Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Beibele e re Ruta Eng?

 KGAOLO YA LESOMESENYANE

Dula o Le Kgauswi Le Jehofa

Dula o Le Kgauswi Le Jehofa

1, 2. Re ka hwetša kae tšhireletšego lehono?

ANKE o nagane o sepela ka ntle go na le ledimo. Go thoma go swiswala, go ba le magadima e bile go kwagala modumo o matla wa magadima. Go se go ye kae pula e thoma go tšhologa. O nyaka moo o ka ikutago gona. O thaba gakaakang ge mafelelong o hwetša lefelo le le šireletšegilego le leo le omilego!

2 Re boemong bjo bo swanago lehono. Maemo a lefase a mpefala le go feta. O ka ipotšiša gore: ‘Nka hwetša kae tšhireletšego?’ Mopsalme o ngwadile gore: “Ke tla botša Jehofa ka re: ‘O setšhabelo sa ka le sebo sa ka, o Modimo wa ka yo ke tlago go mmota.’” (Psalme 91:2) Ee, Jehofa a ka re imolla mathateng a rena gona bjale, le gona o re holofetša bokamoso bjo bo kgahlišago.

3. Re ka dira’ng gore Jehofa a re šireletše?

3 Jehofa a ka re šireletša bjang? A ka re thuša go lebeletšana le bothata le ge e le bofe bjo re nago le bjona, le gona o matla kudu go feta motho le ge e le ofe yo a ka lekago go re gobatša. Gaešita le ge gona bjale re ka diragalelwa ke dilo tše mpe, re ka kgodišega gore Jehofa o tla lokiša dilo tšeo di senyegilego nakong e tlago. Beibele e re kgothaletša gore re “duleng leratong la Modimo.” (Juda 21) Re swanetše go dula re le kgauswi le Jehofa gore a re thuše dinakong tše thata. Eupša re ka dira seo bjang?

ARABELA LERATONG LA MODIMO

4, 5. Jehofa o bontšhitše bjang gore o a re rata?

4 E le gore re dule re le kgauswi le Jehofa, re swanetše go lemoga kamoo a re ratago ka gona. Nagana ka dilo ka  moka tšeo Jehofa a re diretšego tšona. O re neile lefase le lebotse gomme a le tlatša ka dimela le diphoofolo tše di kgahlišago. Le gona o re neile dijo tše dibose le meetse a hlwekilego. Jehofa o diriša Beibele go re ruta leina la gagwe le dika tša gagwe tše di kgahlišago. Go feta moo, o bontšhitše gore o a re rata ka go romela Morwa wa gagwe yo a rategago, e lego Jesu, mo lefaseng gore a tlo re hwela. (Johane 3:16) Le gona ka baka la sehlabelo seo, re na le kholofelo e kgahlišago ka bokamoso.

5 Jehofa o re neile Mmušo wa Mesia, e lego mmušo wa legodimong woo kgauswinyane o tlago go fediša tlaišego ka moka. Mmušo woo o tla fetoša lefase paradeise, moo batho ka moka ba tlago go phela ka khutšo e bile ba thabile ka mo go sa felego. (Psalme 37:29) Tsela e nngwe yeo Jehofa a bontšhitšego ka yona gore o a re rata ke ka go re ruta tsela e kaone ya go phela gona bjale. Le gona o re botša gore re mo rapele, e bile o dula a ikemišeditše go theetša dithapelo tša rena. Jehofa o bontšhitše gabotse gore o rata yo mongwe le yo mongwe wa rena.

6. O swanetše go arabela bjang leratong la Jehofa?

6 O swanetše go arabela bjang leratong la Jehofa? Mmontšhe gore o leboga dilo ka moka tšeo a go diretšego tšona. Ka manyami, batho ba bantši lehono ga ba leboge. Go be go le bjalo le nakong ya ge Jesu a be a le mo lefaseng. Nakong e nngwe, Jesu o ile a fodiša balephera ba lesome, eupša ke o tee feela yo a ilego a mo leboga. (Luka 17:12-17) Re nyaka go swana le monna yo a ilego a leboga Jesu. Ka mehla re nyaka go leboga Jehofa.

7. Re swanetše go rata Jehofa gakaaka’ng?

7 Re swanetše go bontšha le gore re rata Jehofa. Jesu o boditše barutiwa ba gagwe gore ba swanetše go rata Jehofa ka pelo ka moka, moya ka moka le ka monagano ka moka. (Bala Mateo 22:37.) Seo se bolela’ng?

8, 9. Re ka bontšha Jehofa bjang gore re a mo rata?

 8 Na go lekane go fo bolela gore re rata Jehofa? Aowa. Ge e ba re rata Jehofa ka pelo ka moka, moya ka moka le ka monagano ka moka, re tla bontšha ka ditiro tša rena gore re a mo rata. (Mateo 7:16-20) Beibele e ruta ka mo go kwagalago gore ge e ba re rata Modimo, re tla kwa ditaelo tša gagwe. Na go thata go dira seo? Aowa, ka gobane “ditaelo tša [Jehofa] ga di boima.”Bala 1 Johane 5:3.

9 Ge re ekwa Jehofa, re a thaba le go kgotsofala bophelong. (Jesaya 48:17, 18) Eupša ke’ng seo se tlago go re thuša go dula re le kgauswi le Jehofa? Anke re boneng.

TŠWELA PELE O BATAMELA KGAUSWI LE JEHOFA

10. Ke ka baka la’ng o swanetše go tšwela pele o ithuta ka Jehofa?

10 Go tlile bjang gore o be mogwera wa Jehofa? Ka go ithuta Beibele, o tseba Jehofa le go feta le gona o na le tswalano le yena. Tswalano ye e swana le mollo wo o nyakago gore o se ke wa tima. Go etša ge mollo o nyaka dikgong gore o se time, o swanetše go tšwela pele o ithuta ka Jehofa e le gore tswalano ya lena e dule e tiile.Diema 2:1-5.

Go swana le mollo, lerato la gago go Jehofa le swanetše go bešeletšwa e le gore le se ke la fola

11. Seo o ithutago sona ka Beibeleng se tla go kgoma bjang?

11 Ge o tšwela pele o ithuta Beibele, o tlo ithuta dilo tšeo di tlago go go kgoma pelo e le ka kgonthe. Ela hloko kamoo ba babedi ba barutiwa ba Jesu ba ilego ba ikwa ka gona ge a ba hlalosetša diporofeto tša Beibele. Ba itše: “Na dipelo tša rena di be di sa fse ge a be a bolela le rena tseleng, ge a be a re bulela Mangwalo ka mo go feletšego?”Luka 24:32.

12, 13.  (a) O ka ikwa bjang ge o dutše o kwešiša Beibele? (b) Re ka dira’ng gore lerato la rena go Jehofa le se ke la fola?

12 Go etša ge dipelo tša barutiwa di ile tša kgomega ge ba kwešišetše Mangwalo, le wena o ka ba o ile wa ikwa ka tsela e swanago ge o be o thoma go kwešiša Beibele. Se se go  thušitše go tseba Jehofa le go mo rata. Ga o nyake gore lerato leo le fole.Mateo 24:12.

13 Ge o šetše o le mogwera wa Modimo, o swanetše go šoma ka thata gore segwera sa lena se dule se tiile. O swanetše go tšwela pele o ithuta ka yena le ka Jesu le go naganišiša ka seo o ithutago sona le kamoo o ka se dirišago ka gona bophelong bja gago. (Johane 17:3) Ge o bala Beibele goba o ithuta yona, ipotšiše gore: ‘Taba ye e nthuta eng ka Jehofa Modimo? Ke ka baka la’ng ke swanetše go mo rata ka pelo ka moka le ka moya ka moka?’1 Timotheo 4:15.

14. Thapelo e re thuša bjang go tiiša lerato la rena go Jehofa?

14 Ge o na le mogwera wa kgonthe, o boledišana le yena ka mehla, gomme se se dira gore segwera sa lena se tie. Ka mo go swanago, ge re bolela le Jehofa ka mehla ge re rapela, se se dira gore tsela yeo re mo ratago ka yona e dule e tiile. (Bala 1 Bathesalonika 5:17.) Thapelo ke mpho e kgahlišago yeo re e neilwego ke Tatago rena wa legodimong.  Ka mehla re swanetše go bolela le yena ka go tšwa pelong. (Psalme 62:8) Ga se ra swanela go swara dithapelo tša rena ka hlogo, eupša re swanetše go bolela seo se lego ka dipelong tša rena. Ee, ge e ba re tšwela pele go ithuta Beibele le go rapela go tšwa pelong, re tla tiiša lerato la rena go Jehofa.

GO BOTŠA BA BANGWE KA JEHOFA

15, 16. O lebelela bjang modiro wa go botša ba bangwe ditaba tše dibotse?

15 Ge e ba re nyaka go dula re le kgauswi le Jehofa, re swanetše go botša ba bangwe ka tumelo ya rena. Go bolela le ba bangwe ka Jehofa ke tokelo e kgolo kudu. (Luka 1:74) Le gona ke boikarabelo bjoo Jesu a bo neilego Bakriste ka moka ba therešo. Yo mongwe le yo mongwe wa rena o swanetše go bolela ditaba tše dibotse tša Mmušo wa Modimo. Na o šetše o thomile go dira se?Mateo 24:14; 28:19, 20.

16 Moapostola Paulo o ile a bona modiro wa go botša ba bangwe ditaba tše dibotse o le bohlokwa kudu; o ile a o bitša “letlotlo.” (2 Bakorinthe 4:7) Go botša ba bangwe ka Jehofa le morero wa gagwe ke modiro o bohlokwa kudu wo o swanetšego go o dira. Ke tsela ya gore o hlankele Jehofa, gomme yena o thabela seo o mo direlago sona. (Baheberu 6:10) Le gona go botša ba bangwe ditaba tše dibotse go ka hola wena le bao ba go theetšago ka gobane o thuša ba bangwe e bile o ithuša go batamela kgauswi le Jehofa le go tlo hwetša bophelo bjo bo sa felego. (Bala 1 Bakorinthe 15:58.) Na go na le modiro o mongwe wo o ka go kgotsofatšago go feta wo wa go botša ba bangwe ditaba tše dibotse?

17. Ke ka baka la’ng modiro wa go bolela ditaba tše dibotse o akgofile?

17 Modiro wa go bolela ditaba tše dibotse o akgofile kudu. Re swanetše go ‘bolela lentšu la Modimo’ le gona re swanetše ‘go ba go lona re sa dikadike.’ (2 Timotheo 4:2)  Batho ba swanetše go kwa ka Mmušo wa Modimo. Beibele e re: “Letšatši le legolo la Jehofa le kgauswi. Le kgauswi e bile le akgofile kudu.” Bofelo bo ka “se diege.” (Tsefanya 1:14; Habakuku 2:3) Ee, kgauswinyane Jehofa o tlo fediša lefase le lebe la Sathane. Pele ga ge seo se ka direga, batho ba swanetše go lemošwa e le gore ba kgethe go hlankela Jehofa.

18. Ke ka baka la’ng re swanetše go hlankela Jehofa re na le Bakriste ba bangwe ba therešo?

18 Jehofa o nyaka gore re mo hlankele gotee le Bakriste ba bangwe ba therešo. Beibele e re: “A re hlokomelaneng gore re hlohleletšaneng leratong le medirong e mebotse, re sa tlogele go bokana ga rena gotee, go etša ge ba bangwe ba tlwaetše go dira bjalo, eupša re kgothatšana, kudukudu ka ge le bona letšatši le batamela.” (Baheberu 10:24, 25) Re swanetše go dira sohle seo re ka se kgonago gore re be gona dibokeng ka moka. Diboka di re nea sebaka sa go kgothatšana le go matlafatšana.

19. Ke’ng seo se ka re thušago go rata bana babo rena le dikgaetšedi ba Bakriste?

19 Ge o eba gona dibokeng, o tla hwetša bagwera ba babotse bao ba tlago go go thuša go hlankela Jehofa. O tla tsebana le bana babo rena le dikgaetšedi bao ba fapafapanego, bao ka go swana le wena ba dirago sohle seo ba ka se kgonago go hlankela Jehofa. Le gona go swana le wena, ga se ba phethagala gomme ba dira diphošo. Ge ba go fošetša, ikemišetše go ba lebalela. (Bala Bakolose 3:13.) Ka mehla lebelela dika tše dibotse tša bana beno le dikgaetšedi ba Bakriste, ka gobane go dira seo go tla go thuša go ba rata le go batamela kgauswi kudu le Jehofa.

BOPHELO BJA KGONTHE

20, 21. ‘Bophelo bja kgonthe’ ke’ng?

20 Jehofa o nyaka gore bagwera ba gagwe ka moka ba  ipshine ka bophelo. Beibele e re ruta gore bophelo bja rena bja nakong e tlago bo tlo fapana kudu le bjo re bo phelago lehono.

Jehofa o nyaka gore o thabele ‘bophelo bja kgonthe.’ Na o tla bo thabela?

21 Nakong e tlago, re tlo phela ka mo go sa felego, re ka se phele feela mengwaga e 70 goba e 80. Re tlo thabela “bophelo bjo bo sa felego” re phetše gabotse mmeleng, go na le khutšo le lethabo paradeiseng e botse. Se ke seo Beibele e se bitšago ‘bophelo bja kgonthe.’ Jehofa o holofetša go tlo re nea bophelo bjo bja kgonthe, eupša re swanetše go dira sohle seo re ka se kgonago gona bjale gore re bo “swarelele ka go tia.”1 Timotheo 6:12, 19.

22. (a) Re ka dira’ng gore re “swarelele ka go tia bophelong bja kgonthe”? (b) Ke ka baka la’ng re ka se hwetše bophelo bjo bo sa felego ka gobane bo re swanela?

22 Re ka dira’ng gore re “swarelele ka go tia bophelong bja kgonthe”? Re swanetše ‘go dira botse’ e bile re “hume medirong e mebotse.” (1 Timotheo 6:18) Se se ra gore re swanetše go diriša seo re ithutago sona ka Beibeleng. Lega go le bjalo, go hwetša bophelo bja kgonthe ga se gwa ithekga ka rena. Re ka se hwetše bophelo bjo bo sa felego ka gobane bo re swanela. Ke mpho e sa lefelelwego e tšwago go Jehofa yeo a e neago bahlanka ba gagwe ba botegago, gomme wo ke mohlala wa ‘botho bja gagwe bjo bogolo.’ (Baroma 5:15) Tatago rena wa legodimong o tloga a nyaka go nea bahlanka ba gagwe ba botegago mpho ye.

23. Ke ka baka la’ng o swanetše go dira dikgetho tše dibotse gona bjale?

23 Ipotšiše gore: ‘Na ke hlankela Modimo ka tsela yeo a e amogelago?’ Ge o lemoga gore o swanetše go dira diphetogo, di dire ntle le go senya nako. Ge re ithekga ka Jehofa gomme re dira sohle seo re ka se kgonago go mo kwa, Jehofa e tla ba setšhabelo sa rena. O tla šireletša batho ba gagwe ba botegago mehleng ye ya bofelo bja lefase le le lebe la Sathane. Ke moka Jehofa o tla kgonthišetša gore  re phela ka mo go sa felego Paradeiseng, go etša ge a re holofeditše. Ee, o ka hwetša bophelo bja kgonthe ge e ba o dira dikgetho tše dibotse gona bjale!

Ithute ka mo go Oketšegilego

DIPUKU LE DIPOROUTŠHA

Batamela Kgaufsi le Jehofa

Modimo o go laletša go batamela kgaufsi le yena. Puku ye e tla go bontšha go tšwa Beibeleng kamoo o ka dirago sona seo.