Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele e re Ruta Eng?

 KGAOLO YA LESOMETEE

Ke ka Baka la Eng go na le Tlaišego e Kaakaa?

Ke ka Baka la Eng go na le Tlaišego e Kaakaa?

1, 2. Batho ba bantši ba ipotšiša eng?

TSUNAMI e senya motse. Motho yo a swerego sethunya o thunya batho ka kerekeng, a gobatša le go bolaya ba bantši. Kankere e bolaya mma, gomme o tlogela bana ba bahlano.

2 Ge dikotsi goba masetlapelo a go swana le a go boletšwego ka ona ka mo godimo a direga, batho ba bantši ba ipotšiša gore: “Ka baka la’ng?” Batho ba bantši ba ipotšiša gore ke ka baka la eng lefase le tletše ka lehloyo le tlaišego. Na le wena o kile wa ipotšiša potšišo yeo?

3, 4. (a) Ke dipotšišo dife tšeo Habakuku a ilego a di botšiša? (b) Jehofa o ile a mo araba bjang?

3 Ka Beibeleng, re ithuta gore banna bao ba bego ba na le tumelo e tiilego go Modimo le bona ba ile ba botšiša dipotšišo tše bjalo. Ka mohlala, moporofeta Habakuku o ile a botšiša Jehofa gore: “Ke ka baka la’ng o ntesa ke bona tše di kwešago bohloko gomme wena o dula o lebeletše bokgopo? Ke ka baka la’ng ke lebane le bohlakodi le bošoro? Ke ka baka la’ng go ngangišanwa le gona ke ka baka la’ng go dirwa bošoro?”Habakuku 1:3.

4 Go Habakuku 2:2, 3, re bala karabo yeo Modimo a ilego a e nea Habakuku ya dipotšišo tša gagwe le kamoo A ilego a mo holofetša gore o tla lokiša boemo bjoo. Jehofa o rata batho ka mo go tseneletšego. Beibele e re: “O a [re] hlokomela.” (1 Petro 5:7) Ge e le gabotse, Modimo o hloile go bona tlaišego go feta rena. (Jesaya 55:8, 9) Ka  gona, anke re ahlaahleng potšišo ye e rego: Ke ka baka la’ng go na le tlaišego e kaakaa mo lefaseng?

KE KA BAKA LA ENG GO NA LE TLAIŠEGO E KAAKAA?

5. Ke’ng seo baruti ba bantši ba se bolelago ka tlaišego? Beibele e ruta’ng?

5 Baruti gantši ba bolela gore ge batho ba tlaišega ke thato ya Modimo. Ba bangwe ba bolela gore selo se sengwe le se sengwe seo se diragalelago motho, go akaretša le masetlapelo, se rerilwe ke Modimo gomme le ka mohla re ka se kwešiše gore ke ka baka la eng se direga. Ba bangwe ba re lebaka la gore batho ba hwe, go akaretša le bana, ke gore ba be le Modimo kua legodimong. Eupša seo ga se therešo. Le ka mohla Jehofa ga a dire gore dilo tše mpe di direge. Beibele e re: “Go dira tše kgopo a go be kgole le Modimo wa therešo, le go dira ka go hloka toka a go be kgole le Ramatlaohle!”Jobo 34:10.

6. Ke ka baka la’ng batho ba bantši ba bea Modimo molato bakeng sa tlaišego ka moka e diregago mo lefaseng?

6 Batho ba bantši ba bea Modimo molato bakeng sa tlaišego ka moka e diregago mo lefaseng ka gobane ba nagana gore ke yena a bušago lefase. Eupša ka ge re ithutile go Kgaolo 3, mmuši wa kgonthe wa lefase le ke Sathane Diabolo.

7, 8. Ke ka baka la’ng go na le tlaišego e kaakaa mo lefaseng?

7 Beibele e re botša gore “lefase ka moka le rapaletše matleng a yo kgopo.” (1 Johane 5:19) Mmuši wa lefase le, e lego Sathane, o bogale e bile o sehlogo. O ‘timetša lefase ka moka.’ (Kutollo 12:9) Batho ba bantši ba a mo ekiša. Ka gona le ke le lengwe la mabaka ao lefase le tletšego ka maaka, lehloyo le bošoro.

8 Go na le mabaka a mangwe ao ka ona go nago le tlaišego e kaakaa mo lefaseng. Ka morago ga gore Adama le Efa ba se kwe Modimo, ba ile ba fetišetša sebe go bana ba  bona. Le gona ka baka la sebe, batho ba dira gore batho ba bangwe ba tlaišege. Gantši ba nyaka gore ba be bohlokwa kudu go feta ba bangwe. Ba alwa, ba ya ntweng gomme ba gatelela ba bangwe. (Mmoledi 4:1; 8:9) Ka dinako tše dingwe batho ba tlaišega ka baka la “nako le ditiragalo tšeo di sa letelwago.” (Mmoledi 9:11) Ge ba le lefelong le le fošagetšego ka nako e fošagetšego, ba ka welwa ke dikotsi le go diragalelwa ke dilo tše dingwe tše mpe.

9. Ke ka baka la’ng re ka kgodišega gore Jehofa o na le lebaka le le kwagalago la go dumelela tlaišego gore e tšwele pele e le gona?

9 Jehofa le ka mohla ga a dire gore go be le tlaišego. Ga se ra swanela go mmea molato ka dintwa, bosenyi le ka tsela yeo batho ba swarwago gampe. Modimo ga a dire gore dikotsi tše bjalo ka ditšhišinyego tša lefase, madimo le mafula di be gona. Eupša o ka ipotšiša gore: ‘Ge e ba Jehofa e le Modimo yo matla legohleng, ke ka baka la’ng a sa thibele dilo tšeo tše mpe gore di se direge?’ Re a tseba gore Modimo o tloga a na le taba le rena, ka gona o swanetše go ba a na le lebaka le le kwagalago la go dumelela tlaišego gore e tšwele pele e le gona.1 Johane 4:8.

LEBAKA LEO MODIMO A DUMELELAGO TLAIŠEGO

10. Sathane o ile a latofatša Jehofa ka’ng?

10 Kua serapeng sa Edene, Diabolo o ile a fora Adama le Efa. Sathane o ile a latofatša Modimo ka gore ke Mmuši yo mobe. O ile a bolela gore Modimo o be a tima Adama le Efa selo se itšego se sebotse. Sathane o be a nyaka gore ba dumele gore yena o be a tla ba mmuši yo kaone go feta Jehofa le gore ga ba hloke Modimo.Genesi 3:2-5; bala Tlhaloso 27.

11. Ke potšišo efe yeo re swanetšego go e araba?

11 Adama le Efa ba ile ba se kwe Jehofa le go rabela go yena. Ba be ba nagana gore ba na le tshwanelo ya go ikgethela  se se lokilego le se se fošagetšego. Jehofa o be a tla hlatsela bjang gore marabele a a be a bolela maaka le gore yena o tseba seo se tlago go re hola?

12, 13. (a) Ke ka baka la’ng Jehofa a se a ka a fediša marabele le semeetseng? (b) Ke ka baka la’ng Jehofa a ile a dumelela Sathane gore e be mmuši wa lefase le le gore batho ba ipuše?

12 Jehofa ga se a ka a fediša Adama le Efa le semeetseng. Go e na le moo, o ile a ba dumelela gore ba be le bana. Ke moka Jehofa o ile a dira gore bana ba Adama le Efa ba kgone go ikgethela yoo ba nyakago e e ba mmuši wa bona. Morero wa Jehofa e be e le gore lefase le tlale ka batho bao ba phethagetšego, gomme seo se be se tla direga go sa šetšwe seo Diabolo a lekago go se dira.Genesi 1:28; Jesaya 55:10, 11.

13 Sathane o ile a belaela tsela ya Jehofa ya go buša pele ga barongwa ba dimilione. (Jobo 38:7; Daniele 7:10) Ka gona Jehofa o ile a nea Sathane nako ya go hlatsela ge e ba seo a se bolelago e le therešo. Le gona Modimo o ile a nea batho nako ya go ipuša ka tlase ga taolo ya Sathane gore ba bone ge e ba ba tla atlega ntle le thušo ya Modimo.

14. Nako yeo batho ba e feditšego ba ipuša e hlatsetše’ng?

14 Batho ba lekile go ipuša ka mengwaga e dikete, eupša ba paletšwe. Go bonagetše gore Sathane o bolela maaka. Batho ba hloka thušo ya Modimo. Moporofeta Jeremia o be a nepile ge a be a re: “Ke tseba gabotse, wena Jehofa, gore tsela ya motho ga e matleng a gagwe. Ga go matleng a motho yo a sepelago gore a laole dikgato tša gagwe.”Jeremia 10:23.

KE KA BAKA LA ENG JEHOFA A TŠEA NAKO E KAAKAA?

15, 16. (a) Ke ka bala la’ng Jehofa a dumeletše tlaišego gore e be gona ka nako e telele gakaakaa? (b) Ke ka baka la’ng Jehofa a se a lokiša mathata ao a bakilwego ke Sathane?

15 Ke ka baka la’ng Jehofa a dumeletše tlaišego gore e  be gona ka nako e telele gakaakaa? Ke ka baka la’ng a sa thibele dilo tše mpe gore di se direge? Go tšere nako go hlatsela gore pušo ya Sathane e paletšwe. Batho ba lekile mehuta ka moka ya go buša, eupša ga se ba atlega. Le ge ba dirile tšwelopele ya thutamahlale le thekinolotši, eupša go hloka toka, bodiidi, bosenyi le dintwa di oketšegile go feta le ge e le neng pele. Re ka se kgone go ipuša ntle le Modimo.

16 Lega go le bjalo, Jehofa ga se a lokiša mathata ao a bakilwego ke Sathane. Ge a be a ka a lokiša, se se be se tla bolela gore o thekga bogoši bja Sathane. Modimo a ka se tsoge a thekga bogoši bja Sathane. Le gona, batho ba be ba tla nagana gore ba ka kgona go ipuša. Eupša ao ke maaka, e bile Jehofa a ka se a thekge. Ga a ke a bolela maaka.Baheberu 6:18.

17, 18. Jehofa o tla dira’ng ka dilo ka moka tšeo Sathane a di sentšego?

17 Na Jehofa a ka lokiša dilo tšeo di sentšwego ke borabele bja Sathane le batho? Ee. Go Modimo, dilo ka moka di a kgonega. Jehofa o a tseba gore o tla araba neng ka mo go kgotsofatšago dilo ka moka tšeo Sathane a mo latofaditšego ka tšona. Ke moka o tla dira lefase gore e be paradeise, ka ge a be a rerile bjalo. Bohle “bao ba lego mabitleng” ba tla tsošwa. (Johane 5:28, 29) Le ka mohla batho ba ka se babje goba go hwa. Jesu o tla lokiša dilo ka moka tšeo Sathane a di sentšego. Jehofa o tla diriša Jesu go “fediša mediro ya Diabolo.” (1 Johane 3:8) Re leboga Jehofa gore gona bjale ga a re felele pelo e le gore re kgone go mo tseba le go mo kgetha gore e be Mmuši wa rena. (Bala 2 Petro 3:9, 10.) Le ge re tlaišega, o re thuša gore re kgotlelele.Johane 4:23; bala 1 Bakorinthe 10:13.

 18 Jehofa ga a re gapeletše gore re kgethe yena gore a re buše. O file batho mpho ya tokologo ya boikgethelo. Anke re ahlaahleng seo mpho ye ya bohlokwa kudu e se bolelago go rena.

O TLA DIRIŠA BJANG MPHO YA TOKOLOGO YA BOIKGETHELO?

19. Ke mpho efe e kgahlišago yeo Jehofa a re filego yona? Ke ka baka la’ng re swanetše go leboga mpho ye?

19 Mpho ye e kgahlišago ya tokologo ya boikgethelo yeo Jehofa a re filego yona e re dira gore re fapane le diphoofolo. Gantši diphoofolo di dira dilo ka tlhago, eupša rena re kgona go kgetha kamoo re nyakago go phela ka gona le go kgetha ge e ba re nyaka go kgahliša Jehofa. (Diema 30:24) Le gona, ga re swane le metšhene yeo e dirago feela dilo tšeo e hlametšwego go di dira. Re na le tokologo ya go ikgethela seo re nyakago go ba sona, go ikgethela bagwera le go ikgethela seo re nyakago go se dira ka maphelo a rena. Jehofa o nyaka gore re thabele bophelo.

20, 21. Ke kgetho efe e kaone yeo o ka e dirago gona bjale?

20 Jehofa o nyaka gore re mo rate. (Mateo 22:37, 38) O swana le tate yo a thabelago go kwa ngwana wa gagwe a bolela go tšwa pelong e sego ka go gapeletšwa gore: “Ke a go rata.” Jehofa o re file tokologo ya go kgetha ge e ba re tla mo hlankela goba go se bjalo. Sathane, Adama le Efa ba ile ba kgetha go se kwe Jehofa. Wena o tla diriša bjang mpho ya gago ya tokologo ya boikgethelo?

21 Diriša tokologo ya gago ya boikgethelo go hlankela Jehofa. Go na le batho ba bangwe ba dimilione bao ba kgethilego go thabiša Modimo e sego Sathane. (Diema 27:11) O ka dira’ng gona bjale gore o tle o phele lefaseng le lefsa la Modimo ge a fedišitše tlaišego ka moka? Kgaolo e latelago e tlo araba potšišo yeo.