelo ya Maria e be e sa boifiše e bile e se thata?

10 Maria o be a tla dira’ng ga bjale? O be a sa tšwa go newa kabelo ya gagwe gomme o be a na le bohlatse bja gore Modimo o be a tla dira sohle seo Gabariele a se boletšego. Ga se ra swanela go phetha ka gore kabelo ye e kgethegilego ga se ya mmakela mathata goba go mo dira gore a boife. Ka mohlala, o be a swanetše go naganišiša ka go beeletšwa ga gagwe ke Josefa. Na Josefa o be a sa tlo nyala Maria ka morago ga go kwa gore o imile? Bothata bjo bongwe ke gore kabelo ye ka boyona e ka ba e ile ya bonagala e le boikarabelo bjo boima. O be a tla rwala bophelo  bja motho yo bohlokwa kudu gare ga dibopiwa tša Modimo ka moka—Morwa wa Modimo yo a ratwago! O be a tla swanelwa ke go mo hlokomela ge e be e sa le lesea leo le sa kgonego go itirela selo gomme a mo šireletše lefaseng le kgopo. Ka kgonthe bjo e be e tla ba boikarabelo bjo bogolo!

11, 12. (a) Ka dinako tše dingwe banna ba bangwe ba matla bao ba botegago ba ile ba arabela bjang ge Modimo a ba nea dikabelo tše boima? (b) Tsela yeo Maria a ilego a araba Gabariele e ile ya utolla’ng ka yena?

11 Beibele e bontšha gore ka dinako tše dingwe gaešita le banna ba matla bao ba botegago ba ile ba dikadika go amogela dikabelo tše boima tše di tšwago go Modimo. Moshe o ile a gana a re ga a kgone go bolela gabotse gore a ka ba mmoleledi wa Modimo. (Ek. 4:10) Jeremia o ile a gana a re e be e “fo ba mošemanyana,” a ipona e le yo monyenyane kudu gore a ka amogela modiro woo Modimo a bego a mo abetše wona. (Jer. 1:6) Jona yena o ile a tšhabela kabelo ya gagwe! (Jona 1:3) Go thwe’ng ka Maria?

12 Lehono batho ba sa gopola mantšu a gagwe ao a bontšhago go kwa le boikokobetšo. O boditše Gabariele gore: “Bona, nna lekgoba la Jehofa! A go ntiragalele go ya ka mantšu a gago.” (Luka 1:38) Lekgoba e be e le mohlanka wa maemo a tlasetlase; bophelo bja gagwe bo be bo laolwa ke mong wa gagwe ka mo go feletšego. Ke kamoo Maria a bego a ikwa ka gona ka Jehofa Mong wa gagwe. Maria o be a tseba gore o šireletšegile ka diatleng tša Modimo, gore Jehofa o botegela bao ba mmotegelago le gore o be a tla mo šegofatša ge a dira sohle seo a ka se kgonago kabelong ye e boima.Ps. 18:25.

Maria o be a tseba gore o šireletšegile ka diatleng tša Modimo wa gagwe yo a botegago Jehofa

13. Mohlala wa Maria o ka re hola bjang ge e ba go bonagala go le thata goba go sa kgonege go dira seo Modimo a se nyakago go rena?

13 Ka dinako tše dingwe Modimo o re kgopela gore re dire dilo tšeo re ka bonago di le thata goba di sa kgonege. Lega go le bjalo, ka Lentšung la gagwe o re nea mabaka a mantši a go mmota ka mo go feletšego, go etša ge Maria a dirile. (Die. 3:5, 6) Na re tla dira bjalo? Ge e ba re dira bjalo, o tla re putsa, a re nea mabaka a oketšegilego a gore re be le tumelo e matla kudu go yena.

Maria o Etela Elisabetha

14, 15. (a) Jehofa o ile a putsa Maria bjang ge a be a etetše Elisabetha le Sakaria? (b) Mantšu a Maria ao a begilwego go Luka 1:46-55 a utolla’ng ka yena?

14 Seo Gabariele a se boletšego ka Elisabetha se ile sa kgoma Maria kudu. Ke mosadi ofe gare ga basadi ka moka yoo a bego a ka kwešiša boemo bja Maria gakaone go feta Elisabetha? Maria o ile a akgofela go ya nageng yeo e lego dithabeng ya Juda, e lego leeto leo mohlomongwe le bego le tšea matšatši a mararo goba a mane. Ge Maria a tsena legaeng la Elisabetha le moperisita Sakaria, Jehofa o ile a mo putsa ka bohlatse  bjo bo oketšegilego bjo matla bjoo bo bego bo tla matlafatša tumelo ya gagwe. Elisabetha o ile a kwa Maria a dumediša gomme gateetee a kwa lesea leo le lego ka popelong ya gagwe le tshela ka lethabo. O ile a tlala moya o mokgethwa gomme a bolela ka Maria e le “mmago Morena wa ka.” Modimo o be a utolletše Elisabetha gore morwa wa Maria e be e tla ba Morena wa gagwe, Mesia. Go oketša moo, o ile a budulelwa gore a rete Maria ka baka la go kwa ga gagwe ka potego, a re: “Go thaba yo a dumetšego.” (Luka 1:39-45) Ee, dilo ka moka tšeo Jehofa a bego a di holofeditše Maria di be di tla phethagala!

Segwera sa Maria le Elisabetha e be e le tšhegofatšo go bona ka bobedi

15 Ka morago ga moo, Maria o ile a bolela. Mantšu a gagwe a bolokilwe ka kelohloko ka Lentšung la Modimo. (Bala Luka 1:46-55.) Ke mantšu a matelele kudu a Maria ao a ngwadilwego ka Beibeleng, gomme a utolla mo gontši ka yena. A bontšha moya wa gagwe wa tebogo, ka ge  a ile a tumiša Jehofa ka go mo šegofatša ka go mo nea kabelo e kgethegilego ya go ba mmago Mesia. A bontšha tumelo ya gagwe e matla, ka ge a bolela ka Jehofa e le yoo a kokobetšago baikgogomoši le batho ba matla gomme a thuša batho ba tlasana le badiidi bao ba nyakago go mo hlankela. Le gona a utolla tsebo yeo a bego a na le yona. Go akanyetšwa gore o ile a tsopola Mangwalong a Seheberu ka makga a fetago a 20! *

16, 17. (a) Maria le morwa wa gagwe ba ile ba bontšha seka sefe seo le rena re swanetšego go se ekiša? (b) Ketelo ya Maria go Elisabetha e re gopotša ka tšhegofatšo efe?

16 Go molaleng gore Maria o be a naganišiša ka Lentšu la Modimo. Lega go le bjalo, o ile a dula a ikokobeditše, a bona go le kaone gore Lentšu la Modimo le ipolelele go e na le gore go bolele yena. Ka letšatši le lengwe, morwa yo ka nako yeo a bego a gola ka popelong ya gagwe o be a tla bonagatša moya o swanago, ge a tlo ba a re: “Seo ke se rutago ga se sa ka, eupša ke sa yo a nthomilego.” (Joh. 7:16) Re dira gabotse ge re ipotšiša gore: ‘Na ke hlompha Lentšu la Modimo ka tsela e bjalo? Goba na ke rata go diriša dikgopolo le dithuto tša ka?’ Ruri Maria o be a na le pono e nepagetšego.

17 Maria o ile a dula le Elisabetha ka dikgwedi tše e ka bago tše tharo, gomme ga go pelaelo gore ba be ba kgothatšana kudu. (Luka 1:56) Pego ye e kgothatšago ya Beibele ya nakong ya ge Maria a be a etetše Elisabetha e re gopotša gore segwera e ka ba tšhegofatšo. Ge e ba re tsoma bagwera bao ba tlogago ba rata Modimo wa rena e lego Jehofa, re ka kgodišega gore tswalano ya rena le yena e tla matlafala gomme re tla batamela kgauswi kudu le yena. (Die. 13:20) Lega go le bjalo, mafelelong e be e le nako ya gore Maria a boele gae. Josefa o be a tla re’ng ge a ekwa ka boemo bja Maria?

Maria le Josefa

18. Ke’ng seo Maria a ilego a se botša Josefa gomme Josefa o ile a arabela bjang?

18 Go bonala Maria a se a ka a letela gore batho ba bone gore o imile pele a ka botša Josefa ka taba ye. Ga go pelaelo gore o ile a swanelwa ke go bolela le Josefa. Pele a dira bjalo, a ka ba a ile a ipotšiša kamoo monna yo yoo a hlomphegago le yo a boifago Modimo a bego a tla arabela ka gona ge a ekwa ditaba tšeo a bego a tlo mmotša tšona. Lega go le bjalo, o ile a ya go yena gomme a mmotša dilo tšohle tšeo di mo diragaletšego. Bjale ka ge o ka nagana, Josefa o be a tshwenyegile kudu. O be a nyaka go kgolwa kgarebe ya gagwe e rategago, eupša go be go bonala e se ya mmotegela. Beibele ga e re botše kamoo a bego a ikwa ka gona goba seo a bego a se nagana. Eupša e re botša gore o ile a dira phetho ya go mo hlala, ka gobane ka nako yeo batho bao ba beeletšanego ba be ba lebelelwa e le ba nyalanego. Lega go le bjalo, o be a sa nyake go mo leša dihlong goba go mo kweša bohloko phatlalatša, ka gona o  ile a kgetha go mo hlala ka sephiring. (Mat. 1:18, 19) Maria o swanetše go ba a ile a kwa bohloko ge a bona monna yo yo botho a kwešitšwe bohloko ke boemo bjo bja moswananoši. Lega go le bjalo, Maria ga se a ka a galefišwa ke gore Josefa ga a mo kgolwe.

19. Jehofa o ile a thuša Josefa bjang go dira se se lokilego?

19 Ka botho Jehofa o ile a thuša Josefa gore a dire se se lokilego. Morongwa wa Modimo o ile a mmotša torong gore ka kgonthe go ima ga Maria e be e le mohlolo. Seo se swanetše go ba se ile sa mo imolla! Ga bjale Josefa o ile a dira seo Maria a se dirilego go tloga mathomong—o ile a dira dilo ka go dumelelana le tlhahlo ya Jehofa. O ile a nyala Maria gomme a itokišeletša go rwala boikarabelo bjo bo kgethegilego bja go hlokomela Morwa wa Jehofa.Mat. 1:20-24.

20, 21. Ke’ng seo banyalani le bao ba naganelago go tsena lenyalong ba ka ithutago sona go Maria le Josefa?

20 E tla ba mo gobotse gore batho bao ba lego lenyalong gotee le bao ba naganago go tsena lenyalong, ba ithute go banyalani ba ba bafsa bao ba phetšego nywageng e 2 000 e fetilego. Ga go pelaelo gore Josefa o ile a thaba gore morongwa wa Jehofa o be a mo hlahlile ge a be a bona mosadi wa gagwe yo e sa lego yo mofsa a phethagatša boikarabelo bja go ba mma. Josefa o swanetše go ba a ile a lemoga bohlokwa bja go ithekga ka Jehofa ge a dira diphetho tše dikgolo. (Ps. 37:5; Die. 18:13) Ga go pelaelo gore o ile a dula a le šedi le go ba botho ge a dira diphetho bjalo ka hlogo ya lapa.

21 Ka lehlakoreng le lengwe, re ka ithuta’ng tabeng ya gore Maria o be a ikemišeditše go nyalana le Josefa? Gaešita le ge mathomong Josefa a ile a hwetša go le thata go kwešiša taba ya gagwe, Maria o ile a letela gore a dire phetho ka ge e be e le yena e tlago go ba hlogo ya lapa. Ruri yeo e be e le thuto ya bohlokwa go yena, go etša ge e le thuto ya bohlokwa go basadi ba Bakriste lehono. Mafelelong, ditiragalo tše di swanetše go ba di ile tša ruta Maria le Josefa mo gontši ka bohlokwa bja go boledišana go tšwa pelong le ka bolokologi.Bala Diema 15:22.

22. Motheo wa lenyalo la Josefa le Maria e be e le ofe gomme ba be ba letetšwe ke’ng?

22 Banyalani bao ba bafsa ruri ba thomile lenyalo la bona metheong e mebotse kudu. Ba be ba rata Jehofa Modimo kudu gomme ba be ba nyaka go mo thabiša ka go ba batswadi bao ba nago le boikarabelo le bao ba nago le lerato. Ke therešo gore ba be ba letetšwe ke ditšhegofatšo tše dintši gotee le ditlhohlo tše dikgolo. Ba be ba swanetše go godiša Jesu, yoo a bego a tla gola gore e be motho yo mogolo kudu yoo lefase le kilego la mo tseba.

^ par. 15 Gare ga dilo tšeo Maria a ilego a di tsopola, go bonagala a ile a tsopola mantšu a mosadi yo a botegago e lego Hanna yoo le yena Jehofa a ilego a mo šegofatša ka ngwana.—Bona lepokisi le le rego: “Dithapelo tše Pedi tše di Kgahlišago,” leo le lego go Kgaolo 6.