Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ekiša Tumelo ya Bona

 Matseno

Lengwalo le le Tšwago go Sehlopha se Bušago

Lengwalo le le Tšwago go Sehlopha se Bušago

Go Bana Babo Rena le Dikgaetšedi ba ba Rategago:

Kgatišong ya pele ya batho bohle ya Morokami wa January 1, 2008, re ile ra lokollelwa lelokelelo leo le kgahlišago la dihlogo tša “Ekišang Tumelo ya Bona.” Ga e sa le go tloga ka nako yeo, go be go gatišwa sehlogo se sefsa lelokelelong le la dihlogo ka morago ga dikgwedi tše dingwe le tše dingwe tše tharo gomme re ile ra di thabela kudu!

Ba bangwe ba babadi ba ile ba ikwa bjang ka dihlogo tše? Ka morago ga gore mmadi yo mongwe a bale sehlogo seo se bolelago ka Mareta, o ile a ngwala gore: “Ke ile ka sega ke nnoši ge ke bala sehlogo se sa Mareta ka gobane ke swana tlwaa le yena—ke dula ke nyaka go amogela baeng, ke swarega kudu ka go ba direla dijo gomme ka fetwa ke sebaka sa go thabela bogwera le bona.” Ge mofsa yo mongwe a fetša go bala sehlogo seo se bolelago ka Esitere, o ile a bolela mantšu a a kgahlišago: “Ke a tseba gore go bjang go tshwenyega ka diaparo le dilo tšeo di lego fešeneng. Gona ke therešo gore re swanetše go itokiša gabotse, eupša ga se ra swanela go feteletša.” O ile a oketša ka gore: “Jehofa o tshwenyegile kudu ka seo re lego sona ka gare.” Sehlogo seo se bolelago ka moapostola Petro se ile sa dira gore kgaetšedi yo mongwe wa Mokriste a bolele ka mafolofolo gore: “Ke ile ka ipona ka leihlo la kgopolo ke le tiragalong ye. Okare ke be ke le gona ge e direga! Ke ile ka kgona go kwešiša gabotse seo se bolelwago pegong ye!”

Babadi ba—le ba bangwe ba bantši bao ba ilego ba leboga lelokelelo le la dihlogo—ba kgonthišetša seo moapostola Paulo a se ngwadilego kgale, ge a be a re: “Dilo tšohle tšeo di ilego tša ngwalwa e sa le pele di ile tša ngwalelwa go re ruta.” (Baroma 15:4) Ruri Jehofa o ile a dira gore dipego tše di ngwalwe ka Beibeleng e le go re ruta dilo tša bohlokwa. Ka moka ga rena re ka ithuta go tšona, go sa šetšwe gore re na le nako e kae re le therešong.

Re go kgothaletša gore o bale puku ye gateetee ge go kgonega. E diriše Borapeding bja Lapa—ruri le bana ba tla e rata! Ge phuthego e tla ba e e hlahloba nakong ya Thuto ya Beibele ya Phuthego, o se fošwe le ke seboka setee! O se e bale ka lepotlapotla gomme o naganišiše ka seo o se balago. Ipopele seswantšhokgopolo ke moka o ipone o le ditiragalong tše. Leka go ikwa go swana le batho bao ba ka Beibeleng gomme o bone seo ba se bonego. Bona gore ba ile ba arabela bjang maemong ao ba ilego ba lebeletšana le ona ke moka o ipotšiše gore wena o be o ka arabela bjang.

Re thabela go abelana le wena kgatišo ye. Eka wena le lapa la gago le ka holwa ke kgatišo ye. Re le rata kudu e bile re le lakaletša dilo tše dibotse,

Sehlopha se Bušago sa Dihlatse tša Jehofa