Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele e re Ruta Eng?

 KGAOLO YA LESOMEŠUPA

Re na le Tokelo ya go Rapela

Re na le Tokelo ya go Rapela

“Modiri wa legodimo le lefase” o nyaka go theetša dithapelo tša rena.Psalme 115:15

1, 2. Ke ka baka la’ng o nagana gore thapelo ke mpho e kgethegilego kudu, le gona ke ka baka la’ng re swanetše go tseba seo Beibele e se rutago ka yona?

LEFASE ke le lenyenyane kudu ge re le bapetša le legohle. Ge Jehofa a lebelela lefase, o bona batho ba ditšhaba ka moka ba le bjalo ka ge eka ke lerothi leo le lego ka kgamelong. (Psalme 115:15; Jesaya 40:15) Gaešita le ge re le ba banyenyane kudu ge re bapetšwa le legohle, Psalme 145:18, 19 e re: “Jehofa o kgauswi le bohle bao ba mmitšago, gotee le bohle bao ba mmitšago ka go rereša. O tla kgotsofatša kganyogo ya bao ba mmoifago, o tla ba kwa ge ba mo llela gore a ba thuše, gomme o tla ba phološa.” Ruri re na le tokelo e kgahlišago! Jehofa, e lego Mmopi Ramatlaohle, o nyaka go ba kgauswi le rena le gona o nyaka go theetša dithapelo tša rena. Ee, thapelo ke tokelo, ke mpho e kgethegilego yeo Jehofa a e neilego yo mongwe le yo mongwe wa rena.

2 Eupša Jehofa o tla re theetša ge feela re bolela le yena ka tsela yeo a e amogelago. Re ka dira seo bjang? Anke re boneng seo Beibele e se rutago ka thapelo.

KE KA BAKA LA ENG RE SWANETŠE GO RAPELA JEHOFA?

3. Ke ka baka la’ng o swanetše go rapela Jehofa?

3 Jehofa o nyaka gore o mo rapele, goba o bolele le yena. Re tseba seo bjang? Hle bala Bafilipi 4:6, 7. Nagana ka taletšo yeo e botho. Mmuši wa legohle o tloga a na le taba le wena gomme o nyaka gore o mmotše kamoo o ikwago ka gona le ka mathata a gago.

4. Go rapela Jehofa ka mehla go matlafatša segwera sa gago le yena bjang?

 4 Thapelo e re thuša gore re be le segwera sa kgauswi le Jehofa. Ge bagwera ka mehla ba ntšhetšana sa mafahleng, segwera sa bona se a tia. Seo se swana le ge re rapela Jehofa. A diriša Beibele, o go botša dikgopolo tša gagwe le maikwelo a gagwe, le gona o go botša seo a tlago go se dira nakong e tlago. Le wena o ka mo ntšhetša sa mafahleng ka go boledišana le yena ka mehla. Ge o dutše o dira se, segwera sa gago le Jehofa se tla tia.Jakobo 4:8.

RE SWANETŠE GO DIRA ENG GORE MODIMO A RE KWE?

5. Re tseba bjang gore Jehofa ga a theetše dithapelo ka moka?

5 Na Jehofa o theetša dithapelo ka moka? Aowa. Mehleng ya moporofeta Jesaya, Jehofa o ile a botša Baisiraele gore: “Gaešita le ge le ka atiša dithapelo, ga ke di theetše; diatla tša lena di tletše madi.” (Jesaya 1:15) Ka gona ge e ba re se šedi, re ka dira dilo tšeo di ka re aroganyago le Jehofa, ra dira gore a hlokomologe dithapelo tša rena.

6. Ke ka baka la’ng tumelo e le bohlokwa kudu? O ka bontšha bjang gore o na le tumelo?

 6 Ge e ba re nyaka Jehofa a theetša dithapelo tša rena, re swanetše go ba le tumelo go yena. (Mareka 11:24) Moapostola Paulo o hlalosa ka gore: “Ka ntle le tumelo go kgahliša Modimo gabotse ga go kgonege, gobane yo a batamelago Modimo o swanetše go dumela gore o gona le gore e ba moputsi wa bao ba mo tsomago ka phišego.” (Baheberu 11:6) Eupša ga se gwa lekana go no bolela gore re na le tumelo. Re swanetše go bontšha tumelo ya rena gabotse ka go kwa Jehofa letšatši le letšatši.Bala Jakobo 2:26.

7. (a) Ke ka baka la’ng re swanetše go ikokobetša le go bontšha tlhompho ge re rapela Jehofa? (b) Re ka bontšha bjang gore seo re se bolelago ge re rapela se tšwa pelong?

7 Re swanetše go ikokobetša le go bontšha tlhompho ge re rapela Jehofa. Ka baka la’ng? Ge e ba re be re ka bitšwa gore re bolele le kgoši goba mopresitente, re be re tla dira seo ka tsela ya tlhompho. Jehofa ke Modimo Ramatlaohle, ka gona, ruri re swanetše go bontšha tlhompho e tseneletšego le boikokobetšo ge re bolela le yena. (Genesi 17:1; Psalme 138:6) Le gona re swanetše go bolela therešo gomme re rapele Jehofa go tšwa pelong, e sego gore re fo bušeletša mantšu a swanago.Mateo 6:7, 8.

8. Ge re rapela ka taba e itšego, ke selo sefe se sengwe seo re swanetšego go se dira?

8 Mafelelong, ge re rapela ka selo se itšego, re swanetše go dira sohle seo re ka se kgonago go šomela go seo re se rapelelago. Ka mohlala, ge e ba re rapela Jehofa gore a re nee dinyakwa tša rena tša letšatši le letšatši, gona re ka se tšwafe gomme ra letela gore Jehofa a re nee selo se sengwe le se sengwe le ge re kgona go itirela. Re swanetše go šoma ka thata gomme re amogele mošomo o mongwe le o mongwe woo re ka kgonago go o dira. (Mateo 6:11; 2 Bathesalonika 3:10) Goba ge e ba re rapela Jehofa gore  a re thuše go se sa dira selo se itšego se se fošagetšego, re swanetše go phema go ba boemong le ge e le bofe bjo bo ka re lekago. (Bakolose 3:5) Anke ga bjale re ahlaahleng dipotšišo tše dingwe tšeo di botšišwago gantši mabapi le thapelo.

DIPOTŠIŠO TŠEO DI BOTŠIŠWAGO GANTŠI MABAPI LE THAPELO

9. Re swanetše go rapela mang? Johane 14:6 e re ruta’ng ka thapelo?

9 Re swanetše go rapela mang? Jesu o rutile balatedi ba gagwe gore ba rapele “Tatago rena wa magodimong.” (Mateo 6:9) Le gona o itše: “Ke nna tsela le therešo le bophelo. Ga go yo a tlago go Tate ge e se ka nna.” (Johane 14:6) Ka gona re swanetše go rapela Jehofa feela re diriša leina la Jesu. Go bolela’ng go rapela re diriša leina la Jesu? E le gore Jehofa a amogele dithapelo tša rena, re swanetše go bontšha gore re hlompha kabelo e kgethegilego yeo Jehofa a e neilego Jesu. Re šetše re ithutile gore Jesu o tlile lefaseng go tlo re phološa sebeng le lehung. (Johane 3:16; Baroma 5:12) Le gona Jehofa o kgethile Jesu gore e be Moperisita yo a Phagamego le Moahlodi.Johane 5:22; Baheberu 6:20.

O ka rapela nako e nngwe le e nngwe

10. Na re swanetše go dula ka tsela e itšego ge re rapela? Hlalosa.

10 Na re swanetše go dula ka tsela e itšego ge re rapela? Aowa, Jehofa ga a re kgopele gore re khuname, re dule goba re eme ge re rapela. Beibele e re ruta gore re ka bolela le Jehofa re le ka tsela le ge e le e efe yeo e hlomphegago. (1 Dikoronika 17:16; Nehemia 8:6; Daniele 6:10; Mareka 11:25) Seo se lego bohlokwa kudu go Jehofa ke gore re bolele le yena ka tsela e botse, e sego gore re mo rapele re dutše ka tsela e itšego. Re ka rapela ka go hlaboša lentšu goba ka setu re le lefelong le ge e le lefe le ka nako le ge e le efe, e ka ba mosegare goba bošego. Ge re rapela Jehofa,  re ka bota gore o tla re kwa gaešita le ge go se na motho yo a re kwago.Nehemia 2:1-6.

11. Ke dilo dife tše dingwe tšeo re ka bolelago le Jehofa ka tšona?

11 Re ka rapelela eng? Re ka rapelela selo le ge e le sefe seo se amogelago go Jehofa. Beibele e re: “Go sa šetšwe seo re se kgopelago go ya ka thato ya Modimo, Modimo o a re kwa.” (1 Johane 5:14) Na re swanetše go rapela ka dinyakwa tša rena le dilo tšeo di re tshwenyago? Ee. Go rapela Jehofa go swanetše go swana le ge re bolela le mogwera wa rena yo mogolo. Re ka botša Jehofa selo le ge e le sefe seo se lego ka menaganong ya rena le ka dipelong tša rena. (Psalme 62:8) Re ka mo rapela gore a re nee moya wa gagwe o mokgethwa wo o lego matla gore o re thuše go dira seo se nepagetšego. (Luka 11:13) E bile re ka kgopela Jehofa gore a re nee bohlale bja go dira diphetho tše dibotse, le gona re ka mo kgopela gore a re nee matla a go lebeletšana le mathata. (Jakobo 1:5) Re swanetše go kgopela Jehofa gore a re lebalele dibe. (Baefeso 1:3, 7) Le gona re swanetše go rapelela ba bangwe, go akaretša malapa a rena le bana babo rena le dikgaetšedi ka phuthegong.Ditiro 12:5; Bakolose 4:12.

12. Dithapelong tša rena re swanetše go bolela ka eng kutšwanyana?

12 Dithapelong tša rena re swanetše go bolela ka eng kutšwanyana? Re swanetše go bolela ka Jehofa le thato ya gagwe. Re mo leboge ka go tšwa pelong bakeng sa dilo ka moka tšeo a re direlago tšona. (1 Dikoronika 29:10-13) Re tseba se ka gobane ge Jesu a be a le mo lefaseng, o ile a ruta barutiwa ba gagwe go rapela. (Bala Mateo 6:9-13.) O itše ba swanetše go thoma ka go rapelela leina la Modimo gore le kgethagatšwe, ke gore, le swarwe ka tsela e kgethwa. Ke moka Jesu o ile a bontšha gore re swanetše go rapelela Mmušo wa Modimo gore o tle le gore thato ya Jehofa e direge lefaseng ka moka. Jesu o itše ke feela ka morago ga  gore re rapelele dilo tše tša bohlokwa kudu moo re ka rapelelago dinyakwa tša rena. Ge re etiša Jehofa le thato ya gagwe pele dithapelong tša rena, re bontšha seo se lego bohlokwa kudu go rena.

13. Re swanetše go rapela nako e kaaka’ng?

13 Re swanetše go rapela nako e kaaka’ng? Beibele ga e re botše. Dithapelo tša rena e ka ba tše kopana goba tše telele, go ithekgile ka maemo. Ka mohlala, re ka rapela thapelo e kopana pele re eja, eupša ra rapela e telele ge re leboga  Jehofa goba re mmotša dilo tšeo di re tshwenyago. (1 Samuele 1:12, 15) Ga re nyake go rapela dithapelo tše ditelele e le feela go kgahliša batho, go etša ge ba bangwe ba ile ba dira bjalo mehleng ya Jesu. (Luka 20:46, 47) Jehofa ga a thabišwe ke dithapelo tša mohuta woo. Selo sa bohlokwa go Jehofa ke gore re rapele go tšwa pelong.

14. Re swanetše go rapela gakae, gomme se se re ruta’ng ka Jehofa?

14 Re swanetše go rapela gakae? Jehofa o re botša gore re bolele le yena ka mehla. Beibele e re re swanetše go ‘rapela re sa kgaotše,’ re ‘phegelele thapelong,’ gomme re ‘rapele ka mehla.’ (Mateo 26:41; Baroma 12:12; 1 Bathesalonika 5:17) Jehofa o dula a ikemišeditše go re theetša. Re ka mo leboga letšatši le letšatši ka ge a re bontšha lerato le go re fa dilo tšeo re di hlokago. Le gona re ka mo kgopela gore a re nee tlhahlo, matla le khomotšo. Ge e ba re tloga re tšeela  godimo tokelo yeo re nago le yona ya go rapela Jehofa, re tla diriša sebaka se sengwe le se sengwe go bolela le yena.

15. Ke ka baka la’ng re swanetše gore re re “amene” mafelelong a thapelo?

15 Ke ka baka la’ng re swanetše gore “amene” mafelelong a thapelo? Lentšu “amene” le bolela gore “go bjalo” goba “a go be bjalo.” Ke tsela ya go bontšha gore re tiišetša seo re se boletšego thapelong, ke gore, se tšwa pelong. (Psalme 41:13) Le gona Beibele e re ruta gore ke mo gobotse gore re re “amene” mafelelong a thapelo e rapelwago phatlalatša go bontšha gore re dumelelana le seo se bego se bolelwa. Re ka dira seo ka setu goba ka go hlaboša.1 Dikoronika 16:36; 1 Bakorinthe 14:16.

KAMOO MODIMO A ARABAGO DITHAPELO TŠA RENA

16. Na ruri Jehofa o araba dithapelo tša rena? Hlalosa.

16 Na ruri Jehofa o araba dithapelo tša rena? Ee, o a di araba. Beibele e mmitša “Mokwi wa thapelo.” (Psalme 65:2) Jehofa o kwa le go araba dithapelo tšeo di tšwago dipelong tša batho ba dimilione, gomme o dira bjalo ka ditsela tše dintši tše difapafapanego.

17. Jehofa o diriša bjang barongwa le bahlanka ba gagwe ba mo lefaseng go araba dithapelo tša rena?

17 Jehofa o araba dithapelo tša rena a diriša barongwa le bahlanka ba gagwe ba mo lefaseng. (Baheberu 1:13, 14) Go na le mehlala e mentši ya batho bao ba ilego ba rapela Jehofa gore a ba thuše go kwešiša Beibele, gomme ka moragonyana ga moo, ba ile ba etelwa ke Dihlatse tša Jehofa. Beibele e bontšha gore barongwa ba tšea karolo modirong wa go bolela “ditaba tše dibotse” lefaseng ka moka. (Bala Kutollo 14:6.) Le gona, ba bantši ba rena re ile ra rapela Jehofa ka bothata bjo itšego goba senyakwa se itšego gomme ka morago ra hwetša thušo yeo re e hlokago go ngwanabo  rena wa Mokriste goba kgaetšedi.Diema 12:25; Jakobo 2:16.

Jehofa a ka araba dithapelo tša rena a diriša Bakriste ba bangwe go re thuša

18. Jehofa o diriša bjang moya wa gagwe o mokgethwa le Beibele go araba dithapelo tša rena?

18 Jehofa o diriša moya wa gagwe o mokgethwa go araba dithapelo tša rena. Ge re mo rapela gore a re thuše go lebeletšana le bothata bjo itšego, a ka diriša moya wa gagwe o mokgethwa go re hlahla le go re nea matla. (2 Bakorinthe 4:7) Le gona Jehofa o diriša Beibele go araba dithapelo tša rena le go re thuša go dira diphetho tše bohlale. Ge re bala Beibele, re ka hwetša mangwalo ao a tla re thušago. E bile Jehofa a ka diriša motho yo a itšego yo a arabago sebokeng gore a arabe thapelo ya gago goba a diriša mogolo ka phuthegong go bolela ntlha e itšego yeo e tšwago ka Beibeleng.Bagalatia 6:1.

19. Ke ka baka la’ng go ka bonagala eka Jehofa ga a arabe dithapelo tša rena?

19 Lega go le bjalo, ka dinako tše dingwe re ka ipotšiša gore: ‘Ke ka baka la’ng Jehofa a se a tšwa a araba dithapelo tša ka?’ Gopola gore o a tseba gore o tla di araba neng le gona bjang. O tseba seo re se hlokago. Re ka swanelwa ke go rapela ka lebakanyana go bontšha gore re tloga re tiišitše ka seo re se botšago Modimo le go bontšha gore re tloga re na le tumelo go yena. (Luka 11:5-10) Ka dinako tše dingwe Jehofa o araba dithapelo tša rena ka tsela yeo re sego ra e letela. Ka mohlala, re ka rapela ka boemo bjo itšego bjo boima, eupša go e na le gore a tloše bothata bjoo, a ka re nea matla a gore re bo kgotlelele.Bala Bafilipi 4:13.

20. Ke ka baka la’ng re swanetše go rapela Jehofa ka mehla?

20 Ruri re na le tokelo e kgolo kudu ya go rapela Jehofa! Re ka kgodišega gore o tla theetša dithapelo tša rena. (Psalme 145:18) Le gona ge re dutše re rapela Jehofa ka mehla go tšwa pelong, ke moo re tlago go ba le segwera se se tiilego le yena.

Ithute ka mo go oketšegilego

Na go na le Taba Gore re Rapela Kae, Gona Neng?

Ithute ge e ba Beibele e lekanyetša dithapelo tša rena mafelong a itšego goba dinakong tše itšego.