Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele e re Ruta Eng?

 KGAOLO YA BOHLANO

Topollo ke Mpho e Kgolo Kudu Yeo re e Neilwego ke Modimo

Topollo ke Mpho e Kgolo Kudu Yeo re e Neilwego ke Modimo

1, 2. (a) Ke’ng seo se dirago gore mpho e be e bohlokwa go wena? (b) Ke ka baka la’ng topollo e le mpho e kgolo kudu yeo re e neilwego ke Modimo?

KE MPHO efe e kgahlišago kudu yeo o kilego wa e hwetša? Ga se gore mpho e swanetše go tura e le gore e be e bohlokwa go wena. Ge mpho e go thabiša, goba e le selo seo o tlogago o se hloka, o a e leboga.

2 Go dimpho ka moka tšeo Modimo a re filego tšona, go na le mpho e tee yeo re e hlokago go feta selo le ge e le sefe. Ke mpho e kgolo kudu yeo Modimo a e filego batho. Kgaolong ye re tlo ithuta gore Jehofa o rometše Morwa wa gagwe e lego Jesu Kriste lefaseng e le gore re tle re hwetše bophelo bjo bo sa felego. (Bala Mateo 20:28.) Ka go romela Jesu mo lefaseng go tlo re lopolla, Jehofa o bontšhitše gore o tloga a re rata.

TOPOLLO KE ENG?

3. Ke ka baka la’ng batho ba ehwa?

3 Topollo ke tsela ya Jehofa ya go lokolla batho sebeng le lehung. (Baefeso 1:7) E le gore re kwešiše gore ke ka baka la eng re be re nyaka topollo, re swanetše go tseba seo se diregilego mengwaga e dikete e fetilego serapeng sa Edene. Batswadi ba rena ba pele e lego Adama le Efa ba ile ba dira sebe. Ka ge ba dirile sebe, ba ile ba hwa. Le rena re a hwa ka ge ba re fetišeditše sebe seo.—Bala Tlhaloso 9.

4. Adama e be e le mang, gona o be a na le eng?

 4 Ge Jehofa a be a bopa motho wa pele e lego Adama, O ile a mo fa selo sa bohlokwa kudu. O ile a mo fa bophelo bjo bo phethagetšego. Adama o be a na le monagano o phethagetšego le mmele o phethagetšego. Le ka mohla o be a ka se babje, a ka se tšofale e bile a ka se hwe. Ka ge a bopilwe ke Jehofa, go be go swana le gore Jehofa ke tatagwe. (Luka 3:38) Jehofa o be a bolela le yena gantši. Modimo o ile a hlalosetša Adama ka mo go kwagalago seo a bego a se letetše go yena a ba a mo fa mošomo o thabišago.Genesi 1:28-30; 2:16, 17.

5. Beibele e ra go re’ng ge e re Adama o be a bopilwe ka ‘seswantšho sa Modimo’?

5 Adama o be a bopilwe ka ‘seswantšho sa Modimo.’ (Genesi 1:27) Jehofa o ile a mo fa dika tša go swana le tša Gagwe, go akaretša lerato, bohlale, toka le matla. O ile a fa Adama tokologo ya boikgethelo. Adama e be e se roboto. Modimo o be a mmopile ka tsela yeo a bego a tla kgona go ikgethela go dira se se nepagetšego goba se se fošagetšego. Ge nkabe Adama a kgethile go kwa Modimo, nkabe a ile a phela ka mo go sa felego Paradeiseng.

6. Ge Adama a be a sa kwe Modimo, o ile a lahlegelwa ke’ng? Se se re kgoma bjang?

6 Ge Adama a be a sa kwe Modimo gomme a ahlolelwa lehu, o ile a hwetša kotlo e kgolo kudu. O ile a lahlegelwa ke segwera sa gagwe se se kgethegilego le Jehofa, bophelo bjo bo phethagetšego le legae la gagwe la Paradeise. (Genesi 3:17-19) Adama le Efa ba ile ba kgetha go se kwe Modimo, ka gona go be go fedile ka bona. Ka baka la seo Adama a se dirilego, “sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” (Baroma 5:12) Ge Adama a be a dira sebe, o  ‘ithekišitše’ bokgobeng a ba a rekiša le rena gore re be le sebe gomme re hwe. (Baroma 7:14) Na go na le seo se ka re lokollago bokgobeng bjoo? Ee, se gona.

7, 8. Topollo ke’ng?

7 Topollo ke’ng? Topollo ge e le gabotse e akaretša dilo tše pedi. Sa pele, topollo ke tefo yeo e lefiwago go lokolla motho goba go rekolla selo se itšego. Sa bobedi, topollo ke tefo yeo e lefelelago selo se itšego.

8 Go be go se na motho yo a ka lefelelago tshenyo e kgolo yeo Adama a e bakilego ge a be a dira sebe le go re tlišetša lehu. Eupša Jehofa o ile a bula tsela ya go re lokolla sebeng le lehung. Anke re ahlaahleng kamoo topollo e lefiwago ka gona le kamoo e ka re holago ka gona.

KAMOO JEHOFA A NEILEGO TOPOLLO KA GONA

9. Topollo e be e swanetše go lefiwa bjang?

9 Ga go le o tee wa rena yo a bego a ka tsoga a lefile topollo ya bophelo bjo bo phethagetšego bjoo Adama a bo lahlilego. Ka baka la’ng? Ka gobane ka moka ga rena ga se ra phethagala. (Psalme 49:7, 8) Go be go nyakega motho yo mongwe yo a phethagetšego gore a lefe topollo yeo. Ke ka baka leo e bitšwago “topollo e lekanago.” (1 Timotheo 2:6) Topollo yeo e be e swanetše go lefiwa ka bophelo bjo bo lekanago tlwaa le bjo Adama a bo lahlilego.

10. Jehofa o ile a nea bjang topollo?

10 Jehofa o ile a nea bjang topollo? O ile a romela Morwa wa gagwe yo bohlokwahlokwa lefaseng. Morwa yo, e lego Jesu, o mmopile pele a bopa dilo ka moka. (1 Johane 4:9, 10) Jesu o ile a ithaopela go tlogela Tatagwe le bophelo bja legodimong. (Bafilipi 2:7) Jehofa o ile a fetišetša bophelo bja Jesu ka popelong ya Maria, gomme Jesu a belegwa e le motho yo a phethagetšego, a se na sebe.Luka 1:35.

Jehofa o re neile Morwa wa gagwe yo bohlokwahlokwa e le topollo

11. Go kgonega bjang gore motho o tee a lefe topollo bakeng sa batho ka moka?

 11 Ka ge motho wa pele e lego Adama a se a kwa Jehofa, o ile a dira gore batho ka moka ba lahlegelwe ke bophelo bjo bo phethagetšego. Na go be go ka ba le motho yo mongwe yo a ka tlošago lehu baneng ka moka ba Adama? Ee. (Bala Baroma 5:19.) Jesu, yo a sa kago a dira sebe, o ile a nea bophelo bja gagwe bjo bo phethagetšego e le topollo. (1 Bakorinthe 15:45) Bophelo bja gagwe bjo bo phethagetšego bo be bo tla dirišwa go tloša lehu baneng ka moka ba Adama.1 Bakorinthe 15:21, 22.

12. Ke ka baka la’ng Jesu a ile a swanelwa ke go tlaišega kudu?

12 Beibele e hlalosa kamoo Jesu a ilego a tlaišega ka gona pele a ka hwa. O ile a bethwa gasehlogo, a kokotelwa koteng ya tlhokofatšo, gomme a tlogelwa moo gore a hwe gabohloko. (Johane 19:1, 16-18, 30) Ke ka baka la’ng Jesu a ile a swanelwa ke go tlaišega ka tsela ye? Ke ka gobane Sathane o be a boletše gore ga go na motho yo a ka botegelago Modimo ge e ba a ka lekwa o šoro. Jesu o ile a bontšha gore motho yo a phethagetšego a ka botegela Modimo le ge a ka tlaišega o šoro. Nagana kamoo Jehofa a ilego a ikgantšha ka Jesu ka gona!Diema 27:11; bala Tlhaloso 15.

13. Topollo e ile ya lefiwa bjang?

13 Topollo e ile ya lefiwa bjang? Jesu o ile a nea Tatagwe mohola wa bophelo bja gagwe. Ka ngwaga wa 33, ka Nisani 14 khalentareng ya Sejuda, Jehofa o ile a dumelela manaba a Jesu gore a mmolaye. (Baheberu 10:10) Ka morago ga matšatši a mararo, Jehofa o ile a tsoša Jesu, e sego e le motho wa nama eupša e le sebopiwa sa moya. Ka morago, ge Jesu a boetše go Tatagwe legodimong, o ile a mo nea mohola wa bophelo bja gagwe bjo bo phethagetšego gore a re lopolle. (Baheberu 9:24) Ka ge ga  bjale topollo e lefilwe, re na le sebaka sa go lokollwa sebeng le lehung.Bala Baroma 3:23, 24.

KAMOO O KA HOLWAGO KE TOPOLLO

14, 15. Re swanetše go dira’ng gore Jehofa a re lebalele dibe tša rena?

14 Re šetše re holwa ke mpho ye e kgolo kudu ya Modimo. Anke re boneng kamoo re holegago ka gona gona bjale le kamoo re tla holegago ka gona nakong e tlago.

15 Re kgona go lebalelwa dibe. Ga go bonolo go dira se se lokilego ka dinako tšohle. Re dira diphošo, e bile ka dinako tše dingwe re bolela dilo tše di fošagetšego le go di dira. (Bakolose 1:13, 14) Re ka lebalelwa bjang? Re swanetše go itshola go tšwa pelong ka seo re se dirilego gomme ka boikokobetšo re kgopele Jehofa gore a re lebalele. Ge re dirile bjalo, re ka kgodišega gore dibe tša rena di lebaletšwe.1 Johane 1:8, 9.

16. Re swanetše go dira’ng gore re be le letswalo le lebotse?

16 Re ka ba le letswalo le lebotse. Ge e ba letswalo la rena le re botša gore re dirile selo se se fošagetšego, re ikwa re le molato, mohlomongwe re nagana gore re ka se lebalelwe e bile re ikwa re se na mohola. Eupša ga go hlokagale gore re nolege moko. Ge e ba re kgopela Jehofa gore a re lebalele dibe tša rena, re ka kgodišega gore o tla re kwa gomme a re lebalela. (Baheberu 9:13, 14) Jehofa o nyaka gore re mmotše mathata a rena ka moka le mafokodi a rena. (Baheberu 4:14-16) Mafelelong, re tla ba le khutšo le Modimo.

17. Ke ditšhegofatšo dife tšeo re ka di hwetšago ka ge Jesu a re hwetše?

17 Re na le kholofelo ya go tlo phela ka mo go sa felego. Beibele e re: “Moputso woo sebe se o lefago ke lehu, eupša mpho yeo Modimo a e neago ke bophelo bjo bo sa felego ka Kriste Jesu Morena wa rena.” (Baroma 6:23) Ka ge Jesu a re hwetše, re ka phela ka  mo go sa felego gomme ra thabela bophelo bjo bo phethagetšego. (Kutollo 21:3, 4) Eupša re swanetše go dira’ng gore re hwetše ditšhegofatšo tšeo?

NA O TLA BONTŠHA TUMELO SEHLABELONG SA TOPOLLO?

18. Re tseba bjang gore Jehofa o a re rata?

18 Nagana kamoo o thabago ka gona ge motho yo mongwe a go fa mpho e botse. Go dimpho ka moka tšeo Jehofa a re filego tšona, topollo ke mpho e bohlokwa kudu, gomme re swanetše go mo leboga go tšwa pelong ka ge a re file yona. Johane 3:16 e re botša gore: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši.” Ee, Jehofa o re rata kudu moo a re filego Morwa wa gagwe yo bohlokwahlokwa e lego Jesu. E bile re a tseba gore Jesu le yena o a re rata ka gobane o ile a re hwela ka go rata. (Johane 15:13) Mpho ya topollo e swanetše go go kgodiša gore Jehofa le Jesu ba tloga ba go rata.Bagalatia 2:20.

Ge re dutše re ithuta ka Jehofa, re tla ba bagwera ba gagwe, gomme ra mo rata le go feta

19, 20. (a) O ka ba mogwera wa Jehofa bjang? (b) O ka bontšha bjang gore o na le tumelo sehlabelong sa Jesu sa topollo?

19 Ka ge ga bjale o ithutile ka lerato le legolo leo Modimo a re bontšhitšego lona, o ka ba mogwera wa gagwe bjang? Ga go bonolo go rata motho yo o sa mo tsebego. Johane 17:3 e re re ka tseba Jehofa. Ge o dutše o ithuta ka yena, o tla mo rata le go feta, o tla nyaka go mo thabiša gomme wa ba mogwera wa gagwe. Ka gona tšwela pele o ithuta ka Jehofa ka go bala Beibele.1 Johane 5:3.

20 Bontšha tumelo sehlabelong sa Jesu sa topollo. Beibele e re “yo a dumelago go Morwa o na le bophelo bjo bo sa felego.” (Johane 3:36) Go bolela’ng go bontšha tumelo? Go bolela go dira seo Jesu a re rutilego gore re se dire. (Johane 13:15) Ga se gwa lekana go no bolela gore re  dumela go Jesu. E le gore re holwe ke topollo, re swanetše go dira se sengwe ka tumelo ya rena. Go Jakobo 2:26, re bala gore: “Tumelo ka ntle le mediro e hwile.”

21, 22. (a) Ke ka baka la’ng re swanetše go ba gona Segopotšong sa lehu la Kriste ngwaga le ngwaga? (b) Re tlo ahlaahla’ng go Kgaolo 6 le 7?

21 Eba Gona Segopotšong sa lehu la Kriste. Bošegong bja pele ga ge Jesu a ka hwa, o ile a re ruta gore re swanetše go gopola lehu la gagwe. Re dira se ngwaga le ngwaga, gomme tiragalo ye e bitšwa Segopotšo goba “Selalelo sa Morena.” (1 Bakorinthe 11:20; Mateo 26:26-28) Jesu o nyaka gore re gopole gore o re neile bophelo bja gagwe bjo bo phethagetšego e le topollo. O itše: “Dulang le dira se e le go nkgopola.” (Bala Luka 22:19.) Ge o eba gona Segopotšong, o bontšha gore o gopola topollo le lerato le legolo leo Jehofa le Jesu ba re bontšhago lona.—Bala Tlhaloso 16.

22 Topollo ke mpho e kgolo kudu go feta dimpho ka moka tšeo Modimo a re neilego tšona. (2 Bakorinthe 9:14, 15) Le gona mpho ye e bohlokwahlokwa e tla thuša batho ba dimilione bao ba šetšego ba hwile. Kgaolo 6  le 7 di tla hlalosa kamoo seo se ka kgonegago ka gona.

Ithute ka mo go oketšegilego

Jehofa o Lokišetša “Topollo Bakeng sa go Lopolla ba Bantši”

Thuto e bonolo eupša e le e kwagalago e ka go thuša go batamela kgaufsi le Modimo.