Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ekiša Tumelo ya Bona

 KGAOLO YA MASOMEPEDI-PEDI

O be a Botega ge a Lebane le Diteko

O be a Botega ge a Lebane le Diteko

1, 2. Go bonagala Petro a be a letetše gore go direge’ng ge Jesu a be a ruta kua Kaperenaume, eupša go ile gwa direga’ng?

PETRO o ile a lebelela difahlego tša batheetši ba Jesu a tshwenyegile. Ba be ba le ka sinagogeng kua Kaperenaume. Petro o be a dula motseng wo; kgwebo ya gagwe ya go rea dihlapi e be e le gona mo lebopong la Lewatle la Galilea; bagwera ba gagwe ba bantši, ba leloko le bagwebišani ba gagwe ba be ba dula gona mo. Ga go pelaelo gore Petro o be a letetše gore batho ba mo motseng wa gabo ba lebelele Jesu ka tsela yeo yena a bego a mo lebelela ka yona, gore le bona ba thabele go ithuta ka Mmušo wa Modimo go morutiši yo mogolo go feta barutiši ka moka. Ga go bonagale seo se tla direga letšatšing leo.

2 Ba bantši ba ile ba kgaotša go theetša. Ba bangwe ba be ba kwala ba ngongorega, ba ganetša seo Jesu a bego a se bolela. Lega go le bjalo, seo se bego se tshwenya Petro kudu e be e le kamoo ba bangwe ba barutiwa ba Jesu ba arabelago ka gona. Ba be ba se sa thabišwa ke go ithuta ditherešo tše mpsha tšeo Jesu a bego a ba ruta tšona. Ga bjale ba be ba bonagala ba nyamile e bile ba galefile. Ba bangwe ba ile ba ba ba re mantšu a Jesu a a tšhoša. Ka ge ba se sa nyaka go theetša, ba ile ba tloga sinagogeng—ba kgaotša go latela Jesu.Bala Johane 6:60, 66.

3. Tumelo ya Petro e ile ya mo thuša go dira’ng ka makga a mantši?

3 Ye e be e se taba e bonolo go Petro le baapostolagotee le yena. Petro o be a se a kwešiša ka mo go feletšego seo Jesu a se boletšego letšatšing leo. Ga go pelaelo gore o be a lemoga gore ge mantšu a Jesu a se a hlaloswa a be a ka bonagala a kgopiša. Petro o be a tla dira’ng? E be e se la mathomo potego ya gagwe go Mong wa gagwe e lekwa; le gona e be e se la mafelelo. A re boneng kamoo tumelo ya Petro e ilego ya mo thuša go lebeletšana ka katlego le ditlhohlo tšeo gotee le go dula a botega.

O Ile a Botega le ge ba Bangwe ba sa Botege

4, 5. Jesu o ile a dira bjang dilo go fapana le kamoo batho ba bego ba letetše gore a di dire ka gona?

4 Petro o be a fela a makatšwa ke dilo tšeo Jesu a di dirago le go di bolela. Ka dinako tše dingwe Mong wa gagwe o be a dira dilo le go  bolela ka tsela e fapanego le yeo batho ba bego ba e letetše. Letšatši pele ga moo, Jesu o be a ile a fepa lešaba la ba dikete ka mohlolo. Ge ba bona seo, batho ba ile ba leka go mo dira kgoši. Lega go le bjalo, o ile a makatša ba bantši ka go gana le go laela barutiwa ba gagwe gore ba namele sekepe gomme ba sesele thoko tša Kaperenaume. Ge barutiwa ba gagwe ba le gare ba sesa meetseng bošego, Jesu o ile a ba makatša gape ka go sepela godimo ga meetse a Lewatle la Galilea leo le bego le galefile, le go ruta Petro thuto e bohlokwa mabapi le tumelo.

5 Ge go esa, ba ile ba lemoga gore mašaba ao a ile a ba šala morago. Lega go le bjalo, go molaleng gore batho ba be ba tlile ka ge ba be ba nyaka gore Jesu a ba fe dijo ka mohlolo, ba sa tlišwa ke ge ba swerwe ke tlala ya moya. Jesu o ile a ba kgalemela ka baka la go rata dijo. (Joh. 6:25-27) Polelo yeo e ile ya tšwela pele le kua sinagogeng ya Kaperenaume, moo Jesu a ilego a makatša batho gape ka go ba ruta therešo e bohlokwa eupša e le e thata.

6. Jesu o ile a dira papišo efe gomme batheetši ba gagwe ba ile ba arabela bjang?

6 Jesu o be a sa nyake gore batho ba tle go yena ka gobane a ba fepa. O be a nyaka gore ba lemoge gore Modimo o be a tla ba fa bophelo bjo bo sa felego ge feela ba dumela sehlabelong sa Jesu le go latela mohlala wa gagwe. Ka gona o ile a dira papišo, a ipapetša le manna, senkgwa seo se theogilego se etšwa legodimong mehleng ya Moshe. Ge ba bangwe ba be ba mo ganetša, o ile a diriša papišo e tseneletšego, a hlalosa gore go be go nyakega gore ba je nama ya gagwe le go nwa madi a gagwe e le gore ba hwetše bophelo. Mantšu ao, ke ona a ilego a galefiša batho. Ba bangwe ba ile ba re: “Mantšu a a a tšhoša; ke mang yo a ka a theetšago?” Ba bantši ba barutiwa ba Jesu ba ile ba kgaotša go mo latela. *Joh. 6:48-60, 66.

7, 8. (a) Ke’ng seo Petro a bego a sa se kwešiše ka karolo ya Jesu? (b) Petro o ile a araba bjang potšišo yeo Jesu a e botšišitšego baapostola?

7 Petro o be a tla dira’ng? Le yena o swanetše go ba a ile a gakantšhwa ke mantšu a Jesu. O be a se a hlwa a kwešiša gore Jesu o be a swanetše go hwa e le gore a phethe thato ya Modimo. Na Petro o ile a lekega go kgaotša go latela Jesu letšatšing leo go swana le barutiwa bao ba go hloka tumelo? Aowa; go na le selo se sengwe se bohlokwa seo se ilego sa dira gore Petro a fapane le batho bao. Selo seo e be e le eng?

8 Jesu o ile a retologela go baapostola ba gagwe gomme a re: “Na le lena le nyaka go sepela?” (Joh. 6:67) O be a bolela le ba lesomepedi, eupša ke Petro yoo a ilego a araba. Ke yena gantši a bego a bolela pele baapostola ba bangwe ba ka bolela. Petro a ka ba a be a ba feta ka moka ka bogolo. Go sa šetšwe gore o be a boledišwa ke bogolo goba  go se bjalo, ruri ke yena yo a bego a bolela kudu moo sehlopheng; go bonagala e le ka sewelo moo Petro a bego a dikadika go bolela seo a se naganago. Boemong bjo, monaganong wa gagwe go be go duma mantšu a mabotse le a gopolegago, a rego: “Morena, re tla ya go mang? Wena o na le mantšu a bophelo bjo bo sa felego.”Joh. 6:68.

9. Petro o ile a bontšha bjang gore o botegela Jesu?

9 Na mantšu ao ga a kgome pelo ya gago? Tumelo ya Petro go Jesu e ile ya mo thuša go ba le seka se bohlokwa kudu—potego. Petro o ile a bona gabotse gore Jesu e be e le Mophološi a nnoši yo a tšwago go Jehofa le gore Jesu o be a phološa ka mantšu a gagwe, e lego dithuto tša gagwe mabapi le Mmušo wa Modimo. Petro o be a tseba gore gaešita le ge e ba go be go na le dilo tšeo a sa di kwešišego, go be go se na moo a ka yago gona ge e ba a be a nyaka go amogelwa ke Modimo le go šegofatšwa ke yena ka bophelo bjo bo sa felego.

Re swanetše go botegela dithuto tša Jesu, gaešita le ge di se ka tsela yeo re bego re letetše gore di tla ba ka yona

10. Re ka ekiša bjang potego ya Petro lehono?

10 Na le wena o ikwa ka tsela yeo? Ka manyami, ba bantši lefaseng la lehono ba bolela gore ba rata Jesu eupša ga ba mmotegele. Gore re botegele Jesu e le ka kgonthe re swanetše go rata dithuto tša gagwe go swana le Petro. Re swanetše go ithuta tšona, re kwešiše seo di se bolelago le go phela ka tšona—gaešita le ge di re makatša ka ge di se ka tsela yeo re bego re letetše gore di tla ba ka yona. Ke feela ka go dula re botega moo re ka holofelago go hwetša bophelo bjo bo sa felego bjoo Jesu a nyakago gore re bo hwetše.Bala Psalme 97:10.

O Ile a Botega ge a Phošollwa

11. Jesu o ile a iša balatedi ba gagwe kae? (Bona le mongwalo wa tlase.)

11 Nakwana ka morago ga nako yeo ya leemaema, Jesu o ile a eta pele baapostola ba gagwe le barutiwa ba bangwe ba gagwe leetong le letelele la go ya ka thoko ya leboa. Ntlha e khupeditšwego ke lehlwa ya Thaba ya Heremone, yeo e lego godimo kgauswi le mollwane wa ka leboa wa Naga ya Kholofetšo, ka dinako tše dingwe e be e bonagala le ka meetseng a matalalerata a Lewatle la Galilea. Ganyenyane-ganyenyane, thaba yeo e be e bonagala gabotse ge sehlopha seo se be se batamela, se rotogela metsaneng ya kgauswi le Kesarea Filipi. * Boemong bjoo bjo bo kgahlišago, a lebane kudu le bogolo bja Naga ya Kholofetšo go ya ka borwa, Jesu o ile a botšiša balatedi ba gagwe potšišo e bohlokwa.

12, 13. (a)  Ke ka baka la’ng Jesu a be a nyaka go tseba gore mašaba a re ke yena mang? (b) Petro o ile a bontšha bjang tumelo ya kgonthe ge a be a araba Jesu?

12 Jesu o ile a ba botšiša gore: “Mašaba a re ke nna mang?” Re ka akanya ka Petro a lebeletše Jesu ka mahlong ge a be a fagahletše go  kwa karabo, a lemoga botho bja Mong wa gagwe le bohlale bja gagwe bjo bogolo le bjo bo bonagalago. Jesu o be a nyaka go tseba gore batho ba be ba re ke yena mang. Barutiwa ba Jesu ba ile ba araba potšišo yeo, ba bolela tše dingwe tša dikgopolo tše di fošagetšego tšeo batho ba di bolelago ka Jesu. Eupša Jesu o be a nyaka go tseba se sengwe gape. Na le baapostola ba gagwe ba be ba nagana bjalo? O ile a ba botšiša gore: “Eupša lena le re ke nna mang?”Luka 9:18-20.

13 Le mo lekgeng le, Petro o ile a akgofela go araba. Ka mantšu a kwagalago le ka sebete o ile a bolela phetho yeo ba bantši bao ba bego ba na le yena ba e dirilego ka dipelong tša bona. O itše: “Ke wena Kriste, Morwa wa Modimo yo a phelago.” Re ka akanya ka Jesu a myemyela go bontšha gore o thabela le go reta Petro ka borutho. Jesu o ile a gopotša Petro gore e be e le Jehofa Modimo—e sego motho—yoo a bego a dirile gore bao ba nago le tumelo ya kgonthe ba kwešiše therešo ye e bohlokwa. Petro o be a kgonne go lemoga e nngwe ya ditherešo tše dikgolo tšeo Jehofa a ilego a di utolla—go tseba Mesia, goba Kriste, yo e lego kgale a holofeditšwe!Bala Mateo 16:16, 17.

14. Jesu o ile a nea Petro tokelo efe e bohlokwa?

14 Kriste yo ke yena yoo boporofeta bja bogologolo bo mmitšago leswika leo baagi ba tlago go le gana. (Ps. 118:22; Luka 20:17) A naganne ka diporofeto tše bjalo, Jesu o utolla gore Jehofa o be a tlo hloma phuthego leswikeng goba letlapeng leo Petro a sa tšwago go le lemoga. Ke moka o ile a fa Petro e nngwe ya ditokelo tše bohlokwa kudu ka phuthegong. Ga se a ka a dira gore Petro a phagamele baapostola ba bangwe, bjalo ka ge ba bangwe ba ile ba nagana bjalo, eupša o ile a mo fa boikarabelo. O file Petro “dinotlelo tša mmušo.” (Mat. 16:19) E be e tla ba modiro wa Petro go bula kholofelo ya go tsena Mmušong wa Modimo go ditšhemo tše tharo tše fapafapanego tša batho—sa pele go Bajuda, sa bobedi go Basamaria gomme sa boraro go Bantle, goba bao e sego Bajuda.

15. Ke’ng seo se dirilego gore Petro a kgalemele Jesu gomme o ile a mo kgalema a re’ng?

15 Lega go le bjalo, Jesu ka morago o boletše gore bao ba neilwego mo gontši go tla nyakwa mo gontši go bona gomme Petro e bile yo mongwe wa bona. (Luka 12:48) Jesu o ile a tšwela pele a utolla ditherešo tše bohlokwa ka Mesia, go akaretša le kgonthišetšo ya gore o be a le kgauswi le go tlaišwa gotee le go bolawa kua Jerusalema. Petro o ile a tshwenywa ke go kwa dilo tše bjalo. O ile a tšea Jesu a ya le yena ka thoko gomme a mo kgalema, a re: “Ikwele bohloko Morena; o ka se feleletše ka tsela ye le gatee.”Mat. 16:21, 22.

16. Jesu o ile a phošolla bjang Petro, gona ke keletšo efe yeo re ka e hwetšago mantšung a Jesu?

 16 Ka ntle le pelaelo Petro o be a na le maikemišetšo a mabotse, ka go re’alo karabo ya Jesu e swanetše go ba e ile ya mo makatša. O ile a furalela Petro, a lebelela barutiwa ba bangwe ka moka—bao le bona ba ka bago ba be ba nagana ka tsela e swanago—gomme a re: “Tloga mo pele ga ka, wena Sathane! O tšhitišo go nna, gobane o nagana dikgopolo tša batho, e sego tša Modimo.” (Mat. 16:23; Mar. 8:32, 33) Mantšu a Jesu a hupere keletšo e šomago go rena ka moka. Go bonolo kudu go dumelela dikgopolo tša batho di eta tša Modimo pele. Ge e ba re dira bjalo, gaešita le ge re na le maikemišetšo a mabotse, re ka fetoga didirišwa tša go phetha morero wa Sathane re sa lemoge, e sego wa Modimo. Lega go le bjalo, Petro o ile a arabela bjang?

17. Jesu o be a e ra go re’ng ge a botša Petro gore “tloga mo pele ga ka”?

17 Ka ntle le pelaelo Petro o be a tseba gore Jesu o be a sa re gore ke Sathane Diabolo e le ka kgonthe. Godimo ga moo, Jesu ga se a bolela le Petro go swana le ge a be a bolela le Sathane. Jesu o be a e ra go re’ng ge a botša Petro a re: “Tloga mo pele ga ka, wena Sathane”? Jesu ga se a ka a raka moapostola yo yoo a ilego a bona dika tše dibotse kudu go yena, eupša o ile a fo phošolla kgopolo ya gagwe tabeng ye. Ga go thata go lemoga gore Petro o be a swanetše go tlogela go ba tšhitišo go Mong wa gagwe gomme a mo thekge.

Ke feela ge re amogela tayo ka boikokobetšo le go ithuta go yona moo re ka tšwelago pele re batamela Jesu Kriste le Tatagwe e lego Jehofa Modimo

18. Petro o ile a bontšha bjang potego, gona re ka mo ekiša bjang?

18 Na Petro o ile a ba le manganga, a befelwa goba a ngala? Aowa; o ile a amogela phošollo ka boikokobetšo. Ka go re’alo o ile a bonagatša potego gape. Bohle bao ba latelago Kriste ba tla fela ba nyaka go phošollwa. Ke feela ge re amogela tayo ka boikokobetšo le go ithuta go yona moo re ka tšwelago pele re batamela Jesu Kriste le Tatagwe e lego Jehofa Modimo.Bala Diema 4:13.

Petro o ile a botega gaešita le ge a be a swanetše go phošollwa

Potego e a Putswa

19. Jesu o ile a bolela mantšu afe a makatšago gomme ke’ng seo Petro a ka bago a ipotšišitše sona?

19 Go se go ye kae Jesu o ile a bolela mantšu a mangwe gape a makatšago, ao a rego: “Ruri ke le botša gore go na le ba bangwe ba bao ba emego mo ba ba ka se kego ba hwa le gatee go ba go fihla pele ba bona Morwa wa motho a etla ka Mmušo wa gagwe.” (Mat. 16:28) Ga go pelaelo gore mantšu ao a ile a dira gore Petro a ipotšiše dipotšišo. Jesu a ka ba a e ra go re’ng? Mohlomongwe Petro a ka ba a ile a ipotšiša ge e ba phošollo e matla yeo a bego a sa tšwa go e hwetša e  be e e ra gore o be a ka se sa hwetša ditokelo tše bjalo tše di kgethegilego.

20, 21. (a) Hlalosa pono yeo Petro a e bonego. (b) Poledišano ya batho bao ba lego ponong e ile ya thuša bjang go phošolla Petro?

20 Lega go le bjalo, moo e ka bago ka morago ga beke, Jesu o ile a tšea Jakobo, Johane le Petro a ya le bona “thabeng e telele”—mohlomongwe Thabeng ya Heremone, yeo e bego e le bokgoleng bja dikhilomithara tše 25. Go bonagala e be e le bošego, ka ge banna bao ba bararo ba be ba swerwe ke boroko. Eupša ge Jesu a be a rapela, go ile gwa direga selo se sengwe seo se ilego sa ba phafoša.Mat. 17:1; Luka 9:28, 29, 32.

21 Jesu o ile a thoma go fetoga ba mo lebeletše. Sefahlego sa gagwe se ile sa thoma go phadima go ba go fihlela a phadima bjalo ka letšatši. Diaparo tša gagwe le tšona di ile tša šweufala wa go phadima. Ke moka go ile gwa bonwa batho ba babedi ba na le Jesu, yo mongwe a swantšhetša Moshe gomme yo mongwe a swantšhetša Eliya. Ba ile  ba boledišana le yena mabapi le “go tloga ga gagwe mo a bego a reretšwe go go phethagatša Jerusalema”—seo go lego molaleng gore ke lehu la gagwe le tsogo ya gagwe. Ruri go be go le molaleng gore Petro o be a fošitše ge a be a nagana gore Jesu o be a ka se tlaišege le go hwa!Luka 9:30, 31.

22, 23. (a) Petro o ile a bontšha bjang moya wa mafolofolo le o borutho? (b) Petro, Jakobo le Johane ba ile ba hwetša moputso ofe o mongwe bošegong bjoo?

22 Petro o ile a ikwa a gapeletšega gore a tšee karolo ka tsela e itšego ponong ye yeo e sa tlwaelegago—mohlomongwe a nyaka go e oketša. Go ile gwa bonagala eka Moshe le Eliya ba tloga go Jesu. Ka gona Petro o ile a bolela a re: “Morutiši, ke mo gobotse ge re le mo, ka gona a re hlomeng ditente tše tharo, e nngwe e be ya gago, e nngwe e be ya Moshe gomme e nngwe e be ya Eliya.” Ke therešo gore go be go sa nyakege gore bahlanka ba babedi ba Jehofa bao ba hwilego kgale bao ba bego ba le ponong ye ba hlomelwe ditente. Petro ruri o ile a fo bolela a sa nagane. Lega go le bjalo, na ga o ikwe o kgahlišwa ke monna yo ka baka la moya wa gagwe wa mafolofolo le o borutho?Luka 9:33.

Petro, Jakobo le Johane ba ile ba putswa ka go bona pono e kgahlišago

23 Petro, Jakobo le Johane ba ile ba hwetša moputso o mongwe bošegong bjoo. Leru le ile la bopega gomme la ba aparetša ba le thabeng. Go ile gwa tšwelela lentšu go lona—lentšu la Jehofa Modimo! Le ile la re: “Yo ke Morwa wa ka, yena yo a kgethilwego. Le mo theetšeng.” Ke moka pono yeo e ile ya fela gomme ba ikhwetša ba na le Jesu feela thabeng.Luka 9:34-36.

24. (a) Go fetoga ga Jesu ponagalo go hotše bjang Petro? (b) Re ka holwa bjang ke go fetoga ga Jesu ponagalo?

24 Ruri go fetoga ga Jesu ponagalo e be e le mpho go Petro—le go rena! Nywagasome ka morago o ile a ngwala ka tokelo yeo a bilego le yona bošegong bjoo ya go ba yo mongwe wa “dihlatse tše di bonego ka mahlo tša bogolo bja gagwe bjo bogolo kudu,” go iponela ka boyena pontšho ya Jesu e le Kgoši e tagafaditšwego ya legodimong. Pono yeo e tiišeditše diporofeto tše dintši tša Lentšu la Modimo e bile e matlafaditše tumelo ya Petro bakeng sa diteko tšeo a bego a sa tlo lebeletšana le tšona. (Bala 2 Petro 1:16-19.) E ka dira se se swanago le go rena ge e ba, go swana le Petro, re dula re botegela Mong yoo Jehofa a re kgethetšego yena, ra ithuta go yena, ra amogela tayo ya gagwe le phošollo gotee le go mo latela ka boikokobetšo letšatši le letšatši.

^ par. 6 Re kgona go bona boikaketši bja lešaba le leo le lego ka sinagogeng ge re bapetša karabelo ya lona mantšung a Jesu a gona bjale le seo le se boletšego letšatšing le le fetilego ge le be le mmitša moporofeta wa Modimo.Joh. 6:14.

^ par. 11 Ge sehlopha seo se be se thoma leeto leo la dikhilomithara tše 50 la go tloga lebopong la Lewatle la Galilea, se be se le ka tlase ga lewatle ka tekanyo ya dimithara tše 210 gomme sa feleletša se le ka godimo ga lewatle ka tekanyo ya dimithara tše 350, se le mafelong a mabotse kudu a tlhago.