Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele e re Ruta Eng?

 KGAOLO YA LESOMESESWAI

Na ke Swanetše go Ineela go Modimo Gomme ke Kolobetšwe?

Na ke Swanetše go Ineela go Modimo Gomme ke Kolobetšwe?

1. O ka ipotšiša’ng ka morago ga gore o ithute puku ye ka kelohloko?

O ITHUTILE ditherešo tše dintši tša ka Beibeleng, tše bjalo ka kholofetšo ya Modimo ya go tlo re nea bophelo bjo bo sa felego, seo se diregago ka rena ge re ehwa le kholofelo ya gore bahu ba tlo tsošwa. (Mmoledi 9:5; Luka 23:43; Johane 5:28, 29; Kutollo 21:3, 4) O ka ba o šetše o thomile go ya dibokeng tša Dihlatse tša Jehofa gomme o dumela gore Dihlatse di borapeding bja therešo. (Johane 13:35) Le gona o ka ba o šetše o thomile go ba le tswalano ya kgauswi le  Jehofa, gomme o dirile phetho ya gore o nyaka go mo hlankela. Ka gona o ka ipotšiša gore: ‘Ke swanetše go dira’ng gona bjale gore ke dire seo Modimo a se nyakago?’

2. Ke ka baka la’ng monna wa Moethiopia a ile a nyaka go kolobetšwa?

2 Se ke seo monna wa Moethiopia yo a phetšego mehleng ya Jesu a ilego a ipotšiša sona. Nakong e itšego ka morago ga gore Jesu a tsošwe, morutiwa wa gagwe e lego Filipi o ile a botša monna yoo wa Moethiopia ditaba tše dibotse. Filipi o ile a bontšha monna yoo gore Jesu e be e le Mesia. Monna yoo wa Moethiopia o ile a kgongwa kudu ke seo a ithutilego sona moo kapejana a ilego a re: “Bona! Bodiba bja meetse; ke’ng seo se nthibelago go kolobetšwa?”Ditiro 8:26-36.

3. (a) Jesu o neile balatedi ba gagwe taelo efe? (b) Motho o swanetše go kolobetšwa bjang?

3 Beibele e ruta ka mo go kwagalago gore ge e ba o nyaka go hlankela Jehofa, o swanetše go kolobetšwa. Jesu o ile a botša balatedi ba gagwe gore: “Le dire batho ba ditšhaba ka moka barutiwa, le ba [kolobetše].” (Mateo 28:19) Le gona Jesu o beile mohlala ka gore yena a kolobetšwe. O ile a inwa ka meetseng ka mo go feletšego, e sego feela go fo gašwa ka meetse hlogong. (Mateo 3:16) Lehono ge Mokriste a kolobetšwa, o swanetše go inwa ka mo go feletšego ka meetseng.

4. Ge o kolobetšwa o bontšha ba bangwe eng?

4 Ge o kolobetšwa, o bontšha ba bangwe gore o tloga o nyaka go ba mogwera wa Modimo le go mo hlankela. (Psalme 40:7, 8) Ka gona o ka ipotšiša gore: ‘Ke swanetše go dira’ng gore ke kolobetšwe?’

TSEBO LE TUMELO

5. (a) O swanetše go dira’ng pele o ka kolobetšwa? (b) Ke ka baka la’ng diboka tša rena tša Bokriste di le bohlokwa?

5 Pele o ka kolobetšwa, o swanetše go tseba Jehofa le  Jesu. O šetše o thomile go dira se ka go ithuta Beibele. (Bala Johane 17:3.) Eupša seo ga se sa lekana. Beibele e re o swanetše go “[tlala] tsebo e nepagetšego” ya thato ya Jehofa. (Bakolose 1:9) Diboka tša Dihlatse tša Jehofa di tla go thuša go ba le tswalano ya kgauswi le Jehofa. Leo ke le lengwe la mabaka a bohlokwa a gore o be gona dibokeng tšeo ka mehla.Baheberu 10:24, 25.

O swanetše go ithuta Beibele pele o kolobetšwa

6. O swanetše go tseba Beibele go fihla bokgoleng bofe pele o ka kolobetšwa?

6 Ke therešo gore Jehofa ga se a letela gore o tsebe selo se sengwe le se sengwe ka Beibeleng pele o ka kolobetšwa. O be a sa letela gore monna wa Moethiopia a tsebe selo se sengwe le se sengwe pele a ka kolobetšwa. (Ditiro 8:30, 31) Re tlo tšwela pele go ithuta ka Modimo ka mo go sa felego. (Mmoledi 3:11) Eupša e le gore o kolobetšwe, o swanetše go tseba le go dumela bonyenyane dithuto tša motheo tša Beibele.Baheberu 5:12.

7. Go ithuta Beibele go go thušitše bjang?

7 Beibele e re: “Ka ntle le tumelo go kgahliša Modimo gabotse ga go kgonege.” (Baheberu 11:6) Ka gona o swanetše go ba le tumelo pele o ka kolobetšwa. Beibele e re botša gore ka morago ga gore batho ba bangwe ba motseng wa bogologolo wa Korinthe ba kwe seo balatedi ba Jesu ba bego ba se ruta, ba ile “ba dumela gomme ba kolobetšwa.” (Ditiro 18:8) Ka mo go swanago, go ithuta Beibele go go thušitše go ba le tumelo dikholofetšong tša Modimo le go ba le tumelo ya gore sehlabelo sa Jesu se ka re phološa sebeng le lehung.Joshua 23:14; Ditiro 4:12; 2 Timotheo 3:16, 17.

BOTŠA BA BANGWE DITHEREŠO TŠA BEIBELE

8. Ke’ng seo se tlago go go tutueletša go botša ba bangwe seo o ithutago sona?

8 Ge o dutše o ithuta Beibele gomme o bona kamoo e  go thušago ka gona, tumelo ya gago e tla tia. O tla nyaka go botša ba bangwe seo o ithutago sona. (Jeremia 20:9; 2 Bakorinthe 4:13) Eupša o swanetše go botša bomang?

Tumelo e swanetše go go tutueletša go botša ba bangwe seo o se dumelago

9, 10. (a) O ka thoma ka go botša bomang seo o ithutilego sona? (b) O swanetše go dira’ng ge o nyaka go sepela le ditho tša phuthego go yo bolela le ba bangwe ka Beibele?

9 O ka nyaka go botša ba lapa la geno, bagwera, baagišani goba bao o šomago le bona ka seo o ithutago sona. O tla be o dira gabotse, eupša ka mehla bolela le bona ka tsela e botho le e lerato. Mafelelong, o tla kgona go sepela le ditho tša phuthego go yo bolela le ba bangwe ka Beibele. Ge o bona gore o loketše go dira seo, o ka bolela le motho yo o ithutago Beibele le yena gomme o mmotše gore o nyaka go sepela le phuthego go yo bolela le ba bangwe ka Beibele. Ge e ba motho yoo a nagana gore o loketše go dira seo gomme o phela ka go dumelelana le ditekanyetšo tša Beibele, gona bobedi bja lena le tla ba le seboka le bagolo ba babedi ba phuthego.

10 Go tla direga’ng sebokeng seo? Bagolo ba tla boledišana le wena go bona ge e ba o kwešiša e bile o dumela dithuto tša motheo tša Beibele, go bona ge e ba o ekwa seo Beibele e se bolelago bophelong bja gago bja letšatši le letšatši le go bona ge e ba o tloga o nyaka go ba yo mongwe wa Dihlatse tša Jehofa. Gopola gore bagolo ba hlokomela ditho ka moka tša phuthego, go akaretša le wena, ka gona o se ke wa tšhaba go boledišana le bona. (Ditiro 20:28; 1 Petro 5:2, 3) Ka morago ga seboka seo, bagolo ba tla go tsebiša ge e ba o ka thoma go sepela le ditho tša phuthego go yo bolela le ba bangwe ka Beibele.

11. Ke ka baka la’ng go le bohlokwa kudu gore o dire diphetogo pele o ka sepela le ditho tša phuthego go yo bolela le ba bangwe ka Beibele?

11 Bagolo bao ba ka go hlalosetša gore o swanetše go  dira diphetogo tše dingwe pele o ka thoma go sepela le ditho tša phuthego go yo bolela le ba bangwe ka Beibele. Ke ka baka la’ng go le bohlokwa kudu gore o dire diphetogo tšeo? Ka gobane ge re bolela le ba bangwe ka Modimo, re emela Jehofa gomme re swanetše go phela ka tsela yeo e mo hlomphago.1 Bakorinthe 6:9, 10; Bagalatia 5:19-21.

ITSHOLE GOMME O SOKOLOGE

12. Ke ka baka la’ng batho ka moka ba swanetše go itshola?

12 Go na le selo se sengwe gape seo o swanetšego go se dira pele o ka kolobetšwa. Moapostola Petro o itše: “Ka gona itsholeng le sokologe e le gore dibe tša lena di phumolwe.” (Ditiro 3:19) Go itshola go bolela’ng? Go bolela go nyamišwa kudu ke diphošo le ge e le dife tšeo re di dirilego. Ka mohlala, ge e ba o be o phela bophelo bjo bo gobogilego, o swanetše go itshola. Le gona ge e ba bophelong bja gago ka moka o be o leka go dira sohle seo o ka se kgonago go dula o hlwekile boitshwarong, o sa dutše o swanetše go itshola ka gobane ka moka ga rena re dira dibe gomme re swanetše go kgopela Modimo gore a re lebalele.Baroma 3:23; 5:1.

13. “Go sokologa” go bolela’ng?

13 Na go lekane go fo nyamišwa ke seo o se dirilego? Aowa. Petro o itše selo se sengwe seo o swanetšego go se dira ke “go sokologa.” Se se ra gore o swanetše go lahla tsela le ge e le efe yeo o bego o phela ka yona pele gomme o thome go dira se se nepagetšego. Ka mohlala, a re re o ya lefelong le itšego ka lekga la mathomo. Ka moragonyana, o lemoga gore o a timela. O tla dira’ng? Ga go pelaelo gore o tla thoma go sepela ganyenyane, wa ema, wa sokologa goba wa retologa ke moka wa boela tseleng ya  maleba. Ka mo go swanago, ge o dutše o ithuta Beibele, o ka lemoga gore go na le mekgwa goba dilo tše itšego bophelong bja gago tšeo o swanetšego go di fetoša. Ikemišetše “go sokologa”—ke gore, o dire diphetogo tše di nyakegago—gomme o thome go dira se se nepagetšego.

INEELE GO MODIMO

Na o holofeditše Jehofa gore o tla mo hlankela?

14. O ka ineela bjang go Modimo?

14 Selo se sengwe sa bohlokwa seo o swanetšego go se dira pele o ka kolobetšwa ke go ineela go Jehofa. Ge o ineela go Jehofa, o rapela thapelo yeo go yona o holofetšago Modimo gore o tla hlankela yena feela le go etiša pele thato ya gagwe bophelong bja gago.Doiteronomio 6:15.

15, 16. Ke’ng seo se tutueletšago motho gore a ineele go Modimo?

15 Ge o holofetša Jehofa gore o tla hlankela yena a nnoši, go swana le ge o holofetša motho yo o mo ratago gore o tla phela le yena bophelo ka moka. Anke o nagane ka lesogana le kgarebe bao ba lego lefereyong. Ge lesogana le tseba kgarebe yeo gakaone, le tla e rata gomme la nyaka go e nyala. Gaešita le ge ye e le phetho e kgolo kudu, lesogana leo le ka se be le bothata bja go nyala kgarebe ye ka gobane le a e rata.

16 Ge o dutše o ithuta ka Jehofa, o thoma go mo rata gomme o nyaka go dira sohle seo o ka se kgonago go mo hlankela. Se se tla go tutueletša go mo rapela gomme o mo holofetše gore o tla mo hlankela. Beibele e re motho le ge e le ofe yo a nyakago go latela Jesu o swanetše go ‘itatola.’ (Mareka 8:34) Seo se ra go re’ng? Se ra gore go kwa Jehofa go tla pele bophelong bja gago. Seo Jehofa a se nyakago se bohlokwa kudu go feta dikganyogo tša gago le dipakane tša gago.Bala 1 Petro 4:2.

 O SE KE WA BOIFA GORE O TLA PALELWA

17. Ke ka baka la’ng batho ba bangwe ba sa ineele go Jehofa?

17 Batho ba bangwe ga ba ineele go Jehofa ka gobane ba tšhaba gore ba tla palelwa ke go phetha kholofetšo yeo ba e dirilego ya gore ba tla mo hlankela. Ga ba nyake go nyamiša Jehofa, goba ba ka re ge e ba ba sa ineela go yena, gona Jehofa a ka se ba bone molato ka seo ba se dirago.

18. Ke’ng seo se ka go thušago gore o se ke wa boifa gore o tla nyamiša Jehofa?

18 Ge o rata Jehofa, seo se tla go thuša go fenya poifo le ge e le efe ya go mo nyamiša. O tla dira sohle seo o ka se kgonago go phetha kholofetšo ya gago ka gobane o mo rata. (Mmoledi 5:4; Bakolose 1:10) O ka se nagane gore go dira thato ya Jehofa go thata. Moapostola Johane o ngwadile gore: “Se ke seo lerato la Modimo le se bolelago, gore re boloke ditaelo tša gagwe gomme ditaelo tša gagwe ga di boima.”1 Johane 5:3.

19. Ke ka baka la’ng o sa swanela go tšhaba go ineela go Jehofa?

19 Ga go hlokagale gore o phethagale e le gore o ineele go Jehofa. Le ka mohla ga a letele gore re dire seo se tlago go re palela. (Psalme 103:14) O tla go thuša gore o dire se se nepagetšego. (Jesaya 41:10) Bota Jehofa ka pelo ya gago ka moka, gomme “yena o tla letliša ditsela tša gago.”Diema 3:5, 6.

GO BOLELA PHATLALATŠA GORE LE WENA O NYAKA GO PHOLOŠWA

20. Ka morago ga gore o ineele go Modimo, o swanetše go dira’ng?

20 Na o nagana gore o loketše go ineela go Jehofa? Ka morago ga gore o ineele go Jehofa ka thapelo, gona o loketše go gata mogato o latelago. O swanetše go kolobetšwa.

21, 22. O ka ‘bolela tumelo ya gago phatlalatša’ bjang?

 21 Botša molomaganyi wa sehlopha sa bagolo wa phuthegong ya geno gore o ineetše go Jehofa gomme o nyaka go kolobetšwa. Ge o mmoditše, o tla rulaganya gore bagolo ba itšego ba ahlaahle le wena dithuto tša motheo tša Beibele. Ge e ba ba dumelelana gore o ka kolobetšwa, ba tla go botša gore o ka kolobetšwa kopanong e latelago ya tikologo  goba ya selete ya Dihlatse tša Jehofa. Kopanong yeo, go tla newa polelo yeo e hlalosago seo se bolelwago ke kolobetšo. Ke moka ngwanabo rena yo a neago polelo o tla botšiša bao ba yago kolobetšong dipotšišo tše pedi tše bonolo. Ka go araba dipotšišo tšeo, o tla ‘bolela tumelo ya gago phatlalatša.’Baroma 10:10.

 22 Ka morago ga moo o tla kolobetšwa. O tla inwa ka mo go feletšego ka meetseng. Ge o kolobetšwa o tla bontšha batho ka moka gore o ineetše go Jehofa gomme ga bjale o yo mongwe wa Dihlatse tša Jehofa.

SEO SE BOLELWAGO KE GO KOLOBETŠWA

23. Go kolobetšwa “leineng la Tate le la Morwa le la moya o mokgethwa” go bolela’ng?

23 Jesu o boletše gore barutiwa ba gagwe ba tla kolobetšwa “leineng la Tate le la Morwa le la moya o mokgethwa.” (Bala Mateo 28:19.) Seo se ra go re’ng? Se ra gore o lemoga bogoši bja Jehofa le tema yeo Jesu a e kgathago morerong wa Modimo le kamoo Modimo a dirišago moya wa gagwe o mokgethwa go phetha thato ya gagwe.Psalme 83:18; Mateo 28:18; Bagalatia 5:22, 23; 2 Petro 1:21.

Ge o kolobetšwa, o bontšha gore o nyaka go dira thato ya Modimo

24, 25. (a) Go kolobetšwa go emela’ng? (b) Re tlo ahlaahla’ng kgaolong ya mafelelo ya puku ye?

24 Go kolobetšwa go emela selo se itšego se bohlokwa kudu. Ge o inwa ka meetseng, go ra gore o tlogetše tsela ya gago ya kgale ya bophelo. Ge o etšwa ka meetseng, o tla thoma bophelo bjo bofsa bja go dira thato ya Modimo. Seo se bontšha gore o tla hlankela Jehofa go tloga ka nako yeo go ya pele. Gopola gore ga o ineele mothong yo a itšego, mokgatlong goba modirong. O ineetše go Jehofa.

25 Boineelo bja gago bo tla go thuša go ba le tswalano ya kgauswi le Modimo. (Psalme 25:14) Se ga se bolele gore motho o tla phološwa feela ka gobane a kolobeditšwe. Moapostola Paulo o ngwadile gore: “Dulang le šomela phološo ya lena ka go boifa le go thothomela.” (Bafilipi 2:12) Kolobetšo e fo ba mathomomayo. Eupša o ka dira’ng gore o dule o le kgauswi le Jehofa? Kgaolo ya mafelelo ya puku ye e tla araba potšišo yeo.