Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele e re Ruta Eng?

 KGAOLO YA LESOMEHLANO

Tsela Yeo Modimo a e Amogelago ya go mo Hlankela

Tsela Yeo Modimo a e Amogelago ya go mo Hlankela

1. Ke mang a swanetšego go re botša tsela yeo e amogelegago ya go hlankela Modimo?

DIKEREKE tše dintši di ipolela gore di ruta batho therešo ka Modimo. Eupša ga di dire seo, ka gobane di ruta batho dilo tše di fošagetšego ka Modimo le kamoo re swanetšego go mo hlankela ka gona. Re ka tseba bjang tsela yeo Modimo a e amogelago ya go mo hlankela? Jehofa ke yena feela yo a ka re botšago kamoo re swanetšego go mo hlankela ka gona.

2. O ka tseba bjang tsela yeo Modimo a e amogelago ya go mo hlankela?

2 Jehofa o re neile Beibele gore re kgone go ithuta tsela yeo a e amogelago ya go mo hlankela. Ka gona ithute Beibele, gomme Jehofa o tla go thuša gore o holwe ke dithuto tša gagwe ka gobane o go rata kudu.Jesaya 48:17.

3. Modimo o nyaka gore re dire’ng?

3 Batho ba bangwe ba re Modimo o amogela madumedi ka moka, eupša se ga se seo Jesu a re rutilego sona. O itše: “Ga se yo mongwe le yo mongwe yo a rego go nna: ‘Morena, Morena,’ a tlago go tsena Mmušong wa magodimo, eupša go tla tsena yo a dirago thato ya Tate.” Ka gona go bohlokwa gore re ithute gore thato ya Modimo ke eng ke moka re e dire. Ye ke taba ya bohlokwahlokwa ka gobane Jesu o bapeditše batho bao ba sa kwego Modimo le dikebekwa, batho “ba go hloka molao.”Mateo 7:21-23.

4. Jesu o boletše’ng ka bao ba nyakago go dira thato ya Modimo?

4 Jesu o re lemošitše gore ge re nyaka go dira thato ya Modimo, re tlo lebeletšana le mathata. O itše: “Tsenang ka kgoro e tshesane gobane tsela e išago tshenyegong e petleke  e bile e phatlaletše gomme bao ba tsenago ka yona ke ba bantši; anthe kgoro e išago bophelong ke e tshesane gomme tsela ya yona e pitlagane, le gona ke ba sego kae ba ba e hwetšago.” (Mateo 7:13, 14) Tsela e pitlaganego, goba tsela yeo Modimo a e amogelago ya go mo hlankela, e lebiša bophelong bjo bo sa felego. Tsela e petleke, goba tsela e fošagetšego ya go hlankela Modimo, e lebiša lehung. Eupša Jehofa ga a nyake gore batho ba hwe. O nea yo mongwe le yo mongwe sebaka sa go ithuta ka yena.2 Petro 3:9.

TSELA YEO MODIMO A E AMOGELAGO YA GO MO HLANKELA

5. O ka tseba bjang batho bao ba hlankelago Modimo ka tsela yeo a e amogelago?

5 Jesu o itše re ka kgona go tseba batho bao ba hlankelago Modimo ka tsela yeo a e amogelago. Re ka dira seo ka go ithuta ka ditumelo tša bona le seo ba se dirago. O itše: “Le tla ba tseba ka dienywa tša bona.” Ke moka a oketša ka gore: “Sehlare se sengwe le se sengwe se sebotse se enywa dienywa tše dibotse.” (Mateo 7:16, 17) Se ga se bolele gore bahlanka ba Modimo ba phethagetše. Eupša ka mehla ba leka go dira dilo tše dibotse. Gona bjale re tlo ithuta ka dilo tšeo di tlago go re thuša go tseba batho bao ba hlankelago Modimo ka tsela yeo a e amogelago.

6, 7. Ke ka baka la’ng bodumedi bja therešo bo thea dithuto tša bjona Beibeleng? Mohlala wa Jesu o re ruta’ng?

6 Borapedi bja rena bo swanetše go thewa Beibeleng. Beibele e re: “Lengwalo ka moka le buduletšwe ke Modimo gomme le hola ka go ruta, go kgala, go phošolla le go laya ka toko, gore motho wa Modimo a swanelege ka botlalo, a hlangwe ka mo go feletšego bakeng sa modiro o mongwe le o mongwe o mobotse.” (2 Timotheo 3:16, 17) Moapostola Paulo o ngwaletše Bakriste gore: ‘Ge le be le amogela lentšu la Modimo leo le le kwelego go tšwa go rena, le ile  la le amogela, e sego e le lentšu la batho, eupša kamoo ruri le lego ka gona, e le lentšu la Modimo.’ (1 Bathesalonika 2:13) Bodumedi bja therešo bo ruta feela seo se tšwago ka Lentšung la Modimo, e lego Beibele. Ga bo rute dikgopolo tša batho, setšo goba selo le ge e le sefe.

7 Selo se sengwe le se sengwe seo Jesu a bego a se ruta se be se etšwa ka Lentšung la Modimo. (Bala Johane 17:17.) O be a tsopola Mangwalo gantši. (Mateo 4:4, 7, 10) Bahlanka ba therešo ba Modimo ba latela mohlala wa Jesu gomme selo se sengwe le se sengwe seo ba se rutago se tšwa ka Beibeleng.

8. Jesu o re rutile’ng ka go hlankela Jehofa?

8 Re swanetše go hlankela Jehofa a nnoši. Psalme 83:18 e re: “Wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.” Jesu o be a nyaka gore batho ba tsebe gore Modimo wa therešo ke mang, e bile o ile a ba ruta leina la Modimo. (Bala Johane 17:6.) Jesu o itše: “Ke Jehofa Modimo wa gago yo o swanetšego go mo rapela, e bile ke yena a nnoši yo o swanetšego go mo direla tirelo e kgethwa.” (Mateo 4:10) Ka gona, ka ge re le bahlanka ba Modimo, re ekiša mohlala wa Jesu. Re hlankela Jehofa a nnoši, re diriša leina la gagwe, e bile re ruta ba bangwe leina la Modimo le seo a tlago go re direla sona.

9, 10. Re bontšha bjang gore re a ratana?

9 Re swanetše go rata batho ba bangwe go tšwa pelong. Jesu o rutile barutiwa ba gagwe gore ba ratane. (Bala Johane 13:35.) Re dira seo go sa šetšwe gore re dula kae, re ba morafo ofe, re bahumi goba badiidi. Go ratana ga rena go swanetše go re kopanya bjalo ka bana ba motho. (Bakolose 3:14) Ka gona ga re ye dintweng le go bolaya batho ba bangwe. Beibele e re: “Bana ba Modimo le bana ba Diabolo ba bonagala ka taba ye: Yo mongwe le yo mongwe yo a  sa tlwaelego go dira go loka ga a tšwe go Modimo gomme go bjalo le ka yo a sa ratego ngwanabo.” E oketša ka gore: “Re swanetše go ratana; e sego go swana le Kaine yo a tšwilego go yo kgopo gomme a bolaya ngwanabo.”1 Johane 3:10-12; 4:20, 21.

10 Re diriša nako ya rena, matla le dilo tša rena go thušana le go kgothatšana. (Baheberu 10:24, 25) Re ‘direla bohle botse.’Bagalatia 6:10.

11. Ke ka baka la’ng re dumela gore re tla phološwa feela ka Jesu?

11 Re swanetše go kwa Jesu Kriste ka gobane re tla phološwa feela ka yena. Beibele e re: “Ga go phološo go motho le ge e le ofe yo mongwe, gobane ga go leina le lengwe ka tlase ga legodimo leo le neilwego batho leo ka lona re tlago go phološwa.” (Ditiro 4:12) Go Kgaolo 5 ya puku ye, re ithutile gore Jehofa o ile a romela Jesu mo lefaseng gore a tle a hwele batho bao ba kwago e le sehlabelo sa topollo. (Mateo 20:28) Jehofa o kgethile Jesu gore a tle a buše lefase ka moka. Ke ka baka leo Beibele e rego re swanetše go kwa Jesu ge e ba re nyaka go tlo phela ka mo go sa felego.Bala Johane 3:36.

12. Ke ka baka la’ng re sa tšee karolo dipolotiking?

12 Ga se ra swanela go tsenela dipolotiki. Jesu ga se a ka a tsenela dipolotiki. Ge a be a sekišwa, o ile a botša Mmuši wa Roma e lego Pilato gore: “Mmušo wa ka ga se karolo ya lefase le.” (Bala Johane 18:36.) Go swana le Jesu, re thekga feela Mmušo wa Modimo wa legodimong. Ka baka leo, go sa šetšwe gore re dula kae, ga re tšee karolo dipolotiking. Lega go le bjalo, Beibele e re laela gore re kwe “balaodi ba bagolo,” ke gore, mebušo. (Baroma 13:1) Re kwa melao ya dinageng tšeo re dulago go tšona. Eupša ge molao wa naga o thulana le melao ya Modimo, re ekiša baapostola, bao ba itšego: “Modimo ke mmuši yo re swanetšego go mo kwa go e na le go kwa batho.”Ditiro 5:29; Mareka 12:17.

13. Ke’ng seo re se botšago batho ka Mmušo wa Modimo?

 13 Re dumela gore Mmušo wa Modimo ke wona feela o tlago go rarolla mathata a batho. Jesu o itše ‘ditaba tše dibotse tša Mmušo wa Modimo’ di tla bolelwa lefaseng ka moka. (Bala Mateo 24:14.) Ga go na mmušo le o tee wa batho woo o ka dirago seo Mmušo wa Modimo o tlago go re direla sona. (Psalme 146:3) Jesu o re rutile gore re rapelele Mmušo wa Modimo ge a be a re: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:10) Beibele e re botša gore Mmušo wa Modimo o tlo fediša mebušo ka moka ya batho le gore “wona o tla ema go iša mehleng ya neng le neng.”Daniele 2:44.

14. Ke bomang bao o bonago ba hlankela Modimo ka tsela yeo a e amogelago?

14 Ka morago ga go ithuta dilo tše, ipotšiše gore: ‘Ke bomang ba theago dithuto tša bona Beibeleng? Ke bomang ba rutago ba bangwe ka leina la Modimo? Ke bomang ba ratanago ka go tšwa pelong le go dumela gore Modimo o rometše Jesu mo lefaseng go tlo re phološa? Ke bomang bao ba sa tšeego karolo dipolotiking? Ke bomang ba rutago batho gore Mmušo wa Modimo ke wona o nnoši o tlago go rarolla mathata a rena?’ Ke Dihlatse tša Jehofa feela.Jesaya 43:10-12.

O TLA DIRA ENG?

15. Re swanetše go dira’ng ge e ba re nyaka gore Modimo a amogele tsela yeo re mo hlankelago ka yona?

15 Go ba le tumelo go Modimo ga se gwa lekana, ka gobane gaešita le batemona ba a dumela gore Modimo o gona, eupša ga ba mo kwe. (Jakobo 2:19) Ge e ba re nyaka gore Modimo a amogele tsela yeo re mo hlankelago ka yona, re swanetše go dumela gore o gona le go dira seo a se bolelago.

16. Ke ka baka la’ng re swanetše go tšwa bodumeding bja maaka?

 16 Ge re nyaka gore Modimo a amogele tsela yeo re mo hlankelago ka yona, re swanetše go tšwa bodumeding bja maaka. Moporofeta Jesaya o ngwadile gore: “Tšwang go [bjona], ipolokeng le hlwekile.” (Jesaya 52:11; 2 Bakorinthe 6:17) Ke ka baka leo re swanetšego go phema selo le ge e le sefe seo se sepedišanago le bodumedi bja maaka.

17, 18. “Babilona o Mogolo” ke’ng, gona ke ka baka la’ng o swanetše go tšwa go yona kapelapela?

17 Bodumedi bja maaka ke’ng? Ke kereke e nngwe le e nngwe yeo e rutago batho go hlankela Modimo ka tsela yeo e sa dumelelanego le Lentšu la gagwe. Beibele e bitša dikereke ka moka gore ke “Babilona o Mogolo.” (Kutollo 17:5) Ka baka la’ng? Ka morago ga Meetsefula a mehleng ya Noa, motseng o mongwe wo o bitšwago Babilona go ile gwa thoma dithuto tše dintši tša maaka tšeo di rutwago dikerekeng. Dithuto tšeo di ile tša phatlalala lefaseng ka moka. Ka mohlala, batho ba moo Babilona ba be ba rapela dihlopha tša medimo e meraro. Le lehono, dikereke tše dintši di ruta gore Modimo ke Borarobotee, mola Beibele e bolela ka mo go kwagalago gore Modimo wa therešo ke o tee, e lego Jehofa, le gore Jesu ke Morwa wa gagwe. (Johane 17:3) Le gona batho ba kua Babilona ba be ba dumela gore selo se itšego mo mothong se tšwela pele se phela ka morago ga ge a hwile le gore sona selo seo se ka tlaišega diheleng. Ao ke maaka a matala.—Bala Ditlhaloso 14, 17 le 18.

18 Modimo o boletše e sa le pele gore kgauswinyane o tlo fediša madumedi ka moka a maaka. (Kutollo 18:8) Bjale o a bona gore ke ka baka la’ng go le bohlokwa gore o tšwe bodumeding bja maaka kapelapela? Jehofa Modimo o nyaka gore o tšwe moo pele nako e go šia.Kutollo 18:4.

Ge o hlankela Jehofa le batho ba gagwe, o tla ba karolo ya lapa la lefase ka moka

19. Ge o dira phetho ya go hlankela Jehofa, yena o tla go hlokomela bjang?

19 Ge o dirile phetho ya go tšwa bodumeding bja maaka  gore o hlankele Jehofa, ba bangwe ba bagwera ba gago le ba lapa ba ka no se kwane le phetho ya gago gomme ba ka go tlaiša. Eupša Jehofa a ka se go lahle. O tla ba karolo ya lapa la lefase ka moka la batho ba dimilione bao ba ratanago go tšwa pelong, e bile o tla ba le kholofelo ya go tlo phela ka mo go sa felego lefaseng le lefsa la Modimo. (Mareka 10:28-30) Mohlomongwe ge nako e dutše e eya, ba bangwe ba bagwera ba gago goba ba lapa bao ba go ganetšago o hlankela Jehofa, ba ka tla ba fetoga gomme ba ithuta Beibele.

20. Ke ka baka la’ng go le bohlokwa gore re hlankele Modimo ka tsela yeo a e amogelago?

20 Kgauswinyane, Modimo o tlo fediša dilo ka moka tše mpe gomme Mmušo wa gagwe wa buša lefase ka moka. (2 Petro 3:9, 13) Ruri yeo e tla ba nako e thabišago! Batho ka moka ba tla be ba hlankela Jehofa ka tsela yeo a e nyakago. Ka gona go bohlokwa gore o dire diphetogo gona bjale gomme o hlankele Modimo ka tsela yeo a e amogelago.

Ithute ka mo go oketšegilego

Ke ka Baka la Eng re Bitšwa Dihlatse tša Jehofa?

Ela hloko mabaka a mararo a gore re amogele leina le le lefsa.

Na Dihlatse tša Jehofa di Gapeletša Batho go Tlogela Madumedi a Bona?

Na Dihlatse di tlogediša batho madumedi a bona ge ba bolela le bona ka Beibele?