Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Beibele e re Ruta Eng?

 KGAOLO YA LESOMEPEDI

O ka Dira Eng Gore o be Mogwera wa Modimo?

O ka Dira Eng Gore o be Mogwera wa Modimo?

1, 2. Ba bangwe ba bagwera ba Jehofa e be e le bomang?

O NYAKA mogwera wa mohuta mang? O nyaka motho yo a go ratago. Motho yo a go tlwaetšego le wena o mo tlwaetšego. Motho yo a nago le botho le dika tšeo o di ratago.

2 Jehofa Modimo o kgetha batho ba itšego gore e be bagwera ba gagwe. Ka mohlala, Aborahama e be e le yo mongwe wa bagwera ba Jehofa. (Jesaya 41:8; Jakobo 2:23) E bile Jehofa o be a rata Dafida. O ile a re Dafida e be e le ‘monna yo a kwanago le pelo ya gagwe.’ (Ditiro 13:22) Le gona moporofeta Daniele e be e le motho yo a “rategago kudu” go Jehofa.Daniele 9:23.

3. Ke ka baka la’ng Aborahama, Dafida le Daniele e be e le bagwera ba Jehofa?

3 Go tlile bjang gore Aborahama, Dafida le Daniele e be bagwera ba Jehofa? Jehofa o ile a botša Aborahama gore: “O kwele lentšu la ka.” (Genesi 22:18) Jehofa e ba mogwera wa bao ba mo kwago ka pelo ka moka. Gaešita le setšhaba sa batho e ka ba bagwera ba gagwe. Jehofa o ile a hlalosetša setšhaba sa Isiraele gore: “Ekwang lentšu la ka gomme nna ke tla ba Modimo wa lena, lena la ba batho ba ka.” (Jeremia 7:23) Ka gona le wena o swanetše go kwa Jehofa ge e ba o tloga o nyaka go ba mogwera wa gagwe.

JEHOFA O ŠIRELETŠA BAGWERA BA GAGWE

4, 5. Jehofa o šireletša bjang bagwera ba gagwe?

4 Beibele e re Jehofa o nyaka ditsela tša “gore a bontšhe matla a gagwe bakeng sa bao ba mmotegelago ka dipelo ka moka.” (2 Dikoronika 16:9) Go Psalme 32:8, Jehofa o holofetša  bagwera ba gagwe gore: “Ke tla dira gore o be le temogo gomme ka go ruta tsela yeo o swanetšego go sepela ka yona. Ke tla nea keletšo leihlo la ka le le go wena.”

5 Lenaba le matla le nyaka go re thibela go ba bagwera ba Modimo. Eupša Jehofa o nyaka go re šireletša. (Bala Psalme 55:22.) Re hlankela Jehofa ka pelo ka moka ka ge re le bagwera ba gagwe. Re a mmotegela gaešita le ge re le ka tlase ga maemo a thata. Le gona re na le kgodišego e swanago le yeo mopsalme a bego a na le yona. O ile a ngwala ka Jehofa gore: “Ka gobane o ka letsogong la ka la le letona, nka se šišinywe.” (Psalme 16:8; 63:8) Sathane o re thibela bjang go ba bagwera ba Modimo?

MAAKA AO SATHANE A A BOLETŠEGO KA BATHO

6. Sathane o ile a bolela maaka afe ka batho?

6 Go Kgaolo 11 re ithutile gore Sathane o ile a belaela tsela ya Jehofa ya go buša le go mo thomeletša ka gore o bolela maaka le gore ga a na tekatekano ka go se dumelele Adama le Efa gore ba ikgethele seo se nepagetšego le seo se fošagetšego. Puku ya Beibele ya Jobo e re ruta gore Sathane e bile o belaela maikemišetšo a batho bao ba nyakago go ba bagwera ba Modimo. Sathane o bolela gore ba hlankela Modimo ka baka la seo ba se hwetšago go Yena, e sego ka gobane ba Mo rata. Sathane o bolela le gore a ka dira gore motho le ge e le ofe a hlanogele Modimo. Anke re boneng seo re ka ithutago sona go Jobo le kamoo Jehofa a ilego a mo šireletša ka gona.

7, 8. (a) Jehofa o be a ikwa bjang ka Jobo? (b) Sathane o ile a re’ng ka Jobo?

7 Jobo e be e le mang? E be e le monna wa go loka yo a phetšego mengwaga e ka bago e 3 600 e fetilego. Jehofa o boletše gore ka nako yeo go be go se na motho wa go swana le yena mo lefaseng. Jobo o be a hlompha Modimo ka  mo go tseneletšego gomme a hloile go dira bobe. (Jobo 1:8) Ee, Jobo e be e le mogwera wa kgonthe wa Jehofa.

8 Sathane o ile a bolela gore Jobo o be a hlankela Modimo ka ge a be a nyaka go ikhola. Sathane o ile a re go Jehofa: “Na ga se wena o mo ageleditšego ka legora [goba fense], yena le bohle ba ntlo ya gagwe gotee le se sengwe le se sengwe seo a nago le sona go mo dikologa? O šegofaditše modiro wa diatla tša gagwe gomme diruiwa tša gagwe tšona di tletše gohle lefaseng. Eupša, hle otlolla seatla sa gago o kgwathe selo se sengwe le se sengwe se a nago le sona gomme o bone ge e ba a ka se go roge mahlong.”Jobo 1:10, 11.

9. Jehofa o ile a dumelela Sathane gore a dire’ng?

9 Sathane o ile a latofatša Jobo ka gore o hlankela Jehofa ka baka la dilo tšeo a di hwetšago go Yena. Le gona Sathane o ile a re a ka kgona go dira gore Jobo a se sa hlankela Jehofa. Jehofa ga se a ka a dumelelana le Sathane, eupša o ile A dumelela Sathane gore a leke Jobo go bona ge e ba a mo hlankela ka gobane a Mo rata.

SATHANE O HLASELA JOBO

10. Sathane o ile a hlasela Jobo bjang, gona Jobo o ile a arabela bjang?

10 Sa pele, Sathane o ile a diriša batho ba itšego gore ba utswe goba ba bolaye diruiwa ka moka tša Jobo. Ke moka Sathane o ile a bolaya ba bantši ba bahlanka ba Jobo. Jobo ile a lahlegelwa ke dilo ka moka. Ge Sathane a hlasela Jobo la mafelelo, o ile a bolaya bana ba gagwe ba lesome ka ledimo. Eupša Jobo o ile a dula a botegela Jehofa. Beibele e re: “Go tše ka moka Jobo ga se a ka a dira sebe goba a bolela gore Modimo o dirile selo le ge e le sefe se se fošagetšego.”Jobo 1:12-19, 22.

Jehofa o ile a putsa Jobo ka ge a ile a mmotegela

11. (a) Ke’ng se sengwe seo Sathane a ilego a se dira Jobo? (b) Jobo o ile a arabela bjang?

11 Sathane ga se a ka a fela matla. O ile a leka Modimo  ka go bolela gore: “Otlolla seatla sa gago o kgwathe go fihla lerapong la gagwe le nameng ya gagwe gomme o bone ge e ba a ka se go roge mahlong.” Ka gona Sathane o ile a otla Jobo ka bolwetši bjo šoro. (Jobo 2:5, 7) Le mo lekgeng le, Jobo o ile a botegela Jehofa. O ile a re: “Ke tla ba ka hwa ke se ka lahla potego ya ka!”Jobo 27:5.

12. Jobo o ile a hlatsela bjang gore Sathane o bolela maaka?

12 Jobo o be a sa tsebe selo ka taba ya gore Sathane o be a mo latofatša le gore go re’ng a be a tlaišega gakaakaa. O be a nagana gore Jehofa ke yena a mmakelago mathata. (Jobo 6:4; 16:11-14) Eupša Jobo o ile a dula a botegela Jehofa. Ga bjale go be go se na pelaelo gore Jobo o be a se na boithati. E be e le mogwera wa Modimo ka gobane a Mo rata. Ditatofatšo tša Sathane ka moka e be e le maaka!

13. Ditlamorago tša potego ya Jobo e bile dife?

13 Gaešita le ge Jobo a be a sa tsebe seo se bego se direga legodimong, o ile a botegela Modimo gomme a hlatsela gore Sathane ke yo mobe. Jehofa o ile a putsa Jobo ka ge a be a mmotegela.Jobo 42:12-17.

KAMOO SATHANE A GO LATOFATŠAGO KA GONA

14, 15. Sathane o latofatša banna ka moka le basadi ka’ng?

14 O ka ithuta dilo tše bohlokwa go seo se ilego sa diragalela Jobo. Lehono, Sathane o re latofatša ka gore re hlankela Jehofa ka gore re nyaka se sengwe go Yena. Go Jobo 2:4, Sathane o boletše gore: “Se sengwe le se sengwe seo motho a nago le sona o tla se gafa ka baka la moya wa gagwe.” Ka gona, Sathane o latofatša banna ka moka le basadi ka gore ba na le boithati, e sego feela Jobo. Mengwaga e makgolo ka morago ga gore Jobo a hwe, Sathane o be a sa dutše a nyatša Jehofa le go latofatša bahlanka ba gagwe. Ka mohlala, go Diema 27:11 re bala gore: “Morwa wa ka, hlalefa gomme o thabiše pelo ya ka, gore ke kgone go fetola yo a nkwerago [goba yo a nnyatšago].”

 15 O ka kgetha go kwa Jehofa gomme wa ba mogwera wa Gagwe yo a botegago, ka go re’alo wa hlatsela gore Sathane o bolela maaka. Gaešita le ge e ba o swanetše go dira diphetogo tše dikgolo bophelong bja gago gore o be mogwera wa Modimo, ye ke phetho e kaone yeo o ka e dirago! Phetho ye ke e kgolo kudu. Sathane o bolela gore o ka se botegele Modimo ge o na le mathata. O leka go re goketša gore re se botegele Modimo. Bjang?

16. (a) Ke mekgwa efe yeo Sathane a e dirišago go leka go re thibela go hlankela Jehofa? (b) Ke mokgwa ofe wo Sathane a ka o dirišago go leka go go thibela go hlankela Jehofa?

16 Sathane o diriša mekgwa e fapafapanego go leka go re thibela go ba bagwera ba Modimo. O re hlasela “go swana le tau e rorago, a nyaka yo a kago go mo metša.” (1 Petro 5:8) O se ke wa makala ge bagwera ba gago, ditho tša lapa goba ba bangwe ba leka go go thibela gore o ithute Beibele le go dira se se nepagetšego. O ka ikwa eka o hlasetšwe. * (Johane 15:19, 20) Le gona Sathane o itira “morongwa wa seetša.” Ka gona a ka leka go re goketša gore re se kwe Jehofa. (2 Bakorinthe 11:14) Mokgwa o mongwe wo Sathane a o dirišago go leka go re thibela go hlankela Jehofa ke go re dira gore re nagane gore ga re swanelege go hlankela Modimo.Diema 24:10.

EKWA MELAO YA JEHOFA

17. Ke ka baka la’ng re ekwa Jehofa?

17 Ge re ekwa Jehofa, re bontšha gore Sathane o bolela maaka. Ke’ng se se tlago go re thuša go kwa Modimo? Beibele e re: “O rate Jehofa Modimo wa gago ka pelo ya gago ka moka, ka moya wa gago ka moka le ka matla a gago ka  moka.” (Doiteronomio 6:5) Re kwa Jehofa ka gobane re mo rata. Ge tsela yeo re ratago Jehofa ka yona e dutše e gola, re tla nyaka go dira selo se sengwe le se sengwe seo a re kgopelago gore re se dire. Moapostola Johane o ngwadile gore: “Se ke seo lerato la Modimo le se bolelago, gore re boloke ditaelo tša gagwe gomme ditaelo tša gagwe ga di boima.”1 Johane 5:3.

18, 19. (a) Tše dingwe tša dilo tšeo Jehofa a rego di fošagetše ke dife? (b) Re tseba bjang gore Jehofa ga a re kgopele go dira selo seo re ka se kgonego go se dira?

18 Eupša tše dingwe tša dilo tšeo Jehofa a re botšago gore di fošagetše ke dife? Go na le mehlala e itšego ka lepokising leo le rego: “ Hloya Seo Jehofa a se Hloilego.” Mathomong, o ka nagana gore tše dingwe tša dilo tše di lokile. Eupša ge o bala ditemana tša Beibele gomme o naganišiša ka tšona, o tla kgona go bona bohlale bja go kwa melao ya Jehofa. Le gona o ka lemoga gore o swanetše go dira diphetogo bophelong bja gago. Le ge ka dinako tše  dingwe se se ka se be bonolo, eupša ge e ba o dira diphetogo tšeo, o tla ba le khutšo le lethabo tšeo di tlišwago ke go ba mogwera yo a botegago wa Modimo. (Jesaya 48:17, 18) Re tseba bjang gore go a kgonega gore re dire diphetogo tše?

19 Jehofa ga a ke a re kgopela gore re dire selo le ge e le sefe seo re ka se kgonego go se dira. (Doiteronomio 30:11-14) Ka ge e le Mogwera wa kgonthe, o re tseba gabotse go feta kamoo re itsebago ka gona. O tseba bokgoni bja rena le mafokodi a rena. (Psalme 103:14) Moapostola Paulo o re kgothaletša gore: “Modimo o a botega gomme a ka se le lese le lekwa go feta kamoo le ka kgonago go kgotlelela ka gona, eupša ge go etla moleko o tla bula tsela ya go tšwa e le gore le kgone go o kgotlelela.” (1 Bakorinthe 10:13) Re ka kgodišega gore Jehofa ka mehla o tla re fa matla a go dira se se nepagetšego. O tla go fa “matla a fetago a tlwaelegilego” go go thuša go kgotlelela maemo a thata. (2 Bakorinthe 4:7) Ka morago ga gore Paulo a bone kamoo  Jehofa a ilego a mo thuša ka gona dinakong tše bjalo, o itše: “Dilong tšohle ke na le matla ka baka la yo a mphago matla.”Bafilipi 4:13.

ITHUTE GO RATA SEO MODIMO A SE RATAGO

20. Ke dika dife tša Jehofa tšeo o swanetšego go di ekiša, gona ka baka la’ng?

20 Ge e ba re nyaka go ba bagwera ba Jehofa, re swanetše go kgaotša go dira dilo tšeo Jehofa a rego di fošagetše, eupša re se ke ra felela moo. (Baroma 12:9) Bagwera ba Modimo ba rata seo a se ratago. Ba hlaloswa lengwalong la Psalme 15:1-5. (Bala.) Bagwera ba Jehofa ba ekiša dika tša gagwe e bile ba bontšha “lerato, lethabo, khutšo, go se fele pelo, botho, toko, tumelo, boleta le boitshwaro.”Bagalatia 5:22, 23.

21. O ka ithuta bjang go bontšha dika tšeo Modimo a di ratago?

21 O ka ithuta bjang go bontšha dika tšeo tše dibotse? O swanetše go ithuta seo Jehofa a se ratago ka go bala le go ithuta Beibele ka mehla. (Jesaya 30:20, 21) Ge o dutše o dira se, tsela yeo o ratago Jehofa e tla gola, gomme o tla nyaka go mo kwa.

22. Mafelelo e tla ba afe ge o ekwa Jehofa?

22 Diphetogo tšeo o swanetšego go di dira bophelong bja gago di ka swantšhwa le go hlobola diaparo tša kgale gomme wa apara tše mpsha. Beibele e re o swanetše go ‘hlobola semelo sa kgale’ gomme o “apare semelo se sefsa.” (Bakolose 3:9, 10) Gaešita le ge go ka se be bonolo, ge re dira diphetogo tše ebile re ekwa Jehofa, o re holofetša “moputso o mogolo.” (Psalme 19:11) Ee, kgetha go kwa Jehofa gomme o bontšhe gore Sathane o bolela maaka. Hlankela Jehofa ka gobane o mo rata ka lerato le le se nago boithati, e sego ka gobane o nyaka go hwetša moputso nakong e tlago. Ge o ka dira bjalo, o tla ba mogwera wa kgonthe wa Modimo!

^ par. 16 Se ga se bolele gore Sathane o laola batho bao ba lekago go go thibela go ithuta Beibele. Eupša Sathane ke “modimo wa lefase le,” gomme “lefase ka moka le rapaletše matleng a [gagwe].” Ka gona ga go makatše ge batho ba bangwe ba leka go re thibela go hlankela Jehofa.2 Bakorinthe 4:4; 1 Johane 5:19.

Ithute ka mo go oketšegilego

BATAMELA KGAUFSI LE JEHOFA

Na o ka ‘Batamela Kgaufsi le Modimo’ e le ka Kgonthe?

Jehofa Modimo, Mmopi wa legodimo le lefase, o re nea taletšo le kholofetšo.