Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele e re Ruta Eng?

 KGAOLO YA PELE

Modimo ke Mang?

Modimo ke Mang?

1, 2. Gantši batho ba rata go botšiša dipotšišo dife?

BANA ba rata go botšiša dipotšišo. O ka ba hlalosetša selo se itšego, eupša gantši ba sa tlo botšiša gore: ‘Ke ka baka la’ng?’ Le gona ge o leka go ba araba, ba ka botšiša gape gore: ‘Eupša ke ka baka la’ng?’

2 Go sa šetšwe gore re bana goba re batho ba bagolo, ka moka ga rena re na le dipotšišo. Re ka ba re na le dipotšišo ka seo re tlago go se ja, go se apara goba go se reka. Goba re ka ba re na le dipotšišo tše bohlokwa ka bophelo le bokamoso. Eupša ge re sa hwetše dikarabo tše di kgotsofatšago tša dipotšišo tšeo, re ka tlogela go nyaka dikarabo.

3. Ke ka baka la’ng batho ba bantši ba nagana gore ba ka se hwetše dikarabo tša dipotšišo tša bona tše bohlokwa?

3 Na Beibele e na le dikarabo tša dipotšišo tše bohlokwa tšeo re nago le tšona? Batho ba bangwe ba ka nagana bjalo, eupša ba nagana gore go thata kudu go kwešiša Beibele. Ba ka nagana gore barutiši goba baruti ke bona feela ba nago le dikarabo. Le gona ba bangwe ba lewa ke dihlong tša go bolela gore ga ba tsebe dikarabo. Wena o nagana’ng?

4, 5. O na le dipotšišo dife tše bohlokwa? Ke ka baka la’ng o swanetše go tšwela pele o tsoma dikarabo?

4 Ga go pelaelo gore o nyaka dikarabo tša dipotšišo tše bjalo ka tše di rego: Ke ka baka la’ng ke phela? Go tlo direga’ng ka nna ge ke ehwa? Modimo o na le dika dife? Jesu, e lego Morutiši yo a tsebjago kudu, o itše: “Tšwelang pele le kgopela, le tla newa; tšwelang pele le tsoma, le tla hwetša; tšwelang pele le kokota, le tla bulelwa.”  (Mateo 7:7) O se ke wa lesa go tsoma dikarabo go fihlela o hwetša tšeo o ka di botago.

5 Ee, ge e ba o ‘tšwela pele o tsoma,’ o tla hwetša dikarabo ka Beibeleng. (Diema 2:1-5) Dikarabo tšeo di kwešišega gabonolo. Seo o ithutago sona se tla dira gore o phele bophelo bjo bo thabišago gona bjale le go go nea kholofelo e kgahlišago ka bokamoso. Anke re ahlaahle potšišo e tee yeo e gakantšhitšego batho ba bantši.

NA MODIMO O NA LE TABA LE RENA GOBA NA O SEHLOGO?

6. Ke ka baka la’ng batho ba bangwe ba nagana gore Modimo ga a na taba le gore ba a tlaišega?

6 Batho ba bantši ba nagana gore Modimo ga a na taba le rena. Ba nagana gore ge e ba Modimo a be a tloga a na le taba le rena, nkabe re ipshina ka bophelo. Lefaseng go tletše dintwa, lehloyo le manyami. Batho ba a babja, ba a tlaišego le go hwa. Ba bangwe ba ipotšiša gore: ‘Ge e ba Modimo a na le taba le rena, go re’ng a sa fediše tlaišego ye ka moka?’

7. (a) Baruti ba rutile batho bjang gore Modimo o sehlogo? (b) Ke ka baka la’ng re ka kgodišega gore Modimo ga se yena a dirago gore dilo tše mpe di direge?

7 Ka dinako tše dingwe baruti ba dira gore batho ba dumele gore Modimo o sehlogo. Ge go direga selo se itšego se bohloko, ba re ke thato ya Modimo. Ba re o be a nyaka gore selo seo se direge. Ge ba bolela gore ke thato ya Modimo, ge e le gabotse ba mmea molato. Eupša Beibele e ruta gore Modimo ga se mothopo wa bobe. Lengwalo la Jakobo 1:13 le re botša gore Modimo ga a leke motho ka dilo tše mpe. Le re: “A go se be le yo a rego ge a le molekong a re: ‘Ke lekwa ke Modimo.’ Gobane Modimo a ka se ke a lekwa ka dilo tše mpe le gona yena ga a leke motho le ge e le ofe.” Se se bolela gore gaešita le ge  Modimo a se a thibela dilo tše mpe gore di se ke tša direga, ga a ke a dira gore di direge. (Bala Jobo 34:10-12.) A re boneng mohlala o latelago.

8, 9. Ke ka baka la’ng e tla ba phošo go rweša Modimo molato ge re welwa ke mathata? Nea mohlala.

8 Anke o nagane ka lesogana leo le dulago ka gae le batswadi ba lona. Tatago lona o le rata kudu e bile o le rutile go dira diphetho tše dibotse. Ke moka lesogana leo la se kwe tatago lona, gomme la tloga gae la yo dira dilo tše mpe e bile la tsena mathateng. Na o tla bea tatago lesogana leo molato ka seo se diragetšego ka ge a se a thibela morwa wa gagwe gore a se tloge gae? Aowa! (Luka 15:11-13) Go etša tate yoo, Modimo ga se a ka a thibela batho ge ba be ba kgetha go se mo kwe le go dira dilo tše mpe. Ka gona ge go direga selo se itšego se sebe, re swanetše go gopola gore ga se Modimo a dirilego gore se direge. E tla ba phošo go rweša Modimo molato.

9 Go na le lebaka le le kwagalago leo ka lona gona bjale Modimo a sa thibelego dilo tše mpe gore di se ke tša direga. Go Kgaolo 11, o tla ithuta seo Beibele e se bolelago ka taba ye. Eupša o ka kgodišega gore Modimo o a re rata le gore ga se ra swanela go mmea molato ge re welwa ke mathata. Ge e le gabotse, ke Yena feela a ka rarollago mathata ao.Jesaya 33:2.

10. Ke ka baka la’ng re ka kgodišega gore Modimo o tla lokiša tshenyo ka moka yeo e bakilwego ke batho ba babe?

10 Modimo ke yo mokgethwa. (Jesaya 6:3) Selo se sengwe le se sengwe seo a se dirago se sekile, se hlwekile e bile ke se sebotse. Ka gona re ka mmota. Eupša batho bona ga ba bjalo. Ka dinako tše dingwe ba dira diphošo. Gaešita le mmuši yo a tlogago a botega ga a na matla a go lokiša dilo ka moka tšeo batho ba babe ba di dirago. Ga go na motho yo a nago le matla ao a lekanago le a Modimo.  Modimo a ka kgona go lokiša tshenyo ka moka yeo e bakilwego ke batho ba babe, e bile ke sona seo a tlago go se dira. O tla fediša bobe ka moka ka mo go sa felego.—Bala Psalme 37:9-11.

MODIMO O IKWA BJANG GE BATHO BA TLAIŠEGA?

11. Modimo o ikwa bjang ge o tlaišega?

11 Modimo o ikwa bjang ge a bona dilo tše di diregago lefaseng le dilo tšeo di go welago? Beibele e ruta gore Modimo “o rata toka.” (Psalme 37:28) Ka gona o tloga a tshwenyega ka se se nepagetšego le se se fošagetšego. Ga a rate go bona batho ba tlaišega. Beibele e re ‘pelo ya gagwe e ile ya kwa bohloko’ ge a be a bona lefase le tletše ka bobe nakong e fetilego. (Genesi 6:5, 6) Modimo ga se a fetoga. (Maleaki 3:6) Beibele e re Modimo o tloga a na le taba le wena.Bala 1 Petro 5:7.

Beibele e ruta gore Jehofa ke Mmopi yo lerato wa legohle

12, 13. (a) Ke ka baka la’ng re rata batho ba bangwe e bile re na le taba le bona, le gona re ikwa bjang ka tlaišego yeo e lego gona mo lefaseng? (b) Ke ka baka la’ng re ka kgodišega gore Modimo o tla fediša tlaišego ka moka le go hloka toka?

12 Le gona Beibele e re Modimo o re bopile ka seswantšho sa gagwe. (Genesi 1:26) Se se ra gore Modimo o re bopile re na le dika tše dibotse tšeo yena a nago le tšona. Ka gona ge e ba o ekwa bohloko ge batho bao ba se nago molato ba tlaišega, gona go ra gore Modimo o kwa bohloko le go feta! Re tseba bjang se?

13 Beibele e re ruta gore “Modimo ke lerato.” (1 Johane 4:8) Selo se sengwe le se sengwe seo Modimo a se dirago o tutuetšwa ke lerato. Ka gona re rata batho ka gobane Modimo le yena o a re rata. Anke o nagane ka se: Ge nkabe o na le matla, na o be o tla fediša tlaišego ka moka le go hloka toka mo lefaseng? Ga go pelaelo gore o be o tla di fediša, ka gobane o rata batho. Go thwe’ng ka Modimo? O na le matla, e bile ka ge a re rata, o tla fediša  tlaišego ka moka le go hloka toka. O ka kgodišega gore kholofetšo e nngwe le e nngwe ya Modimo yeo e boletšwego mathomong a puku ye e tla phethagala! Eupša e le gore o bote dikholofetšo tše, o swanetše go tseba ka mo go oketšegilego ka Modimo.

MODIMO O NYAKA GORE O MO TSEBE

Ge e ba o nyaka go ba mogwera wa motho yo a itšego, o mmotša leina la gago. Modimo o re botša leina la gagwe ka Beibeleng

14. Leina la Modimo ke mang, gona re tseba bjang gore re swanetše go le diriša?

14 Ge e ba o nyaka go ba mogwera wa motho yo a itšego, gantši selo sa pele seo o mmotšago sona ke sefe? O mmotša leina la gago. Na Modimo o na le leina? Madumedi a mantši a re leina la gagwe ke Modimo goba Morena, eupša a ga se mainaina. E fo ba maina a tlhompho, a go swana le “kgoši” goba “mopresidente.” Modimo o re boditše gore leina la gagwe ke Jehofa. Psalme 83:18 e re: “Gore batho ba tsebe gore wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.” Bangwadi ba Beibele ba dirišitše leina la Modimo ka makga a dikete. Jehofa o nyaka gore o tsebe leina la gagwe gomme o le diriše. O go botša leina la gagwe gore o be mogwera wa gagwe.

15. Leina Jehofa le ra go re’ng?

15 Leina la Modimo, e lego  Jehofa, le bolela mo gontši. Le ra gore Modimo a ka phethagatša kholofetšo le ge e le efe yeo a e dirago e bile a ka phethagatša morero wa gagwe. Ga go na seo se ka mo thibelago. Ke Jehofa feela a ka bago le leina le. *

16, 17. Ke’ng seo se bolelwago ke gore (a) “Ramatlaohle”? (b) “Kgoši ya bosafelego”? (c) “Mmopi”?

16 Go etša ge re badile pejana, Psalme 83:18 e bolela ka Jehofa gore: “Ke wena o nnoši o lego Yo Godimodimo.”  Le gona Kutollo 15:3 e re: “Mediro ya gago ke e megolo le e makatšago, wena Jehofa Modimo Ramatlaohle. Ditsela tša gago ke tša go loka le therešo, wena Kgoši ya bosafelego.” Go ra go re’ng gore “Ramatlaohle”? Go ra gore Jehofa o matla kudu go feta motho le ge e le ofe legohleng. Go re “Kgoši ya bosafelego” go ra gore o be a dutše a le gona. Psalme 90:2 e hlalosa gore ke wa go tloga mehleng ya neng le neng go iša mehleng ya neng le neng. Ruri seo se a makatša!

17 Jehofa ke yena feela e lego Mmopi. Kutollo 4:11 e re: “Wena Jehofa Modimo wa rena o swanelwa ke go amogela letago, kgodišo le matla, gobane o bopile dilo ka moka gomme di bile gona le go bopša ka baka la thato ya gago.” Ee, Jehofa o hlodile dilo ka moka, go tloga ka barongwa legodimong le dinaledi tše di lego sebakabakeng go fihla ka dienywa tše di lego mehlareng le dihlapi tša lewatleng!

 NA O KA BA MOGWERA WA JEHOFA?

18. Ke ka baka la’ng batho ba bangwe ba ka nagana gore ba ka se tsoge e bile bagwera ba Modimo? Beibele e re’ng ka taba yeo?

18 Batho ba bangwe ge ba bala ka dika tša Jehofa tše di kgahlišago, ba kwa ba boifa gomme ba nagana gore: ‘Go tla bjang gore Modimo yo matla kudu, yo bohlokwa kudu le yo a lego kgolekgole a be le taba le nna?’ Eupša na Modimo o nyaka gore re ikwe ka tsela yeo? Aowa. Jehofa o nyaka go ba kgauswi le rena. Beibele e re Modimo “ga a kgole le yo mongwe le yo mongwe wa rena.” (Ditiro 17:27) Modimo o nyaka gore o batamele kgauswi le yena, gomme o holofetša gore ‘o tla go batamela.’—Jakobo 4:8.

19. (a) O ka dira’ng gore o be mogwera wa Modimo? (b) Ke seka sefe sa Jehofa seo o se ratago kudu?

19 O ka dira’ng gore o be mogwera wa Modimo? Jesu o itše: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.” (Johane 17:3) Tšwela pele o ithuta, gomme o tla tseba Jehofa le Jesu. Ke moka o tla hwetša bophelo bjo bo sa felego. Ka mohlala, re šetše re ithutile gore “Modimo ke lerato.” (1 Johane 4:16) Eupša o na le dika tše dingwe tše dintši tše dibotse. Beibele e re botša gore Jehofa ke yo a “gaugelago le yo a šokelago, yo a diegago go galefa, yo a tletšego botho le therešo.” (Ekisodo 34:6) Jehofa “o lokile e bile o ikemišeditše go lebalela.” (Psalme 86:5) Modimo ga a fele pelo e bile o a botega. (2 Petro 3:9; Kutollo 15:4) O tla ithuta mo gontši ka dika tša gagwe tše dibotse ge o dutše o bala ka yena ka Beibeleng.

20-22. (a) Re ka kgona bjang go ikwa re le kgauswi le Modimo le ge re ka se kgone go mmona? (b) O swanetše go dira’ng ge batho ba bangwe ba nyaka gore o tlogele go ithuta Beibele?

20 O ka kgona bjang go ikwa o le kgauswi le Modimo le  ge o ka se kgone go mmona? (Johane 1:18; 4:24; 1 Timotheo 1:17) Ge o bala ka Jehofa ka Beibeleng, o thoma go mo tseba e le Modimo wa kgonthe. (Psalme 27:4; Baroma 1:20) Ge o dutše o ithuta ka mo go oketšegilego ka Jehofa, o tla mo rata ka mo go oketšegilego e bile wa ikwa o mmatametše kutšwanyana.

Tate o rata bana ba gagwe, eupša Tatago rena wa legodimong o re rata le go feta

21 O tla kwešiša gore Jehofa ke Tatago rena. (Mateo 6:9) O re neile bophelo, le gona o nyaka gore re ipshine ka bophelo. Se ke seo tate yo lerato a ka se kganyogelago bana ba gagwe. (Psalme 36:9) Ee, Beibele e ruta gore o ka ba mogwera wa Jehofa. (Jakobo 2:23) Nagana feela. Jehofa, yena Mmopi wa legohle, o nyaka gore o be mogwera wa gagwe!

22 Batho ba bangwe ba ka nyaka gore o tlogele go ithuta Beibele. Ba ka boifa gore o tlo tlogela kereke yeo o e tsenago. Eupša o se ke wa dumelela motho le ge e le ofe a dira gore o tlogele go ba mogwera wa Jehofa. Ke Mogwera wa kgonthe yo o ka ikhweletšago yena.

23, 24. (a) Ke ka baka la’ng o swanetše go tšwela pele o botšiša dipotšišo? (b) Re tlo ahlaahla’ng sehlogong se se latelago?

23 Ge o dutše o ithuta Beibele, o tlo hwetša dilo tšeo o sa di kwešišego. O se ke wa lewa ke dihlong tša go botšiša dipotšišo goba go kgopela thušo. Jesu o itše re swanetše go ikokobetša go etša bana ba banyenyane. (Mateo 18:2-4) Le gona bana ba botšiša dipotšišo tše dintši. Modimo o nyaka gore o hwetše dikarabo. Ka gona ithute Beibele ka kelohloko go kgonthišetša gore seo o ithutago sona ke therešo.Bala Ditiro 17:11.

24 Tsela e kaone ya go ithuta ka Jehofa ke go bala Beibele. Kgaolong e latelago, re tlo bona gore ke ka baka la eng Beibele e sa swane le dipuku tše dingwe.

^ par. 15 Ge e ba Beibele ya gago e se na leina Jehofa goba ge e ba o nyaka go kwa ka mo go oketšegilego ka tlhaloso le mmiletšo wa leina la Modimo, hle bala Tlhaloso 1.

Ithute ka mo go oketšegilego

Na Modimo o na le Leina?

Modimo o na le direto tše dintši tše swanago le Ramatlaohle, Mmopi gotee le Morena. Eupša leina la gagwe le dirišwa ka makga a fetago a 7 000 ka Beibeleng.