Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ekiša Tumelo ya Bona

 KGAOLO YA BORARO

“Tatago Bohle Bao ba Nago le Tumelo”

“Tatago Bohle Bao ba Nago le Tumelo”

1, 2. Lefase le be le fetogile bjang ga e sa le go tloga mehleng ya Noa, gona seo se ile sa kgoma bjang Aborama?

ABORAMA o ile a lebelela godimo gomme a bona tempele yeo e bego e le motseng wa gabo wa Uri. * Go be go na le lešata moo e bile muši o rotogela godimo. Baperisita ba modimo wa ngwedi ba be ba dira dihlabelo gape. Akanya Aborama a retologa gomme a šikinya hlogo, a sentše sefahlego go bontšha gore ga a kgahlišwe ke seo. Ge a dutše a lebile gae lešabeng leo le bego le le mebileng yeo, mohlomongwe o be a nagana ka borapedi bja medimo ya diswantšho bjoo bo bego bo atile motseng woo wa Uri. Ruri borapedi bjoo bjo bo gobogilego ga e sa le bo ata go tloga mehleng ya Noa!

2 Noa o hwile nywaga e mebedi pele Aborama a belegwa. Ge Noa le lapa la gagwe ba etšwa ka arekeng ka morago ga Meetsefula a magolo, mopatriareka yoo o ile a direla Jehofa Modimo sehlabelo gomme yena a dira gore go tšwelele molalatladi. (Gen. 8:20; 9:12-14) Lefaseng ka nako yeo go be go na le borapedi bjo bo sekilego feela. Eupša ga bjale, ge moloko wa lesome go tšwa go Noa o dutše o phatlalala le lefase, borapedi bjo bo sekilego bo be bo hwelela. Batho mo gohle ba be ba rapela medimo e šele. Gaešita le tatago Aborama e lego Thera, o be a rapela medimo ya diswantšho, mohlomongwe a dira medingwana.Josh. 24:2.

Go tlile bjang gore Aborama a be le tumelo e kgahlišago gakaaka?

3. Ge nywaga ya Aborama e dutše e eya, o ile a ba le seka sefe se se kgahlišago gomme re ka ithuta’ng go seo?

3 Aborama o be a sa swane le batho ba. Ge nywaga e dutše e eya, o ile a tloga a bontšha gore o fapane le bona ka ge a be a na le tumelo. Ge e le gabotse, ka morago moapostola Paulo o ile a budulelwa gore a mmitše “tatago bohle bao ba nago le tumelo”! (Bala Baroma 4:11.)  Anke re boneng gore go tlile bjang gore Aborama a be le tumelo e kaakaa. Ka go re’alo le rena re ka ithuta kamoo re ka agago tumelo ya rena.

Go Hlankela Jehofa ka Morago ga Meetsefula

4, 5. Aborama a ka ba a ithutile kae ka Jehofa, gona ke ka baka la’ng re ka phetha ka go re’alo?

4 Go tlile bjang gore Aborama a ithute ka Jehofa Modimo? Re a tseba gore go be go na le bahlanka ba botegago ba Jehofa mo lefaseng mehleng yeo. Yo mongwe wa bona e be e le Sheme. Le ge e be e se wa pele go barwa ba Noa ba bararo, gantši go bolelwa ka yena pele. Seo se ka ba se bolela gore Sheme e be e le monna wa tumelo e kgahlišago. * Nakwana ka morago ga Meetsefula, Noa o ile a bolela ka Jehofa e le “Modimo wa Sheme.” (Gen. 9:26) Sheme o be a hlompha Jehofa le borapedi bjo bo sekilego.

5 Na Aborama o be a tseba Sheme? Go ka direga gore o be a mo tseba. Akanya ka Aborama e le mošemane. O swanetše go ba a be a kgahlišwa ke go tseba gore o na le rakgolokhukhu yo a sa phelago yoo a nago le nywaga e fetago e 400! Sheme o bone bokgopo bja pele ga Meetsefula, a bona ge lefase le fedišwa, a bona ge setšhaba sa pele mo lefaseng se be se ata le ge Nimirode a be a rabela nakong ya ge a aga Tora ya Babele. Sheme ga se a tšea karolo borabeleng bjoo, ka gona ge Jehofa a be a raranya leleme la batho bao ba bego ba aga tora, Sheme le lapa la gagwe ba ile ba tšwela pele ba bolela leleme la pele la batho, e lego leleme leo le bego le bolelwa ke Noa. Lapa leo le be le akaretša le Aborama. Gona go molaleng gore Aborama o ile a gola a hlompha Sheme kudu. Taba e nngwe ke gore Sheme o ile a phela nako e teletšana ka morago ga gore Aborama a belegwe. Ka gona Aborama o swanetše go ba a ithutile ka Jehofa go Sheme.

Aborama o ile a ganetša borapedi bja medimo ya diswantšho bjo bo bego bo atile kua Uri

6. (a) Aborama o ile a bontšha bjang gore o ithutile mo gogolo ka Meetsefula? (b) Aborama le Sarai ba ile ba phela bjang?

6 Go sa šetšwe seo se diregilego, Aborama o ithutile mo gogolo ka Meetsefula. O ile a katanela go sepela le Modimo go swana le Noa. Ke ka baka leo Aborama a ilego a ganetša borapedi bja medimo ya diswantšho bja kua Uri, mohlomongwe e bile a fapane le ba bangwe ba lapa la gagwe. Lega go le bjalo, o ile a hwetša mosadi yo a kgahlišago. O ile a nyala Sarai, mosadi yo mobotse kudu yo a bego a na le tumelo e  kgolo go Jehofa. * Le ge ba be ba se na bana, ga go pelaelo gore banyalani bao ba ile ba thabišwa ke go hlankela Jehofa ba le gotee. Ba ile ba ba ba godiša morwa wa ngwanabo Aborama e lego Lota.

7. Balatedi ba Jesu ba swanetše go ekiša bjang mohlala wa Aborama?

7 Aborama ga se a ka a hlanogela Jehofa gomme a rapela medimo ya diswantšho ya Uri. Yena le Sarai ba be ba ikemišeditše go fapana le barapedi ba medimo ya diswantšho ba tikologong ya gabo bona. Le rena re swanetše go ba le moya o swanago ge e ba re nyaka go ba le tumelo e tiilego. Re swanetše go ikemišetša go fapana le batho ba bangwe. Jesu o itše balatedi ba gagwe e ka se be “karolo ya lefase” gomme lefase le tla ba hloya ka baka la seo. (Bala Johane 15:19.) Ge e ba o ka kwešwa bohloko ke go hlanogelwa ke ditho tša lapa la geno goba batho ba tikologong ya geno ka baka la ge o kgethile go hlankela Jehofa, gopola gore ga o noši. O ekiša mohlala o mobotse wa Aborama le Sarai wa go sepela le Modimo.

“Tloga Nageng ya Geno”

8, 9. (a) Aborama o ile a diragalelwa ke selo sefe seo a bego a ka se se lebale? (b) Molaetša wa Jehofa o be o re’ng go Aborama?

8 Ka letšatši le lengwe Aborama o ile a diragalelwa ke selo se sengwe seo a bego a ka se se lebale. O ile a hwetša molaetša o tšwago go Jehofa Modimo! Beibele ga e re botše gore o o hweditše bjang, eupša e re “Modimo wa letago” o iponagaditše go monna yo yo a botegago. (Bala Ditiro 7:2, 3.) Mohlomongwe Modimo o ile a diriša morongwa gomme Aborama a bona go se nene letago la Mmuši wa legohle. Re ka akanya kamoo Aborama a bego a thabile ka gona go bona phapano magareng ga Modimo yo a phelago le medimo e sa phelego ya diswantšho yeo e bego e rapelwa ke batho ba mehleng ya gagwe.

9 Molaetša woo wa Jehofa o be o re’ng go Aborama? O be o re: “Tloga nageng ya geno le go metswalo ya gago o ye nageng ye ke tlago go go bontšha yona.” Jehofa ga se a bolela leina la naga yeo a bego a e naganne—eupša o itše o tla e bontšha Aborama. Sa pele, Aborama o be a tla swanelwa ke go tlogela naga ya gabo le metswalo ya gabo. Ditšong tša bogologolo tša Bohlabela bja Magareng, ditho tša lapa di be di le bohlokwa kudu. Gore monna a tlogele metswalo ya gagwe a hudugele nageng ya kgole, go be go tloga go le thata kudu gomme ba bangwe ba go lebelela go sa kgonege!

10. Ke ka baka la’ng e be e le go ikgafa gore Aborama le Sarai ba tlogele legae la bona kua Uri?

10 Go be go nyakega boikgafo gore Aborama a tloge nageng ya gabo. Bohlatse bo bontšha gore Uri e be e le motse wa leemaema le wo o humilego. (Bona lepokisi leo le rego: “ Motse Woo Aborama le Sarai ba Ilego ba o Tlogela.”) Boepi bja marope bo utolla gore go be go  na le dintlo tša manobonobo kua Uri ya bogologolo; tše dingwe di na le diphapoši tše dintši bakeng sa ba lapa le bahlanka, tše ka moka di le ka gare ga lapa. Mabenkele a tlwaelegilego a be a na le methopo ya meetse, dintlwana tša boithomelo le mekero ya go sepediša tšhila. Le gona gopola gore Aborama le Sarai ba be ba godile; mohlomongwe Aborama o be a na le nywaga e 70 gomme Sarai a na le e 60. Go molaleng gore Aborama o be a nyaka gore Sarai a dule ka go iketla le go hlokomelwa gabotse—go etša ge monna yo mongwe le yo mongwe a ka nyaka gore go be bjalo ka mosadi wa gagwe. Akanya ba boledišana ka kabelo ye, ba ipotšiša dipotšišo e bile ba tshwenyegile. Aborama o swanetše go ba a ile a thaba kudu ge Sarai a dumela go lebana le tlhohlo ye! Go swana le Aborama, Sarai o be a ikemišeditše go tlogela manobonobo ka moka a lapa la gagwe.

11, 12. (a) Aborama le Sarai ba ile ba swanelwa ke go dira ditokišetšo le diphetho dife pele ba ka tloga nageng ya Uri? (b) O be o ka hlalosa bjang seo se diregilego letšatšing la ge ba tloga?

11 Ka morago ga gore Aborama le Sarai ba dire phetho, ba ile ba lebana le mošomo o mogolo. Ba be ba swanetše go phutha le go rulaganya tša leeto leo ba tlago go le tšea. Ba be ba tla tšea eng goba ba šie eng leetong le leo ba bego ba sa tsebe gore le ya go felela kae? Eupša ba be ba tshwenyegile kudu ka batho bao ba ba ratago. Ba be ba tla dira’ng ka Thera yo a tšofetšego? Ba ile ba kgetha go sepela le yena gomme ba tšama ba mo hlokomela. Thera o swanetše go ba a ile a dumelelana le phetho ya bona ka gobane pego e mo hlalosa e le mopatriareka yo a tšwilego Uri le lapa la gagwe. Go bonagala Thera a ile a tlogela borapedi bja medimo ya diswantšho. Morwa wa ngwanabo Aborama e lego Lota le yena o ile a sepela le bona.Gen. 11:31.

12 Letšatši la gore ba sepele le ile la hlaba. Akanya ka batho bao ba bego ba tla tšea leeto leo ba kgobokane ka ntle ga motse le moedi wa Uri. Dikamela le ditonki di be di rwaleletše, mehlape e kgobokantšwe, lapa le bahlanka ba itokišitše gomme ba fagahletše leeto. * Mohlomongwe ba be ba letetše go kwa ge Aborama a ba laela gore ba ka tloga. Nako ya go sepela e ile ya goroga gomme ba sepela ba tlogela sa ruri motseng wa Uri.

13. Bahlanka ba bantši ba Jehofa lehono ba bontšha bjang moya o swanago le wa Aborama le Sarai?

13 Bahlanka ba bantši ba Jehofa lehono ba kgetha go hudugela moo go nago le tlhokagalo e kgolo ya bagoeledi ba Mmušo. Ba bangwe ba kgetha go ithuta leleme le lengwe gore ba katološe bodiredi bja bona, goba ba kgetha go leka mehuta e mengwe ya bodiredi yeo ba sa kago ba e dira peleng. Ga go pelaelo gore diphetho tšeo di nyaka boikgafo—go ikemišetša go tlogela dilo tšeo o di ratago. Ruri Jehofa o tšeela  godimo bahlanka ba gagwe bao ba bontšhago moya o bjalo ge ba ekiša Aborama le Sarai! Ge e ba re ka ba le tumelo e bjalo, re ka kgodišega gore Jehofa o tla re atišetša go feta kamoo re mo neago ka gona. Ka mehla o putsa bao ba nago le tumelo. (Baheb. 6:10; 11:6) Na o ile a putsa Aborama?

Ba Tshela Noka ya Eforate

14, 15. Leeto la go tloga Uri go ya Harane le be le le bjang gomme ke ka baka la’ng Aborama a ile a kgetha go dula ka nakwana kua Harane?

14 Lešaba le ile la thoma go tlwaelana le tsela. Re ka akanya ka Aborama le Sarai ba nametše dikamela gomme ba fela ba di fologa ba sepela ka maoto, go dutše go kwagala ba boledišana gotee le ditleloko tšeo di lekeletšego melaleng ya diruiwa. Ganyenyane-ganyenyane, batho ka moka ba ile ba tlwaela go hloma le go hlomolla mešaša gomme ba thuša le mokgalabje Thera go dudišega godimo ga kamela goba ga pokolo yeo a e namelago. Ba ile ba leba ka leboabodikela, ba sepela go bapa le Noka ya Eforate. Matšatši a ile a feta le dibeke tša fela ba dutše ba sepela.

15 Ka morago ga gore ba sepele dikhilomithara tše ka bago tše 960, ba ile ba fihla mekutwaneng ya kua Harane yeo e kego ke diphago tša dinosi, motseng o humilego wo o bego o na le ditsela tša go tloga ka Bohlabela go leba ka Bodikela. Ba ile ba ema gomme ba dula moo ka  nakwana. Mohlomongwe Thera o be a se sa kgona go tšwela pele ka leeto.

16, 17. (a) Aborama o ile a thabišwa ke kgwerano efe? (b) Jehofa o ile a šegofatša bjang Aborama ge a be a dula Harane?

16 Ka morago, Thera o ile a hwa a na le nywaga e 205. (Gen. 11:32) Aborama o ile a homotšega kudu nakong yeo ge Jehofa a buša a bolela le yena. O ile a bušeletša taelo yeo a mo neilego yona kua Uri gomme a oketša kholofetšo yeo a mo neilego yona. Aborama o be a tlo ba “setšhaba se segolo” e bile malapa ka moka a lefaseng a be a tlo šegofatšwa ka baka la gagwe. (Bala Genesi 12:2, 3.) Ka ge Aborama a be a thabišitšwe ke kgwerano ye a e dirilego le Modimo, o ile a bona gore ke nako ya gore ba tloge.

17 Eupša mo nakong ye ba be ba na le merwalo e mentši ka ge Jehofa a be a šegofaditše Aborama nakong ya ge a dula Harane. Pego e bolela ka “dithoto ka moka tšeo ba bego ba di kgobetše gotee le bahlanka ka moka bao ba bego ba na le bona kua Harane.” (Gen. 12:5) Gore Aborama e be setšhaba se segolo, o be a swanetše go ba le dithoto tše dintši le bahlanka—lapa le legolo. Ga se ka mehla Jehofa a dirago gore bahlanka ba gagwe ba hume, eupša o ba nea seo ba se hlokago gore ba phethe morero wa gagwe. Ka ge Aborama a be a matlafaditšwe, o ile a leba mo a sa go tsebego.

Go tlogela bophelo bja manobonobo bja Uri e ile ya ba tlhohlo go Aborama le Sarai

18. (a) Aborama o ile a dira neng selo sa bohlokwa historing ya ditirišano tša Modimo le batho ba gagwe? (b) Ke ditiragalo dife tše dingwe tše bohlokwa tšeo di ilego tša direga ka Nisani 14 nywageng yeo e ilego ya latela? (Bona lepokisi leo le rego: “ Letšatši la Bohlokwa Historing ya Beibele.”)

18 Leeto la matšatši a mmalwa le ile la ba lebiša Karakemishi, moo mašaba a bego a tlwaetše go tshela noka ya Eforate. Mohlomongwe ke yona nakong ye moo Aborama a ilego a dira selo se bohlokwa historing ya ditirišano tša Modimo le batho ba gagwe. Go bonagala e be e le ka di-14 tša kgwedi yeo ka morago e ilego ya bitšwa Nisani, ka 1943 B.C.E., ge Aborama a be a etile lešaba leo pele ba tshela noka. (Ek. 12:40-43) Ka borwa go be go na le naga yeo Jehofa a holofeditšego go e bontšha Aborama. Lona letšatšing leo, ke moo kgwerano yeo Modimo a e dirilego le Aborama e ilego ya thoma go šoma.

19. Kholofetšo ya Jehofa go Aborama e be e akaretša’ng, gona se se ile sa gopotša Aborama eng?

19 Ge Aborama le lešaba leo ba lebile ka  borwa, ba ile ba ema kgauswi le dihlare tše dikgolo tša More, kgauswi le Shikeme. Ge Aborama a le moo, Jehofa o ile a boledišana le yena gape. Mo nakong ye Modimo o ile a dira kholofetšo yeo e akaretšago peu ya Aborama, goba bana bao ba bego ba tla dula nageng yeo. Na Aborama o ile a nagana ka boporofeta bjoo Jehofa a bo dirilego kua Edene, bjo bo bolelago ka “peu,” goba ngwana yoo ka letšatši le lengwe a bego a tla phološa batho? (Gen. 3:15; 12:7) Mohlomongwe a ka ba a ile a nagana ka bjona. A ka ba a be a thoma go kwešiša gore le yena o na le karolo morerong o mogolo wa Jehofa.

20. Aborama o ile a bontšha bjang gore o leboga tokelo yeo Jehofa a mo neilego yona?

20 Aborama o ile a tšeela godimo tokelo yeo Jehofa a mo neilego yona. Ge a dutše a sepela nageng yeo—mohlomongwe a ntšhitše mahlo dinameng ka ge e be e sa dulwa ke Bakanana—Aborama o ile a ema gore a agele Jehofa dialetare, ya pele kgauswi le dihlare tše dikgolo tša More gomme ya bobedi kua kgauswi le Bethele. O ile a bitša leina la Jehofa, mohlomongwe e le go bontšha go leboga Modimo wa gagwe ge a dutše a nagana ka bokamoso bja bana ba gagwe. Go ka direga gore o ile a ba a dira boboledi go baagišani ba gagwe ba Bakanana. (Bala Genesi 12:7, 8.) Ke therešo gore tumelo ya Aborama e be e tla lekwa kudu bophelong bja gagwe. Aborama o ile a bontšha bohlale ka go se nagane ka legae la gagwe le manobonobo ao a a tlogetšego motseng wa Uri. O be a fagahletše dikholofetšong tša Jehofa. Ge Baheberu 11:10 e bolela ka Aborama, e re: “O be a letetše motse wo o nago le metheo ya kgonthe, woo mohlami le moagi wa wona e lego Modimo.”

21. Tsebo ya rena ka Mmušo wa Modimo e fapana bjang le ya Aborama, gona o tutueletšega go dira’ng?

21 Ka go se swane le Aborama, rena bao re hlankelago Jehofa lehono re tseba mo gontši ka motse woo wa seswantšhetšo e lego Mmušo wa Modimo. Re a tseba gore Mmušo woo o buša legodimong gomme go se go ye kae o tla fediša tshepedišo ye ya dilo, e bile re a tseba gore Jesu Kriste yoo e lego Peu yeo e lego kgale e holofeditšwe Aborama, o a buša gona bjale kua legodimong. Ruri e tlo ba tokelo e kgolo go bona Aborahama nakong yeo a tlago go ba a phela gomme a thoma go kwešiša kamoo morero wa Jehofa o ilego wa phethagala ka gona. Na o ka rata go bona Jehofa a phethagatša dikholofetšo tša gagwe ka moka? Gona go bohlokwa gore o tšwele pele o dira seo Aborama a se dirilego. E ba le boikgafo, o kwe gomme o tšeele godimo ditokelo tšeo Jehofa a go neilego tšona. Ge o dutše o ekiša tumelo ya Aborama, gona re ka re “tatago bohle bao ba nago le tumelo” le wena e tla ba tatago!

 
 

^ par. 1 Nywaga e latetšego, Modimo o ile a fetola leina la Aborama gore e be Aborahama, leo le bolelago gore “Tatago Ditšhaba.”Gen. 17:5.

^ par. 4 Ka mo go swanago, gantši go bolelwa ka Aborama pele go barwa ba Thera le ge e be e se leitšibulo la gagwe.

^ par. 6 Ka morago Modimo o ile a fetola leina la Sarai gore e be Sara, leo le bolelago gore “Kgošigadi.”Gen. 17:15.

^ par. 12 Diithuti tše dingwe di belaela gore dikamela di be di ruiwa mehleng ya Aborama. Lega go le bjalo, ga di na bohlatse bja go ganetša seo. Ka makga a mantši Beibele e bolela ka dikamela gare ga dithoto tša Aborama.Gen. 12:16; 24:35.