Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ekiša Tumelo ya Bona

Phetho

Phetho

“Le be baekiši ba bao ka tumelo le go se fele pelo ba jago bohwa bja dikholofetšo.”BAHEBERU 6:12.

1, 2. Ke ka baka la’ng go le bohlokwa gore re be le tumelo gona bjale? Bontšha.

TUMELO. Le ke lentšu le le kgahlišago leo le šupago seka se sebotse kudu. Eupša ge re kopana le lentšu leo, re swanetše go nagana ka polelwana e nngwe gape e lego: “Go akgofa!” Ka gobane, ge e ba re se na tumelo, re swanetše go e hlagolela ka go akgofa. Le gona, ge re na le tumelo, re swanetše go akgofela go e šireletša le go e matlafatša. Ka baka la’ng?

2 Akanya o phatša gare ga leganata le legolo, o nyorilwe wa go hwa. Ge o hwetša meetse, o swanetše go a šireletša. Le gona, o swanetše go tsoma a mangwe e le gore a se fele go fihlela o fetša leeto la gago. Go swana le leganata leo le se nago meetse, le lehono re phela lefaseng leo le se nago tumelo e bile go bonolo gore e hwe ge e ba e sa šireletšwe le go matlafatšwa. Go swana le ge re ka se phele ntle le meetse, re ka se kgone go ba le tswalano le Jehofa ge re se na tumelo.Baroma 1:17.

3. Jehofa o re neile’ng go re thuša go aga tumelo ya rena, gona ke dilo dife tše pedi tšeo re swanetšego go gopola go di dira?

3 Jehofa o a tseba gore go akgofile gore re be le tumelo, e bile o a tseba gore go thata go e hwetša le go e matlafatša lehono. Ga go pelaelo gore se ke sona se dirilego gore a re nee mehlala yeo re ka e ekišago. Jehofa o ile a budulela moapostola Paulo go ngwala gore: “Le be baekiši ba bao ka tumelo le go se fele pelo ba jago bohwa bja dikholofetšo.” (Baheb. 6:12) Le gona le ke lebaka leo mokgatlo wa Jehofa o re kgothaleditšego go katanela go ekiša mehlala ya banna le basadi bao ba botegago, ba bjalo ka bao re ithutilego ka bona pukung ye. Eupša ga bjale re swanetše go dira’ng? A re gopoleng dilo tše tše pedi: (1) Re swanetše go dula re matlafatša tumelo ya rena; (2) re swanetše go dula re naganne ka kholofelo ya rena.

4. Sathane o ipontšhitše bjang e le lenaba la tumelo, eupša ke ka baka la’ng re sa swanela go nyama?

4 Dula o matlafatša tumelo ya gago. Sathane ke lenaba le legolo la tumelo ya rena. Mmuši wa lefase le o fetotše tshepedišo ye ya dilo gore e swane le leganata la go hloka tumelo. O na le matla a magolo go re feta. Na re swanetše go nyama re nagana gore re ka se kgone go ba le tumelo le go e matlafatša? Le gatee! Jehofa ke Mogwera yo mogolo wa bao ba nyakago go ba le tumelo ya kgonthe. O re kgonthišetša gore ge re ka ithekga ka Yena, re ka fenya Diabolo a ba a feleletša a re tšhaba! (Jak. 4:7) Re mo ganetša ka go ipha nako ya go matlafatša tumelo ya rena le go e godiša letšatši le letšatši. Re ka dira seo bjang?

5. Go tlile bjang gore banna le basadi ba botegago ba ka Beibeleng ba be le tumelo? Hlalosa.

 5 Go etša ge re bone, banna le basadi ba tumelo ba ka Beibeleng ga se ba belegwa ba na le tumelo. Ba re neile bohlatse bja gore tumelo ke seka seo se tšweletšwago ke moya o mokgethwa wa Jehofa. (Bagal. 5:22, 23) Ba ile ba rapela Jehofa gore a ba thuše gomme o ile a dula a ba thuša go matlafatša tumelo ya bona. A re ba ekišeng, re se lebale gore Jehofa o nea ka boati moya wa gagwe o mokgethwa go bao ba o kgopelago gomme ba šoma ka go dumelelana le dithapelo tša bona. (Luka 11:13) Na go na le se sengwe seo re ka se dirago go feta se?

6. Re ka holwa bjang kutšwanyana ke go ithuta ka dipego tša Beibele?

6 Ka pukung ye, re ahlaahlile mehlala e mmalwa ya batho bao ba nago le tumelo e kgahlišago. Go sa na le e mengwe e mentši kudu! (Bala Baheberu 11:32.) O mongwe le o mongwe o ka re thuša ge re ithuta ka mo go tseneletšego le go rapela ka wona. Re ka se matlafatše tumelo ya rena ge e ba re fo bala ka lepotlapotla dipego tša Beibele tša batho ba bontšhitšego tumelo. Re swanetše go fetša nako e ntši re naganišiša ka seo re se balago le seo se dikologilego dipego tšeo tša Beibele gore di re hole kudu. Ge re ka se lebale gore banna le basadi bao ba be ba na “le maikwelo a swanago le a rena,” mehlala ya bona e tla ba ya kgonthe go rena. (Jak. 5:17) Re ka kgona go kwešiša kamoo ba bego ba ikwa ka gona ge ba be ba lebeletšane le ditlhohlo le mathata a swanago le a rena.

7-9. (a) Ba bangwe ba banna le basadi ba tumelo ba mehleng ya Beibele ba ka ba ba ile ba ikwa bjang ka go hlankela Jehofa go swana le rena lehono? (b) Ke ka baka la’ng re swanetše go matlafatša tumelo ya rena ka mediro?

7 Le rena re matlafatša tumelo ya rena ka mediro. Go ba gona, “tumelo ka ntle le mediro e hwile.” (Jak. 2:26) Anke o nagane kamoo banna le basadi bao re badilego ka bona ba ka bego ba ile ba thaba ka gona ge nkabe ba neilwe modiro woo Jehofa a re kgopetšego gore re o dire lehono!

8 Ka mohlala, Aborahama o be a tla ikwa bjang ge nkabe a be a boditšwe gore o tla rapela Jehofa gare ga dihlopha tše di rulagantšwego tša barapedigotee bao ba rapelago ka Diholong tša Mmušo le dikopanong tše dikgolo, moo dikholofetšo tšeo a di ‘bonego di le kgole’ di ahlaahlwago le go hlaloswa ka botlalo, e sego dialetareng tša go se re selo? (Bala Baheberu 11:13.) Le gona, Eliya o be a tla ikwa bjang ge nkabe a boditšwe gore modiro wa gagwe o be o tla akaretša go etela batho ka ntlo le ntlo a ba nea molaetša wa khomotšo le kholofelo, e sego go fediša baporofeta ba Baali mola a dutše a leka go hlankela Jehofa ka tlase ga kgoši e kgopo ya mohlanogi? Na ruri banna le basadi bao ba tumelo ba be ba ka se thabele go hlankela Jehofa go swana le rena lehono?

9 Ka gona, a re duleng re matlafatša tumelo ya rena ka mediro. Ge re dutše re dira bjalo, re  tla ba re diriša seo re ithutilego sona mehlaleng ya tumelo ya banna le basadi bao ba lego ka Lentšung la Modimo leo le buduletšwego. Go etša ge go boletšwe Matsenong a puku ye, re tla kgona go ba tšea e le bagwera ba rena ba paale. Lega go le bjalo, kgauswinyane segwera seo e tla ba sa kgonthe.

10. Ke’ng seo se tla re thabišago Paradeiseng?

10 Dula o naganne ka kholofelo ya gago. Banna le basadi ba botegago ba be ba dutše ba matlafatšwa ke kholofelo ya bona go Modimo. Na go bjalo le ka wena? Ka mohlala, akanya kamoo o tlago go thaba ka gona ge o kopana le bahlanka ba botegago ba Modimo nakong ya “tsogo ya . . . ba lokilego.” (Bala Ditiro 24:15.) O ka rata go ba botšiša dipotšišo dife?

11, 12. Lefaseng le lefsa, ke dipotšišo dife tšeo o ka di botšišago (a) Abele? (b) Noa? (c) Aborahama? (d) Ruthe? (e) Abigaile? (f) Esitere?

11 Ge o kopana le Abele, na o ka se rate go mmotšiša gore batswadi ba gagwe ba be ba le bjang? Goba o ka mmotšiša gore: “Na o kile wa bolela le bakerubi bao ba bego ba hlapeditše tsela ya go tsena Edene? Na ba ile ba go araba?” Go thwe’ng ka Noa? O ka mmotšiša gore: “Na o be o boifišwa ke Banefilimi? O ile wa hlokomela bjang diphoofolo ka moka ngwageng woo le o feditšego ka arekeng?” Ge o kopana le Aborahama, o ka mmotšiša gore: “Na o kile wa bona Sheme? Ke mang a go rutilego ka Jehofa? Na go be go le thata go tloga Uri?”

12 Ka mo go swanago, akanya ka dipotšišo tšeo o ka di botšišago basadi ba botegago bao ba tlago go tsošwa. “Ruthe, o tutueleditšwe ke’ng go ba morapedi wa Jehofa?” “Abigaile, na o be o sa boife ge o be o botša Nabala kamoo o thušitšego Dafida?” “Esitere, go diragetše’ng ka wena le Morodekai ka morago ga kanegelo e lego ka Beibeleng?”

13. (a) Bao ba tsošitšwego ba ka rata go go botšiša’ng? (b) O ikwa bjang ka kholofelo ya go tlo kopana le banna le basadi ba botegago ba bogologolo?

13 Ruri banna le basadi bao ba botegago le bona ba ka nyaka go go botšiša dipotšišo tše dintši. E tla ba mo go thabišago go ba botša ka matšatši a thata a bofelo le kamoo Jehofa a šegofaditšego batho ba gagwe dinakong tšeo tše thata! Ga go pelaelo gore ba tla thabišwa ke go kwa kamoo Jehofa a phethagaditšego dikholofetšo tša gagwe ka moka. Matšatšing ao a tlago, go ka se sa nyakega gore re akanye ka bahlanka ba Modimo bao go boletšwego ka bona ka Beibeleng. Ba tla be ba na le rena Paradeiseng! Ka gona, tšwela pele o dira sohle seo o ka se kgonago gona bjale go dira gore e be ba kgonthe go wena. Dula o ekiša tumelo ya bona. Eka o ka thabela go hlankela Jehofa gotee le bona e le bagwera ba gago ba rategago ka mo go sa felego!