Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ekiša Tumelo ya Bona

 KGAOLO YA LESOMETEE

O Ile a Lebelela Gomme a Leta

O Ile a Lebelela Gomme a Leta

1, 2. Eliya o ile a swanelwa ke go dira modiro ofe o thata, gomme yena le Ahaba ba be ba fapana ka ditsela dife?

ELIYA o be a nyaka go ba noši gore a rapele Tatagwe wa legodimong. Eupša batho ba bantši bao ba bego ba mo dikologile ba be ba sa tšwa go bona moporofeta yo wa therešo a bitša mollo o tšwago legodimong gomme ga go pelaelo gore ba bantši ba bona ba be ba nyaka gore a ba šegofatše. Pele ga ge Eliya a ka rotogela tlhoreng ya Thaba ya Karamele le pele a ka rapela Jehofa Modimo ka sephiring, o ile a swanelwa ke go dira modiro o thata. O ile a swanelwa ke go yo bolela le Kgoši Ahaba.

2 Banna ba ba babedi ba be ba fapane kudu. Ahaba, yo a bego a apere seaparo se sebotse sa bogoši, e be e le mohlanogi yo a nago le megabaru e bile a eya le mogofe. Eliya o be a apere seaparo sa boporofeta—se bonolo seo mohlomongwe se bego se dirilwe ka letlalo la phoofolo goba boya bjo bo logilwego bja kamela goba bja pudi. E be e le monna yo a nago le sebete kudu, yo a botegago le yo a nago le tumelo. Letšatši le leo le bego le sobela le be le utolotše mo gontši ka dimelo tša banna ba ba babedi.

3, 4. (a) Ke ka baka la’ng Ahaba le barapedi ba bangwe ba Baali ba ile ba šulafalelwa ke letšatši? (b) Re tlo ahlaahla dipotšišo dife?

3 Ahaba le barapedi ba bangwe ba Baali ba ile ba šulafalelwa ke letšatši. Bodumedi bja boheitene bjoo Ahaba le mosadi wa gagwe e lego Kgošigadi Isebele ba bego ba bo hlomile mmušong wa meloko e lesome wa Isiraele e be e le bja maaka. Baali o be a pepentšhitšwe gore ke modimo wa maaka. Modimo yoo yo a sa phelego o be a paletšwe ke go gotša mollo e le gore a arabe baporofeta ba gagwe ge ba be ba ba mo lopa ka go hlaba mašata le go bina e bile ba itshega ka dithipa. Baali o be a paletšwe ke go šireletša banna bao ba 450 gore ba se ke ba bolawa, e lego seo se bego se ba swanetše. Eupša modimo yo wa maaka o be a paletšwe ke selo se sengwe gape seo se bego se le kgauswi le go utollwa. Go be go fetile nywaga ya ka godimo ga e meraro baporofeta ba Baali ba lopa modimo wa bona gore a fediše komelelo nageng, eupša Baali o ile a palelwa ke go dira bjalo. Kgauswinyane Jehofa o be a tla bonagatša matla a gagwe ka go fediša komelelo yeo.1 Dikg. 16:30–17:1; 18:1-40.

 4 Lega go le bjalo, Jehofa o be a tla gata mogato neng? Eliya o be a tla itshwara bjang go fihla nakong yeo? Le gona, re ka ithuta’ng go monna yo wa tumelo? Anke re boneng ge re hlahloba pego ye.Bala 1 Dikgoši 18:41-46.

Monna yo a Bego a Rata go Rapela

5. Eliya o ile a botša Ahaba gore a dire’ng, gona na go bonagala Ahaba a ithutile se sengwe ditiragalong tša letšatšing leo?

5 Eliya o ile a ya go Ahaba gomme a re: “Rotoga, o je o be o nwe; gobane go kwala modumo wa pula.” Na kgoši ye e kgopo e be e ithutile se sengwe ditiragalong tša letšatšing leo? Pego ga e bolele ka go lebanya ka seo, e bile ga e re botše gore o ile a itshola le go kgopela moporofeta yoo gore a mo thuše go batamela go Jehofa le go kgopela tebalelo. Ahaba o ile a fo “rotoga a yo ja a ba a nwa.” (1 Dikg. 18:41, 42) Go thwe’ng ka Eliya?

6, 7. Eliya o ile a rapelela’ng, gona ka baka la’ng?

6 “Eliya yena a rotogela tlhoreng ya Karamele gomme a kotama a tsenya sefahlego sa gagwe gare ga matolo.” Ge Ahaba a ile go ja, Eliya o ile a hwetša sebaka sa go rapela Tatagwe wa legodimong. Ela hloko boikokobetšo bjo bo hlalositšwego mo—Eliya o khuname gomme o inamišitše hlogo moo e lego gore sefahlego sa gagwe se kgauswi le matolo a gagwe. Eliya o be a dira’ng? Ga se ra swanela go phopholetša.  Beibele go Jakobo 5:18 e re botša gore Eliya o ile a rapelela gore komelelo e fele. Ga go pelaelo gore o ile a rapela thapelo e bjalo a le tlhoreng ya thaba ya Karamele.

Dithapelo tša Eliya di bontšhitše gore o tloga a kganyoga go bona thato ya Modimo e dirwa

7 Pejana, Jehofa o itše: “Ke ikemišeditše go neša pula mo nageng.” (1 Dikg. 18:1) Ka gona, Eliya o ile a rapelela gore go phethagatšwe thato yeo Jehofa a e boletšego, go swana le ge Jesu a rutile barutiwa ba gagwe gore ba rapele bjalo nywageng e ka bago e sekete ka morago.—Mat. 6:9, 10.

8. Mohlala wa Eliya o re ruta’ng ka thapelo?

8 Mohlala wa Eliya o re ruta mo gontši ka thapelo. Selo se segolo seo Eliya a bego a tshwenyegile ka sona e be e le go phethagatšwa ga thato ya Modimo. Ke mo gobotse gore ge re rapela re gopole gore: “Go sa šetšwe seo re se kgopelago go ya ka thato ya Modimo, Modimo o a re kwa.” (1 Joh. 5:14) Go molaleng gore re swanetše go tseba thato ya Modimo gabotse e le gore re rapele ka tsela e amogelegago. E le gore re tsebe thato yeo ya Modimo re swanetše go dira thuto ya Beibele karolo ya bophelo bja rena bja letšatši le letšatši. Ka kgonthe Eliya le yena o be a nyaka gore komelelo e fele ka baka la tlaišego yeo e bego e le gona gare ga batho ba naga ya gabo. Mohlomongwe o be a leboga kudu ka morago ga go bona mohlolo woo Jehofa a o dirilego letšatšing leo. Ka mo go swanago, dithapelo tša rena di swanetše go bontšha gore re tshwenyega ka ba bangwe gotee le go leboga go tšwa pelong.Bala 2 Bakorinthe 1:11; Bafilipi 4:6.

Go Bontšha Kgodišego le go Phakgama

9. Eliya o ile a laela mohlokomedi wa gagwe go dira’ng, gona ke dika dife tše pedi tšeo re tlago go di hlahloba?

9 Eliya o be a kgodišegile gore Jehofa o tla gata mogato wa go fediša komelelo, eupša o be a sa kgodišege gore Jehofa o tla gata mogato woo neng. Ka gona, moporofeta yo o ile a dira’ng ge a sa letetše seo? Ela hloko seo pego e se bolelago, e re: “A bolela le mohlokomedi wa gagwe a re: ‘Rotoga hle. Lebelela ka thoko ya lewatleng.’ Ka gona a rotoga a lebelela ke moka a re: ‘Ga go na selo.’ Eliya a re go yena: ‘Boelela gape.’ A dira bjalo ka makga a šupago.” (1 Dikg. 18:43) Mohlala wa Eliya o re ruta bonyenyane dithuto tše pedi. Sa pele, ela hloko kgodišego ya moporofeta yo. Sa bobedi, o ele hloko go phakgama ga gagwe.

Eliya o ile a fagahlela go tsoma bohlatse bja gore Jehofa o be a le kgauswi le go gata mogato

10, 11. (a) Eliya o ile a bontšha ka ditsela dife gore o bota dikholofetšo tša Jehofa? (b) Ke ka baka la’ng re ka ba le kgodišego e swanago?

10 Ka ge Eliya a be a botile dikholofetšo tša Jehofa, o ile a dula a nyaka bohlatse bja gore go na le seo Jehofa a tlago go se dira. O ile a  roma mohlokomedi wa gagwe gore a ye ntlheng e phagamego ya thaba gore a lebeledišiše go bona pontšho le ge e le efe ya gore pula e kgauswi le go na. Ge a boile, mohlanka o ile a mo nea pego ye yeo e sa kgahlišego: “Ga go na selo.” Go be go sa bonale pula yeo e tlago gomme mohlomongwe leratadima le be le se na maru. Bjale, na o lemogile selo se sengwe seo se sa tlwaelegago? Gopola, Eliya o be a sa tšwa go botša Kgoši Ahaba gore: “Go kwala modumo wa pula.” Moporofeta yo o be a ka bolela bjang selo se bjalo mola go be go sa bonagale maru a pula?

11 Eliya o be a tseba kholofetšo ya Jehofa. Ka ge e be e le moporofeta wa Jehofa le moemedi wa gagwe, o be a kgodišegile gore Modimo wa gagwe o be a tla phethagatša lentšu la Gagwe. Eliya o be a kgodišegile—go le bjalo ka ge eka o be a šetše a ekwa modumo wa pula. Se se ka re gopotša tsela yeo Beibele e hlalosago Moshe ka yona ge e re: “O ile a tšwela pele a tiile go etša ge eka o bona Yo a sa bonagalego.” Na Modimo ke wa kgonthe go wena? O re nea mabaka a mantši a go ba le tumelo e swanago go yena le dikholofetšong tša gagwe.Baheb. 11:1, 27.

12. Eliya o ile a bontšha bjang gore o be a phakgame gomme o ile a arabela bjang ge a botšwa gore go na le leru letee le lenyenyane?

12 Se se latelago, ela hloko kamoo Eliya a bego a phakgame ka gona. O ile a roma mohlanka wa gagwe gape, e sego gatee goba gabedi, eupša gašupa! Re ka akanya mohlanka yoo a lapišwa ke go boelela gantšintši, eupša Eliya o ile a dula a fagahletše go bona pontšho gomme ga se a ka a langwa. Mafelelong, ka morago ga go boelela gašupa, mohlanka o ile a bega gore: “Bona! Go na le leru le lenyenyane leo le hlatlogago lewatleng leo le etšago seatla sa motho.” Na o ka kgona go bona mohlanka yoo, a otlolotše letsogo la gagwe gomme a diriša seatla sa gagwe go lekanya bogolo bja leru letee le lenyenyane leo le rotogago Lewatleng le Legolo? Go ka direga gore leru leo e be e se la bohlokwa go mohlanka yo. Lega go le bjalo, go Eliya leru leo le be le le bohlokwa kudu. Ka nako yeo o ile a nea mohlanka wa gagwe ditaelo tše tše akgofilego: “Rotoga o yo botša Ahaba o re: ‘Pana koloi! Theoga e le gore pula e se tlo go nela!’”1 Dikg. 18:44.

13, 14. (a) Re ka ekiša bjang go phakgama ga Eliya? (b) Re na le mabaka afe a go dira dilo ka go akgofa?

13 Eliya o re beetše mohlala o matla gape. Le rena re phela nakong yeo Modimo a tlago go gata mogato kgauswinyane go phethagatša morero wa gagwe wo a o boletšego. Eliya o be a letetše gore komelelo e fele; bahlanka ba Modimo lehono ba letetše go fela ga tshepedišo ye ya dilo ya lefase e kgopo. (1 Joh. 2:17) Go ba go fihla ge Jehofa Modimo a gata mogato, re swanetše go dula re phakgame go etša Eliya. Morwa wa Modimo Jesu, o eleditše balatedi ba gagwe ka gore: “Ka baka  leo, dulang le phakgame gobane ga le tsebe letšatši leo Morena wa lena a tlago ka lona.” (Mat. 24:42) Na Jesu o be a bolela gore balatedi ba gagwe ba be ba tloga ba ka se tsebe gore bofelo bo be bo tla tla neng? Aowa, ka gobane o hlalositše tsela yeo lefase le bego le tla ba ka yona pele bofelo bo fihla. Ka moka ga rena re ka bona go phethagala ga pontšho ye e boletšwego ka botlalo ya “bofelo bja tshepedišo ya dilo.”Bala Mateo 24:3-7.

Lerunyana letee le be le lekane go kgodiša Eliya gore go na le seo Jehofa a tlago go se dira. Dipontšho tša mehla ya bofelo di re nea mabaka a kwagalago a go dira dilo ka go akgofa

14 Sebopego se sengwe le se sengwe sa pontšho yeo se re nea bohlatse bjo matla le bjo bo kgodišago. Na bohlatse bjoo ke bjo bo lekanego go re tutueletša go gata mogato ka go akgofa tirelong ya rena go Jehofa? Leru letee le lenyenyane leo le rotogago lewatleng le be le lekane go ka kgodiša Eliya gore Jehofa o be a le kgauswi le go gata mogato. Na seo moporofeta yo a botegago a bego a se letetše se ile sa phethagala?

Jehofa o Tliša Kimollo le Ditšhegofatšo

15, 16. Ke ditiragalo dife tšeo di ilego tša direga ka lebelo gomme Eliya o swanetše go ba a ile a nagana’ng ka Ahaba?

15 Pego e re botša gore: “Ya re ka yona nako yeo magodimo a swifala ka maru, gwa ba le phefo ke moka pula ya matlorotloro ya tšhologa. Ahaba a otlela koloi ya gagwe a ya Jeseriele.” (1 Dikg. 18:45) Dilo di ile tša thoma go direga ka lebelo le le makatšago. Ge mohlanka wa Eliya a sa begela Ahaba molaetša o tšwago go moporofeta, lerunyana lela le ile la gola, la tlatša leratadima le go le swifatša. Gwa ba le phefo e kgolo. Mafelelong, ka morago ga nywaga e meraro le seripa, pula e ile ya na nageng ya Isiraele. Mobu o omeletšego o ile wa monya marothi a pula. Ge pula e thoma go tšhologa ka matla, noka ya Kishoni e ile ya tlala gomme ga go pelaelo gore e ile ya hlatswa madi a baporofeta ba Baali bao ba bego ba bolailwe. Baisiraele bao ba sa kwego le bona ba ile ba newa sebaka sa go fediša borapedi bja Baali nageng.

“Pula ya matlorotloro ya tšhologa”

16 Ruri se ke seo Eliya a bego a letetše gore se tla dirwa! Mohlomongwe o be a ipotšiša gore Ahaba o tla arabela bjang ge dilo di fetoga. Na Ahaba o be a tla fetoga gomme a furalela borapedi bjo bo šilafatšago bja Baali? Ditiragalo tša letšatšing leo di be di neile mabaka a matla a go dira diphetogo tše bjalo. Ke therešo gore re ka se tsebe seo Ahaba a bego a se nagana ka nako yeo. Pego e re botša feela gore kgoši ‘e ile ya otlela koloi ya ya Jeseriele.’ Na e be e ithutile selo se sengwe? Na e be e ikemišeditše go fetoša ditsela tša  yona? Ditiragalo tša ka morago di bontšha gore karabo ke aowa. Lega go le bjalo go be go sa na le seo Ahaba le Eliya ba bego ba sa tlo se bona.

17, 18. (a) Go diragetše’ng ka Eliya tseleng ya go ya Jeseriele? (b) Ke’ng seo se bego se kgahliša ka go kitima ga Eliya go tloga Karamele go ya Jeseriele? (Bona le mongwalo wa tlase.)

17 Moporofeta wa Jehofa o ile a sepela ka yona tsela yeo Ahaba a sepetšego ka yona. O be a letetšwe ke leeto le letelele, tseleng e kolobilego le ya leswiswi. Ke moka go ile gwa direga mohlolo.

18 “Seatla sa Jehofa sa ba le Eliya, moo a ilego a itlema matheka gomme a kitima pele ga Ahaba go ba go fihla Jeseriele.” (1 Dikg. 18:46) Go molaleng gore “seatla sa Jehofa” se be se thuša Eliya ka tsela ya mohlolo. Jeseriele e be e le bokgole bja dikhilomithara tše 30, le gona Eliya e be e šetše e le mokgalabje. * Nagana feela ka moporofeta yoo a tlema seaparo sa gagwe se setelele lethekeng e le gore a kgone go kitima ka bolokologi tseleng yeo e kolobilego—a kitima ka lebelo kudu mo e lego gore o ile a hwetša koloi ya kgoši le go e feta!

19. (a) Matla ao Modimo a ilego a a nea Eliya a ka re gopotša boporofeta bofe? (b) Eliya o be a kgodišegile ka’ng ge a be a kitimela Jeseriele?

19 Ruri se e swanetše go ba e be e le tšhegofatšo e kgolo go Eliya! E swanetše go ba e be e le mo go thabišago go ikwa a na le matla le matšato a bjalo, mohlomongwe a go feta ao a bego a na le wona ge e be e sa le yo mofsa. Re ka gopola boporofeta bjo bo kgonthišetšago batho bao ba botegago gore ba tla ba le bophelo bjo bo phethagetšego le matla lefaseng la Paradeise leo le tlago. (Bala Jesaya 35:6; Luka 23:43) Ge Eliya a be a kitima tseleng e kolobilego, ruri o be a kgodišegile gore o be a amogelwa ke Tatagwe, Modimo a nnoši wa therešo e lego Jehofa!

20. Re swanetše go dira’ng gore Jehofa a re šegofatše?

20 Jehofa o fagahletše go re šegofatša. E le gore a dire bjalo, go nyakega gore re dire maiteko ka moka. Ka go swana le Eliya, re swanetše go dula re phakgame, re lekole bohlatse bjo matla bjo bo bontšhago gore Jehofa o kgauswi le go gata mogato dinakong tše tše kotsi le tše di akgofilego. Go etša Eliya, re na le mabaka ka moka a go ba le kgodišego e feletšego dikholofetšong tša Jehofa “Modimo wa therešo.”Ps. 31:5.

^ par. 18 Kapejana ka morago ga se, Jehofa o be a tla laela Eliya gore a tlwaetše Elisha, yo a bego a tla tsebja e le “yo a bego a tšhela meetse diatleng tša Eliya gore a hlape.” (2 Dikg. 3:11) Elisha o ile a šoma e le mohlanka wa Eliya gomme go molaleng gore o be a thuša mokgalabje yo.